Kəzəɗ ngə wəriy gawliy ngə Yesu ma gəɓ atalan saray
(Mt 10:5-15; Mk 6:7-13)
9
Pic takan Yesu ɗefenma a wəriy gawliy ngetik ma gəɓ atalan saray, ɓas ɓas tə kaɗ, za vəlenta mordoy atalan musurufigi avə gədan kə gami musuruf cike tə kəsəm hidigi, za ɓəw kə mbəl mə daldaligi. 2 Ma vəlenta gədan mordoy za, zlən ta acin a liɓdigi. Luwenta: ‹‹ Mə sliɗ, mə va ceɗen a hidigi ləbar ngə bay ngə Bayzlav, za hin kə mbəl mə daldaligi. 3 Hin tu kə va, hin kə va ngər maymay, ko zlambəlay mə gər kə wət am ngəra kwən, ko təkən ngə zəm, ko gabal kə zek təkən ngə zəm, za ko suloy baha mə gər kə va avə sin am ngər kwən. Za mə gər kə wət ləkwət saray kə va avə sin kwən. 4 Mana hin tu hos a liɓde məpərmay, hidi njə de təbəgo tu yəki hin ngər səsəray wər, hin kə ɗewey kin a bəgo hos am pic, hin tu kə sliɗ kə va kin kibik. 5 Am liɓde ma hidi njə de təbəgo a yəki hin bəgwən wər, hin kə sliɗ, hin kə va kin a bəgo za. Mandal hin tu kə sliɗ kə va kin, hin kə tih kirbitil təm ngaz kin kaɗ, kə jan hidi tə liɓde səna kə sən ta a kimin, mə ɗiyi təkən mə ngavngav za.›› 6 Yesu ma luwenta atəgo za, sliɗi vigi a liɓde ma par par acin. A ceɗenta Ləbar Malaw a hidi tə bəgo, za a mbəli mə daldaligi təm lay cike.Bərngəzl talan ngə bay Hirudus tu pərasl
(Mt 14:1-12; Mk 6:14-29)
7 Pic takan bay Hirudus məmar hayək Galili zlim ləbar atalan təkəniy mə ɗiyi ma tuwnha nhi, za tu pərasl bərngəzl talan ngetik. 8 Kadaban hidi məpərmay a luw ta: ‹‹ Yuhana mə njə kə pan baptisma mə mbəlah am məc za.›› Hidi məpərmay bah a luw ta: ‹‹ Eli, mokotuf ngə Bayzlav ta micek, acin mə pətaha a kibik ngiykwan.›› Za hidi məpərmay a luw tə bah: ‹‹ Momozlokotuf ngə Bayzlav ma takan tə dab mokotufi ngə Bayzlav taməcek acin mə mbəlaha am məc za.›› 9 Bay Hirudus ɓən ɓən za, ɗiya luw acin: ‹‹ Amma Yuhana baptis wər, kata mə mgban talan tik kaɗ. Hidi nhi, hidi ngayi acin mə njə kə ɗiy təkən ma par par kata mə zlim nhi?›› A may kə saf Yesu acin.
