Təkəni ngə zəm dolom, hidi ngə ɓas tik gəɗak
10
1 Adəwən səna, pic takan Yesu wel hidi məpərmay ngər cisaray atalan saray baha kə ɗewiy kə wəriy gawliy ngetik. A gər kə zlən ta saray saray kə vi gesin a kibik a liɓdigi ma par par, sin mə may kə va a bəgo. 2 ya luwenta acin avə ma məngaɓngaɓ: ‹‹ Təkəni ngə zəm day godokwən a donu, amma hidi ngə ɓas tik kiy a de gəɗak. Kadaban səna, mə tar hidi məmar təkəniy ngə zəm ta ngav a donu səna, mə zlən hidi məpərmay bah kə ɓasi təkəniy ngə zəm ngetik səna kə va a de. 3 Yo, tanjinhi mə sliɗ, mə va. Kata zləne hin mana təmakigi a dab meceɗeɗigi. 4 Ta luwe hin, mə gər kə va avə suloy kwən, ko gabal ngə zek təkən ngə zəm, ko kərap kin, mə gər kə va avə sin kwən. Za baha mə gər kə zlay talan a mozlokotuf kə gar kaɗ kə ɗə mbeli avə hidigi kwən. 5 Mandal hin tu kə pət a de hidi kə jar lay wan, ma luwenta a hidi tə de səna: ‹Soko ngikin, joy mə ɗew avə hin.’ 6 A de səna, mana hin mə jan hidi mə may joy za, joy ngə ngəkin avə kə ɗew avə sin. Mana, njə de səna a may joy kwən, joy ngəkin av kə ɗew kə təkən may may. 7 Mana hin tu jan lay wan wər, ma wan dab am jik ma takan nha am pic, hin tu kə gar kə va kin am lay məpərmay. Mandal hin tu jan gəda angər hidi sən təm, weli mə gər kə ɗiye hin kə zəm tik kwən. Kadaban hidi mə njə kə ɗiy kəzəɗ wər, law kə jan gəd mazlən ngə kəzəɗ ngetik am lay ta njə ɗiy kəzəɗ a bəgo. 8 Am liɓde hin tu kə va, hidi təbəgo tu yəki hin ngər səsəray wər, ko gəd ngemi, hidigi tu kə vəle hin, mə gər kə wel a wel kwən, mə zəm dap. 9 Hin kə mbəl mə daldaligi tə bəgo, za hin kə ceɗen a hidigi : ‹Tanjinhi bay ngə Bayzlav mbeh kə yah angər kin.’ 10 Am liɓde məpərmay mana a yəki hin ɓabəgwən, hin kə sliɗ kə va kin a bəgo za. Mandal hin tu kə sliɗ kin, hin kə va am lay ɓas ngatan, hin kə ceɗenta mgban mgban kaɗ : 11 ‹Yikwan ma tih kirbitil təm ngaz ngiykwan tə liɓde ngikin kaɗ, kə jan hin kə sən a kimin, hin tu ɗiyi yikwan təkən mə ngav ngav. Mə sən kaɗ, yikwan mə yah kə ceɗi hin bay ngə Bayzlav mbeh kə yah angər kin.› Mana hin tu luwenta atəgo , hin kə sliɗ kə va kin acin. 12 Ta ceɗe hin, am pic Bayzlav tu kə zla dalgway, dalgway hidi mə zeli ma ngikin səna avə kə ɗiy day kə ngə hidi tə liɓde Sodom.›› Hidi mə zeli mə ngə Yesu (Mt 11:20-24) 13 Yesu a luw baha: ‹‹ Mə zlimu, hin hidi tə liɓde Korajin avə hin hidi tə liɓde Betisayda. Kata ceɗe hin, banay mordoy av kə yah atalan kin. Law law wər təkən ma tuwnha kata mə ɗiyu a liɓde ngikin, mana tə ɗiy a liɓde Tir avə Sidon wər, hidi təbəgo av kə luwta, mana yikwan mə sən zaba, av kə hanigi kadaban mə ngavngav ngatan ta micek, kadaban a mayi kə buwi nəv ngatan kaɗ. 14 Ta ceɗe hin, am pic dalgway ngə Bayzlav, dalgway ngikin av kə ɗiy day ngə ngatan. 15 Hin, hidi tə liɓde Kaparnahum, mə ce gingin Bayzlav av kə kafe hin ha wəzlav day kə hidi mə pərmay vu? Ta ceɗe hin, pic takan hin məv kə səroh kəla am lay mimcigi.