Yesu avə hidi njə kəsəm mə hav hav, am pic nəp ngə yahudig
14
1-2 Am pic nəp ngə Yahudigi məpərmay, Yesu sliɗ va a de hidi mordoy tə dab hidi Farisigi kə zəm gəda a bəgo. Hidi cike mə vi kə zəmiy gəda, ci həriya atalan Yesu kə safta ko av kə ɗiy mi am pic səna. Hidi məpərmay ɗaha a bəgo a dal, kəsəm ngetik mə faka ɓiɓ ɓiɓ. Mə gara kaɗ a kibik Yesu. 3 Yesu səna acin ɗiya luwenta a mogroyiy jəgwan ɓəw a Farisagi: ‹‹ Məzugzug ngiykwan a luw, kə mbəl hidi mə dal dal am pic nəp, law vu, a sən hezi vu?›› 4 Taniy cike ɗewiy tan kaɗ tete. Yesu wət ngəra, pac atalan gawal səna acin, mbəl am dal ngetik za, za luweni: ‹‹ A sliɗ za, ma və koh a de.›› 5 Ma mbəl za, Yesu ɗiya luwen a hidi səna cike wayza: ‹‹ Tanjinhi kərti kin asənkwən zla kin tu ndəv am yəm am pic nəp wər, mə va angaw kə ɓiyah tik kwən vu?›› 6 Ma zlimiy zləgam nhi za, tu pərasl bərngəzl talan tan, za a səni kə zlawenta a Yesu a ciki bugwən.Ngəz atalan ɗew təm məmbəlwa
7 Yesu ta zəmiy gəda avə hidi nhi, limi hidi məpərmayigi a jariy lay malaw kə ɗewiy a kimin. Ma lim tə za, ɗiya ceɗenta ma məngaɓngaɓ məpərmay acin kə ngəz ta. A luw: 8 ‹‹ Am pic məpərmay mana ngwalay koh tu ɗefeh ma am məmbəlwa ngə ndəm werti, mana hoh tu za, hoh gər kə jar lay ɗew malaw kə ɗew a kimin kwən. 9 Ezen ko a dab hidi sin mə ɗefenta ma, hidi ma day kə hoh ɗaha a bəgo wər, njə de mə ɗefehin ma av kə luwoh: ‹A sliɗ za, ma geɗən lay ɗew a mordoy nhi.› Tu ɗiy atəgo , weli av kə ɗiyoh kə sliɗ kə va kə ɗew a kayək. 10 Geleɓe mana ngwalay koh tu ɗefeh ma kə zəm gəd məmbəlwa, ma va ɗewey koh a kayək ɗər. Mana mə limeh za, av kə luwoh: ‹Ngwalay ɗa, hoh ɗew a kayək kemi, a yah ma ɗewey koh am lay ɗew malaw nhi.› Mə ɗiya za atəgo , hidi ma njə de mə ɗefenta ma, av kə safigi acin wa hidi mordoy. 11 Yo tanjinhi hin mə zlim za kwa, hidi mə həɗək talan tik, Bayzlav av kə gəc kaɗ. Hidi mə mbaɗ talan tik ndez, Bayzlav av kə kaf tik.›› 12 Yesu ma way kə ceɗ ma məngaɓngaɓ za, ɗiya luwen a Farisa mə ɗefenma kə zəm gəda səna acin: ‹‹ Mana hoh ɗefenma a hidi kə zəmiy gəd məmbəlwa, hoh gər kə ɗefenma a ngwalay koyigi kwən, ko golmocoyigi, ko vənigi, za ko midigi koh ta və təkən, hoh gər kə ɗefentəma kwən. Kadaban mi, hoh tu ɗefen tə ma a hidi səna wər, hidi sən av kə wərəkigi təm am lay tik. 13 A zlimu, mana hoh ɗefenma a hidigi, ma ɗefenma a hidi njə sanhahigi, a matakwan hidigi, a vəderigi, ɓəw hulufigi. 14 Am mandal pic sən mə hoso za, nəv koh av kə zəzay. Kadaban ngatan, təkən ngə wərəkoh am lay tik ɗahkwən. Bayzlav avə talan tik av kə wərəkoh kaɗ am pic sin tu kə mbəla hidi mə ɗiyi təkən sin mə mayu am məc za.››
Hidi mə ɗefenma a hidigi, kə zəm gəd məmbəlwa
(Mt 22:1-10)
15 Hidi mə zəmiy gəda avə Yesu ma zlimiy ləbar tik za, hidi takan tə dab tan luwen a Yesu: ‹‹ Kay, nəv ngə hidi məv kə zəmiy gəda am lay Bayzlav məmaru, avə kə zəzayigi.›› 16 Yesu ɗiya luwenni avə ma məngaɓngaɓ acin: ‹‹ Hid məpərmay ɗaha, a tə gəd məmbəlwa mordoy kə jan kə ɗefenma a hidi dolom kə zəm ta. 17 Ma tə gəda za, zlən hidi mə njə kə ɗiy kəzəɗ ngetik kə va kə ɗefenma a hidigi acin. Gawal səna sliɗ, va gbom avə hidi məpərmayigi. ɗiya luwenta takan takan: ‹Mordoy ngaɗa a ɗefehin ma kə zəm gəda səna acin, nakam kə zəma tik.’ 18 Za ko yi a luw: ‹Kay, tə jan lay kə va kwən.