Mə cen ngəra a Bayzlav mə tak dangar
18
Yesu luwen a wəriy gawliy ngetik bah, a luw: ‹‹ Mana hin ma tar təkən angər Bayzlav, mə gər kə dangar lay cen ngər kwən. Mə ɓəs kə tar tik hos am pic, hin tu kə jan təkən səna.›› Kə jan hidi ngetik kə jan kə zlimiy mə ngetik law law, ɗiya ceɗenta acin avə ma məngaɓngaɓ. A luwenta: 2 ‹‹ A liɓde məpərmay hidi məpərmay mə njə kə zla dalgway ɗaha. Amma sin wər, a hovok a Bayzlav ɗawən, za a njə kə saf hidigi mana təkən may may. 3 A liɓde səna werti mə cupcup awan bəgo təm. A njə kə va hoyhoy angər gawal mə zla dalgway səna kə cen ngəra. A njə kə luwen: ‹Mordoy, hidi məpərmay mə cak wəla za, za tə gəren godoroy ɓabəgwən, a pətari yikwan kaɗ.’ 4 Puw puw dangar, gawal mə zla dalgway səna a may kə mənen kwən. Amma werti səna a wəlen a tes tik dab. Ma gboren mə ngetik za acin, mə zla dalgway səna a luw a liɓ za: ‹Ko tə hovok a Bayzlav bugwən, za tə njə kə saf hidigi mana təkən may may wər, 5 kay geleɓe kata kə mən werti nhi, kadaban a dangarak day. Mana tə mən bəgwən wər, av kə yə hoyhoy kə dangara ku.› ‹‹ 6 Yesu ma way ceɗ ma məngaɓngaɓ za, ɗiya luw acin: ‹‹ Yo, ma kata tu kə ceɗehinnhi, mə slek atalan law law. Wer səna ma gboren ma a hidi mə zla dalgway sən za, ko sin hidi mə ngav ngav, tu mən tik acin. 7 Ya sako Bayzlav vu? Hidi ngetik sin mə wel ta, mə njə kə cen tə ngəra pic pic, vuɗu vuɗu, talan tik a zlay a taniy za vu? 8 Ta ceɗe hin, hidi mə njə kə cen ngəra a Bayzlav wər, Bayzlav av kə zlen wəla angaw kə mən tik. Yo, am pic kata Hidi mə yah ta ngər Bayzlav za, kata tu kə jəɓaha, təv kə jan hidigi a wəlen a yəkaki Bayzlav vu?››Njə Farisa avə dəwan
9 Yesu ɗiya ceɗ ləbar məpərmay a hidi mə vərəki talan ngatan mana hidi mə ɗiyi kəzəɗ malaw a kibik Bayzlav, za mə njə kə safi hidi məpərmay mana təkən hezi. 10 ɗiya luwenta avə ma məngaɓngaɓ acin: ‹‹ Pic takan hidi səray sliɗi vigi am jik Bayzlav kə tari Bayzlav. Sənan hidi Farisa, za sənan dəwan. 11 Ma pəti za, Farisa səna gar kə tar Bayzlav acin. A luw: ‹Aw Bayzlav ɗa, ta luwoh soko day day, kadaban kata wa hidi məpərmay kwən. Ta ɗiy təkən mə ngavngav a hidigi ɗahkwən, ta ngaw ma ɗahkwən, za ta ɗiy vərndew ɗahkwən təm. Bayzlav, ta luwoh soko, kadaban kata wa dəwan nhi kwən. 12 Bayzlav hoh mə sən za, am wan cisaray, tə njə kə ɗiy dalyam jəɓ saray. Am təkən cike kata ta janu, a dab təkən gəɓ, tə njə kə wət takan kə vəloh.› 13 Yo, amma dəwan wər, garay tik a gozlum, weli a ɗiyeni kə kaf həriya kə va wəzlav. ɗiya daw nəv ngetik, a luw: ‹Aw Bayzlav ɗa, aw Bayzlav ɗa, a saf kaymah ngaɗa, kata hidi mə njə kə ɗiy mə ngav ngav.› ‹‹ 14 Yesu ma way kə ceɗenta ma məngaɓngaɓ sən za, ɗiya luw: ‹‹ Ta ceɗe hin, dəwan ma jəɓ a de za, Bayzlav tu yək tik, za tu geɗ mə ngavngav ngetik kaɗ bah. Amma Farisa wər, Bayzlav a yək ɓabəgwən. Kadaban hidi mə kaf talan tik, Bayzlav av kə gəc kaɗ. Za hidi mə gəc talan tik, Bayzlav av kə kaf tik.››
