Mə kaw talan kin am zləgam ngə kin!
(Mt 10:26-27)
12
Mandal təkən sən ta ɗiy, hidi mə ɓasigi za dolom, ha ɗiya jaki ngaz atalan ngaz ngə celenigi. Yesu ɗiya luwen a wəriy gawliy ngetik acin: ‹‹ Zagway, mə kaw talan kin lawlaw avə njem ngə Farisigi. Mana kə luw kaɗ, mə kaw talan kin avə ma ta njə kə njol ta. 2 Kata ceɗehin, angər Bayzlav wər ɓən cike təm nəv hidigi av kə ɗiy mgban nga. Ma mə ɓah ɓah, av kə sən. 3 Kadaban səna, ta luwe hin təm, hin wəriy gawliy ɗa: Ma hin mə zləgam avə celekin avə ɓah, av kə pətah am lay ma varak hidigi kə zlim ta. Ma hin mə səsekin a celekin, hidigi av kə gari am lay ma fal kə zləgami mə səna.››Mə gər kə hovok avə hidi kwən!
(Mt 10:28-31)
4 Yesu a luw: ‹‹ Ta luwe hin ngwalay ɗigi, mə gər kə hovok avə hidi mə njə kə wəzli hidi kaɗ kwən. Ngatan tu hosi gəga kə wəzl hidi kaɗ, amma, a ɓəs kə ɗiyehin təkən day kə nhi kwən. 5 Anhi, hidi hin tu kə hovok avə sin ɗər: Mə hovok avə Bayzlav, sin mə hosoh gəga kə wəzl hidi dap kwən,mə hosoh za gəga kə fək hidi am kuhu baha. Yo, ta ceɗehinbah, hidi hin tu kə hovok, sin acin hidi tugo. 6 ‹‹ Hin mə sən za, vigin ma cicer a njə kə səkəm ta joɓən, suloy saray. Za ma, Bayzlav a zlay vigin ko takan tə dap tan bugwən. 7 Za hin baha, ko suson talan kin cike ma, Bayzlav mə nəf kaɗ. Mana atəgo wər, hin mə gər kə hovok kwən. Mə saf ko vigini ma dolom, talan Bayzlav a zlay a kimin ɗahkwən, geɗ hin ɗer kaɗ vu? A zlayehin kwən.››
Mə gər kə ɗiy weli avə zlim ngə Yesu Kristu kwən!
(Mt 10:32-33; 12:32; 10:19-20)
8 Yesu ɗiya luw: ‹‹ Mə zlim ləbar ngaɗ bah. Hidi mə səb mozlokotuf ngaɗa, za mə ceɗ mgban kaɗ a kibik hidigi : ‹Tə njə kə səb mozlokotuf ngə Kristu,› kata Hidi mə yah ta ngər Bayzlav za, təv kə ceɗ tik a kibik mbaslayi ngə Bayzlav ‹Gawəl nhi, hidi ngaɗa.’ 9 Amma hidi mə səb mozlokotuf ngaɗa, za luw mgban kaɗ a kibik hidigi : ‹Kata sən Kristu ɗahkwən,› kata Hidi mə yah ta ngər Bayzlav za, təv kə ceɗ tik təm a kibik mbaslayi ngə Bayzlav: ‹Kata sən gawal nhi ɗahkwən .’ 10 Yo, hidi mə luw ma mə ngavngav atalan ɗa, kata Hidi mə yah ta ngər Bayzlav za, Bayzlav av kə geɗ mə ngavngav sin mə ɗiyak nhi kaɗ. Amma hidi mə rə Mbiɗ ngə Bayzlav, mə ngavngav ngetik a geɗ kwən. 11 Yo, mandal pic sən mə hoso za, hidi məpərmay av kə tepiy hin angər hidi Yahudigi, mə njə kə zliy dalgway təm jik jəgwan ngatan, ɓəw kə tepiy hin angər bayigi avə mogroyigi məmariy lay. Mana tu tepiy hin, mə gər kəɓən day atalan ma hin tu kə zləgam kwən. 12 Am pic mə hin tu kə zləgam səna, Mbiɗ ngə Bayzlav av kə ceɗehin zləgam hin tu kə zləgam səna.››
Hidi mə njə nja mətak bərngəzl talan
