Yesu a zləgam atalan məzugzug ngə yahudigi
15
Mandal səna, Farisigi ɓəw mogroy ngə jəgwan yiy aa Ursalima za, viy angər Yesu, za ɗiya luwenta: 2 ‹‹Wəriy gawliy koh aa səbiy məzugzug ngə didiy ngiykwan ɗahkwən wər kemi? Yikwan mə luw anhi, kadaban taniy aa paniy ngər kaɗ za kə diw kə zəmiy gəda mana məzugzugwa ngə didiy ngiykwan mə luw ɗahkwən.›› 3 Yesu zlawenta, ɗiya luw: ‹‹Ya ngəkin, hin maa səb mə zugzugwa ngəkin, amma hin maa səb mə jawjaw ngə Bayzlav ɗahkwən wər kemi? 4 Bayzlav a luw: ‹A zlimen ma a bahbay koh ɓəw a mahmay koh.› Za a luw baha, ‹Hid mə zləgam ma mə ngavngav atalan bahbay tik asənkwən atalan mahmay tik, say kə wəzlta kaɗª.› 5 Amma ngəkin, mə njə kə luwen a hidiy anhi: Hid kwəl kə luwen a bahbay tik asənkwən a mahmay tik, təkən kat mə ɓən kə vəloh kə jan kə mənoh, kat tu vəlen a Bayzlav. 6 Asəna acin, hin mə vəlen gədan a hid səna kə mən bahbay tik bəgwən.›› Hin maa ngav zləgam ngə Bayzlav avə səb mə zugzugwa ngəkin. 7 Məplafasiy ca! Esaya mokotuf ngə Bayzlav mə zləgam taməcek atalan kin səna mindiwin. Sin a luw:8 ‹Hidiy nhi a vəlakta mordoy a ma a gendik,
amma nəv ngatan gaf a kata.
9 Mbəzl taniy mə njə kə mbəzlakta, zay tik ɗahkwən.
Təkəniy taniy mə njə kə jəgwanenta a hidigi, za mə njə kə luwta jəgwan ngaɗa nhi, ɓən ngatan gandan dapª.›››
Təkən mə njə kə dəbəz hidi a kibik Bayzlav
10 A dəwən səna, Yesu ɗefenma a hidigi, za ɗiya luwenta: ‹‹Mə zlim ləbar kat tu kə ceɗehin nhi lawlaw. 11 Təkən hid ta njə kə zəm tik acin mə njə kə dəbəz tik a kibik Bayzlav kwən. Amma təkən mə njə kə pətah taa kəma tik za acin mə njə kə dəbəz tik a kibik Bayzlav.››
12 Za acin wəriy gawliy ngə Yesu kərəɓiy a jagwar tik, za ɗiya luwenta: ‹‹Hoh mə sən za, zləgam hoh mə zləgam nhi, mə bas nəv ngə Farisiy za vu? ›› 13 Yesu zlawenta, ɗiya luw: ‹‹Ko pay ceki, maa Vay tə dibizlav acin mə ngəɓ tik kwən, av kə cofta kaɗ. 14 Mə geɗta, taniy wa hulufiy mə njə kə ngazliy celeniy tan huluf. Mana huluf tu ngazl celen huluf, taniy saray tik av kə ndəviy am wili.››
15 Piyer maa zlim atəgo za, luwenni: ‹‹Məmar kata, a pəsliy yikwan madaba ma mə ngaɓngaɓ səna.›› 16 Yesu zlawenni, ɗiya luw: ‹‹Hin təm nha tanjinhi bərngəzl talan kin a zlər kə zlim zləgam səna gesin bəgwən vu? 17 Maa sən təkən hid ta njə kə zəm tik ɗaw kə gar am gadablak, za a dəwən səna kə cah kaɗ kwən vu? 18 Amma zləgam mə njə kə pətah aa mə ma ngə hid za, a njə kə garah aa mə nəv ngetik za. Sin acin mə njə kə dəbəz hidi a kibik Bayzlav. 19 Kat tə luw a nhi, kadaban ɓən mə ngavngav ɗaw kə garah aa mə nəv za, kə lebeɗ hidi kə wəzl duwa, kə ɗiy vərndew, kə ɗiy gugoɓ, kə həl, kə ngawen ma a hidi, za kə zəm madaba ngə hidigi. 20 Təkəniy səna acin mə njə kə dəbəz hidi a kibik Bayzlav. Amma zəm gəda mətak pan ngəra mana məzugzugwa mə luwu, a dəbəz hidi a kibik Bayzlav ɗahkwən.››
Wer maa səban tik par a yahudigi vəl nəv ngetik a Yesu
