Yesu avə wer njə Samariya
4
1-3 Farisiy zlimta Yesu ɗaw kə juroɓen baptisma a hidigi, za ɗaw kə jan wəriy gawliy day kə Yuhana mə juroɓ baptisma. Mindiwin tik wər, Yesu atalan tik acin taa juroɓ baptisma a hidiy kwən, wəriy gawliy ngetik acin mə njə kə juroɓenta. Yesu maa zlim atəgo za, sin sliɗtik aa mə hayək Yahudiya za, jəɓtik am hayək Galili. 4 Asəna acin, sin kəv abəgo, say sin kə ton aa mə hayək Samariya za. 5 Za Yesu hos a liɓde ta luwta Sikar təm hayək Samariya. Sikar səna mbeh a tuz Yakubu mə vəlen a kərti tik Yusufu amicekª. 6 Wilyəm awan am tuz səna, Yakubu acin mə lətik. Yesu mə dangara wayza lay va, hos a jagwar wilyəm, za sin ɗew kaɗ am mətik. Mandal səna av kə ɗiy dab dab pic. 7 Wer məpərmay njə samariya yah kə ɗa yəm. Za Yesu luwenni: ‹‹Aw a vəlak yəm kə sa may!›› 8 Mandal səna wəriy gawliy ngetik taa viy aliɓde Sikar tafnan kə səkəmiy təkən ngə zəm. 9 Wer njə Samariya səna luwen a Yesu: ‹‹Kata, kat wer njə Samariya, za hoh, hoh njə Yahudiya. Za hoh kə neh yəm ngə sa angər ɗa nhi aceki?›› Wer səna a luwen atəgo, kadaban Yahudiy aa lapiy avə Samariy ɗahkwən. 10 Yesu zlawenni, ɗiya luw: ‹‹Mana hoh sən təkən Bayzlav tu kə vəlen a hidiy ɗaha, za mana hoh sən gawal mə luwoh: ‹A vəlak yəm kə sa may› nhi ɗaha, mbək hoh acin ngə neh yəm angər tik ɗər, za sin av kə vəloh yəm ngə vəl micin.›› 11 Wer səna luwenni: ‹‹Mordoy na, təkən ngə ɗa yəm ɗah angər koh kwən, za wilyəm nhi kpəm. Ya hov kə jan yəm ngə vəl micin səna aki? 12 Hoh, hoh ɓən wər, hoh day didi ngiykwan Yakubu vu? Sin acin mə geɗ yikwan wilyəm nhi. Sin talan tik, wəriy tik ɓəw huviy tik mə siy yəm am wilyəm nhi za.›› 13 Yesu zlawenni, ɗiya luw: ‹‹Ko hid ngayi tu sa yəm təm wilyəm nhi, yəm avə kə wəzlen baha. 14 Amma hid mə sa yəm kat tu kə vəlenni, yəm a wəzlen ɗaba ko apu. Yəm kat tu kə vəlen səna, av kə mbaɗ a liɓ tik wa lay yəm maa njeɓ njeɓ njeɓ ngə vəlen micin mətak way ko apu.›› 15 Wer tafnan ɗiya luwenni: ‹‹Aw mordoy, a vəlak yəm hoh mə luw səna. Asəna acin, yəm a wəzlak ɗaba, za kat tə jəɓah kə ɗa yəm awənhi ɗaba.›› 16 Yesu luwenni: ‹‹A va ɗefenma a zoloh, hin kə yah awənhi.›› 17 Wer səna zlawenni, ɗiya luw: ‹‹Zalɗa ɗahkwən.›› Yesu luwenni baha: ‹‹Hoh luw tiɗtiɗe. Lay hoh mə luw zoloh ɗahkwən nhi, 18 hoh luw atəgo mindiwin, kadaban hoh dəm mawəliy par par joɓən. Za gawal hin mə ɗew tanjənhi, sin zoloh kwən.››19 Wer səna ɗiya luwenni: ‹‹Mordoy, tanjinhi kat mə sən za, hoh mokotuf ngə Bayzlav! 20 Didiy ngiykwan Samariyiy tu səbaniy Bayzlav atalan wərum nhi. Amma hin Yahudigi, mə njə kə luw, lay ngə səban Bayzlav say a liɓde Ursalima a gendik.