Mə gəlgəla avə təmak tik mə lek lek
(Mt 18:12-14)
15
Pic məpərmay dəwanigi avə hidiy məpərmay mə njə kə ɗiyi mə ngavngav cike sliɗi vigi angər Yesu kə zlimiy ləbar ngetik. 2 Farisigi avə mogroyiy jəgwan ma limi hidi nhi za, nəv hamenta, Nap zləgamigi atalan Yesu: ‹‹ Gawəl nhi a njə kə kaw hidi mə njə kə ɗiyi mə ngavngav ngər səsəray, za a njə kə zəm gəda avə tanigi.›› 3 Am ta ɓənigi atəgo , Yesu luwenta acin avə ma məngaɓngaɓ: 4 ‹‹ Mə ɓən mu, mana hidi məpərmay a dap kin, a mar təmaki bələk. Za pic takan, təmak ngetik takan lekey tik. A ged təmaki tik ma ngər ngərafkatakan atalan ngərafkatakan gesin angər celeni mə gəl gəla, kə sliɗ kə va kə jara ma takan mə lek tafnan nhi kwən vu? Və jar jar jan. 5 Ma jan za acin, nəv ngetik ɗiya zəzay, wət gendik pak am wəla, 6 sliɗ yah tik de. Ɗefen ma a ngwalay tikigi avə medig tikigi, nap luwenta: ‹Mə yah hidi ɗa, kata mə jan təkən ngaɗ mə lek sən za. Nəv ɗa wana avə zəzay. Nəmkwan kə zəzay witikwitik acin.› ‹‹ 7 Yesu ma ceɗenta ma məngaɓngaɓ sən za, ceɗenta madaba ma səna acin. ɗiya luw: ‹‹ Yo ta ceɗe hin, a dab hidi dolom mə njə kə ɗiyi təkən mə ngav ngav, ko hidi takan a gendik tu bu nəv tik a kibik Bayzlav, Bayzlav av kə zəzay day day mana ngə mə ngəlngəl nhi mə zəzay. Av kə zəzay day atalan hidi ma takan mə bu nəv tik sən nhi, kə hidi ma ngər ngərafkatakan atalan ngərafkatakan məpərmayigi mə vərəki talan tan kə hidi ma malaw a kibik Bayzlav, za a mayi kə buwi nəv tan ɗaba.››Wert njə suloy tik mə lek
8 Yesu ɗiya ceɗ ma məngaɓngaɓ məpərmay, a luw: ‹‹ Wer məpərmay ɗaha, a mar suloy gabal gəɓ. Pic takan suloy ngetik gabal takan lek a lek. Wer sən sliɗ mbəl kuhu kə jar tik, ɗiya gudor lay hayya, za jan gendik acin. 9 Ma jan za, njoɗ ɗefenma a ngwalay tikigi avə medig tikigi. A luw: ‹Mə yah hidi ɗa, kata mə jan suloy ngaɗ mə lek sən za. Nəv ngaɗa wana avə zəzay. Nəmkwan kə zəzay witik witik.› ‹‹ 10 Yesu ma ceɗenta ma məngaɓngaɓ sən za, ceɗenta madaba ma səna acin. A luw: ‹‹ Yo, ta ceɗe hin, a dab hidi dolom mə njə kə ɗiyi təkən mə ngav ngav, ko hidi takan a gendik tu bu nəv ngetik a kibik Bayzlav wər, mbaslayigi ngə Bayzlav av kə zəzayigi. Av kə zəzayigi day day atalan tik mana werti mə jan suloy ngetik nhi.››
Jəɓaha ngə kər mə lek lek
11 Yesu a ceɗ ma məngaɓngaɓ məpərmay bah. A luw: ‹‹ Hid məpərmay ɗaha, a mar wəriy kərtawəl saray. 12 Pic takan kir mendez luwen a babay tik: ‹Vay, a wəzaki yikwan aray koh, yikwan tu kə zəm de koh, za ma vəlak ngaɗa.› Ma luwen atəgo za, babay tik a aray sən acin, wəzak wəzak kaɗ, wət vəlenni. 13 Wan gwedek, kir mendez tafnan wət aray ngetik, ber ber cike way kaɗ, sliɗ vətik avə suloy tik a liɓde ma guduk, va ɗewey tik a bəgo. Ma hos a liɓde sən za, ɗew mətak bərngəzl talan, wət suloy ngetik, cakway cakway hayya. Gwedek suloy way am ngər tik. 14 Ma ngav suloy ngetik cike za, mitis mordoy yah a liɓde səna, za təkən angər tik ko ndez ɗaɗaba. 