›› 16 Ma ndəl hidi tə liɓde ma par par atəgo za, ɗiya luwenta a wəriy gawliy ngetik bah: ‹‹ Hidi mə zlimiy mə ngikin, a zlimiy mə ngaɗ təm, hidi mə zeli hin, a zeli kata təm, za hidi mə zel kata, a zel Vay Bayzlav mə zlənak ku.›› Mə zlən zləni ngə Yesu a zəzayigi 17 Pic məpərmay,mə zlən zləni ngə Yesu ma ngər cisaray atalan saray mə jəɓi tan za acin angər Yesu. Nəv ngatan nek godokwən. ɗiya luwenta: ‹‹ Mordoy, ko musurufigi a njə kə zlimiy mə ngiykwan, yikwan mə njə kə gam ta a kəsəm hidigi avə zlim ngəkoh, a njə kə pəti tan.›› 18 Yesu ɗiya luwenta: ‹‹ Kat tu lim Musuruf a ndəva wəzlav za angaw mana von ta wəciɗ. Tanjinhi a kəz am nəv ngər ngaɗa ɗaba. 19 Hin mə sən za, kata tu vəle hin gədan kə jak ngaz atalan Musuruf, təkən ngə ɗiye hin ɓaɗakwən. Ko hin tu jak ngaz atalan wən, ko atalan herdi, təkən ngə ɗiye hin ɗahkwən . 20 Amma mə gər kə zəzay kadaban musurufigi ta njə kə zlimiy mə ngikin kwən. Geleɓ mə zəzay ɗər, kadaban Bayzlav mə ɗəɗef zlim ngikin za a dibizlav, hin hidi ngetik.›› 21 Yesu ɗiya zəzay, Mbiɗ ngə Bayzlav tə kəsəm ngetik acin mə vəlen zəzay. Nap səban Bayzlav, ɗiya luweni: ‹‹ Vay, hoh acin Mordoy məmar dibizlav avə talan mahayək. Ta ɗiyoh soko kadaban hidi njə bərngəzl talan ngatan a zlər bugwən, hoh tu zlər nəv ngatan kaɗ kə zlimiy mə ngəkoh. Za ngə hidi mə ɓen ɓen avə hidi njə bərngəzl talan mə zlər zlər, hoh tu tpizlik bərngəzl talan ngatan kaɗ. Yaw Vay, ta ɗiyoh soko kadaban hoh tu may təkəniy nhi kə ɗiy atəgo .›› 22 Ma səban Bayzlav za, ɗiya luwenta a hidigi : ‹‹ Vay tu vəlak təkən cike, kata kə mar tik. Za koh hidi takan mə sən nəv ngaɗa ɗahkwən. Sana Vay a gendik acin mə sən nəv ngaɗa. Za bah, koh hidi takan mə sən nəv Vay ɗahkwən. Sana kat, kərti tik acin mə sən nəv ngetik a gendik avə hidi məpərmay kata mə may kə ceɗenta.›› 23 Ma luwenta a hidi cike za, ɗiya luwen a wəriy gawliy ngetik: ‹‹ Ta luwe hin, hin wəriy gawliy ngaɗa, nəv ngikin mə ɗiy nek, kadaban təkən ma par par Bayzlav ta njə kə ɗiyu, həriy ngəkin a lim tik. 24 Ta ceɗe hin, aməcek mokotufi ngə Bayzlav avə bayigi dolom tu may tə godokwən kə limi təkəniy hin ta njə kə lim ma tanjinhi, za ko a lim tə ɓabəgwən. Tu may tə godokwən baha kə zlimiy təkəniy hin ta njə kə zlim ma tanjinhi, za ko a zlim tə ɓabəgwən.›› Ma məngaɓngaɓ atalan hidi mə ɗiy malaw 25 Gwedek mordoy jəgwan məpərmay va angər Yesu. A may kə sən madaba gana ngetik, ko av kə luwen a ciki. ɗiya luwenni acin: ‹‹ Aw Mordoy, a ceɗek sək may, kata kə ɗiy mi kə jan micin matak way ?›› 26 Yesu ɗiya luweni: ‹‹ Məzugzug təm deftere Musa a luwa yikwan aceki ? Za hoh ta njə kəjangi tik, hoh njə kə zlim aceki ?›› 27 Mordoy jəgwan səna ɗiya luweni: ‹‹ Məzugzug ngiykwan a luw: ‹A may Babay koh Bayzlav avə nəv koh takan, avə bərngəzl talan koh cike, avə gədan koh cike, za ma vəl talan koh a sin.› Za məzugzugwa ngiykwan a luw bah: ‹A may coloh mana hoh ta may talan koh.