Hidi mə ɗiy wir wir atalan mordoy ngetik
16
Yesu ɗiya luwenta a wəriy gawliy ngetik: ‹‹ Hid mə njə nja məpərmay ɗaha, njə təkən ma day godokwən. Wel hidi takan acin kə ɗiy lisafi təkəniy tik. Pic takan hidi məpərmay yigi angər hidi mə njə nja səna, ɗiya luwenta: ‹Hid mə njə kə ɗiy lisafi təkəniy koh nhi, a ngav aray koh.› 2 Ma zlim atəgo za, ɗefen ma, luweni: ‹Hidi a luwakta hoh njə kə ngav aray ɗa. Yo, a dah ɗerewel ngə ɗiy lisafi səna, kata kə saf tik.› Ma da za, ɗefenni. saf saf, za jan suloy ngetik tu ngav mindiwin. Nap luwenni acin: ‹Tanjinhi, ta may hoh kə ɗiy kəsəɗ ɗa ɗaba.’ 3 Ma zlim atəgo za, ɗiya ɓən am nəv za, a luw: ‹Kay, mordoy ngaɗa av kə goɗok kaɗ am kəzəɗ ngetik za, ya tanjinhi acin kata kə jan təkən ngə zəm bah a ki? Ndah, gədan ngaɗ ngə biz ɗahkwən, za kə tar təkən angər hidigi bah weli.’ 4 ɓən ɓən za, ɗiya luw: ‹Yaw, kata mə sən təkən kata tu kə ɗiy za acin. Təv kə kaw ngwalay avə hidigi, mandal mordoy ngaɗ tu kə goɗok am kəzəɗ ngetik za, hidi səna kə yəkak ta ngər səsəray a de ngatan.’ 5 Ma ɓən atəgo za, ɗefenma a hidi takan takan njə dəwa ngə mordoy ngetik tə ngər tan. Hidi tizin ma yə za, luweni: ‹Dəw ngə mordoy ngaɗa tə ngər koh, təkən ngemi?’ 6 Ɗiya zlawenni: ‹Vəram ɗawa mogroy bələk.› Gawal nhi luweni: ‹Ndah ɗerewel dəwa koh. Njoɗ a ɗew kaɗ, ma ɗəɗef vəram ɗawa mogroy ngər joɓən a gendik, za ma geɗ mə fəs tik kaɗ.’ 7 ɗefenma a hidi məpərmay, luweni: ‹Ngə koh, dəw ngə mordoy ngaɗa tə ngər koh, təkən ngemi?› Ɗiya zlaweni: ‹Buhu ngirmi bələk joɓən.› ɗiya luweni: ‹Ndah ɗerewel dəw koh, a ɗəɗef buhu bələk foɗ a gendik.› Mə luwa atəgo nhi, kadaban sin a may kə kaw ngwalay avə hidi səna.›› 8 Yesu ma way zləgam sən za, a luw: ‹‹ Ta həmən gawal mə jək mordoy ngetik nhi, kadaban tu sən kə ɗiy wirwir kə mbəl talan tik. Yo, ta ceɗe hin, hin hidi ngaɗa, hidi təm talan mahayək nhi, ɓen ngatan ta njə kə ɗiy ta am walan tan, day kə hidi mə janiy lay ma kweɗek angər Bayzlav. 9 Amma kata wər, ta ngəze hin. Suloy wər wa mbiɗ ta ca. Mə wət mə ɗiyen malaw a hidigi avə sin, hin kə kaw ngwalay avə tanigi. Kadaban am pic hin tu kə məc, təkən ngə ɗiy avə aray kin səna ɗahkwən. Kadaban vəl ngəkin, av kə yəke hin ngər səsəray a dibizlav.10 Ta ceɗehin, hidi mə njə kə kaw kəzəɗ ngetik gwedek anhi, ngər səsəray, ko kəzəɗ mordoy tu kəjanu, av kə kaw tik ngər səsəray təm. Hidi mə njə kə kaw kəzəɗ mendez a məplafas, ko kəzəɗ mordoy tu kəjanu, av kə kaw tik a mə pəlafas təm. 11 Ya za acin, aray təm talan mahayək nhi, mə sən kaw tik ngər səsəray bəgwən wər, aray malaw Bayzlav av kə vəle hin am ngəra kə kaw tik acin vu? 12 Apica mana təkən hidi mə vəle hin am ngəra hin kə puw tik, mə kaw ngər səsəray bəgwən wər, Bayzlav a vəlehin təkən sin ta ɓən kə vəlen hin sən za vu?
13 ‹‹ Hin mə sən za, hidi takan a ɓəs kə ɗiyen kəsəɗ a hidi saray kwən. Av kə may hidi ma takan, za av kə zel hidi məpərmay. Av kə kaw kəzəɗ ngə hidi ma takan ngər səsəray kə ɗiy tik, za kəzəɗ ngə hidi məpərmay av kə ɗiy tik avə pəlafas. Ya za acin wa sən təm, hin kwəl kə wəzak ngər kaɗ, ngər məpərmay kə ɗiy kəzəɗ ngə Bayzlav, ngər sənan kə ɓas suloy, a ɗiy kwən.››
Yesu avə Farisagi
(Mt 11:12-13; 5:31-32; Mk 10:11-12)
14 Hidi Farisigi ma zlimiy zləgam Yesu sən za, ɗiya mbisen ta a Yesu, kadaban ngatan, suloy a njə kə lebeɗ ta. 15 Yesu nap luwenta: ‹‹ Ngikin, mə njə kə ɗef talan kin a kibik hidigi, hidi kə safi hin mana hidi mə ɗiyi təkən Bayzlav mə mayu. Amma Bayzlav wər a sən nəv kin hos am nəv ma nder nder. Kata ceɗehin, təkən hidigi ta njə kə saf ta kə təkən malaw, angər Bayzlav wər, təkən sin ta zelu.