Yesu avə wərigi mə cicer
(Mt 19:13-15; Mk 10:13-16)
15 Gwedek hidi məpərmay dahi wəriy ngatan ma cicer angər Yesu sin kə ɗiy ngər bay atalan tan. Wəriy gawliy ngə Yesu ma lim tə za, ɗiya ndəli hidi mə dahi wəriy ngatan səna, a luwenta: ‹‹ Mə sliɗ, mə gar kin a wənhi za.›› 16 Yesu ma zlim atəgo za, ɗefenma a wərigi, za ɗiya luw: ‹‹ Mə gər kə gam wərigi a jagwar ɗə za kwən, mə geɗ tə kaɗ mə yi angər ɗa. Ta ceɗe hin, hidi məmariy nəv mana wəriy nhi acin, məv kə mbaɗi kə hidi ngə Bayzlav məmar ta. 17 Ta ceɗ hin kaɗ lawlaw acin, səna hidi mə vəl talan tik a Bayzlav sin kə maru mana wərigi mə vəl ta, av kə hosi am lay Bayzlav məmaru.››
Ləbar atalan hidi mə njə nja
(Mt 19:16-30; Mk 10:17-31)
18 Pic takan hidi mordoy tə dab hidi Yahudiya va angər Yesu, ɗiya neh tik, a luweni: ‹‹ Aw Mordoy, hoh acin hidi malaw, a ceɗek may, kata kə ɗiy təkən ngemi kə jan micin mətak way?›› 19 Yesu ɗiya luwenni acin: ‹‹ Hoh luwak hidi malaw kemi? Ta ceɗeh, hidi malaw wər ɗahkwən, səna Bayzlav a gendik. 20 Yo, hoh sən məzugzugwa ngə Bayzlav mə may yikwan kə səb tik ɗahkwən vu? Anhi məzugzugwa ngetik a luw: ‹Hoh gər kə ɗiy vərndew kwən, hoh gər kə wəzl hidi kwən, hoh gər kə həl kwən, hoh gər kə ngawen ma a coloh kwən, za hoh kə zlimen ma a babay koh avə mocoh.› ‹‹ 21 Gawal səna ma zlim za, ɗiya luwenni acin: ‹‹ Mordoy, məzugzugwa nhi cike kata mə kaw za ngər səsəray, dəga kata wəlen kərti.›› 22 Yesu ma zlim atəgo za, ɗiya zlaweni acin: ‹‹ Law, za amma təkən mə fənoh wər takan. A sliɗ, ma və wət təkən koh cike hoh məmaru, ma ber kaɗ, za ma wət suloy tik ma vəlenta a matakwan hidigi. Hoh tu ɗiy atəgo wər, hav kə jan aray angər Bayzlav. Za ma yah səbak ku acin.›› 23 Gawal səna ma zlim atəgo za, nəv hameni day day, kadaban sin awana avə aray dolom. 24 Njoɗ Yesu mə sən za, nəv ngetik a hamen avə aray ngetik. A luw acin: ‹‹ Ta ceɗe hin, tuwnha godokwən a hidi mə njə nja kə hos am lay Bayzlav məmaru. 25 Yo, zlogomo wər kə pət am wil jelɓer wər tuwnha day day. Amma ta ceɗe hin, hidi mə njə nja kə hos am lay Bayzlav məmaru wər, tuwnha tik day.›› 26 Hidi təbəgo ma zlimiy ləbar nhi za, ɗiya luw ta: ‹‹ Yo, mana atəgo wər, hidi ngayi məv kə hos am lay Bayzlav məmaru kə jan kə mbəl micin ngetik acin yi?›› 27 Yesu ɗiya zlawenta: ‹‹ Təkən mə njə kə pərasl bərngəzl talan ngə hidi, angər Bayzlav təm ɗa təwa kwən.