› ‹‹ 28 Yesu ɗiya luwenni acin: ‹‹ Yaw, hoh mə sən za law law. Tanjinhi a sliɗ a va ma ɗiy atəgo dab, za hav kə jan micin matak way.›› 29 Mordoy jəgwan tafnan səna ma zlim atəgo za, ɗiya ngəway atalan mə səna. luwenni a Yesu: ‹‹ Cal ɗa kata tu kə may səna acin yi?›› 30 Za kə jan kə zlim law law, Yesu diw kə ceɗen avə ma məngaɓngaɓ acin. ɗiya luweni: ‹‹ Pic takan hidi məpərmay, səban Yahudigi sliɗ am liɓde Ursalima za, kə va a liɓde Zeriko. Am ta va a mozlokotuf, njoɗ məhəligi yigi. Njap kaw ta, bazl bazlen tə wəzl nha hidi səna ndəv a kayək, mbeh kə məc. A ləkwət tə kəsəm ngetik, cok tə gandan, si tan. 31 Gwedek hidi məpərmay, mə mbəzl ma təm jik Bayzlav, vənen gawal mə wəzl tə səna, a ton a bəgo. Yah girjik atalan tik, hor mozlokotuf tik, vətik. 32 Gwedek bah hidi Levi mə njə kə ɗiy kəzəɗ təm jik Bayzlav a ton a bəgo. Sin vənen gawal səna baha. Yah girjik atalan tik, hor mozlokotuf tik, vətik. 33 Gwedek acin hidi məpərmay, mbuluk təm səban ngə Samari a ton təm a bəgo. Yah girjik atalan gawal tafnan səna. Ma lim za, kaymah ngetik gaseni. 8:1,5,14-17,25; 9:31 34 Gar kaɗ, va angər tik, saf saf, za a mbəlah tə kəsəm tik goh goh kaɗ. Wət mandərəc tiɗek tiɗek a kimin, paɗ paɗ kaɗ law law, wət vərək adəwən nden nden ngetik acin, vətik avə sin. Va janiy de ngə hidi məpərmay, am lay wan mbulukigi. Ma hosigi za, wanigi kaɗ bugo. Gawal səna ɗew a jagwar tik kə puw tik. 35 Lay ma dan za, sliɗ kə va tik acin a kibik. luwen a gawal njə de səna: ‹Ngwalay ɗa, təv ɗa mbuluk, ma puw hidi ngaɗ nhi law law. Ndah, ta vəloh suloy nhi am ngəra. Təv kə jəɓaha. Mana hoh tu ngav suloy day kə kata mə vəloh nhi wər, ma ceɗek ku, kata kə wərəkoh kaɗ am lay tik.› Ma luwen atəgo za, sliɗ vətik acin.›› 36 Yesu ma way ceɗ ma məngaɓngaɓ za, ɗiya luwen a mordoy jəgwan mə neh tik tafnan nhi acin: ‹‹ Adab hidi ma makaɗ nhi, hidi ngayi mə may gawal məhəl mə wəzlt anhi, mana ta may talan tik wər yi?›› 37 Mordoy jəgwan səna luwenni acin: ‹‹ Hid mə saf kaymah ngetik.›› Yesu luweni: ‹‹ A sliɗ ma və koh, za ma ɗiy a səna.›› Yesu a wan a de Marta avə Mari 38-40 Adəwən səna Yesu avə wəriy gawliy ngetik sliɗi kə vi tan a kibik. Vi vigi, gwedek hosigi a liɓde məpərmay. A liɓde səna, werti məpərmay a wan bəgo, zlim tik Marta. A wani avə galmən Mari. Yesu avə wəriy gawliy ngetik ma hosigi za, vigi a de werti səna. Marta yək ta ngər səsəray. Njoɗ va ten tə gəda. Kəzəɗ day godokwən atalan tik. Am ta ɗiy kəzəɗ səna Mari wər, mə ɗewe kaɗ a bər Yesu. A zlim ma sin ta ceɗ tik. Marta ma lim za, ɗiya luwenni a Yesu: ‹‹ Mordoy, a saf kata juway kəzəɗ kata a gendik nhi wər, aceki ? A luwen a galmay tugo, mə yah mənak səka.›› 41 Yesu ɗiya luwenni acin: ‹‹ Marta, ngəkoh hoh wəzl kəsəm koh kə ɗiy kəzəɗ ma par par, za hoh ɓən day day atalan tik. 42 A zlim, təkən malaw məpərmay ɗaha hoh kə ɗiy tik. Galmoco acin mə ɗiy təkən malaw səna. A geɗ kaɗ, mə zlim ləbar ngaɗa.››