13 Hidi məpərmay tə dab hidi mə ɓas ɓasi səna yah angər Yesu, ɗiya luwenni acin: ‹‹ Mordoy, a luwen a galmay, yikwan kə zəm de babay ngiykwan avə sin.›› 14 Yesu ɗiya luweni: ‹‹ Hoh gawal cah, Bayzlav a zlənak kə wəzak aray kin ɓəw kə zaɓ ma təm walan kin vu?›› 15 Yesu ɗiya luwen a hidigi cike acin: ‹‹ Mə kaw talan kin lawlaw avə tamah ngə ɓas aray, kadaban micin a jan avə aray ɗahkwən. Koh hidi mə njənja a jan micin avə aray tik kwən. 16 Adəwən səna, sin luwenta ma məngaɓngaɓ məpərmay, kə jan kə zlim law law: Hidi mə njənja məpərmay ɗaha, Hidi mə biz biz. Ma biz biz za, təkən zəm tu ɗiy day day. 17 Sin ɗiya ɓən a nəv za: ‹Tanjinhi kata kə ɗiya a ciki? Ndah lay ngə zek təkən zəm ngaɗa gəɗak.’ 18 Ma ɓən ɓən za, ɗiya luw: ‹Kay, tanjinhi kata tu sən təkən kata tu kə ɗiy tik acin. Təv kə nder debin ngaɗ cike way kaɗ, kə ndən mogroyiy malaw. Za təv kə zek təkən zəm ngaɗa cike a kimin, ɓəw aray ngaɗigi cike. 19 Mana kata tu ɗiy atəgo , təv kə həɗəkay ɗa acin. Təv kə luw: Kay, kata tu biz təkən zəm day godokwən, av kə hos di ndas, kata zəm tik. Təkən ngam bami ma angər ɗa ɗahkwən nhi? Tanjinhi təv kə nəpay ɗa kə ɗew mətak biz acin, kə zəm təkən zəm ngaɗa, kə sayɗa təkən ngə sa mana nəv ngaɗ mə mayu, za təv kə ɗewey ɗa ɗew malaw acin.’ 20 Am mandal ta ɓən atəgo , Bayzlav ɗiya luweni: ‹Hoh gawal bərngəzl talan ma toy toy cah, av vuɗ nhi, hav kə məc. Za acin təkən hoh mə ɓasu nhi, av kə zəm ta kwən vu?› ‹‹ 21 Yesu ma way kə zləgam ma məngaɓngaɓ nhi za, ɗiya luw acin: ‹‹ Koh hidi ngayi mə ɓas aray təm talan mayək nhi, av kə ɗiy a səna. A njə kə ɓasi ngə talan tan a gendik, a kibik Bayzlav taniy matakwan hidigi .››
Təkən cike, Bayzlav acin mə njə kə vəltik
(Mt 6:25-34)
22 Yesu ɗiya luwen a wəriy gawliy ngetik acin: ‹‹ Ta luwe hin, mə gər kəɓən day atalan təkən ngə zəm kwən. Za mə gər kəɓən day təm atalan ləkwət kwən. 23 Kadaban təkən ngə zəm a sla avə micin ngə hidi ɗahkwən, za ləkwət a sla avə kəsəm ngə hidi ɗahkwən . 24 Mə saf məngərkakakigi, a bizigi ɗahkwən, za a ɓasi təkən ngə zəm ɗahkwən. Guduk ngatan avə debin ngatan ngə zek təkən ɗahkwən. Ya za ma a ɗiyi sanha təkən ngə zəm ɗahkwən, kadaban Bayzlav a njə kə vəlenta zəm. A viginigi ma, a ɗiy atəgo , ya geɗ micin ngəkin hin hidigi ɗər vu? 25 Hin ta njə kəɓən day atəgo , mana Bayzlav tu may kə wət micin kin a pica wər, məv kə zlan wan tik kaɗ vu? Awwo, ko wan takan a zlan kwən. 26 Ya mana asəna, hin kəl kə zlan wan tik kwən wər, mə njə kəɓən day atalan təkən məpərmay kemi? 27 Yo, mə ɓən bah atalan pay tə donu mana ta njə kə ɗiyi fufon law law. Taniy a ɗiyi kəzəɗ ɗahkwən, a bi ləkwət ɗahkwən baha. Hin mə sən za, bay Suleymanu ta micek, avə mordoy ngetik, sin hidi mə njənja məmar ləkwət dolom. Za ma a dab ləkwət ngetik cike, ko ləkwət takan mə ngəmen mana fufon ngə pay nhi ɗahkwən . 28-29 Yo mə saf fufon a vah ɗahkwən. Hidi tu lim tik apica law godokwən, a pat tu yoɓ, za kuhu av kə kəɗaw kaɗ. Ko asəna, Bayzlav ma a njə kə ngəm ta kə ɗiyi fufon malaw. Za geɗ hin hidi kaɗ ɗər acin vu? Bayzlav avə kə kwəle hin ləkwət malaw. Yo a səna acin, mə gər kəɓən day atalan təkən ngə zəm ɓəw atalan təkən ngə sa, za hin kə naw kwən. Ta ceɗe hin, mana hin mə yək Bayzlav za lawlaw wər, hin mə ɓən atəgo kwən. 30 Ɓən man anhi, hidi mətak səbiy zləgam Bayzlav acin ta njə kəɓən ta matak nəp. Amma hin wər, Babay kin Bayzlav ɗaha. Za ko a pu, talan tik slekke atalan kin kə vəle hin təkən cike ma hin məmar bugwən. 