Təkən ngə zəm ngə hidi wujine joɓən
10 Gwedek mə zlən zləni ngə Yesu jəɓi tan. Vigi angər Yesu, ceɗenta təkən cike mə ɗiy ta. Yesu ngazl ta baɗ gaf a liɓde za kə va kə nəpi avə taniy a gandan. Vigi ɗewiy tan a dab donu ma mbeh tə jagwar liɓde Betisayda. 11 Njoɗ hidi məpərmay dolom mə sən tə za, Yesu ta vətik, za taniy sliɗigi, ɗiya səb ta. Ma hosigi za, Yesu yək ta avə nəv malaw. A ceɗenta ləbar ngə bay ngə Bayzlav a hidigi, za a mbəl mə daldaligi tə dab tan baha. 12 Am mandal Yesu a ɗiy kəzəɗ ngetik, pic a ndəvay tik. Wəriy gawliy ngə Yesu ma gəɓ atalan saray vigi angər tik, za ɗiya luwenta: ‹‹ Mordoy, pic a ndəvay tik kaɗ. Ndah yikwan ma wan a dab donu a wənhi am lay ma lew lew, geleɓe a geɗ hidi nhi kaɗ, mə vigi a liɓdigi, ko am liɓde mendez yigi, ko am liɓde mordoyigi, mə va jariy lay wan avə təkən ngə zəm.›› 13 Yesu ɗiya luwenta: ‹‹ Hin avə talan kin, mə wət təkən ngə zəm tə ngər kin, mə vəlenta ! Luwta acin: ‹‹ Mordoy, təkən ngə zəm angər yikwan ɗahkwən. Səna bəret joɓən avə kilif saray dab. Tanjinhi wər, hoh may kə zləni yikwan kə va kə səkəma təkən ngə zəm a hidi nhi cike vu?›› 14-15 Ma luw ta atəgo za, Yesu ɗiya luwenta acin: ‹‹ Mə ceɗenta a hidi mə ɓas ɓasi nhi, mə ɗewiy kaɗ njuk njuk ngər joɓən,ngər joɓən.›› Wəriy gawliy ngetik vi ceɗenta, za ɗewiy kaɗ acin. Hidi mə ɓas ɓasi nhi, mawuligi tu hos wujine joɓən. 16 Adəwən səna Yesu ɓiy bəret joɓən avə kilif ma saray tafənan, cə həriya kə va wəzlav, luwen soko a Bayzlav. Za mban mban kaɗ, vəlen a wəriy gawliy ngetik kə wəzakenta a hidi nhi. wət ta, wəzakenta. 17 Hidi nhi cike ham hamta pas pas, fəs mə fən tik. Ma pasi za, hidi kambal kambali mə fəs fəs bəret nhi, zek zek am paskar, kpew kpew paskar gəɓ atalan saray.
Yesu acin Hidi Bayzlav mə welu
(Mt 16:13-23; Mk 8:27-33)
18 Pic məpərmay Yesu a tar Bayzlav am lay ma lew lew. Wəriy gawliy ngetik a wani a jagwa tik. Za Yesu ɗiya neh ta acin : ‹‹ Hidigi a njə kə sləgami atalan ɗa wər, kata yi? Mə ceɗek səka.›› 19 A luwenta: ‹‹ Hidi məpərmay a luw ta, hoh acin Yuhana mə njə kə ɗiy baptisma. Hidi məpərmay baha a luw ta, hoh acin Eli, mokotuf ngə Bayzlav ta micek. Za hidi məpərmay baha, a luw ta hoh acin mokotuf ngə Bayzlav məpərmay tə dab mokotufi ngə Bayzlav taməcek mə mbəlaha am məc za.›› 20 Yesu ma zlim atəgo za, ɗiya luwenta a wəriy gawliy ngetik: ‹‹ Yo, hin avə talan kin acin, hin mə ce gingin wər kata yi? Mə ceɗek səka.›› Piyer ɗiya luwenni acin: ‹‹ Hoh acin Kristu, Hidi Bayzlav mə welu kə mbəl hidigi .›› Yesu ɗiya zlaweni: ‹‹ Yaw mindiwin, 21 amma ta ngəze hin, mə gər kə va kə ceɗenta a hidigi kə sənak tə kwən. 22 ‹‹ Yo tanjinhi ta ceɗe hin, kata Hidi mə yah ta ngər Bayzlav za, ko a ɗiya a ciki, təv kə sa banay day day. Mbusur hidigi avə mogroy məmbəzlimigi təm jik Bayzlav ɓəw mogroyiy jəgwan av kə zelek ta, za av kə wəzlak tə kaɗ. Amma mana kata tu məc, wan saray mə makaɗ tik Bayzlav av kə mbəlak ku am məc za.››
