Yesu avə Nikodemus
3
Hid məpərmay ɗaha a dab Farisigi, sin mordoy a dab mogroy ngə Yahudigi, zlim tik Nikodemus. 2 Sin va angər Yesu avə vuɗu. Maa hos za, ɗiya luwenni: ‹‹Mordoy, yikwan mə sən za, Bayzlav acin mə zlənoh kə ɗiyen jəgwan a hidigi. Kadaban təkən maa tuwa hoh taa ɗiy nhi, mana Bayzlav ɗaha avə hid səna kwən wər, a ɗiy təkən hoh taa ɗiy nhi kwən.›› 3 Yesu zlawenni, ɗiya luw: ‹‹Mindiwin, kata ceɗeh, mana a mbuwiy hid jəɓ mə saray tik bəgwən, a pət am bay ngə Bayzlav kwən.›› 4 Nikodemus ɗiya neh tik, ɗiya luw: ‹‹Mordoy na, mana hid mə ɗəmbusur wayza, kə mbuwta mə saray tik bah wər aceki? Sin kə jəɓ aliɓ mahmay tik, za mahmay tik kə mbuwa tik bah vu ?›› 5 Yesu zlawenni, ɗiya luw: ‹‹Mindiwin kata ceɗeh, mana a mbuwiy hid avə yəm ɓəw avə Mbiɗ ngə Bayzlav bəgwən, sin a pət am bay ngə Bayzlav kwənª. 6 Hid maa hidiy acin mə mbuwta, sin acin hid memblen. Za hid maa Mbiɗ ngə Bayzlav acin mə mbuw tik, Mbiɗ ngə Bayzlav awan am nəv tik. 7 Kat mə luwoh: ‹Kə mbuwiy hin mə saray tik› səna, mə gər kə prasl talan koh kwən. 8 Mbiɗ ɗaw kə ca aa kav lay sin mə mayu, za hidiy aa zlimiy ləv tik. Amma, lay sin mə gara taa bəgo za, ɓəw lay sin taa va, hidiy aa sənta ɗahkwən. Pərak pərak a hid Mbiɗ ngə Bayzlav acin mə mbuw tik.››9 Nikodemus ɗiya luwenni baha: ‹‹Təkən səna av kə ɗiy aceki?›› 10 Yesu zlawenni, ɗiya luw: ‹‹Hoh hid mə njə kə jəgwanen təkəniy a Israyiligi, za hoh sən təkən səna ɗahkwən? 11 Mindiwin kata ceɗeh, ngiykwan, yikwan mə zləgam a talan təkən yikwan mə sənu. Za yikwan mə ceɗ təkən yikwan mə limu avə həriya ngiykwan. Amma ko asəna, hin maa yək zləgam ngiykwan ɗahkwən. 12 Kat zləgamehin atalan təkən təm talan mahayək, za hin mə yək bəgwən. Mana kat tu zləgamehin atalan təkən tə dibizlav, hin mə yəkak kwən. 13 Kat tə luw anhi, kadaban hid mə hos a dibizlav ɗahkwən, say hid mə surohoh taa bəgo za, sin acin Kər Hidmemblen.