31 Ta ceɗe hin, mə vəl talan kin ɗər a Bayzlav kə mar hin. Mana hin tu ɗiy atəgo , Bayzlav av kə vəlen hin təkən cike ma hin məmar bugwən. 32 ‹‹ Yo, hin wəriy gawliy ɗa, kata mə sən za, hin ɗa day kwən, amma ta luwe hin, mə gər kə hovok kwən. Nəv ngə Babay kin Bayzlav a zəzay atalan kin, kə tepiy hin am lay sin məmaru, hin kə ɗew avə sin witik witik.››
Aray ma a ngav ɗahkwən
(Mt 6:19-21)
33 Yesu ɗiya ceɗenta mə məpərmay a wəriy gawliy ngetik. A luw: ‹‹ Tanjinhi mə ber aray ngikin kaɗ, mə wət suloy tik, mə vəlen a matakwan hidigi. Mə səkəm gabal ma a ngav ɗahkwən. Mana kə luw kaɗ, mə ɓas aray kin məpərmay a dibizlav. Aray təbəgo nhi a yoɓ am walan ngər za ɗahkwən, məhəl a jan mozlokotuf kə həl tik kwən, za nənəɓ a zəm kwən baha. 34 Kata mə luwe hin mana tugo, kadaban am lay hin ta njə kə ɓas aray kin, nəv ngikin awan bəgo təm.››
Hidi mə puwiy de
35 Yesu ɗiya luw: ‹‹ Mə gər kə zlay talan kaɗ kwən. Mə sləsləɓ kəsəm kin hoyhoy kə puw təkən məv kə hosoho. Mə ɗew avə variya, mə mbəl cəbelbel kin kaɗ təm. 36 Mə ɗew mana hidi mə njə kə sləsləɓi kəsəm ngatan kaɗ kə puwiy njə de tu kə jəɓaha am lay ngazl werti za. Mana mə hoso za, hidi tu zlimiy wəl ngetik, njoɗ av kə zləri bir mədigiɗ. Yo, ta luwe hin, mə ɗew avə variya mana hidi sən təm. 37 Mana njə de tu jəɓaha, nəv ngatan avə kə zəzay, kadaban sin a jan ta avə variya. Yo, ta ceɗehinkaɗ law law, njə de səna avə talan tik av kə sliɗ kə va kə wəta gəda kə vəlenta kə zəm. 38 Ko a yah dab dab vuɗu, ko avə zlalay, njə de səna tu jan ta avə variya wər, avə kə həmən ta, za nəv ngatan avə kə ɗiy nek godokwən. 39 Hin mə sən za, apica mana njə de mə sən za məhəl avə kə yah kə nder de ngetik wər, avə kə ɗew a variya kə tak kaɗ kwən vu? 40 Mə ɗiya atəgo , ta luwe hin acin, hin təm, mə ɗew avə variya ko a pu, kadaban kata Hidi mə yah ta ngər Bayzlav za, təv kə yə məndumndum.››
Hidi mə ɗiy kəzəɗ a de ngə hidi
(Mt 24:45-51)
41 Piyer luwen a Yesu acin: ‹‹ Aw Mordoy, hoh ceɗ ma məngaɓngaɓ nhi a yikwan a gendik vu, a hidi cike wayza?›› 42 Yesu zlaweni: ‹‹ A zlimu, tanjinhi təv kə ceɗeh ləbar atalan hidi məpərmay mə njə kə ɗiy kəzəɗ a de ngə hidi. A njə kə kaw kəzəɗ ngetik ngər səsəray, za a njə kə ɗiy tik avə bərngəzl talan malaw. Hidi mə njə kə ɗiy kəzəɗ mana səna, njə de tu kə sliɗ kə va mbuluk, avə kə vərək tik kə hidi mordoy atalan hidi mə njə ɗiyi kəzəɗ tik cike sin kə saf ta, za ler ngə zəm gəda mə hoso za, kə vəlenta təkən zəm. 43 Mana njə de mə jəɓa za, tu jan hidi səna a ɗiyi kəzəɗ ngetik law law, nəv ngə hidi mə puw de səna avə kə zəzay. 