Yesu avə Zase
19
Gwedek Yesu hos am hayək Zeriko acin, a ton a bəgo za. 2 A liɓde səna, hidi məpərmay ɗaha, hidi mordoy tə dab dəwanigi,hid njə aray, zlim tik Zase. 3 Ma zlim Yesu a ton a liɓde ngatan, a gər kə saf Yesu kə sən tik. Sliɗ va acin kə safa tik. Və jan hidi mə ɓas ɓas dolom. Təl təl kə saf, ko a lim ɗahkwən kadaban gəl ngetik duk dap. 4 Sin si a kibik acin, və tap a pay gorbok kə jan kə lim Yesu tu kə tonoh a bəgo za. 5 Yesu ma hosoh a madaba pay sən za, kaf həriya, saf kə va wəzlav, lim acin. Luweni: ‹‹ Zase, a səroho angaw, kadaban ko a ciki kata təv kə wan a pica a de›› 6 Zase mbire a pay sən za angaw, za yək avə zəzay a de ngetik. 7 Hidi cike ma lim tə za, nəv hamenta, za a luw ta: ‹‹ Gawal nhi av kə wan a de hidi mə njə kə ɗiy mə ngav ngav.›› 8 Za Zase ɗiya sliɗ, za luwen a Yesu: ‹‹ A zlimu Mordoy, kata kə wəɗak aray ngaɗa avə matakwan hidigi, za mana kata tu jək hidi kə yək suloy ngetik dolom, kata kə wərəkeni am lay tik jəɓ foɗ day kə ngetik kata mə yək səna.›› 9 Yesu ma zlim atəgo za, ɗiya luw: ‹‹ Apica, Bayzlav tu yah kə mbəl micin ngə hidi tə de koh, kadaban hoh səban ngə Ibrahima. 10 Ngaɗa kata luwehin, Kata hidi mə yah ta ngər Bayzlav za, tiyah am talan mahayək kə jar hidi mə lek lekigi kə mbəl tə kaɗ.››Ma məngaɓngaɓ atalan suloy ngə buw ngəra
(Mt 25:14-30)
11 Yesu avə hidi mə zlimiy ləbar tik təgo mbeh kə hosigi am liɓde Ursalima. Hidi cike a ɓənigi, Bayzlav av kə mar lay njoɗ acin. Yesu wər mə sən ɓən tan za. ɗiya ceɗenta ma məngaɓngaɓ məpərmay kə jan kə sən ta a kimin za, ɓən ngə Bayzlav wər par gendik. 12 A luwenta: ‹‹ Pic takan, hidi mordoy məpərmay tu may kə va kə jara bay a liɓde ma guduk. Mana tu jan bay səna, avə kə jəɓ a de kə mar lay. 13 Am pic sin a gər kə va tik, ɗefenma a hidi ma gəɓ mə njə kə ɗiyi kəzəɗ a de ngetik kə yigi angər tik. Ma yigi za, wət gabal bələk vəl vəlenta taniy cike. ɗiya luwenta: ‹Mə ɗiy terere avə suloy nhi kə jan kə fəfəl day nha am pic kata tu kə jəɓaha.’ 14 ‹‹ Gawəl sən sliɗ vətik acin. Za Hidi tə liɓde ngetik wər a lapiy talan avə sin ɗahkwən. Kadaban səna, zləni məzlənzləniy kə səb ta, kə va kə ceɗenta a hidi : ‹Yikwan ma may gawal nhi kə ɗew kə bay ngiykwan kwən.’ 15 Ko asəna, tu jan bay sən dap. Za jəɓah tik a de kə ɗiy bay acin. Ma jəɓah za, ɗefenma a hidi mə ɗiyi kəzəɗ ngetik mə vəlenta suloy am ngər anhi, kə sən suloy ngatan mə fuful fuful. 16 Hidi takan yah angər tik, luweni: ‹Mordoy, anhi suloy hoh mə vəlak am ngəra kə ɗiy terere avə sin nhi. Tanjinhi tu fəfəl day gabal bələk temere gəɓ.’ 17 Bay səna luweni: ‹Kay law godokwən, hoh hidi malaw mə ɗiy kəzəɗ ngaɗa. Kəzəɗ mendez kata mə vəloh am ngəra, hoh tu kaw ngər səsəray. Kadaban səna tanjinhi təv kə vərəkoh acin kə hidi mordoy, hoh kə mar liɓde mogroyigi gəɓ.’ 18 Hidi mə saray tik yah angər tik, luweni: ‹Mordoy, anhi suloy hoh mə vəlak am ngəra kə ɗiy terere avə sin nhi, tu fəfəl day gabal bələk joɓən.’ 19 Bay luweni: ‹Yawa, law. Ngə koh, təv kə vərəkoh hidi mordoy, hoh kə mar liɓde mogroy joɓən.’ 