›› 21 Yesu ɗiya luwenni baha: ‹‹Werti, a yək zləgam kat tu kə luwoh nhi. Pic tik a hosohoh, mandal səna hidiy a səbaniy Vay ngiykwan Bayzlav atalan wərum nhi a gendik ɗaba, za a səbanta a liɓde Ursalima a gendik dap kwən. 22 Hin Samariyigi, hin maa səban Bayzlav, amma hin maa sən ɗahkwən. Yikwan Yahudiy wər, yikwan maa səban Bayzlav yikwan mə sən tik, kadaban Bayzlav a wel hid məv kə mbəl hidiy cike a dab Yahudigi. 23 Amma pic məpərmay av kə hosohoh, tanjinhi mə hosoh za. Am mandal səna, hidiy malaw mə səbaniy Vay ngiykwan Bayzlav, av kə səbanta a mən ngə Mbiɗ ngetik, avə nəv takan, kadaban Vay ngiykwan səna a gər hidiy kə səbanta atəgo. 24 Bayzlav wər sin Mbiɗ, kadaban səna acin, hidiy mə səbanta kə səbanta av mən ngə Mbiɗ ngetik, za kə səbanta avə nəv takan.›› 25 Wer səna ɗiya luwenni: ‹‹Kat mə sən za, Kristu av kə yah. Kristu səna mana kə luw kaɗ, hid Bayzlav mə pəzen ɗawa kə mbaɗ kə bay. Mandal sin tu yah, av kə ceɗ yikwan təkəniy cike, mgban mgban.›› 26 Yesu zlawenni, ɗiya luw: ‹‹Kat taa zləgamoh nhi acin Kristu səna.››
27 Mandal Yesu wəlen aa zləgamiy avə wer səna, wəriy gawliy ngetik aa jəɓiy aa liɓde za. Maa limiy Yesu aa zləgamiy avə wer səna za, tu pəraslenta talan. Amma ko kə luwenta: ‹‹Hoh gər təngər wer nhi mi?›› Asənkwən ‹‹Mə zləgam atalan mi?›› A luwenta ɓahbəgwən.
28 Wer səna a siwli tik geɗ kaɗ am lay səna, sliɗ jəɓ kəv a liɓde. Maa hos za, ɗiya luwen a hidigi: 29 ‹‹Mə yah saf hid məpərmay mə ceɗek təkəniy kat mə ɗiyu cike wayza. Kwəl kə ɗiy sin acin Kristu!›› 30 Hidiy tə liɓde səna maa zlimta atəgo za, sliɗiy viy angər Yesu.
31 Adəwən wer səna maa jəɓ kəv liɓde za, wəriy gawliy ɗiya tariy Yesu, luwenta: ‹‹Ambu, a zəm təkən səka Mordoy!›› 32 Amma Yesu zlawenta, ɗiya luw: ‹‹Kat awana təkən ngə zəm maa hin maa sən ɗahkwən.›› 33 Wəriy gawliy ngetik nehiy talan tan, ɗiya luwta: ‹‹Hid məpərmay mə dehen təkən ngə zəm za ɗaha vu?›› 34 Yesu ɗiya luwenta: ‹‹Bayzlav a zlənak am talan mahayək kə ɗiy təkən sin mə mayu, ɓəw kə way kəzəɗ ngetik sin mə vəlakku. Nhi acin zəm ngaɗa. 35 Hin atalan kin, mə njə kə luw: ‹A fəs tər foɗ kə ɓasah təkəniy ngə zəm kə yah ade.› Amma kata, kata luwehin, mə cəhəriya, mə saf tuz law law. Təkəniy ngə zəm tu nigi, za tu hosiy gəga ngə ɓasah kə yah ade. 36 Tanjinhi Bayzlav aa vəlen gədmazlən a hid mə ɓasah təkəniy ngə zəm kə yah ade. Təkəniy sin mə ɓas səna, wa hidiy sin mə ɗefentəma Bayzlav kə vəlenta micin mətak way. Asəna acin, hid mə zləg təkəniy ngə zəm, ɓəw hid mə ɓasahta kə yah ade av kə zəzayiy witikwitik. 37 Ma mə ngaɓngaɓ məpərmay a luw: ‹Hid məpərmay kə zləga, za hid məpərmay kə ɓasah təkəniy ngə zəm kə yah ade.› Ma mə ngaɓngaɓ səna mindiwin. 38 Kata, kat tu zlənehin kə ɓasah təkəniy ngə zəm am tuz maa hin mə ɗiy kəzəɗ akimin ɓahbəgwən. Hidiy məpərmay acin mə biziy tuz səna. Za hin acin mə zlim ndərum ngə kəzəɗ taniy mə ɗiyta səna.››