21 A dəwən səna, Yesu gar tik aa liɓde səna za, vətik am hayək Tirus ɓəw Sidon. 22 Sin maa hos abəgo za, wer məpərmay njə Kanana təm hayək səna, yah angər tik, ɗiya tar tik dayday, luwenni: ‹‹Məmar hidi, kər ngə Dawda, a saf kaymah ngaɗa! Kərtaza ngaɗ ɗaha, musuruf mə kaw za. A njə kə zlənen takwan dayday.›› 23 Amma Yesu a zlawen ɓahbəgwən. Wəriy gawliy ngetik viy a bər tik za ɗiya luwenta: ‹‹A gam kaɗª, kadaban a səb yikwan avə cə wəla›› 24 Yesu zlawenta, ɗiya luw: ‹‹Bayzlav a zlənak angər hidiy Israyila dap, taniy wa təmakiy mə leklekigi.››
25 Amma wer səna yah gbəlih titimbiz a kibik Yesu, za ɗiya luwenni: ‹‹Aw Məmar hidi, a mənakku! ›› 26 Yesu zlawenni, ɗiya luw: ‹‹Kə wət gəda ngə wərigi, kə vəlen aa hevemigi, ɗah law kwən.›› 27 Wer səna ɗiya luwenni acin: ‹‹Mindiwin Məmar hidi. Amma hevemiy ɗər, a njə kə felekiy zəm mə njə kə yoɓiy taa kəma ngə mə marta.›› 28 Yesu zlawenni, ɗiya luw acin: ‹‹Wer cah, hoh mə vəlak nəv koh za lawlaw! Təkəniy səna mə ɗiyiy tiɗtiɗe mana may ngəkoh.›› Yesu maa luw atəgo za, kəsəm ngə kərtaza ɗiy zoy gəzza am mandal səna.
Yesu mbəl mə daldaliy dolom
29 Zəni Yesu gar tik aa mə hayək Tirus ɓəw Sidon za, ton aa talan maza Galili, taptik atalan wərum, ɗewey tik abəgo. 30 Zəgudiy dolom yiy angər tik. A tepiy vəderigi, hulufigi, hidiy njə ngaz mə məcməc, wəyigi ɓəw hidiy məpərmayiy njə məc maa parpar tə kəsəm. Taniy ndəɗndəɗiy mə daldaliy səna a jagwar Yesu. Sin mbəlta kaɗ. 31 Hidiy wələk-wələk lay mə limiy wəyiy aa zləgamigi, hidiy njə ngaz mə məcməc tu mbəligi, vəderigi aa viy lawlaw, za hulufiy aa limiy lay lawlaw. Za taniy ɗiya luwta: ‹‹ Say kə vəlen mordoy a Bayzlav ngə hidiy Israyila.››
Yesu vəlen zəm a hidiy day ngərbək foɗ
32 A dəwən səna, Yesu ɗefenma aa wəriy gawliy ngetik, za ɗiya luwenta: ‹‹Kaymah ngə hidiy nhi a gasakku. Mə ɗiya wan makaɗ, taniy awaniy avə kata, za təkən ngə zəm ngatan ɗahkwən. Za taa may kə luwenta kə jəɓiytan a de mətak zəmiy təkən zagway kwən, taniy kwəl kə ndəviy a mozlokotuf makavay mitis.›› 33 Wəriy gawliy ngetik ɗiya luwenta: ‹‹Ya awənhi dab donu, yikwan kə jan təkən ngə zəm ngə pas hidiy maa ndas nhi a ki?›› 34 Yesu nehta, ɗiya luw: ‹‹Bret angər kin wər nu?›› Taniy zlawenta, ɗiya luwta: ‹‹Bret cisaray ɓəw kilifiy mecicer gwedek.›› 35 Za acin, Yesu luwen a hidiy mə ɓasɓas kə ɗewiy kaɗ a kayək. 36 Maa ɗewiy kaɗ za, sin wət bəret avə kilif tafənan nhi, luwen soko a Bayzlav, nganga kaɗ za, vəlen a wəriy gawliy ngetik, za taniy wəzak wəzakenta a hidigi. 37 Hidiy səna cike wayza tu hamta, paspas. Kambal kambaliy mə fəstik, za zekta am paskar, wekwek paskar cisaray. 38 Hidiy mə hamta mə ɗiya mawəliy ngərbək foɗ, wertigi avə wərigi mə nəfah ɗahkwən . 39 A dəwən səna acin Yesu luwen a hidiy kə viytan a de. Maa viytan za, sin pət am pay ngə zlan maza vətik am hayək Magadan.