44 Ta ceɗehinkaɗ law law, njə de səna avə kə geɗen də ngetik cike wayza, sin kə puw tik. 45 Amma hidi mə njə kə ɗiy kəzəɗ nhi, tu ɓən za kə luw: ‹Kay mordoy ngaɗa a yah a de njoɗ kwən,› za avə kə diw kə wəzl mawəli avə wirzigi ta njə kə ɗiyi kəsəɗ avə sin a de, kə zəmay tik, kə say movu tik kə hayay tik. 46 Sin tu kə zlay talan tik kə ɗiy təkən mana tugo, njoɗ njə de av kə jəɓaha kə jan tik məndumndum. Mana tu jan tik, av kə wəzl tik, kə zlənen banay day godokwən, za av kə fək tik am lay hidi mə buwentadəwən a Bayzlav ta ɗewiy tə bəgo. 47 Yaw mindiwin, mana hidi mə ɗiy kəzəɗ tə de, mə sən nəv ngə njə de za, za a kaw kəzəɗ tə de səna ngər səsəray, kə jan kə fet nəv ngə hidi njə de bəgwən wər, njə de tu kəyah kə jan tik, av kə zlənen banay day godokwən. 48 Amma hidi mə ɗiy kəzəɗ ma a sən nəv ngə njə de ɗahkwən, ko tu ɗiy təkən məv kə dah wəzl atalan tik, njə de ɗa wəzl tik day kwən. Ta ceɗehinacin, mana Bayzlav tu vəl təkən dolom a hidi wər, av kə gər təkən dolom angər hidi səna baha. Mana tu vəl kəzəɗ mordoy a hidi kə ɗiy tik, a may hidi səna kə vəl talan tik cike wayza kə kaw kəzəɗ səna ngər səsəray.››
Yesu a yah atalan mahayək kemi?
(Mt 10:34-36; 16:2-3; 5:25-26)
49 Yesu ɗiya luw bah: ‹‹ Kat tiy am talan mahayək kə dah kuhu. Kata may kuhu nhi, kə zlaw tanjihi. 50 Amma sey kata avə talan ɗa, kata kə sa banay zagway, za acin kuhu səna kə zlaw. Tanjinhi nəv ngaɗa a mbir, av kə mbir ha hos am way tik. 51 Yo, hin mə ɓən wər, kata tiy am talan mahayək kə dah ɗew malaw a hidigi vu? Awwo, kata ceɗehin, tiy kə tpay hidigi kaɗ ɗər. 52 Dəga apica, hidi tə de joɓən av kə tpayi kaɗ par par. Hidi makaɗ a lapiy talan avə hidi ma saray kwən. Za hidi saray a lapiy talan avə hidi ma makaɗ kwən. 53 Babay kərti avə kərti tik a lapiy talan kwən. Za kərtawəl a lapiy talan avə babay tik kwən. Mamay kərti a lapiy talan avə kərti tik kərtaza kwən. Za kərtaza təm a lapiy talan avə mamay tik kwən. Za anhi baha: mamay kərtawəl a lapiy talan avə werti kərti tik kwən. Za werti kirti, a lapiy talan a mən zelen kwən.›› 54 Yesu ma way kə zləgam a wəriy gawliy ngetik za, ɗiya luwen a hidi mə ɓas ɓasi acin: ‹‹ Ngikin, mana hin mə lim gazlavay a madaba za ɗek ɗek wər, mə njə kə luw: ‹Kay, apica von av kə za,› za a njə kə ɗiy tiɗ tiɗe mana hin mə ləwu. 55 Za mana mbiɗ gudul a ca, mə njə kə luw: ‹Tər bay a diw,› za a njə kə ɗiy tiɗ tiɗe mana hin mə ləwu. 56 Ngikin, hin hidi mə njoli ma, a mə təkən ma par par təm talan mahayək nhi avə tə dibizlav, hin ma sən sla tik law law. Amma təkən ma par par mə njə kə ɗiy tə dab kin nhi, ma sən madaba təkən sən ɗahkwən, kemi? 57 ‹‹ Ma ɓən atalan ɗew kin təm talan mahayək nhi, atalan kin təm ɗahkwən kemi? Za ma ɗiy təkən avə mozlokotuf tik ɗa kwən kemi? 58 Yo, ta ceɗe hin, apica mana hidi tu coh wəla, hin ma va kə zla dalgway səna, ma mbəlam kə zaɓ mətik diga mozlokotuf za. Asənkwən av kə tepeh angər hidi mə njə kə zla dalgway. Za mə njə kə zla dalgway səna av kə vəloh angər sojigi, za sojigi səna av kə fəkigi am jik dangay. 59 Yo ta ceɗehinkaɗ, am jik dangay səna, hoh wərək suloy cike tiɗ tiɗe mana mə zligi bəgwən wər, a fəki kaɗ kwən.››