Cə ngəra kə jan micin
13
Mandal səna, hidi məpərmay yigi angər Yesu kə luwenta atalan hidi Pilatu mə wəzl tə kaɗ mimci, mandal hidi Galili səna a fatenta vəren tə de a Bayzlav. 2 Yesu luwenta: ‹‹ Mə ɓən wər hidi tə Galili səna, tu ɗiyi təkən mə ngavngav day kə hidi tə Galili məpərmay, makavay səna acin mə wəzl tə kaɗ mimci nhi vu ? 3 Mə gər kəɓən atəgo kwən, ko hin, ta ceɗe hin, mə cə ngəra kə buw nəv kin kaɗ asənkwən wər, hin məv kə məc cike wayza mana tanigi. 4 Ya hidi ma gəɓ atalan cəfaɗ cəfaɗ mə məcigi am liɓde Ursalima, jik ngə puw ma zoɗ təm maz mordoy Silowe mə gom tə talan tan nhi, mə ɓən wər mə ngavngav ngatan day kə hidi məpərmayigi təm liɓde Ursalima vu ? 5 Mə gər kəɓən atəgo kwən, ko hin, ta ceɗe hin, mə cə ngəra kə buw nəv kin kaɗ bəgwən wər, hin məv kə məc mana tanigi.››Ma məngaɓngaɓ atalan sikwiɗ ma a mbuw ɗahkwən
6 Adəwən səna Yesu ɗiya ceɗ ma məngaɓngaɓ məpərmay a hidi mə ɓas ɓas. A luw: ‹‹ Hid məpərmay ɗaha, kəlah sikwiɗ am tuz ngetik. Adəwən səna, ma hos am tər mbu tik, sliɗ və kə safatik, və jan a mbuw bugwən. 7 Hidi məmar tik a njə kə va kə di kə di, jəɓ makaɗ, ko a mbuw ɓabəgwən. ɗiya luwen a hidi mə njə kə puw tik acin: ‹A saf, di makaɗ tə njə kə yah, tə jan mə məmbuwmbuw tik bugwən. Tanjinhi a bəl kaɗ, a tak lay may may.’ 8 Gawal səna luweni: ‹Mordoy a geɗ kə saf a valay nhi zagway. Təv kə bat hayək am madaba tik, za təv kə zek lələɓ a kimin. 9 Mana kata tu ɗiy atəgo , av kə mbuw awan səna acin vu, aw səɗay. A mbuw bəgwən wər, kə bəl kaɗ acin.› ‹‹
Yesu avə werti njə musuruf am pic nəp ngə Yahudigi
10 Am pic nəp Yahudigi, Yesu a wan am jik jəgwan ngatan. A ceɗenta ləbar ngə Bayzlav a hidi tə bəgo. 11 Wer məpərmay ɗaha a dab tan, musuruf a wan kəsəm tik. Musuruf səna mə kawu mə ɗiya di gəɓ atalan cəfaɗ cəfaɗ, a gar sək sək ɗahkwən . 12 Yesu ma lim za, ɗefen ma, za ɗiya luwenni acin: ‹‹ Wer cah, hoh tə jan geleɓe a kəsəm koh.›› 13 Kaf ngəra za bac atalan tik. Njoɗ werti nhi gar a gar sək sək, ɗiya səban Bayzlav. 14 Hidi mordoy təm jik jəgwan ngə Yahudigi ma lim təkən nhi za, nəv ngetik hameni, kadaban Yesu mə ɗəyen geleɓe a werti nhi am pic nəp ngatan. ɗiya luwen a hidi mə ɓas ɓas acin: ‹‹ Ta ceɗe hin, kəzəɗ wər, a njə kə ɗiy ta səna am wan kwəh a gendik. Mana hidi mə daldaligi a mayi kə yigi, mə yi am wan ma kwəh səna. Am pic nəp wər, kəzəɗ ɗahkwən .›› 15 Yesu ɗiya luwenta: ‹‹ Hin hidi njə bərngəzl talan ma toy toy cah, am pic nəp ngikin, hin ma pəsl zla avə nden nden ngikin, kə va kə vəlenta yəm ɗahkwən vu? 16 Mə saf, werti nhi vənen Ibrahima. Musuruf acin mə ngav tik. Mə ɗiya di gəɓ atalan cəfaɗ cəfaɗ. Yo za acin am pic nəp ngikin ma, mə njə kə pəsl aray kin kaɗ, za ɗər wər geɗ kə gam musuruf tə kəsəm werti nhi kaɗ, za sin kə va avə gar vu?›› 17 Za Yesu ma zləgam atəgo za, weli nap ɗiyen a hidi cike wayza mə zeli sin təbəgo nhi. Amma hidi məpərmay mə ɓas ɓasi wər, nəv ngatan a zəzay atalan təkəniy malaw Yesu mə ɗiy ma par par.
