Ɗaw kə tari Bayzlav aceki ?
(Mt 6:9-13; 7:7-11)
11
Pic məpərmay Yesu sliɗ vətik am lay məpərmay kə tara Bayzlav a bəgo. Ma tara Bayzlav za, kər gawal ngetik takan va angər tik, ɗiya luweni: ‹‹ Mordoy, a jəgwaniy yikwan kə tar Bayzlav səka mana Yuhana mə jəgwanen a wəriy gawliy ngetik.›› 2 Yesu ɗiya luweni: ‹‹ Mana hin ma gər kə tar Bayzlav, hin kə luw anhi : ‹Vay ngiykwan tə dibizlav, Hoh acin ma kweɗek, hidi cike mə səbanigi. Hoh acin bay, a yah, ma mar yikwan. 3 A vəli yikwan zəm hoyhoy . 4 A geɗ mə ngavngav ngiykwan kaɗ mana yikwan mə njə kə geɗin a hidi mə ɗiyi yikwan mə ngav ngav.Hoh gər kə geɗ mozlokotuf a Musuruf kə lebeɗi yikwan kə ɗiy mə ngavngav kwən.› ‹‹ 5 Yesu ɗiya ceɗenta ləbar baha atalan tar Bayzlav a wəriy gawliy ngetik. A luw: ‹‹ Hid məpərmay ɗaha, jan mbuluk avə dab dab vuɗu, za təkən ngə zəm angər tik ngə vəleni ɗahkwən. Sin sliɗ va angər ngwalay tik, fəɗa kaɗ, luweni: ‹Ngwalay ɗa, kata tə yah angər koh kə tar. 6 Kata mə jan mbuluk ma hək za, ay tanjinhi, za təkən ngə zəm angər ɗa ngə vəleni ɗahkwən .’ 7 Ngwalay tik səna zlaweni a jik za: ‹Hoh dangarak kwən, kata mə pek mijijik kaɗ, za yikwan mə wana kaɗ avə wəriy ɗa. Tə jan kə sliɗ, za kə vəloh kwən 8 Ko mə luwen atəgo səna, gawal nhi a wəlen a təs tik dap. Ta ceɗe hin, adəwən səna njə de nhi garaha kə vəlen təkən ngə zəm. Mə sliɗ kə vəlen təkən ngə zəm nhi, kadaban sin ngwalay tik kwən, kadaban mə gboren ma day day. 9 Yo, ta ceɗe hin, mana hin ma tar Bayzlav, hin kə ɗiy atəgo təm. Mə tar təkən angər Bayzlav, av kə vəle hin. Mə jar təkən angər tik, hin məv kə jan tik. Za mə ɗefenma baha, av kə zle hin wəla. 10 Kadaban ko yi mə tar təkən, av kə vəlen ta. Ko yi mə jar təkən, av kə jan tik. Za ko yi mə ɗef ma, av kə zlen tə wəla. 11 Yo, babay wərigi ɗahigi a dab kin awənhi. Mana kər tu tar kilif angər babay tik, av kə vəlen wən vu? 12 Mana tu tar ndezli, av kə vəlen herdi vu? 13 Hin hidi mə ngavngav diga mbuwa kin, hin ma sən kə wət təkən malaw, za kə vəlen a wəriy kin, sakwanta Babay kin tə dibizlav ɗər vu? Av kə vəl mbiɗ ngetik a hidi ngetik mə njə pəlta.››Gədan ngə Yesu ngə gam musuruf
(Mt 12:22-30; Mk 3:20-27)
14 Hidi məpərmay ɗaha, musuruf a wan kəsəm tik. Musuruf səna acin mə tak tik kə zləgam. Pic takan Yesu gam musuruf tə kəsəm tik səna kaɗ. Njoɗ gawal səna diw kə zləgam acin. Hidi mə ɓas ɓasi mə lim ta, pəraslenta bərngəl talan tan, a luw ta: ‹‹ Kay gawal nhi a ɗiy təkən nhi a ciki?›› 15 Hidi məpərmay tə dab tan ɗiya zləgamigi atalan Yesu: ‹‹ Belzebul, bay musuruf acin mə vəlen gədan kə gam musuruf a kəsəm hidigi za.›› 16 Hidi məpərmay bah a mayi kə səni madaba gana ngə Yesu. ɗiya luwenta: ‹‹ Hoh ɗiy avə gədan ngə Bayzlav wər, a ɗiyi yikwan təkən ma tuwnha məpərmay, yikwan kə sən tik.