›› 28 Piyer luwen a Yesu acin: ‹‹ Ya ngiykwan acin, a ciki Mordoy? Hoh mə sən za, yikwan tu geɗ təkən ngiykwan cike adəwən kə səboh.›› 29 Yesu luwen a wəriy gawliy ngetik acin: ‹‹ Ta ceɗehinkaɗ law law, hidi mə sliɗ kə geɗ de ngetik kaɗ, kə geɗ werti tik avə galmənigi, kə geɗ babay tik avə mamay tik, za kə geɗ wəriy ngetik kə ceɗ ləbar Bayzlav a hidigi, kə jan Bayzlav kə mar ta. 30 Mandal pic sən mə hoso za, av kə jan təkəniy sən bah day am ɗew ngetik təm talan mahayək nhi. Za am lay məpərmay tə wəzlav, av kə jan micin mətak way angər Bayzlav.››
Ma mə makaɗ tik atalan məc avə mbəla ngə Yesu atalan civ za
(Mt 20:17-19; Mk 10:32-34)
31 Gwedek Yesu ɗefenma a wəriy gawliy ngetik ma gəɓ atalan səray a gozlum za, za luwenta: ‹‹ Tanjinhi yikwan ma və kin kə va am liɓde Ursalima. Təkən cike, mokotufi Bayzlav mə ɗəɗef ta atalan ɗa, kata Hidi mə yah ta ngər Bayzlav za, av kə ɗiya ku a bəgo. 32 Hidi məpərmay av kə kawak ta, kə vəlak ta am nəv ngər ngə hidi ma səban tan par a ngə Yahudigi. Taniy av kə mbisek ta, av kə rak ta, za av kə tifek tə giden a kəsəm. 33 Av kə zarak ta av lakwatay, za av kə wəzlak tə kaɗ. Amma mana kata tu məc, wan saray mə makaɗ tik Bayzlav av kə mbəla ku am məc za acin.›› 34 Yesu mə luw atəgo nhi, ko a luw atalan təkən ngemi, wəriy gawliy ngetik a zlim tə ɓabəgwən. Bərngəzl talan ngatan mə peke kaɗ.
Yesu avə huluf a liɓde Zeriko
(Mt 20:29-34; Mk 10:46-52)
35 Yesu a wan a mozlokotuf ngə va a liɓde ngə Zerusalem.Mbeh kə hos am hayək Zeriko, huluf məpərmay mə ɗewe kaɗ a bər mozlokotuf. A jəwayay tar tik. 36 Hidi dolom a səbiy Yesu. Ngaz ngatan a ləv kərap kərap kərap a vigi. Huluf səna ma zlim za, ɗiya neh hidi tə jagwar tik, a luw: ‹‹ Təkən ngemi, ta ləv təgo mi?›› 37 Gawal sən luweni: ‹‹ Yesu tə liɓde Nazaratu acin ta ton ta.›› 38 Njoɗ huluf səna cə wəla. Nap luw: ‹‹ Aw Yesu, dehen bay Dawda, a saf kaymah ngaɗ səka!›› 39 Hidi tə kibik Yesu ndəl ta, luwenta: ‹‹ Gawəl cah, a pek mə koh kaɗ!›› Amma huluf səna a wəlen cay wəla tik dab day day, a luw: ‹‹ Mordoy hoh dehen bay Dawda, a saf kaymah ngaɗ səka ta!›› 40 Yesu ma zlim atəgo za, gar kaɗ, luwen a hidigi : ‹‹ Mə va mə ngazla huluf tugo, mə yah.›› Ma ngazla tə za, Yesu ɗiya neh tik acin: 41 ‹‹ Hoh gawal cah, hoh gər kata kə ɗiyoh mi?›› Ɗiya zlaweni: ‹‹ Aw vay ɗa, a zlərak həriya ngaɗ anhi kaɗ may, kata kə lim lay.›› 42 Yesu ɗiya luweni: ‹‹ Ta luwoh, a zlər həriya koh kaɗ, ma lim lay. Hoh mə vəl nəv koh za, hoh tu mbəl.›› 43 Njoɗ həriya ngetik tu zlər acin, a lim lay kweɗek kweɗek, sliɗ ɗiya səb Yesu, za a fal Bayzlav. Hidi cike ma lim tə za, ɗiya fali Bayzlav.