Ɗiy mə ngavngav ɓəw geɗ mə ngav ngav
(Mt 18:6-7,21-22; Mk 9:42)
17
Yesu ɗiya luwen a wəriy gawliy ngetik: ‹‹ Təkən mə njə kə ləbeɗ hidigi kə geɗ mozlokotuf ɗa ɗaha ko a pu. Amma ta ceɗe hin, banay mordoy avə kə yah atalan hidi məv kə lebeɗ celen kə geɗ mozlokotuf ɗa. 2 Hidi mə ɓən kə lebeɗ hidi tə dab sanhayigi mə yəkiy kata, kə geɗiy mozlokotuf ngaɗ kaɗ, geleɓe mə zenenta gugwən həz a hidi səna am wəla, za mə goɗ ta a liɓ yəm mordoy. Mana sin tu lebeɗ hidi kə geɗ mozlokotuf ngaɗ kaɗ wər, dalgway mordoy ɗaha atalan tik. 3 Yo ta ceɗe hin, mə kaw talan kin lawlaw acin.‹‹ Apica coloh tu ɗiyoh mə ngavngav wər, ma ngəzu. Tu coh ngəra, ma geɗen mə ngavngav ngetik kaɗ. 4 Yo, coloh tu ɗiyoh mə ngav ngav, za tu vay angər koh kə coh ngəra, za kə luwoh: ‹Ngwalay ɗa, kata tu ɗiyoh mə ngav ngav, a geɗek kaɗ,› ma geɗen kaɗ. Za ko tə ɗiyoh mə ngavngav am wan takan jəɓ cisaray, za jəɓ cisray səna ɗaw kə jəɓa kə coh ngəra, ma geɗen kaɗ jəɓ cisaray səna.››
Ləbar atalan yək Bayzlav
5 Momozlokotufi Yesu ɗiya luwenta a Yesu: ‹‹ Mordoy, a mən yikwan səka kə jan yikwan kə vəl nəv lawlaw ngiykwan a Bayzlav.›› 6 Yesu luwenta: ‹‹ Ta ceɗe hin, hin tu geɗ nəv kin cike kaɗ a Bayzlav wər, ko hin mə yək Bayzlav gwedek anhi mana sisin gorbok, gəga. Məv kə luwen a pay mordoy acin: ‹A cof a wənhi za, ma va ngəɓ a liɓ yəm,› avə kə pəɗ hok kə va kə ngəɓ a liɓ yəm mana mə kin.››
Hidi mə ɗiy kəzəɗ Bayzlav mətak gəd mazlən
7 Yesu ɗiya luwen a wəriy gawliy ngetik: ‹‹ Mə zlim, tanjinhi hidi məpərmay ɗaha, a njə kə ɗiy kəzəɗ a de hidi məpərmay. A njə kə bizenni, a sən a njə kə gəlen vəren tə de ngetik. Yo, kər səna tu kə yah a don za, njə de a luwenni za: ‹A yah ma ɗew kaɗ, ma zəm gəd› vu? Awwo, a luwen atəgo kwən. 8 Av kə luwen ɗər: ‹A va ma cok ləkwət koh kaɗ, ma yah ma tak gəda. Mana ha mə təh za, ma dah kata kə zəm tik. Mana kata mə zəm za, za acin ma zəm ngəkoh təm.’ 9 Kər səna tu way kəzəɗ ngetik mana njə de mə luweni, njə de səna av kə fal tik acin vu? Awwo, a fal kwən, kadaban kəzəɗ tugo, kəzəɗ ngetik dab. 10 Yo za wa sin təm, hin wəriy gawliy ngaɗa, hin tu ɗiy kəzəɗ ngikin cike, Bayzlav mə vəle hin am ngəra, hin kə luw: ‹Yikwan hidi mə ɗiyi kəzəɗ Bayzlav dab, yo hidigi kə fali yikwan acin atalan mi, yikwan mə ɗiy kəzəɗ ngiykwan dab.› ‹‹
Yesu mbəl kwalkwaligi gəɓ
11 Yesu aa va a liɓde Ursalima. Sin a ton aa mə halah hayək Samariya avə hayək Galili. 12 Am sin taa ton səna, hos a liɓde məpərmay. Kwalkwaliy gəɓ yiy kə gbomiy avə sin. Gariy tan a gaf tik. 13 Taniy ciy wəla day day, ɗiya luwta: ‹‹ Yesu, Mordoy ngiykwan, a saf kaymah ngiykwan!›› 14 Yesu maa limta za, ɗiya luwenta: ‹‹ Mə va ɗef kəsəm kin a masayigi.›› Mandal aa viy a mozlokotuf, safiy mbəlah tə kəsəm ngatan cike tu ɗizigi. 15 Hidi takan tə dab tan, maa lim mbəlah tə kəsəm tik tu ɗiz za, jəɓaha adəwən angər Yesu. Sin ɗiya səban Bayzlav day day. 16 Gbəlih titimbiz a kibik Yesu, ɗiya luwen soko. Gawal mə jəɓah səna, njə Samariya. 17 Yesu ɗiya luw: ‹‹Hidiy gəɓ tik a janiy geleɓeh kəsəm ngatan bəgwən vu? Yah akway hidiy ma ngərafkatakan? 18 Adab tan, hidi mə ɓən kə jəɓah kə luwen soko a Bayzlav ɗahkwən, səna mbuluk nhi a gendik vu?›› 19 Zəni Yesu luwenni: ‹‹ Makavay hoh mə yək zləgam ngə Bayzlav, hoh tu jan mbəl.››