›› 17 Njoɗ Yesu mə sən nəv tan za. ɗiya luwenta avə ma məngaɓngaɓ acin: ‹‹ Hin mə sən za, mana a liɓde ma takan hidi mogroyigi a bərazli kəsəm am walan tan wər, liɓde səna av kə cakway njoɗ kwən vu. Za jikigi av kə gomigi cike way za. 18 Ya za acin, mana bay musuruf a jəgəmigi avə celen musuruf tik wər, kəzəɗ ngetik av kə va a kibik a ciki? Av kə ngav kəzəɗ ngetik dap. Za ngikin acin, hin ma luw, Belzebul bay musuruf acin mə vəlak gədan kə gam musuruf a kəsəm hidigi za. 19 Mana kata tə gam musuruf avə gədan ngə Sayɗanu bay musuruf səna wər, hidi ngikin a njə kə gam ta avə gədan ngayi? Kay, hidi ngikin nhi mə ɗiyi kəsəɗ av gədan ngə Bayzlav, av kə ɗiye hin dalgway. 20 Ta ceɗehinkaɗ, Bayzlav acin mə vəlak gədan kə gam musuruf a kəsəm hidigi za. Za Bayzlav ta njə kə vəlak gədan kə gam musuruf a kəsəm hidigi səna, a ɗiy za hin kə sən tik a kimin za, bay ngə Bayzlav tu hos a dab kin.›› 21 Yesu ɗiya ceɗ ma məngaɓngaɓ məpərmay bah. A luw: ‹‹ Mana hidi njə gədan tu sləsləɓ kəsəm avə gəlam kə puw de ngetik, aray sin məmar cike təkən ngə mbəlen tik ɗahkwən . 22 Amma hidi məpərmay njə gədan ma day kə sin tu yah, av kə jəgəmigi. Mana mə jəgəmi za, gawal mə day sin səna av kə bacen ngaz am wəla. Av kə moh gəlam ngetik, sin mə vərək ɓən ngetik a kimin nhi. Za av kə moh aray ngetik cike wayza kə sliɗ kə va tik avə sin kə wəzaken a celenigi.›› 23 Adəwən səna acin, Yesu ɗiya luw: ‹‹ Ta ceɗe hin, hidi mətak zler ma avə kata, mosum ngaɗa. Za hidi mətak mənak ku am kəzəɗ, av kə cakway kəzəɗ səna.››
Jəɓah ngə musuruf a kəsəm hidi
(Mt 12:43-45)
24 Yesu luw bah: ‹‹ Ta ceɗe hin, musuruf ta njə kə pətaha a kəsəm hidi za, a njə kə va a dab donu kwac a wəta, kwac a wəta kə jar lay ɗew. Mana tu jar lay, jar jar, a jan ɓabəgwən, av kə luw: ‹Kay, təv kə jəɓ ɗa kə va am lay ɗa, kata mə ɗew təbəgo ta micek.’ 25 Mana tu jəɓaha, av kə jan lay ɗew tik tə kəsəm gawal səna mə zlaɗa kaɗ kweɗek kweɗek, za mə zaɓa kaɗ law law. 26 Mana tu jan atəgo , av kə jəɓ kə va donu kə va kə ngazla celen musurufigi məpərmay cisaray ma lem day kə sin. Mana mə yi za, av kə pətigi sirif a kəsəm gawal səna kə ɗewigi am lay malaw səna. Mana tu ɗiya atəgo , wək ngə gawal səna av kə ɗiy day kə ta micek.›› 27 Yesu ma zləgam atəgo , werti a dab hidi mə ɓas ɓasigi ɗiya cə wəla, ɗiya luwen a Yesu: ‹‹ Nəv ngə werti mə mbuwoh, za mə vəloh wa, mə ɗew avə zəzay.›› 28 Za Yesu luweni: ‹‹ Zəzay ɗər ɗaha day a hidi mə zlimiy ləbar ngə Bayzlav, za a səb ta.››
Təkən ma tuwnha atalan Yesu ɓəw atalan Zonas
(Mt 12:38-42)
29 Hidi dolom ɓasigi baha a jagwar Yesu, Yesu luwenta: ‹‹ Hin hidi ma tanjinhi, hin lem. Ngikin ma may kata kə ɗiye hin təkən ma tuwah, za hin kə sən a kimin za Bayzlav acin mə vəlak gədan. Amma tə ɗiye hin təkən ma tuwnha məpərmay kwən. Səna kə way avə təkən ma tuwnha Bayzlav mə ɗiy tə talan Zonas dap, mokotuf ngə Bayzlav mə zlən taməcek kə va kə ceɗen ləbar ngetik a hidi Ninive. 