Ləbar atalan hidi mə may kə səb mozlokotuf ngə Yesu
(Mt 16:24-28; Mk 8:34-9:1)
23 Yesu a luwenta a hidi mə ɓas ɓasi cike: ‹‹ Hid mə may kə səbak ku wər, mə geɗ təkən həriya ngetik ta may kaɗ. Mə sləsləɓ kəsəm ngetik kə sa banay hoyhoy hos am məc mana kata tu kə sətik am məc təm pay, za mə səbak ku acin. 24 Hidi mə may kə mbəl micin ngetik am talan mahayək nhi, mandal pic sən mə hoso za, avə kə lek micin ngetik tə ngər Bayzlav. Amma hidi mə vəl micin ngetik kə lek kadaban sin ta səb mozlokotuf ngaɗ wər, mandal pic sən mə hoso za av kə jan mbəl micin ngetik angər Bayzlav. 25 Yo, apica hidi tu jan təkəniy cike təm talan mahayək nhi, adəwən səna tu ngav ɗew ngetik, asənkwən tu lek micin ngetik tə ngər Bayzlav wər, av kə ɗiy mi acin avə təkən təm talan mahayək sin mə jan səna? 26 Yo ta ceɗe hin, Hidi mə saf ləbar ngaɗa mana təkən weli ɓəw mə ɗiy weli avə kata, təv kə zəmen weli a sin təm. Am pic kat Hid mə yah ta ngər Bayzlav za, təv kə yah avə gədan mordoy ngaɗa, avə ngə Vay, ɓəw ngə mbaslayi ngetik, am pic yə ngaɗ səna, təv kə zəmen weli. 27 Ta ceɗe hin, mindiwin: Hidi məpərmay tə dab kin a wənhi av kə lim ta mana Bayzlav ta njə kə mar lay zagway, za acin kə məcigi.››
Gədan mordoy ngə Yesu
(Mt 17:1-8; Mk 9:2-8)
28 Ma ɗiy zəm luma takan za, Yesu ngazl Piyer, Yuhana ɓəw Zak tapigi atalan wərum kə tari Bayzlav a bəgo. 29 Ma hosigi za, Yesu a tar Bayzlav. Am ta tar səna, kəsəm ngetik ɗiya bu. Za ləkwət tə kəsəm ngetik zlambaɗ kə ma kweɗek, a zləzlaɗ kay kay am həriy ngatan. 30-31 Njoɗ hidi məpərmay saray awaniy a jagwar Yesu, a yigi avə gədan mordoy ngə Bayzlav. Hidi ma saray səna Musa avə Eli. A zləgamigi avə Yesu acin. Zləgam ta zləgam ta, a zləgamigi atalan Yesu tu kə məc am liɓde Ursalima, kə way kəzəɗ Bayzlav mə vəlen kə ɗiy tik. 32 Am ta zləgamigi səna, Piyer avə celenigi tu wanigi filen. Ma fəɗahigi za, lim ta Bayzlav tu vəlen gədan mordoy a Yesu, za limi hidi saray a jagwar tik bah. 33 Hidi ma saray səna ma sliɗi kə vi tan za, Piyer ler ma mətak ɓən. ɗiya luwen a Yesu: ‹‹ Mordoy, nəv ngiykwan nek godokwən yikwan kə ɗewey kin awənhi. Tanjinhi yikwan məv kə lə mazlaɓ makaɗ. Takan a hoh, takan a Musa, za takan a Eli.›› 34 Piyer a zləgam atəgo , njoɗ məsinsineh ɗiy kəlak atalan tan. Piyer avə celenigi tu hovokigi acin. 35 A zlimiy wəl ngə Bayzlav a liɓ gazlavay sən za. A luw atalan Yesu: ‹‹ Gawəl nhi acin kərti ɗa, kata mə welu kə mbəl hidigi, mə zlim mə ngetik.›› 36 Wəriy gawliy ngə Yesu ma zlimiy wəl ngə Bayzlav za, saf safi lay, a limi Yesu a gendik. Yo, mandal Yesu a wəlen am talan mahayək, a ceɗi təkən mə lim ta atalan wərum səna a hidigi ɓabəgwən. Njay tan tete avə sin a liɓi.