16 ‹‹ Amicek deftere Musa ɓəw deftere ngə mokotufi ngə Bayzlav ɗahigi. Hidi tu səbiy məzugzugwa səna, kula am pic Yuhana baptis mə yah. Yuhana ma yə za, Ləbar Malaw ngə bay ngə Bayzlav a zlim mgbaw lay, za ko yi a təl avə gədan ngetik cike kə pət am bay ngə Bayzlav. 17 Ko mə ɗiy atəgo , məzugzugwa Musa wər a wəlen. Ta ceɗe hin, kə cakway talan mahayək avə dibizlav kaɗ, ɗa tuwnha kwən. Amma kə cakway təkən mendez təm liɓ deftere məzugzugwa səna tuwah.
18 ‹‹ Yo, ta ceɗe hin, apica mawəl tu gam werti tik kaɗ, za tu dəma məpərmay, sin tu ɗiy virndew. Za mawəl mə dəm werti zelen mə gam kaɗ nhi, sin mə ɗiy vərndew za təm.››
Hidi mə njə nja avə matakwan hidi
19 Yesu ɗiya luw: ‹‹ Hid məpərmay ɗaha, hidi mə njə nja. A njə kə kwəl ləkwət ma kukuɗ kukuɗ za kwəleɗ kwəleɗ, səkəm tik tuwah. A njə kə zəm təkən malaw dap, zəm zəm nha geɗ. Ko mi angər tik ɗaha. 20-21 Hoyhoy matakwan hidi məpərmay a njə kə wan a mijijik ngetik. Zlim ngetik Lazar. Mbəlah giji giji mgbaw kəsəm ngetik. Ko haza a njə kə yigi kə nakat tik. A may kə felek təkən zəm mə njə kə yoɓigi a kəma hidi mə njə nja sən za, za sin kə jan kə zəm səka.
22 ‹‹ Pic takan matakwan hidi nhi məc acin. Mbaslayigi ngə Bayzlav yi wət ta, tep ta a dibizlav a jagwar Ibrahima. Gwedek hidi mə njə nja tafnan məc təm. Wət ta, pəs tə kaɗ. 23 A zlən banay day day am lay hidi mə məc məcigi ta ɗewiy abəgo . Cə həriy, za lim Ibrahima avə Lazar a jagwar tik guduk avə sin. 24 Ma lim ta za, ɗefenma day day, a luw: ‹Aw vay Ibrahima a saf kaymah ngaɗa, ma mbəlak ku. Ma zləna Lazar mə juroɓ kər ngəra am yəm, mə yah tiɗekek ku, gana ngaɗ kə ɗiy lilen lilen, kadaban ta zlən banay day day am kuhu nhi.’ 25 Ibrahima ɗiya luwenni acin: ‹kərti ɗa, a ɓən talan ɗew koh malaw, hoh mə ɗew atalan mahayək, ko təkən gwedek mə ndako ɗahkwən. Za Lazar, sin tu ɗew am banay. Ya, tanjinhi acin nəv ngetik tu zoy, a zəzay acin angər ɗa awənhi. Amma hoh wər, hoh zlən banay. 26 Yo, za təkən məpərmay təm, wil ma kpum selek selek mə tpay yikwan za. Lay ton ɗahkwən. Hidi tə ngər ɗa a wənhi tu may kə va angər kin, lay ton ɗahkwən. Za hidi tə ngər koh abəgo, tu may kə yah angər yikwan, lay ton ɗahkwən .’ 27 Hidi mənjənja səna a luw: ‹Kat tu zlim ləbar koh nhi, vay Ibrahima. Tanjinhi acin tə may wər, hoh kə zlən Lazar kə va angaw a de ngə babay, 28 galmay ɗigi ɗaha joɓən. Mə va ceɗenta təkən mə ɗiy atalan ɗə nhi, kə zləri zlim ngatan, kə buwi nəv ngatan kaɗ, kadaban ta kə hosigi am lay banay ngaɗ nhi.’ 29 Ibrahima luweni: ‹Ngə golmocoyigi wər, deftere Musa ɓəw ləbar mokotufi ngə Bayzlav ɗaha kə ngəz ta. Mana tu jangi ta, mə yək ta.’ 30 Hoh Hidi mənjənja səna ɗiya luw: ‹Awwo vay Ibrahima, məzugzugwa hidi təgo gəɗak, səna hoh kə zlən hidi mə mbəla am məc za kə va kə ceɗenta, kə jan kə yək ta, za kə buwi nəv kaɗ.’ 31 Ibrahima luwenni acin: ‹A yəki ləbar Musa avə ləbar mokotufi ngə Bayzlav ɓabəgwən wər, ko ləbar hidi mə mbəla am məc za, a yək tə kwən.› ‹‹