Ləbar Malaw a talan Yesu Kristu
YUHANA mə ɗəɗefu
Yesu Kristu acin Zləgam ngə Bayzlav
1
Aməcek, mandal Bayzlav a ndən talan mahayək gesin bəgwən,hid məpərmay ɗaha, zlim tik Zləgam.
Zləgam səna awaniy avə Bayzlav,
za Zləgam səna acin Bayzlav.
2 Dəga mandal Bayzlav a ndən talan mahayək gesin bəgwən, zləgam səna awaniy witikwitik avə sin.
3 Bayzlav a ndən təkəniy cike
avə Zləgam səna.
Ko təkən ngemi maa Bayzlav a ndən avə sin bəgwən, ɗahkwən.
4 Sin acin mə vəl micin a hidigi.
Micin səna acin zləzlaɗ ngə hidigi.
5 Zləzlaɗ aa zləzlaɗ am kpəzlik,
zəni kpəzlik a hos gəga kə məc zləzlaɗ səna kaɗ bəgwən.
6 Bayzlav zlənah hid məpərmay, zlim ngetik Yuhana. 7 Sin a yah kə ceɗ mindiwin ngə zləzlaɗ səna a hidigi, kə jan taniy cike kə yəkiy zləzlaɗ səna. 8 Yuhana acin zləzlaɗ səna kwən, amma sin a yah kə ceɗen zləzlaɗ səna a hidigi. 9 Zləgam səna acin, zləzlaɗ maa mindiwin. Sin a yah am talan mahayək kə zləzlaɗ hidiy cike wayza.
10 Zləgam səna awan am talan mahayək, za Bayzlav a ndən talan mahayək avə sin. Amma hidiy təm talan mahayək a sənta bəgwən. 11 Sin yah angər hidiy ngetik, amma hidiy ngetik səna a yəkta bəgwən. 12 Amma hidiy məpərmay yəkta, za vəlenta nəv ngatan. A taniy wər, zləgam səna vəlenta mozlokotuf taniy kə mbaɗiy kə wəriy ngə Bayzlav. 13 Bayzlav a mbuwta mana hidiy mə njə kə mbuwiy kwən, asənkwən may ngə hid acin mə ɗiy taniy kə mbuwiy kwən. Amma Bayzlav acin mə vəlenta micin ndawyan.
14 Zləgam səna acin mbaɗ kə Hidmemblen, za sin tu ɗew a dab yikwan. Sin ɗaw kə ɗiyen malaw a hidigi, sin tu ɗef yikwan Bayzlav mindiwin. Yikwan tu lim gədan mordoy ngetik, Bahbay tik Bayzlav acin mə vəlen gədan mordoy səna. Sin a vəlen gədan mordoy ngə kərti tik malay. 15 Yuhana a zləgam atalan gawal səna. Sin ɗiya cəwəla day day, ɗiya luw: ‹‹Amicek kat tə luwehin, hid məpərmay av kə yah adəwən ɗa, sin mordoy day kata, kadaban dəga a mbuwakta bəgwən sin ɗaha. Kat mə luw atəgo səna, tə zləgam atalan tik.›› 16 Sin tu vəl yikwan təkəniy sin məmar cike. Sin ɗaw kə ɗiy yikwan malaw, ɗiy za jəɓ ɗiy baha, ɗiy za jəɓ ɗiy baha. 17 Bayzlav vəl yikwan mə jawjaw ngetik aangər Musa. Amma, sin a ɗef yikwan may ngetik avə mindiwin ngetik, aangər Yesu Kristu za. 18 Ko hid takan mə lim Bayzlav avə həriya ngetik ɗahkwən. Amma kərti tik malay mə ɗew tə jagwar tik səna, tu ceɗ yikwan mana aceki Bahbay tik mə ɗew.