Təkən məv kə ɗiya, za acin Yesu kə jəɓaha
(Mt 24:23-28,37-41)
20 Pic takan Farisigi ɗiya nehi Yesu, luwenta: ‹‹ Aw Mordoy, Bayzlav wər avə kə diw kə mar lay a pu?›› Yesu ɗiya zlawenta: ‹‹ Ta ceɗehinkaɗ, Bayzlav tu kə mar lay, a ɗiy mgban nga kwən. 21 Hidi məv kə luwe hin: ‹Mə saf, Bayzlav a mar lay awənhi,› asənkwən: ‹A mar lay a wəta,› ɗahkwən. Awwo, ta ceɗe hin, tanjinhi dap, Bayzlav a mar hidi məpərmay tə dab kin awənhi.››
22 Yesu ɗiya luwen a wəriy gawliy ngetik acin: ‹‹ Mandal pic sən mə hoso za, pic takan tə ɗew a dab kin ɗaba. Məv kə may kə limek ku, kata Hidi mə yah ta ngəra Bayzlav za ko pic takan a gendik, amma hin mə limek ku kwən. 23 Hidi məpərmay av kə lebeɗi hin, av kə ɗefe hin avə ngəra kə luwe hin: ‹Yesu awan awnhi,› asənkwən: ‹Yesu awan a wəta ta.› Mana tu kə luwe hin atəgo , mə gər kə si gigik a wəta, gigik a wəta kə va kə safak ku kwən. 24 Kadaban kata wər, am pic kata Hidi mə yah ta ngər Bayzlav za, kata tu kə yah, hidigi avə kə limek ta mana von ta njə kə wəciɗ, wiciɗ a wəta, wiciɗ a wəta kə zləzlaɗ lay mgbaw kaɗ. 25 Amma pic tik a wəlen, ko a ɗiy aceki, səy kata kə sa banay day godokwən zagway, za hidi ma tanjinhi kə zelek ta.
26 ‹‹ Am pic kat, Hidi mə yah ta ngər Bayzlav za, təv kə jəɓaha, təkəniy av kə ɗiy mana mandal Noye mə ɗew atalan mahayək. 27 Am mandal səna hidigi tu ɗiyi təkən mana nəv tan mə mayu. A zəmiy gəd ngatan, a si təkən ngə sa ngatan, a dəmi werti ngatan, za a vəli wəriy ngatan a mawəl. Tu ɗiy ta atəgo , nha hos am pic Noye mə pət a liɓ pay ngə zlan maza ngetik. Ma pət za, yəm mordoy yah, talan mahayək wek avə yəm, za tu lekigi cike. Səna Noye avə de ngetik mə mbəligi. 28 Yo, am pic kata tu kə jəɓaha, təkəniy avə kə ɗiy mana mandal Lot mə ɗew atalan mahayək. Mandal səna hidigi tu ɗiyi təkən, nəv ngatan mə may ta. A zəmiy gəd ngatan, a si təkən ngə sa ngatan, a səkəmi təkən ngatan, a bizi tan, za a ndəni jik ngatan. 29 Tu ɗiy ta atəgo hos am pic, Lot mə sliɗ a liɓde Sodom za. Ma sliɗ tik za, kuhu ɓəw təkən mə njə kə zlaw kuhu a gədan tu yah a dibizlav za acin, za hidi cike tu lekigi. 30 Yo, ta ceɗe hin, am pic kata Hidi mə yah ta ngər Bayzlav za, təv kə ɗef talan ɗa, təkən av kə ɗiy tiɗ tiɗe mana səna.
31 ‹‹ Am pic səna acin, hidi mə ɗewe kaɗ am lay nəp ngetik, mə gər kəɓən kə pət a de kə gasah təkənitik kwən. Ko hidi tə donu, mə gər kəɓən kə va a de kə gasah təkənitik kwən. 32 Yo, mə ɓən atalan təkən mə hosoho atalan werti Lot. Ma buw həriya kə saf kə vadəwən za, sin məc. 33 Yo, ta ceɗe hin, hidi mə may kə mbəl micin ngetik am talan mahayək awənhi, mandal pic sən mə hoso za, av kə lek micin ngetik tə ngər Bayzlav. Za ngə hidi mə vəl micin ngetik kə lek, kadaban sin ta səb mozlokotuf ngaɗa, mandal pic sən mə hoso za avə kə jan micin ngetik tə ngər Bayzlav. 34 Ta ceɗehinkaɗ, yə ngaɗ ta vuɗu səna, təv kə jan hidi saray mə wani kaɗ am lay ma takan. Təv kə wət ma takan za kə geɗ ma takan. 35 Təv kə jan wertigi saray a həzigi. Təv kə wət ma takan za kə geɗ ma takan. [ 36 6 Təv kə jan hidi saray a bizigi a donu. Təv kə wət ma takan za kə geɗ ma takan.››] 37 Wəriy gawliy ngetik ɗiya neh ta acin, luwenta: ‹‹ Mordoy, təkən səna av kə ɗiy a ki?›› Yesu luwenta: ‹‹ Yo hin mə sən za, am lay təkən mə məc məc a wan abəgo, godok a njə kə ɓasigi a bəgo.››