Zləgam atalan məc ngə Yuhana mə njə kə juroɓ baptisma
14
Mandal səna, Hirudus acin bay məmar hayək Galili cike wayza, sin zlim ləbar atalan Yesu. 2 Sin luwen a hidiy mə ɗiyiy kəzəɗ ngetik: ‹‹Gawal nhi acin Yuhana mə njə kə juroɓ baptisma. Sin a mbəlah aa mə məc za. Makavay sin mə mbəlah taa mə məc za səna acin, sin mə jan gədan kə ɗiy təkəniy ma tuwah.››3 Hirudus a luw atəgo səna, kadaban sin acin mə zlən sojiy ngetik kəv kə kawiy Yuhana mə njə kə juroɓ baptisma, kə jawta avə selelen, za kə pekta kaɗ am jik jaw. Hirudus a ɗiy atəgo makavay sin mə ɓiy Hirudiya wer ngə galmən, zlim tik Filip. 4 Makavay səna acin, Yuhana luwenni: ‹‹Mə taktak a hoh kə ɓiy Hirudiya kə koh. 5 Hirudus aa may kə wəzl Yuhana kaɗ, amma a hovok avə hidigi, kadaban hidiy a safiy Yuhana kə mokotuf ngə Bayzlav.
6 Am mandal məmbəlwa ngə ɓən atalan mbuw ngə bay Hirudus, kər Hirudiya kərtaza ɗiya dar a kibik hidiy Hirudus mə ɗefentəma kə yiy am məmbəlwa. Dar ngə kərtaza səna tu fet nəv ngə bay. 7 Kadaban səna acin, Hirudus luwen mbeɗi a kərtaza səna, ɗiya luw: ‹‹A ceɗek təkəniy hoh mə mayu cike, kat təv kə vəloh.›› 8 Hirudiya mahmay ngə kərtaza səna luwen a kərti tik kəv kə luwen a Hirudus anhi: ‹‹A vəlak talan ngə Yuhana mə njə kə juroɓ baptisma am waslak tanjinhi.›› 9 Bay maa zlim atəgo za, ma səna tu basen nəv day day. Amma lay sin mə luw mbeɗi a kibik hidiy sin mə ɗefentəma am məmbəlwa, sin luwen a sojiy kəv kə rəsliy talan ngə Yuhana, za kə dahenta a kərtaza səna. 10 Sin zlən soje am jik jaw kə rəslah talan ngə Yuhana. 11 Soje dah talan səna am waslak, vəlen a kərtaza səna, za sin təm tepen a mahmay tik.
12 Wəriy gawliy ngə Yuhana mə juroɓ Baptisma maa zlimta atəgo za, yiy ɓiyiy mimci tik, kahta kaɗ. Za va ceɗenta ləbar tik a Yesu.
Yesu vəlen zəm a hidiy day ngərbək joɓən
13 Yesu maa zlim ləbar səna za, sin avə wəriy gawliy ngetik sliɗiy tan aa bəgo za, viy, pətiy a liɓ pay ngə zlan maza, viy tan gaf am lay maa lewlew. Amma hidiy maa sənta za, taniy pətiy aa liɓdiy ma parpar za, ɗiya səbiy Yesu avə ngaz. Taniy a səbiy talan maza talan maza. 14 Yesu maa sərohoh a liɓ pay ngə zlan maza za, sin lim zəgudu mordoy. Sin maa limta za, kaymah ngatan gasenni. Za sin vəlen zoy a hidiy ngatan mə daldaligi.
