Farisiy avə Sadukiy a mayiy Yesu kə ɗiyenta təkən ma tuwah
16
Pic takan, Farisigi avə Sadukigi viy angər Yesu. Taniy a gər kə ɗəfta avə ma. Taniy ɗiya luwenta: ‹‹A ɗiy təkən ma tuwah a kibik yikwan kə jan hoh kə ɗefiyikwan Bayzlav acin mə zlənoh.›› 2 Amma Yesu zlawenta, ɗiya luw: ‹‹Ngəkin mandal pic tu ndəv, za dibizlav tu ɗiy gbiz, mə njə kə luw apat lay avə kə ɗiy kwankwan. 3 Za mandal dibizlav tu ɗiy gbiz aa gbəm, hin mə njə kə luw: ‹Apicah von ɗaha.› Mandal hin tu ca həriya a dibizlav, hin maa sən madaba təkəniy tu kə toniy lawlaw atəgo, amma təkəniy taa toniy tanjənhi, hin maa sən madaba tik ɗahkwən wər kemi? 4 Hin hidiy maa tanjinhi, hin lem. Hin mə njə kə buwen dəwən a Bayzlav. Za hin maa may kat kə ɗiyehin təkən maa tuwah, kə jan hin kə sən tik, Bayzlav acin mə zlənakku. Amma tə ɗiyehin təkən maa tuwah ko takan kwən. Səna kə ɗiy təkən ma tuwah mana Bayzlav mə ɗiyu atalan mokotuf ngetik Yonas a gendik.›› Za acin, Yesu geɗta, sliɗ vətik aa bəgo za.Ma mə ngaɓngaɓ atalan jəgwan ngə Farisigi ɓəw ngə Sadukigi
5 Yesu avə wəriy gawliy ngetik pətiy am pay ngə zlan maza, zlaniy aa dəwən maza. Talan ngə wəriy gawliy zlay, a wətiy bret gəzza bəgwən. 6 Yesu ɗiya luwenta acin: ‹‹Mə kaw talan kin! Mə puw talan kin lawlaw avə njemª ngə Farisigi ɓəw ngə Sadukigi!›› 7 Wəriy gawliy ngetik maa zlimta atəgo , ɗiya zləgamiy am walan tan, luwta: ‹‹Sin a luwiyikwan atəgo , kadaban yikwan mə dah bret gəzza bəgwən.›› 8 Yesu zlim zləgam ngatan, ɗiya luwenta acin: ‹‹Hin nhi, mə vəlen nəv kin lawlaw a Bayzlav bəgwən, asənkwən hin mə zləgam am walan kin: ‹Bret angər yikwan ɗahkwən› kemi? 9 Bərngəzl talan kin a zlər am təkəniy maa tuwah kat mə ɗiyta gesin bəgwən vu? Mə ɓən atalan bret joɓən kat mə wəzaken aa hidiy ngərbək joɓən! Ngə pic səna, mə fəs tik hin mə wek paskar nu? 10 Za mə ɓən atalan bret cisaray kat mə wəzaken a hidiy ngərbək foɗ. Ngə pic səna, mə fəs tik hin mə wek paskar nu? 11 Kat mə luwehin kə puw talan kin lawlaw avə njem ngə Farisigi ɓəw ngə Sadukigi. Kat tə zlagam atalan bret kwən, hin mə sən bəgwən vu?
12 Za acin, wəriy gawliy ngetik sənta, sin a zləgam atalan njem kwən, amma a ngəzta taniy kə kawiy talan tan avə jəgwan ngə Farisigi ɓəw ngə Sadukigi.