Yuhana mə juroɓ baptisma a zləgam atalan Yesu
19 Pic takan, mogroy ngə Yahudiy tə liɓde Ursalima zləniy masayiy təm jik Bayzlav, ɓəw hidiy təm səban ngə Lewi angər Yuhana, taniy kə nehta, kə luwenta: ‹‹Hoh hid ngayi?›› 20 Yuhana a ɓon kə zlawenta bəgwən, ɗiya ceɗenta mgban mgban akibik hidiy cike wayza, ɗiya luw: ‹‹Kata acin Kristu kwən.›› 21 Hidiy tafnan jəɓ nehta baha, luwenta: ‹‹Hoh hid ngayi acin? Hoh acin Eliya vu?›› Yuhana zlawenta, ɗiya luw: ‹‹Awwo, kat sin kwən.›› Taniy nap nehta baha, luwenta: ‹‹Hoh acin mokotuf ngə Bayzlav vu?›› Yuhana zlewenta, ɗiya luw ‹‹Awwo.›› 22 Taniy luwenta: ‹‹Ya hoh hid ngayi acin? A ceɗ yikwan may, kə jan mandal yikwan tu jəɓ kin, yikwan kə ceɗen a hidiy mə zlən yikwan. Hoh vərək talan koh kə hid ngayi?›› 23 Yuhana zlawenta ɗiya luw: ‹‹Kat acin hidi, Esaya mokotuf ngə Bayzlav mə zləgam atalan tik, sin a luw:
‹Hid məpərmay aa cəwəla aa dab donu, a luw:
Mə zaɓ mozlokotuf səksək, a Məmar hidi.›››
24 Hidiy mə yiy kə nehiy Yuhana səna, taniy Farisigi. 25 Taniy nehta, ɗiya luwenta: ‹‹Hoh luw, hoh acin Kristu kwən, hoh acin Eliya kwən, za hoh acin mokotuf ngə Bayzlav kwən. Ya hoh njə kə ɗiy baptisma acin kemi?›› 26 Yuhana zlawenta, ɗiya luw: ‹‹Kat wər, tə ɗiyen baptisma a hidiy aliɓ yəm, amma hid məpərmay ɗaha adab kin, hin maa sən gesin ɗahkwən. 27 Sin av kə yah adəwən ɗa. Tə hos gəga kə mbaɗ kə bahlam kə pəsl mbiseh kərap ngetik bəgwən.››
28 Təkəniy səna cike a toniy a liɓde Baytaniya adəwən maza Urdun, am lay Yuhana ta njə kə juroɓen baptisma a hidigi.
Yesu acin Kərtəmak ngə Bayzlav
29 Apat tik, Yuhana lim Yesu aa yah angər tik. Sin ɗiya luw: ‹‹Anhi Kər təmak ngə Bayzlav məv kə gas mə ngavngav ngə hidiy təm talan mahayək. 30 Kat mə luwehin taməcek anhi: ‹Hid məpərmay av kə yah aa dəwən ɗa.› Amma sin mordoy day kata, kadaban dəga a mbuwakta bəgwən sin ɗaha. Kata mə luwehin səna, tə luwehin atalan gawal nhi. 31 Amicek, kata sən ɗahkwən, amma kat tə yah kə juroɓen baptisma a hidiy aliɓ yəm, kə jan kat kə ɗef sin a hidiy Israyila.››
32 Yuhana zləgam a talan Yesu baha, ɗiya luw: ‹‹Kat lim Mbiɗ ngə Bayzlav a sərohoh aa dibizlav za mana ɓaram, za ɗew atalan tik. 33 Aməcek kata sən ɗahkwən. Amma Bayzlav mə zlənak kə juroɓ baptisma aliɓ yəm a ceɗek zaba. A luwakku: ‹Hov kə lim Mbiɗ ngaɗa aa suroh aa dibizlav za kə ɗew atalan hidi. Sin acin hid məv kə ɗiyen baptisma a hidigi avə Mbiɗ ngaɗa.› 34 Kat mə lim təkən səna za avə həriya ngaɗa. Za kata ceɗehin mgban mgban acin, sin acin Kər ngə Bayzlav.››
Yesu wel tizin wəriy gawliy ngetik
35 Aapat tik, Yuhana awan am lay səna baha taniy avə wəriy gawliy ngetik saray. 36 Sin maa lim Yesu aa ton za, sin ɗiya luw: ‹‹Anhi Kər təmak ngə Bayzlav.›› 37 Wəriy gawliy ngə Yuhana maa saray səna, maa zlimta za, sliɗiy səbiy Yesu. 38 Yesu cəhəriya aa dəwən, lim hidiy səna aa səbta. Sin ɗiya nehta acin: ‹‹Mə jar mi?›› Taniy zlawenta, ɗiya luwta: ‹‹Rabi de ngəkoh a wan ki?›› Rabi səna mana kə luw kaɗ, hid mə njə kə ɗiyen jəgwan a hidigi. 39 Yesu luwenta: ‹‹Mə yaha, hin məv kə lim tik!›› Taniy viy kə safiy lay sin mə ɗew təbəgo səna. A hosiy abəgo am masa foɗ ngə səkoh, za taniy nəp nəpiy avə sin nha pic ndəv.