15 Pic ma ndəv za, wəriy gawliy ngetik viy angər tik, ɗiya luwenta: ‹‹Məmar yikwan, pic tu ndəv, za yikwan mawan am lay maa lewlew. A luwen a hidiy mə viy am slalahde. Taniy kwəl kə səkəmiy təkən ngə zəm abəgo. ›› 16 Yesu zlawenta, ɗiya luw: ‹‹Ɗah law taniy kə viytan kwən, hin talan kin mə vəlenta təkən ngə zəm!›› 17 Wəriy gawliy ngetik zlawenta, ɗiya luwenta: ‹‹Məmar yikwan, təkən ngə zəm angər yikwan ɗahkwən. Say bret joɓən ɓəw kilif saray dap.›› 18 Yesu luwenta: ‹‹Mə dahakta awənhi.››
19 Za sin luwen a hidiy kə ɗewiy kaɗ atalan hiziɗ. Hidiy maa ɗewiy kaɗ za, sin ɓiy bret ma joɓən avə kilif maa saray tafnan. Sin ca həriya a dibizlav, za luwen soko a Bayzlav. A dəwən səna, sin nganga bret tafnan kaɗ, za vəlen a wəriy gawliy ngetik kə wəzakenta a hidigi. 20 Hidiy cike ham hamta mana nəv ngatan mə mayta. Mə fəs tik wəriy gawliy ngə Yesu kambal kambalta wek paskar gəɓ atalan saray. 21 Hidiy mə hamta səna, av kə ɗiy mawəliy ngərbək joɓən. Wertiy avə wəriy mə nəfah ɗahkwən.
Yesu a va avə ngaz atalan yəm
22 Njoɗ Yesu taken wəla a wəriy gawliy ngetik kə pətiy am pay ngə zlan maza, taniy kə viy atalan maza. Mandal səna, sin a way kə ɗəmbeli avə hidiy mə ɓasɓas, za kə luwenta kə viy tan ade. 23 A dəwən sin maa way kə luwen a hidiy kə viy tan a de za, sin tap tik atalan wərum kə tarah Bayzlav sin a gendik palpal. Nha vuɗu ɗiy, sin awan abəgo sin a gendik. 24 Mandal səna, wəriy gawliy ngetik awaniy am pay ngə zlan maza gaf avə talan maza. Mbiɗ ɗiya ca dəzdəz avə tanigi, za ɗiya kəz pay ngə zlan maza avə gədan. 25 Ngə zlalay, Yesu ɗiya va kə va ngər wəriy gawliy ngetik avə ngaz, nap nap nap, atalan yəm. 26 Wəriy gawliy maa limta aa va avə ngaz atalan yəm za, ɗiya hovokiy dayday, za ɗiya luwta: ‹‹Hay gawla, musuruf a ta yah tugo!›› Zəni taniy ɗiya ciy wəla, kadaban taniy mə hovokiy za. 27 Njoɗ Yesu zləgamenta, ɗiya luw: ‹‹Mə hovok kwən, Kata, mə sok nəv kaɗ!›› 28 Piyer ɗiya luwenni: ‹‹Aw Məmar kata, mana hoh mindiwin wər, a luwak kat kə vay avə ngaz atalan yəm.›› 29 Yesu zlawenni, ɗiya luw: ‹‹A yah!›› Za Piyer suroh aa mə pay ngə zlan maza za, diw kə va avə ngaz atalan yəm angər Yesu. 30 Sin maa lim mbiɗ a ca avə gədan, za sin ɗiya hovok. Sin diw kə silim kəv a liɓ yəm. Za sin diw kə cə wəla, ɗiya luw: ‹‹Məmar kata, a mbəlakku!›› 31 Njoɗ Yesu zok ngəra, kaw Piyer za ɗiya luwenni: ‹‹Hoh vəlak nəv koh lawlaw bəgwən, hoh wəzən kemi?›› 32 Taniy maa pətiy saray tik am pay ngə zlan maza za, mbiɗ besey tik. 33 Za wəriy gawliy ngə Yesu sənan tə liɓ pay ngə zlan maza, maa limta atəgo za, gbəlihiy titimbiz a kibik tik, ɗiya luwenta: ‹‹Mindiwin, hoh kər ngə Bayzlav.››
Yesu mbəl hidiy mə daldaliy am hayək Genezaret
34 Yesu avə wəriy gawliy ngetik maa zlaniy maza za, hosiy am hayək Genezaret. 35 Maa hosiy za, hidiy təbəgo səniy Yesu. Za taniy viy ceɗenta yah ngetik a hidiy təm hayək səna cike wayza. Zəni hidiy dahiy mə daldaliy ngatan angər tik. 36 Hidiy səna ɗiya tariy Yesu kə geɗ mə daldaliy kə mbəlemiy gozlum ləkwət ngetik dap. Za hidiy mə daldaliy cike mə mbəlemta tu mbəligi.