Yesu mbaɗ yəm kə movu
2
Wan makaɗ aa dəwən təkəniy səna, məmbəlwa ngə lah werti ɗiy a liɓde Kana am hayək Galili. Mahmay ngə Yesu awan am məmbəlwa səna. 2 Ɗefentəma a Yesu avə wəriy gawliy ngetik təm.3 Mandal taa ɗiyiy məmbəlwa səna, movu ɗiya way. Za acin mahmay ngə Yesu luwenni: ‹‹Movuª tu way angər tan.›› 4 Yesu zlawenni, ɗiya luw: ‹‹Mahmay ɗa, mə ngəkoh a kimin ɗahkwən. Pic ngaɗa ngə ɗiy kəzəɗ a sla gesin bəgwən.›› 5 Adəwən səna, mahmay tik luwen a hidiy mə ɗiyiy kəzəɗ təm məmbəlwa səna: ‹‹Mə ɗiy təkəniy cike mana sin tu kə luwehin.››
6 Am lay məmbəlwa səna, gidiy kwəh awaniy abəgo. Yahudiy a njə kə ɗiy yəm a kimin ngə goh ngaz ɓəw ngə pan ngəra mana məzugzugwa ngatan mə luwu, kə jan kə mbaɗ hid kə ɗiy kweɗek kweɗek. Gid takan a njə kə ɓiy yəm litir blək blək. 7 Yesu luwen a hidiy mə ɗiyiy kəzəɗ təm məmbəlwa səna acin: ‹‹Mə va ɗa yəm, hin kə wek gidiy ngə gugwən nhi cike.›› Taniy viy zek zekiy yəm wek wek akimin, nha aa zek a kayək. 8 Yesu ɗiya luwenta acin: ‹‹Tanjinhi mə ɗu, mə tepen a mordoy ngə məmbəlwa.›› Taniy ɗəta, za tepenta. 9 Mordoy səna dezl a dezl, jan mə mbaɗa za kə movu. Za movu səna a yah aa zəki, sin a sən ɓahbəgwən. Amma hidiy mə ɗiyiy kəzəɗ mə ɗiy yəm səna acin mə sənta. Mordoy ngə məmbəlwa səna ɗefenma a gawal mə dəm wer səna, 10 za luwenni: ‹‹Ko hid ngayi mana tu ɗiy məmbəlwa a njə kə vəl movu maa lem a hidiy zagway, mana tu hayigi, kə vəlenta maa lef lef. Amma ngəkoh, hoh ɓah movu maalem kaɗ nha tanjinhi a ceki?››
11 Nhi acin təkən maa tuwa ngə tizin Yesu mə ɗiyu. A ɗiy a liɓde Kana am hayək Galili. Asəna acin Yesu a ɗef gədan mordoy ngetik. Za wəriy gawliy ngetik vəlenta nəv ngatan a sin.
12 Adəwən səna, Yesu sliɗiy avə mahmay tik ɓəw galmənigi avə wəriy gawliy ngetik, taniy viy a liɓde Kafarnahum. Taniy ɗewiy wan gwedek a liɓde səna.
Yesu gam hidiy mə beriy təkən am jik Bayzlav
13 Pic məmbəlwa ngə Yahudigi, ta njə kə luwta Paska mbeh kə hos. Yesu sliɗ va a liɓde Ursalima. 14 Maa hos za, pət am jik Bayzlav. Sin jan hidiy mə beriy zligi, təmakigi, ɓəw ɓaramigi a terde ngə jik səna. Za hidiy mə zlambaɗiy suloy təm mə ɗewiy kaɗ avə tabəl ngə kəzəɗ ngatan. 15 Za acin, sin ɓələm ɓələm mbiseh wa lakwatay, ɗiya gamta cike aa jik Bayzlav za, taniy avə təmakiy tan ɓəw avə zliy ngatan tik. A tabəliy ngə hidiy mə zlambaɗiy suloy, goɗ goɗ way kaɗ. Suloy ngatan cike cakwayiy, petepete. 16 Sin ɗiya luwen a hidiy mə beriy ɓaramigi: ‹‹Mə gas təkəniy kin awənhi za! Mə gər kə mbaɗ jik ngə Bahbay Bayzlav kə jik ngə ɗiy terere kwən!›› 17 Wəriy gawliy ngetik maa limta atəgo za, talan tan slek am zləgam təm deftere ngə Bayzlav taa luw: ‹‹Aw Bayzlav ɗa, may ngə jik koh tu kaw nəv ɗa, wa kat kə mbiɗ kaɗ a liɓi.ª››
18 Mogroy ngə Yahudiy maa limta atəgo za, ɗiya nehta, luwenta: ‹‹Tanjinhi təkən ma tuwah ceki hoh tu kə ɗiytik, za yikwan kə səntik Bayzlav acin mə geɗeh mozlokotuf ngə ɗiy təkəniy səna?›› 19 Yesu zlawenta, ɗiya luw: ‹‹Mə gom jik ngə Bayzlav nhi kaɗ, za təv kə ndən kaɗ am lay tik, am wan makaɗ.›› 20 Taniy zlawenta, ɗiya luwta: ‹‹A ndəniy jik nhi di ngərfoɗ avə kwəh. Za hoh luw, hov kə ndəntik am wan makaɗ ?›› 21 Yesu mə zləgam atalan jik Bayzlav səna wər, a zləgam atalan kəsəm tik gendik. 22 Yesu maa mbəlah aa mə məc za, wəriy gawliy ngetik slekiy talan am zləgam sin mə zləgamenta atəgo. Taniy yəkiy zləgam təm deftere, za yəkiy zləgamiy cike sin mə luwenta təm.
Yesu aa sən nəv ngə hidiy cike wayza
23 Mandal Yesu awan a liɓde Ursalima am məmbəlwa ngə Paska, hidiy dolom vəlenta nəv ngatan makavay sin mə ɗiy təkəniy maa tuwa taniy mə limta. 24 Amma Yesu aa wəzən atalan tan, kadaban sin aa sən nəv ngatan cike wayza. 25 Aa may hid məpərmay kə ceɗen ma atalan hid kwən, kadaban sin talan tik aa sən nəv ngə hidiy cike wayza.