30 Bayzlav tu ɗiy təkən ma tuwnha atalan Zonas, hidi Ninive kə sən ta, Bayzlav acin mə zləna tik. Bayzlav avə kə ɗiy təkən ma tuwnha baha atalan ɗa Hidi Bayzlav mə zlənaha,ff mana sin mə ɗiy tə talan Zonas, hin hidi ma tanjinhi, hin kə sən tik Bayzlav acin mə zlənak ku.f 31 Ta ceɗe hin, am pic Bayzlav tu kə zla dalgway hidigi, bay werti miy mandan sənan, a mə lay ma guduk za, av kə ce hin wəla am dalgway, hin hidi ma tanjinhi. Kadaban sin, ma zlim bay Suleymanu a wana avə bərngəzl talan malaw, sliɗ am lay ma guduk za, kə va kə zlim ləbar ngetik. Amma hin, hin ma may kə yək ləbar ngaɗ kwən, za ma kata day kə Salomon. 32 Za bah am pic Bayzlav tu kə zla dalgway a hidigi, hidi Ninive av kə yigi kə ci hin wəla am dalgway təm, hin hidi ma tanjinhi. Ngatan, Zonas ma ceɗenta ləbar Bayzlav za, ci ngəra atalan mə ngavngav ngatan, za buwi nəv ngatan kaɗ. Amma ngikin, mə zlim mə ngaɗa kə buw nəv kin kaɗ bugwən. Za ma kata day kə Zonas səna.››
Nəv ma kweɗek, wa pitərla
(Mt 5:15; 6:22-23)
33 Yesu ɗiya luw bah: ‹‹ Hin mə sən za, hidi a mbəl cəbelbel za kə ɓah kaɗ ɗahkwən, ko kə jəɓ avə tasaw ɗahkwən. Hidi a njə kə mbəl za kə ɗer am lay ma fal kə zləzlaɗ lay, hidi ta kə pəti a jik, kə limi lay kweɗek kweɗek. 34 Yo, hin mə sən za təm, həriy ngiykwan a njə kə zləzlaɗ ɗew ngiykwan mana cəbelbel mə njə kə zləzlaɗ lay. Apica mana həriy koh a lim lay kweɗek kweɗek wər, ɗew ngəkoh av kə ɗiy am lay ma kweɗek təm. Mana həriy koh a lim lay lawlaw ɗahkwən wər, ɗew ngəkoh a wan am lay ma zigwit təm. 35 A kaw talan koh acin law law, zləzlaɗ ngə Bayzlav təm nəv koh mə gər kə mbaɗ kə lay ma zəgwit kwən. 36 Mana nəv kin tu ɗiy kweɗek kweɗek, za ko gbizlik gwedek ɗah a kimin kwən wər, kəsəm ngikin avə kə ɗiy cəcay cəcay mana batay mə njə kə zləzlaɗ lay atalan kin.››
Yesu avə Farisagi ɓəw mordoy jəgwan ngə Yahudigi
(Mt 23:1-36; Mk 12:38-40)
37 Yesu a zləgam, hidi Farisa takan sliɗ va angər tik, ɗiya luweni: ‹‹ Nakam a de ngaɗa kə zəma gəda.›› Sliɗ vigi acin. Ma hosi za, Yesu ɗew kaɗ kə zəm gəda mətak pan ngər mana məzugzugwa ngə didi ngatan ta njə kə ceɗu. 38 Farisa səna ma lim za, tu pərasl bərngəzl talan ngetik, kadaban ngatan hezi. 39 Njoɗ Yesu mə sən ɓən ngetik za, ɗiya luweni: ‹‹ Haya hin Farisagi, ngikin mə njə kə goh duwən kendek ngə sa yəm kin ɓəw duwən waslak ngikin goh goh law law. Amma təkən ta liɓ za ma hidi a lim ɗahkwən, ma ɓən atalan nek ngetik ɗahkwən. Mana kə luw kaɗ, nəv ngikin wek avə ɓən ngə həl təkən hidigi, ɓəw ngə ɗiy təkən mə ngavngav baha. 40 Haya hin hidi njə bərngəzl talan ma toy toy nhi. Hin mə ɓən wər, Bayzlav mə ɗiy təkən tadəwən hidi mə njə kə lim tik, acin mə ɗiy təkən ta liɓza təm kwən vu? 41 Yo tanjinhi mə ɓən səka acin atalan nəv ngikin ma hidi a limta ɗahkwən. Mə wət təkən zəm təm waslak kin səna, mə vəlen a matakwanigi. Mana hin tu ɗiy atəgo , təkəniy kin cike avə kə ɗiyi kweɗek kweɗek a kibik Bayzlav. 