Yesu avə kərtawəl njə musuruf tə kəsəm
(Mt 17:14-18; Mk 9:14-27)
37 Apat tik Yesu avə wəriy gawliy ngetik ma makaɗ səna surohigi atalan wərum za. Ma surohigi za, hidi məpərmay dolom yigi kə gbami avə Yesu. 38 Adab hidi səna, hidi məpərmay a bəgo a ɗefenma a Yesu day day, a luweni: ‹‹ Mordoy, ta coh ngəra, a yah ma saf kaymah kərti ɗə nhi. Kərti ɗa məpərmay ɗahkwən, səna malay ɗ anhi a gendik. 39 Musuruf a wan kəsəm tik. Musuruf səna a njə kə kaw tik njap kə por wəla, a njə kə tulək tik, tuwələk tuwələk ma a kayək, za misligif a njə kə yah a kəma tik za bif bif. A njə kə vəvoh tik, vəvoh vəvoh day day, za a pətaha a kəsəm tik njoɗ ɗahkwən . 40 Kata tep angər wəriy gawliy koh kə gami musuruf tə kəsəm tik kaɗ, təl təl ta, koh a ɓəsi kə gam tik bugwən.›› 41 Yesu ɗiya luwenta a hidi cike acin: ‹‹ Kay hin hidi ma tanjinhi, ma yək Bayzlav ɗahkwən. Bərngəzl talan kin toy toy. Hin kə yək ləbar ɗə lawlaw wər, kata kə ɗew avə hin bah wan nu? Za kata kə ɓəs avə hin baha wan nu?›› Yesu ma luwenta atəgo za, ɗefenma a babay kər tafənan, ɗiya luwenni acin: ‹‹ A dah kərti koh səna awənhi.›› 42 Babay tik və wətaha, dah angər Yesu. Ma dah za, musuruf tə kəsəm tik tuwələk tuwələk ma a kayək, za ɗiya vəvoh tik day day. Yesu ndəl a ndəl musuruf səna, za njoɗ musuruf səna pətah tik a kəsəm kər sən za. Tu mbəl acin. Za Yesu wət vəlen a babay tik. 43 Hidi təbəgo cike ma lim tə za, a zləgamigi: ‹‹ Kay gawal nhi a ɗiy a ciki? Bayzlav wər gədan ngetik ɗaha.›› Tu pərasl bərngəzl talan ngə hidi nhi.
Yesu av kə məc, za kə mbəla a mə məc za
(Mt 17:22-23; Mk 9:30-32)
Hidi cike mə limi kəzəɗ Yesu ta njə kə ɗiy nhi, a njə kə zəzayigi. Yesu ɗiya luwenta a wəriy gawliy ngetik acin: 44 ‹‹ Hin wəriy gawliy ngaɗa, mə zlim ləbar ngaɗa kata tu kə ceɗehinnhi, mə sleku atalan kin law law. Kata Hidi mə yah angər Bayzlav za, hidi məpərmay av kə kawak ta, kə vəlak ta am nəv ngər ngə hidi məpərmay.›› 45 Yesu ma ceɗenta atəgo za, a zlim tə lawlaw bugwən.Mə nja kə təkən mə ɓaɓah am bərngəzl talan ngatan, kə jan ta səni madaba ma ngə Yesu mə may kə ceɗenta. A gər kə nehi Yesu kə ceɗenta bah kə zlim tə law law, amma hovok a ɗiyenta kə neh tik.
Hidi mordoy a kibik Bayzlav wər, hidi mana ciki ?
(Mt 18:1-5; Mk 9:33-37)
46 Wəriy gawliy ngə Yesu a ɗiyi neh am walan tan, a luw ta: ‹‹ Hid mordoy tə dab yikwan acin yi?›› 47 Njoɗ Yesu mə sən ɓən təm nəv tan za. Wət kərti tə dab tan acin, vərək a jagwar tik. 48 Ɗiya luwenta: ‹‹ Ta ceɗe hin, hidi mə yək kər nhi ngər səsəray kadaban sin ta səb mozlokotuf ngaɗa, hidi səna mə yəkak za ngər səsəray təm. Za bah a yək kata gendik ngər səsəray kwən, a yək Vay Bayzlav mə zlənak ku baha. Mə zlimu, ta ceɗehinacin: Hidi mə njə kə mbaɗ talan tik ndez a dab kin, sin acin hidi mordoy a kibik Bayzlav.››
Hidi mə tak zele hin, hidi ngikin
(Mk 9:38-40)