39 Hidiy Samariy dolom tə liɓde səna vəliy nəv ngatan a Yesu, lay taniy mə zlimiy zləgam wer səna mə zləgamenta atalan Yesu. Sin a luwenta: ‹‹Gawal səna tu ceɗek təkəniy kat mə ɗiy cike wayza.›› 40 Asəna acin, hidiy Samariya səna maa hosiy angər Yesu za, tar tarta sin kə ɗew avə tanigi. Taniy luwenta: ‹‹Aw Mordoy, a ɗew am hayək ngiykwan.›› Yesu ɗew abəgo wan saray. 41 Za Yesu a talan tik ceɗ zləgam ngetik a Samariy səna. Taniy maa zlimiy zləgam səna za, hidiy dolom bah vəliy nəv ngatan a sin. 42 Hidiy səna luwenta a wer tafnan: ‹‹Tanjinhi yikwan mə vəl nəv ngiykwan za a gawal nhi, kadaban yikwan avə talan ngiykwan yikwan mə zlim zləgam mə pətah taa kəma tik za. Yikwan mə vəlen nəv səna makavay ləbar hoh mə ceɗ yikwan dap kwən. Za yikwan mə sən za, mindiwin sin acin hid məv kə mbəl hidiy təm talan mahayək cike wayza.››
Yesu mbəl kər ngə hid mordoy mə ɗiy kəzəɗ ngə Bay
43 Yesu maa wan wan saray am hayək Samariya za, sin sliɗtik aabəgo za, vətik am hayək Galili. 44 Sin a luw zaba mandal sənan: ‹‹Hidiy təm hayək ngə mokotuf ngə Bayzlav aa vəlenta mordoy a mokotuf səna am hayək tik ɗahkwən. 45 Amma Yesu maa hos am hayək Galili za, hidiy təbəgo yəkta ngər səsaray. A yəkta ngər səsaray səna, makavay taniy mə limiy təkən maa tuwah sin mə ɗiy tə liɓde Ursalima mandal sin məv kə ɗiya məmbəlwa ngə Paska, kadaban taniy təm mə njiy za am mənbəlwa səna.
46 Adəwən səna, Yesu jəɓtik a liɓde Kana təm hayək Galili. A liɓde sin mə mbaɗ yəm kə movu. Hid mordoy məpərmay mə njə kə ɗiy kəzəɗ ngə bay ɗaha, kərti tik kərtawəl a dal a liɓde Kaparnahum təm hayək Galili. 47 Hid mordoy səna zlim Yesu mə yah tik aa mə hayək Yahudiya za, awan am hayək Galili. Za acin, sin sliɗ va angər tik. Ɗiya tar tik kə viy a Kaparnahum, sin kə mbəl kərti tik kaɗ. Kərti tik səna mbeh kə məc. 48 Yesu luwenni: ‹‹Mana hin mə lim təkən maa tuwah ɓəw təkən mə wələk bərngəzl kat ta njə kə ɗiy tik bəgwən wər, hin mə vəlak nəv kin ɓahkwən!›› 49 Hid mordoy səna luwenni: ‹‹Ambu Mordoy, nəmkwan. Asənkwən kərti ɗa səna av kə məc!›› 50 Yesu luwenni: ‹‹A sliɗ, av koh ade, kərti koh tu mbəl.›› Gawal səna yək zləgam ngə Yesu, za sliɗ vətik a de. 51 Mandal sin wəlen aa va a mozlokotuf, gbomiy avə hidiy mə ɗiyiy kəzəɗ tə de ngetik. Taniy luwenta: ‹‹Kərti koh tu mbəl.›› 52 Sin nehta, ɗiya luw: ‹‹Sin a jan zoy am mandal ceki?›› Taniy zlawenta, ɗiya luwta: ‹‹Sin a jan zoy kəsəm ngetik avənan gəga am pic mə ngə wəla.›› 53 Bahbay ngə kər səna slek talan am mandal Yesu mə luwenni: ‹‹Kərti koh tu mbəl.›› Kərti tik a jan zoy kəsəm kpekpe am mandal səna. Sin avə hidiy tə de ngetik cike wayza vəliy nəv ngatan a Yesu acin.
54 Nhi acin təkən maa tuwa mə saray tik, Yesu mə ɗiy a Galili aa dəwən sin maa yah tik aa mə hayək Yahudiya za.