42 ‹‹ Haya hin Farisagi nhi, ta ceɗe hin, banay mordoy av kə yah atalan kin. Ngikin, a dab təkən cike hin məmaru, mə njə kə wel təkən takan a dab təkəniy ma gəɓ kə vəlen a Bayzlav. Za koh am təkən mecicerigi ma mə njə kə ɓiy wili, ɓəw vidiɗ wili məpərmay ma par par, mə njə kə ɗiy mana sin baha. Amma təkən Bayzlav mə may hidi kə ɗiyu, hin geɗ kaɗ. Təkən sin ta may wər, hin kə ɗiy təkən cike avə mozlokotuf tik, za hin kə may Bayzlav avə nəv takan. Təkən nhi acin təkən mordoy am həriy ngə Bayzlav. Adəwən səna law təm hin kə wət təkən takan a dab təkəniy gəɓ hin məmaru, kə vəlen a Bayzlav. 43 ‹‹ Haya hin Farisagi nhi, ta ceɗe hin, banay mordoy avə kə yah atalan kin. Am jik jəgwan ngə Yahudigi mə njə kə may kə ɗew rap abəgo, hidi kə safi hin. Za am lay ɓas mə njə kə may hidigi kə daɓi kaɗ kə ɗe hin mbeli mana hidi mogroy. 44 Ta ceɗe hin, banay mordoy av kə yah atalan kin. Hin wa talan civi mə vəvay vəvay, hidigi ta njə kə vigi atalan tik za, a sən ta mimci mə wər wəra awan bəgo bəwən.›› 45 Hidi ma zlim ta atəgo za, mordoy jəgwan məpərmay ɗiya luwen a Yesu acin: ‹‹ Mordoy, hoh ta luw atəgo nhi, hoh tu ra yikwan təm.›› 46 Yesu luweni: ‹‹ Hin mogroyiy jugwan, banay mordoy av kə yah atalan kin təm. Ngikin, mə njə kə luwenta a hidigi kə ɗiyi təkən mə njə kə pərasl bərngəzl talan ngatan, za ngikin mə njə kə ngəjeh kəsəm kin. 47-48 Ta ceɗe hin, banay mordoy av kə yah atalan kin. Aməcek didi ngikin tu wəzli mokotufi ngə Bayzlav kaɗ. Za ngikin acin, hin ndən talan civi ngatan kə ngəm lawlaw kəɓən atalan tik. Hin mə ɗiy atəgo , hin mə yək kəzəɗ didi ngikin mə wəzli mokotufi səna. 49 Bayzlav avə bərngəzl talan ngetik malaw tu luwen a didi ngikin atalan təkəniy səna: ‹Təv kə zlənenta mokotufi ngaɗa ɓəw hidi məpərmay məv kə ceɗi ləbar ngaɗa a hidigi. Hidigi avə kə ɗiyenta mə ngavngav a hidi məpərmay tə dab tan, za məpərmayigi av kə wəzl tə kaɗ.’ 50 Ta ceɗe hin, tanjinhi, hin hidi ma tanjinhi, dalgway didi ngikin, mə wəzli mokotufigi səna dəga am diw talan mahayək, av kə yah atalan kin. 51 Tu wəzli mokotufi ngə Bayzlav ma par par, diw am Habila hos am Zakari mə wəzl ta am walan jik ngə Bayzlav avə lay ta njə kə fatenta təkən a Bayzlav a bəgo. Yaw ta ceɗe hin, dalgway ngə hidi mə wəzli hidi nhi səna, av kə ndəv atalan kin, hin hidi ma tanjinhi. 52 ‹‹ Ta ceɗe hin, hin mogroyiy jugwan, banay mordoy av kə yah atalan kin. Hin tu lap ləbar Bayzlav avə ɓən ngikin, hidi kə ɗewiy mətak səni ləbar Bayzlav. Hin avə talan kin ma, ma sən ɗahkwən. Za acin hidi mə mayi kə sən tik, mə njə kə tak tə kaɗ.›› 53-54 Yesu ma ngəz mogroyiy jəgwan ɓəw Farisagi za, sliɗ kə va tik. Za ngəz sin mə ngəz tə nhi, a hamenta nəv day day. Dəga am pic səna, ɗiya jariy Yesu kə səni madaba gana tik. A njə kə neh ta atalan təkən ma par par, kə safta ko av kə ler ma mə ngavngav wər kə kaw ta f 11:30 Təkən ma tuwah, Bayzlav tu kə ɗiy atalan Yesu, wan saray mə makaɗ tik avə kə mbəlaha am məc za.