49 Yuhana ɗiya luwen a Yesu: ‹‹ Mordoy, yikwan lim hidi məpərmay a gam musuruf a kəsəm hidi avə zlim ngəkoh. Yikwan ma lim za, yikwan tu mbəlam kə tak kaɗ, kadaban sin lap ngiykwan kwən.›› 50 Yesu zlaweni: ‹‹ mə tak kaɗ kwən. Hidi mə tak zele hin acin hidi ngə ngikin.››
Hidi tə liɓde Samari a mayi kə yəki Yesu kwən
51 Tanjinhi, pic Bayzlav tu kə wət Yesu kə va angər tik a dibizlav mbeh. Mandal səna Yesu a luw: ‹‹ Ko a ɗiya a ciki, təv kə va am liɓde Ursalima.›› 52 ɗefenma a hidi məpərmay kə zlən ta, luwenta: ‹‹ Məv gesin a kibik, ta vay. Mə va jar lay wan gesin kaɗ angər hidi məpərmay tə liɓde Samari.›› Hidi səna sliɗi vigi. 53 Ma hosigi za, hidi təbəgo a mayi kə vəlenta lay wan a Yesu kwən, kadaban mə sən tə za, a vətik kibik am liɓde Ursalima.fdd 54 Zak avə Yuhana ma zlim ta hidi Samari a vəlenta lay wan a Yesu bugwən, nəv tu hamenta day day. ɗiya luwenta a Yesu acin: ‹‹ Mordoy, a geɗ yikwan mozlokotuf, yikwan kə tar Bayzlav kə zləna kuhu a wəzlav za, kə lek micin ngəhidi tə liɓde nhi cike kaɗ.›› 55 Ma luw ta atəgo za, Yesu buw kə va ngər tan, ɗiya ndəl ta. A luwenta: ‹‹ Bərngəzl talan man anhi mə jan angər yi? Kata Hidi mə yah ta ngər Bayzlav za, kata tiy mə talan mahayək kə lek micin ngə hidigi kaɗ kwən, awwo, kata tiy kə mbəl tə kaɗ.›› 56 Adəwən səna, taniy sliɗi vi tan a liɓde məpərmay.
Yesu avə hidi mə mayi kə səbiy mozlokotuf ngetik
(Mt 8:19-22)
57 Yesu avə wəriy gawliy ngetik am ta vigi a mozlokotuf, gbamigi avə hidi məpərmay. Gawal səna ɗiya luwen a Yesu: ‹‹ Mordoy, ko hav nha am lay ciki, yikwan məv kə lap avə hoh.›› 58 Yesu luwenni acin: ‹‹ A ɓən lawlaw zagway. Hoh mə sən za, bəlway awan avə wil ngetik, za vigin baha jik wan ngatan ɗaha. Amma kata Hidi mə yah ta ngər Bayzlav za wər, jik wan ngaɗa ɗahkwən .›› 59 Vigi gbamigi avə hidi məpərmay baha. Yesu luweni: ‹‹ A yah ma səbak ku.›› Gawal səna luweni: ‹‹ Mordoy, a geɗek mozlokotuf kata kə va kə kahah babay ɗə kaɗ zagway, za acin kata kə yah kə səboh.›› 60 Yesu ɗiya luweni: ‹‹ A yah, ma səbak dab. Ma geɗ mimcigife mə kahi celen mimcigi. Za hoh, ma sliɗ ma va ceɗenta a hidigi ləbar ngə bay ngə Bayzlav.››e 61 Vigi gbamigi avə hidi məpərmay baha. Gawal nhi ɗiya luweni: ‹‹ Mordoy, ta may kə səboh, amma a geɗek mozlokotuf kata kə va a de zagway kə luwenta a hidi tə de ngaɗa, mə ɗewiy law law, za acin kata kə jəɓaha yikwan kə lap avə hoh acin.›› 62 Yesu ɗiya luwenni acin: ‹‹ A saf, mana hidi a biz avə zla, a zlay talan kə cə həriya adəwən ɗa vu? Za wa səna baha, hidi mə njə kəɓən təkən ta dəwən, a hos gəga kə ɗiy kəzəɗ ngə bay ngə Bayzlav kwən.›› d 9:53 Hidi Samari a lapiy talan avə hidi Yahudigi ɗahkwən. Kadaban səna hidi Samari a yəki hidi mə njə kə tonigi a liɓde ngatan za kə va am liɓde Ursalima ɗahkwən. e 9:60 Mimcigi səna mana kə luwa kaɗ ‹‹ hidi mətak janiy micin ndawyan tə ngər Yesu.››