Ma məngaɓngaɓ atalan sisin pay avə njem
(Mt 13:31-33; Mk 4:30-32)
18 Yesu ɗiya luw: ‹‹ Tanjinhi təv kə sla bay ngə Bayzlav avə təkən məpərmay. Amma lay, Bayzlav ta njə kə maru wər, a njə kə diw gwedek anhi 19 mana hidi mə wət sisin gorbok, za mə zləg am tuz ngetik. Ma zləg za, təvay tik, a gəlay tik, gəl gəl mbaɗ kə pay mordoy ma givir givir. Za viginigi, ba bi jik ngatan a kimin.›› 20 Yesu ɗiya luw bah: ‹‹ Təv kə sla lay, Bayzlav ta njə kə maru avə təkən məpərmay. Amma lay, Bayzlav ta njə kə maru a njə kə diw gwedek gwedek 21 mana werti mə wət njem kə gavaɗ a liɓ mosuf reta buhu kə bas bifbif cike wayza.››
Pət a bər mədigiɗ ma ɗen
(Mt 7:13-14,21-23)
22 Yesu a ton liɓde ma par par kə va am liɓde Ursalima. Am liɓde am liɓde mə ton ta bəgo za, a ceɗen Ləbar Malaw a hidigi . 23 Pic takan hidi məpərmay ɗiya neh tik, luweni: ‹‹ Mordoy, sey hidi gwedek dap acin məv kəjani mbəl micin tan vu?›› Yesu zlawenta a hidi cike acin, a luw: 24 ‹‹ Tanjinhi mə təl dap, avə gədan kin cike kə pət a mə bər mədigiɗ ma ɗen. Ta ceɗe hin, mandal pic sən mə hoso za, hidi dolom av kə təli kə pətigi, amma a jan kə pətigi kwən. 25 Kadaban pic takan njə de av kə pek bər mədigiɗ tik kaɗ. Mana tu pek kaɗ, hin a wəlen a caɗak wər, məv kə cen ngəra acin: ‹Vay, vay, a zləri yikwan bər mədigiɗ, yikwan kə pət səka.› Njə de səna av kə luwe hin: ‹Ko mə yah zəki, ta səni hin ɗahkwən .› Məv kə luw: 26 ‹Vay, a saf, yikwan tu zəm ɓəw yikwan tu sa təkən avə hoh a micek. Za pic məpərmay hoh tu yah a liɓde ngiykwan kə ceɗ ləbar Bayzlav a hidigi təm kwən vu?’ 27 Njə de səna avə kə luwe hin bah: ‹Ko mə yah zəki, ta səni hin ɗahkwən. Mə sliɗ, mə jel kin a jagwar ɗə za, hin cike mə njə kə ɗiy mə ngavngav nhi.’ 28 Yo mə zlimu, ta ceɗe hin, hin tu kə lim Ibrahima, Izak, Zakob ɓəw mokotufi ngə Bayzlav taməcek cike wayza am lay Bayzlav məmaru, məv kə han, za məv kə ham ndin, kadaban ngikin, av kə fəke hin kaɗ a caɗak za. 29 Za acin hidi məpərmay ta madabalay gbaw way kaɗ, av kə pətigi am lay Bayzlav məmaru kə ɗiyi məmbəlwa. 30 ta ceɗehinacin, am lay Bayzlav məmar səna, hidi tadəwən av kə mbaɗi kə hidi tə kibik, za hidi ta kibik av kə mbaɗi kə hidi ta dəwən.››
Yesu avə hidiy təm liɓde Ursalima
(Mt 23:37-39)
31 Gwedek Farisigi məpərmay yigi angər Yesu, ɗiya luwenta: ‹‹ A sliɗ ma və koh am lay məpərmay, kadaban ‹‹ Bay Hirudus a gər kə wəzloh kaɗ.›› 32-33 Yesu luwenta: ‹‹ Mə va ceɗen a Bəlway səna, mə luwen se: ‹Pic ngə kaw kata a hos gesin bugwən. Kadaban ko a ɗiya a ciki, mokotuf ngə Bayzlav a məc a liɓde məpərmay kwən, səna a Ursalima. Apica təv ɗa a kibik kə va a Ursalima, za təv kə gam musuruf a kəsəm hidigi mozlokotuf mozlokotuf, za təv kə mbəl mə daldaligi baha. Apat təv kə ɗiy a səna. Za azlapat təv kə hos a Ursalima kə jan kə way kəzəɗ ngaɗa acin.’ 34 ‹‹ Haya, hin hidi təm liɓde Ursalima, mə njə kə wəzl mokotufi ngə Bayzlav kaɗ, za hidi məpərmay Bayzlav ta njə kə zləna ta, mə njə kə ndə ta avə gugwən kə wəzl tə kaɗ. Mə saf kata tu təl jəɓ ndas kə ɓasehin mana mən gamndak ta njə kə ɓas wəriy tik. Za ko mə may bugwən. 35 Yo, tanjinhi Bayzlav av kə pəɗ ngər tik am hayək kin za, za liɓde kin kə cakway. Ta ceɗe hin, mə limek ɗaba hos am pic hin tu kə luw atalan ɗa: ‹Bayzlav mə gəl micin zoɗ ngə hidi mə yah am zlim ngetik.› ‹‹