Piyer a ceɗ tik Yesu acin Kristu
13 A dəwən səna, Yesu avə wəriy gawliy ngetik viy am hayək maa mbeh a liɓde Kaysariya Filipi. A bəgo sin ɗiya neh wəriy gawliy ngetik, luwenta: ‹‹Hidiy a njə kə zləgamiy atalan ɗa kat kər Hidmemblen wər, kat hid ngayi?›› 14 Taniy ɗiya zlawenta, luwta: ‹‹Hidiy məpərmay a luwta hoh acin Yuhana mə njə kə juroɓ baptisma. Hidiy məpərmay bah a luwta hoh acin Eliya, mokotuf ngə Bayzlav tamicek. Za hidiy məpərmay təm baha a luwta hoh acin Yeremiya, mokotuf ngə Bayzlav, asənkwən hid takan tə dab mokotufiy ngə Bayzlav tamicek.›› 15 Yesu nehta baha, ɗiya luw: ‹‹Ya hin atalan kin wər, mə vrəkak kə hid ngayi?›› 16 Simon ta njə kə luwta Piyer zlawenni, ɗiya luw: ‹‹Hoh acin Kristu, kər ngə Bayzlav maa aa məc ɗahkwən.›› 17 Zəni Yesu ɗiya luwenni: ‹‹Hoh Simon, kər ngə Yonas, nəv koh awana zoy, kadaban ma hoh mə luw nhi, hidi acin mə ceɗeh kwən, Vay tə dibizlav acin mə ceɗeh. 18 Kata, kata luwoh: hoh acin Piyer, mana kə luw kaɗ talagwən. Təv kə mbaslª mgbəw ngə hidiy ngaɗa atalan talagwən səna. Ko gədan ngə məc a ɓəs kə gom kaɗ kwən. 19 Za təv kə vəloh lekiliy ngə zlər mijijikiy ngə bay ngə Bayzlav. Təkən hoh mə tak təm talan mahayək, Bayzlav av kə tak tik a dibizlav. Təkən hoh mə yək tik təm talan mahayək, Bayzlav av kə yək tik a dibizlav təm.››
20 Yesu ɗiya zləgamen a wəriy gawliy tik avə ndəl, luwenta: ‹‹Mə gər kə ceɗen a hidigi, kata acin Kristu kwən.››
Yesu zləgam atalan məc ngetik
21 Dəga am pic səna, Yesu diw kə zləgamen a wəriy gawliy ngetik mgban-mgban, ɗiya luwenta: ‹‹Say kat kəv a Ursalima. Abəgo, talan mbalgamigi, bay ngə masayigi ɓəw mogroy ngə jəgwan av kə zlənakta takwan dayday. Za taniy av kə wəzlakta kaɗ. Zəni wan saray mə makaɗ tik, Bayzlav av kə mbəlakku aa mə məc za.›› 22 A dəwən Piyer maa zlim atəgo za, ngazl Yesu a gozlum. Za ɗiya ndəl tik, luwenni: ‹‹Awwo Məmar kata, Bayzlav mə gəl micin koh. Mə gər kə ɗiy mana hoh mə luw təgo kwən!›› 23 Amma Yesu buw həriya kəv angər Piyer, za ɗiya luwenni: ‹‹Bay musuruf cah, a jel gaf aa bər ɗa za! Hoh ɗəfakku, kadaban ɓən ngəkoh mana ngə Bayzlav kwən. Hoh ɓən mana ngə hidigi.››
Hid kə səb mozlokotuf ngə Yesu aceki ?
24 Zəni Yesu ɗiya luwen a wəriy gawliy ngetik anhi: ‹‹Mana hid a may kə səbakku, say sin kə geɗ ɓən atalan tik kaɗ. Sin mə ɓiy pay maa zləngrak ngə talan tik, za mə səbakku. 25 Asəna acin, ko hid ngayi mə may kə mbəl micin ngetik, av kə lek tik. Amma ko hid ngayi mə vəl micin ngetik kə lek makavay kata, av kə jan tik. 26 Ya mana hid tu jan aray təm talan mahayək cike, za sin lek micin tik wər, zay ngə aray təm talan mahayək səna a sin wər mi? Təkən hid tu kə vəl tik kə zlambaɗ micin a sin ɗaha vu? 27 Kat tə luw anhi, kadaban Kər Hidmemblen av kə jəɓah avə gədan mordoy ngə bahbay tik, avə mbaslayiy tik, za av kə vəl gədmazlən ko aa hid ngayi mana kəzəɗ sin mə ɗiyu. 28 Mindiwin, kata luwehin, hidiy məpərmay a dab kin awənhi av kə limiy Kər hidmemblen a jəɓaha mana bay zagway, za kə diw kə məcigi.››