14 ‹‹Amicek Musa mə ɗew tə dab donu, sin zen wən mə ɓəslta a masa am pay. Wa səna təm hidiy av kə zeniy Kər Hidmemblen am pay atəgo. 15 Asəna acin, ko hid ngayi mə vəl nəv ngetik a sin, Bayzlav av kə vəlen micin mətak way. 16 Mindiwin, Bayzlav aa may hidiy day day, nha sin zlənah Kərti tik malay, kə jan ko hid ngayi mə vəl nəv ngetik a Kərti səna, sin a lek kwən, amma av kə jan micin mətak way. 17 Bayzlav a zləna Kərti tik am talan mahayək kə zla dalgway ngə hidiy kwən. A zlənah kə jan hidiy kə mbəliy aangər kərti tik səna za. 18 Ko hid ngayi mə vəl nəv ngetik a Kər səna, Bayzlav a zlen dalgway kwən. Amma hid mətak vəlen nəv tik, Bayzlav mə zlen dalgway wayza, makavay hid səna a vəlen nəv a kərti tik malay səna ɓahbəgwən. 19 Anhi təkən Bayzlav tu kə zla dalgway a hidiy makavay: Bayzlav zlənah zləzlaɗ am talan mahayək, amma hidiy mayiy kpizlik day kə zləzlaɗ, kadaban taniy ɗaw kə ɗiyiy təkəniy mə ngavngav. 20 Hidiy mə ɗiyiy mə ngavngav ɗaw kə zeliy zləzlaɗ, a njə kə siy tan avə zləzlaɗ, kə jan taa hidiy kə limiy kəzəɗ ngatan mə ngavngav za. 21 Amma hidiy mə ɗiyiy təkən maa tiɗtiɗe, a njə kə ɗewiy am zləzlaɗ, kə jan hidiy cike kə limiy kəzəɗ ngatan law law, za kə sənta taniy a ɗiyiy təkən Bayzlav mə mayu.››
Yesu avə Yuhana mə juroɓ baptisma
22 Adəwən səna, Yesu vətik avə wəriy gawliy ngetik am hayək Yahudiya. Tu waniy wan ndas abəgo, za Yesu ɗaw kə juroɓen baptisma a hidigi. 23 Yuhana təm aa juroɓen baptisma a hidiy a liɓde Aynon, kadaban yəm day a liɓde səna. Liɓde səna mbeh a liɓde ta njə kə luwta Salim. Hidiy ɗaw kə yiy angər tik, sin ɗaw kə juroɓenta baptisma. 24 Mandal səna, a pekiy Yuhana mə juroɓ baptisma a jik jaw gesin bəgwən.
25 Pic takan, a dab wəriy gawliy ngə Yuhana, sənaniy diwiy kə ngiway avə njə Yahudiya. A ngiwayiy atalan mə zugzugwa ngatan mə luw mana aceki hid kə mbaɗ kweɗek kweɗek. 26 Wəriy gawliy ngə Yuhana viy angər tik, za ɗiya luwenta: ‹‹Mordoy, hid hin mə ɗew avə sin aa dəwən maz Urdun, za hoh mə zləgam yikwan atalan tik səna, aa ɗiyen baptisma a hidigi təm, za hidiy cike aa viy angər tik. A ceki?›› 27 Yuhana zlawenta, ɗiya luw: ‹‹Hid kwəl kə jan ko mi kwən, say mana Bayzlav tu vəlenni. 28 Hin atalan kin, hin maa sən təkən kat mə ceɗehin wayza. Kat tə luwehin anhi: ‹Kata acin Kristu kwən. Amma kat hid Bayzlav mə zlənak mə pəlpəla kə sləsləɓen mozlokotuf.› 29 Hin mə sən za, hid mə dəm werti acin zelen ngə werti. Ngwalay ngə mawəl ɗaw kə ɗew abər tik, aa zlim zləgam ngetik, za nəv ngetik a njə kə wek avə zəzay. Kat təm nəv ngaɗa wek avə zəzay, tanjinhi nəv ngaɗ tu fet. 30 Say mordoy ngetik kəv kibik kibik za ngaɗ kə jəɓah adəwən!››
Hid mə surohoh taa dibizlav za
31 Yuhana ɗiya luw baha: ‹‹Hid mə surohoh taa dibizlav za day hidiy cike wayza. Hid mə ɗew təm talan mahayək, sin hid ngə talan mahayək. Za a njə kə zləgam a talan təkən təm talan mahayək. Amma hid mə surohoh taa dibizlav za, [day hidiy cike wayza]. 32 Sin a njə kə zləgam atalan təkən sin mə limu ɓəw sin mə zlimu. Amma hidiy aa yəkiy zləgam sin taa ceɗenta ɗahkwən. 33 Mana hid mə yək zləgam ngetik za wər, hid səna a yək tik Bayzlav a ceɗ zləgam maa mindiwin. 34 Kadaban səna acin, hid Bayzlav mə zlənaha, a njə kə ceɗ zləgamiy ngə Bayzlav, kadaban Bayzlav acin mə vəlen Mbiɗ ngetik cike wayza. 35 ‹‹Vay ngiykwan Bayzlav aa may Kərti tik, sin vəl təkəniy cike am nəv ngəra ngetik. 36 Hid mə vəl nəv ngetik a Kər səna, mə jan micin mətak way za. Hid mətak vəl nəv ngetik a Kər səna, a jan micin mətak way kwən. Bayzlav av kə ɗiyen nəv ko apu.››