15 Sliɗ va acin angər hidi məpərmay tə liɓde səna kə jar kəzəɗ angər tik. Gawal səna zlən kə va kə gəl guldom a donu. 16 Am ta gəl səna, mitis a wəzleni day day. May a may kə zəm təkən guldomi ta njə kə zəm ta, amma hidi mə vəlen, ɗahkwən . 17 Pic takan kər səna ɓən atalan ɗew ngetik təm banay. ɓən ɓən za, ɗiya luw: ‹Hidi cike mə ɗiyi kəzəɗ ngə babay ɗa a njə kə zəmiy ha fes tə kaɗ. Za kata, mitis a gər kə wəzlak awənhi. 18 Kay geleɓe tə jəɓ ɗa kə va a de babay ɗa. Kata tu za, təv kə luweni: Vay, kata tu ɗiy təkən mə ngavngav a kibik Bayzlav, za kata tu ɗiyoh təm. 19 Tanjinhi hoh gər kə safak mana kərti koh ɗaba, ma safak mana hidi may may mə ɗiy kəzəɗ koh dap.’ 20 Ma ɓən atəgo za, sliɗ kə jəɓtik acin kə va angər babay tik. Mandal a wəlen guduk a mozlokotuf, njoɗ babay tik mə lim za. Ma lim za, kaymah gaseni day day. Sliɗ nap si, və gbomigi a mozlokotuf, za tərlaki kəsum. 21 kərti tik luwenni acin: ‹Vay, kata tu ɗiy təkən mə ngavngav a kibik Bayzlav, za kata tu ɗiyoh təm. Tanjihi wər hoh gər kə safak mana kərti koh ɗaba.’ 22 Amma babay tik wər, ɗefenma a hidi mə ɗiyi kəzəɗ ngetik, luwenta: ‹Mə sliɗ, mə va ngaw mə ɓiyah ləkwət malaw, mə kwəleni. Mə va mə ɓiyah desi, mə təmen am ngəra, za mə va mə ɓiyah kərap təm, mə təmen am ngaz. 23 Mə kaw zla mə geh ngeh nhi, mə fatu yikwan kə zəm gəd malaw pas pas, kə zəzay, za kə dar acin. 24 Ndah kərti ɗə nhi, tə ɓən mə məca za, za ma wəlen avə micin. A micek tu lek, tanjinhi tu jan acin. Nəv ngaɗ nek godokwən.› Gwedek dar mordoy tu diw acin, hidi cike a zəzayigi. 25 ‹‹ Təkən nhi ta ɗiy cike, kir mordoy a wəlen a donu. Za gwedek, sliɗ kə yah tik a de. Ma mbeh kə hosoho a de za, zlim gəma a ləv a de babay tik girim girim,girim girim, avə dirif tik. 26 Ma hos za, ɗefenma a hidi takan tə dab hidi mə ɗiyi kəzəɗ ngə babay tik, za ɗiya neh tik, a luw: ‹Təkən ngemi mə ɗiy apica a de babay mi?’ 27 Gawal sən zlaweni: ‹Galmoco acin mə jəɓah tik a de, kadaban səna babay koh a fat zla mə geh geh kə zəzayigi avə ɗəɗel, kə darigi, kadaban sin mə jan kərti tik law law.’ 28 Kər mordoy səna ma zlim atəgo za, nəv hameni, a may kə pət a de kwən. Babay tik yah a caɗak, ɗiya tar tik kə pət a de. 29 Kərti tik səna luwenni acin: ‹Vay, a safu, mə ɗiya di ndas tə njə kə ɗiy kəzəɗ ngəkoh, za ko hoh luwak kə ɗiy mi, tə njə kə ɗiy tik. Yo, hoh vəlak gəd mazlən ɗa zab vu? Ko zuvu mendez anhi, kata kə fat tik, kə ɗiy məmbəlwa avə ngwalay ɗigi, hoh vəlak ɓabəgwən. 30 Amma ngə kərti koh mə ngav aray koh cike kə baɗ wertigi, ma jəɓah za, hoh wət zla ngiykwan mə geh geh nhi, za hoh fateni kə ɗiy məmbəlwa avə sin.’ 31 Babay tik ɗiya luwenni acin: ‹kərti ɗa, hoh gər kə ɗiy nəv kwən, yikwan mə njə kə ɗew avə hoh hoyhoy. Təkən cike kata məmaru, ngəkoh. 32 A saf, galmocoh nhi, kata tə ɓən mə məca za, za ma awana micin. A micek tu lek, tanjinhi tu jan acin. Za ma ɗiy atəgo acin, yikwan kə ɗiy məmbəlwa mordoy, za yikwan kə zəzay kwən vu?› ‹‹