› ‹Kay, tə jan lay kə va kwən.› Sənan a luw: ‹Kat mə səkəm lay biz za angər hidi. Tanjinhi təv kə va kə safa tik. Hoh gər kə ɗiy nəv kwən.’ 19 Sənan a luw: ‹Kat mə səkəma zliy za gəɓ, tanjinhi təv kə jugwanentə biz kə saf ta. Hoh gər kə ɗiy nəv kwən.’ 20 Sənan təm a luw: ‹Tə dəm werti tanjinhi, kadaban səna tə jan kə va kwən.’ 21 Hidi səna ma luwenta atəgo za, gawal sən sliɗ vətik a de acin. Luwen a mordoy ngetik: ‹Tə janah hidigi bugwən.› Za nap ceɗen ləbar hidi sən mə luwenta. Mordoy ngetik ma zlim atəgo za, tu hamen nəv. ɗiya luwen a hidi mə njə kə ɗiy kəzəɗ ngetik nhi: ‹A sliɗ, ma va angaw am lay hidi ta njə kə ɓasigi abəgo, ɓəw am mozlokotufigi. Ma ɗefenma a matakwanigi, mə gbəru gbəruhigi, hulufigi, vəderigi, taniy kə yigi kə zəmiy gəd tafnan nhi.’ 22 Gawal səna sliɗ və ceɗenta ma acin. Ma jəɓah a de za, ɗiya luwen a njə de: ‹Mordoy ɗa, kata tu ɗefenma a hidigi mana hoh mə ceɗek ku. Tu yigi dolom. Amma jik a wek bugwən, lay mə fəsa za.’ 23 Mordoy səna luweni: ‹A sliɗ, ma va a mozlokotuf ma par par. A bəgo hav kə jan hidigi, ma vaza ta, mə yigi kə wek jik k aɗ!’ 24 Ta ceɗehinkaɗ, a dab hidi tizin mətak yigi kə zəmiy gəd ngaɗ nhi, ko hidi takan məv kə tesl tik ɗahkwən .››
Hidi kəɓən zagway, za kə jan kə səb mozlokotuf ngə Yesu
(Mt 10:37-38)
25 Pic məpərmay hidi dolom sliɗi lapigi avə Yesu kə vi am lay. Gwedek Yesu gar kaɗ, buw a dəwən, za ɗiya luwenta: 26 ‹‹ Hid mə may kə səbakku, səna sin kə mayak ku day kə babay tik, mamay tik, werti tik, wəriy tik, galmənigi ɓəw day kə talan tik, za kə jan kə ɗew kə kər gawla ngaɗa. 27 Hidi ma a ngəm kə sa banay bəgwən mana kata tu kə sa tik hos am məc, ɓəw mə tak səb batam ngaɗa, hidi səna a ɗew kə kər gawla ɗa kwən. Yo mə ɓən atalan ləbar nhi law law. 28 Hin mə sən za, hidi a may kə wəzl jik wər, a njə kə ɗiy ɓən atalan suloy ngə ndən jik səna zagway, kə jan sin kə sən tik, av kə way tik cike wayza vu, a jan kə way kwən vu? 29 Asənkwən tu sla jik tik kə ndən dab, mətak ɗiy ɓən zagway wər, av kə ndən tik matak za. Mana hidi mə lim tə za, av kə pəteɗi kəsəm kə mbisen ta acin. 30 Av kə luw ta: ‹Mə saf may, gawal nhi a luw: Təv kə ndən jik kə wəzl kaɗ, za ndən ndən, a jan kə za kaɗ bugwən, gədan ngetik gəɗak.’ 31 Yo hin mə sən za təm, bay məmar hidi wujine gəɓ, tu may kə va kə ɗiy vərum avə celen bay məpərmay mə yah mozlokotuf kə cakway liɓde ngetik avə hidi wujine ngər saray, av kəɓən a ɓən zagway. Av kə luw: ‹Yikwan tu hos gəga kə gam hidi ma day kə yikwan vu, yikwan mə hos bəgwən vu?’ 32 Mana mə ɓəna za, av kə luw: ‹Gədan ngiykwan gəɗak.› Av kə zlən hidigi a kibik acin kə va kə gbomigi avə celen bay a mozlokotuf kə centa ngəra kə zleri ma kaɗ. 33 Yo, ta ceɗehinkaɗ təm, mə ɓən zagway. Hidi tə dab kin mə may kə ɗew kər gawla ngaɗa, səna kə geɗ təkən ngetik cike məmaru kə jan kə səbak ku.››
Ləbar atalan məngahay ma laham laham
(Mt 5:13; Mk 9:50)
34 Yesu ɗiya luw bah: ‹‹ Amma məngahay wər, təkən menek. Yo pic takan tu mbaɗay tik laham laham acin wər, hav kə ɗiy acin a ciki kə ɗiy kwerek kwerek bah? 35 Mə ɗiya za atəgo wər, səna kə zek kaɗ. Kadaban ko kə zek am tuz, a mən kwən. Ko kə zek am kilviɗ, a mən kwən. Av kə mbaɗ kə təkən may may dab. Ləbar kata mə ceɗehinnhi, hidi məmar zlim kə zlim tik, mə slek atalan tik law law.››