40 Hidiy maa saray mə zlimiy zləgam ngə Yuhana, za mə səbiy Yesu səna, hid sənan zlim tik Andire. Sin galmən ngə Simon Piyer. 41 Andire səna acin, sliɗ va angər galmən Simon zagway. Sin maa hos za, ɗiya luwenni: ‹‹Yikwan mə mgbama za avə Kristu. ‹‹Kristu›› səna mana kə luw kaɗ, hid Bayzlav mə pəzen ɗawa kə mbaɗ kə hid mordoy. 42 Andire ngazl Simon angər Yesu. Yesu cəhəriya atalan Simon, za luwenni: ‹‹Hoh acin Simon kər ngə Yuhana. Akibik nhi, av kə ɗefiyma Kefas.›› Kefas səna mana kə luw kaɗ ‹‹talagwən››.
Filip avə Nataniyel səbiy Yesu
43 Aapat tik Yesu sliɗ, a may kəv am hayək Galili. Mandal sin aa va, gbamiy avə hid məpərmay zlim tik Filip, Yesu luwenni: ‹‹A səbakku!››. 44 Filip səna liɓde ngetik takan avə ngə Andire ɓəw Piyer. Zlim ngə liɓde səna Baytisayda.
45 Aadəwən səna Filip gbamiy avə Nataniyel. Sin ɗiya luwenni: ‹‹Yikwan mə gbama za avə hid Musa mə zləgam atalan tik am deftere mə jawjaw ngetik, ɓəw mokotufiy ngə Bayzlav mə zləgamiy atalan tik təm. Sin acin Yesu kər ngə Yusufu tə liɓde Nasaratu.›› 46 Nataniyel luwenni: ‹‹Təkən malaw kwəl kə pətah aa liɓde Nasaratu za vu?›› Filip luwenni: ‹‹A yah, ma limu avə həriy koh.››
47 Nataniyel sliɗ, va angər Yesu. Yesu maa lim za, ɗiya luw: ‹‹Anhi hid təm səban ngə Israyila maa cekcek. Sin aa ɗiy polkoy ɗahkwən.›› 48 Nataniyel tafnan ɗiya nehtik, luwenni: ‹‹Hoh sənak aceki?›› Yesu zlawenni ɗiya luw: ‹‹Kat mə limeh za mandal hoh wan madaba sikwiɗ. Mandal səna, Filip a ɗefehma gesin bəgwən.›› 49 Za acin Nataniyel luwenni: ‹‹Mordoy, hoh Kər ngə Bayzlav, hoh acin bay ngə Israyiligi.›› 50 Yesu zlawenni ɗiya luw: ‹‹Hoh vəlak nəv koh, kadaban kat mə luwoh kat mə limeh za mandal hoh awan a madaba sikwiɗ nhi vu? Kata ceɗeh, hov kə lim təkəniy maa day kə nhi.›› 51 Yesu ɗiya luwen baha: ‹‹Kata ceɗehin lawlaw, hin məv kə lim dibizlav tu zlər, za mbaslayiy ngə Bayzlav aa tapiy kəv dibizlav, za aa sorohiy aabəgo za, kə yiy angər Kər hidmemblen.