20 Hidi məpərmay yə za, luweni: ‹Mordoy, anhi suloy ko hoh mə vəlak am ngər anhi. Kata njev kaɗ am mbusur lukwət, za kata ɓah kaɗ law law. 21 Kata hovok avə hoh, kadaban hoh hidi me lem. Ha njə kə zəmay bay tal koh atalan hidigi. Am lay ha daɓ a kimin bugwən, ha njə kə mar tik.’ 22 Bay səna luweni: ‹Hoh gawal mə njə kə ɗiy kəzəɗ ngaɗ cah, hoh hidi mə ngav kəsəɗ. Ma hoh mə zləgam nhi, təv kə zloh dalgway avə sin. Hoh luw, kata hidi me lem, tə njə kə zəmay bay tal ɗa atalan hidigi, za am lay tə daɓ a kimin bugwən, tə njə kə mar tik ta. 23 Yo am pic səna, mana hoh mə sən za, hoh ɗiy terere avə sin kwən wər, hoh tep am bankə kway? Mək kata mə jəɓah nhi, kata kəjan, tu fəfəl kwən vu?’ 24 Ma ngəz atəgo za, ɗiya luwen a hidi mə ɓas ɓasi təbəgo acin: ‹Mə yək gabal bələk təm ngər tik səna, mə capen a hidi məmar gabal bələk gəɓ.’ 25 ɗiya luwenta: ‹Mordoy, awana avə gabal bələk temere gəɓ, ya kə capen bah kemi?’ 26 Mordoy səna luwenta acin: ‹Hid mə jan təkən, za a ɗiy terere avə sin, av kə capen a kimin bah sin kə va kibik kibik. Amma hidi mə jan təkən, za a ɗiy terere avə sin ɗahkwən, ko mendez sin mə janu, av kə yək tə kaɗ. 27 Tanjinhi acin, mə dahak mosum ngaɗigi mə tak ngəmi kata kə ɗew bay ngatan nhi, mə bən tə kaɗ a kibik ngaɗa awənhi.› ‹‹
Pət ngə Yesu a Ursalima mana bay
28 Yesu ma ceɗenta ma məngaɓngaɓ a hidigi za, sliɗ cə mozlokotuf acin kə vigi am liɓde Ursalima. 29 Vi vigi, mbeh kə hosigi am hayək Betifaze avə hayək Betani tə bər wərum zlim tik Jaytun. A bəgo Yesu wel wəriy gawliy ngetik saray acin kə zləne ta a kibik. luwenta: 30 ‹‹ Mə sliɗ, mə va a liɓde tə kibik kin tugo. Mana hin mə hoso za, məv kə jan kər nden nden mə jawa kaɗ a bər mədigiɗ, ma hidi a tap kimin gesin bugwən. Mə pəslaha, mə daha angər ɗa awənhi. 31 Mana hidi məpərmay tu nehe hin: ‹Mə pəsl nden nden təgo kaɗ kemi?› Hin kə luwenni: ‹Mordoy ngiykwan acin mə gər kə tap tik.› ‹‹ 32 Yesu ma luwenta atəgo za, hidi səna sliɗi vigi acin. Vi vigi, jan ta tiɗ tiɗe mana Yesu mə ceɗenta. 33 Ma jan tə za, nap pəsl ta. Hidi məmariy nden nden səna ma lim tə za, luwenta: ‹‹ Mə pəsl nden nden təgo kaɗ kemi?›› 34 Ɗiya zlawenta: ‹‹ Mordoy ngiykwan acin mə gər kə tap tik.›› Za hidi məmar ta geɗentə mozlokotuf kə pəsl ta. 35 Ma pəsl tə za, ngazl ta kə va ngər Yesu. Wəti ləkwət tə kəsəm ngatan, dəp dəp ta adəwən nden nden səna, za luwenta a Yesu kə tap. 36 Mandal Yesu səna a wan a dəwən, hidi məpərmay wətiy ləkwət ngatan, ndəɗ ndəɗ ta a mozlokotuf, Yesu kə va atalan tik mana bay, kə səban ta 37 Yesu məv kə səroho a wərum Jaytun za kə hos am liɓde Ursalima, hidi mə njə kə səbiy Yesu a zəzayigi, za a fali Bayzlav kadaban təkən ma tuwnha Yesu mə ɗiy taməcek am həriy ngatan. 38 ɗiya ci wəla, a luw ta: ‹‹ Vay ngiykwan Bayzlav mə gəl micin ngə bay mə yah am zlim ngetik nhi zoɗ. Bayzlav mə vəli yikwan kə ɗew lawlaw a kibik ngetik, za hidi cike mə səban ta, kə kafi zlim ngə Bayzlav fal a wəzlav.›› 39 Hidi Farisigi məpərmay tə dab tan ma zlim tə za, luwenta a Yesu: ‹‹ Mordoy, a luwenta a hidi mə səbiy nhi, mə ɗewiy kaɗ tete!›› 40 Yesu ɗiya zlawenta acin: ‹‹ Hidi nhi tu ɗewiy kaɗ tete wər, gugwən av kə ci wəla kə səbanak ta››
Han ngə Yesu atalan hidi tə Ursalima
41 Yesu mbeh kə hos am liɓde Ursalima. Ma lim liɓde səna a kibik tik za, ɗiya han a teweɗ. Nəv ngetik a hameni atalan hidi tə bəgo. 42 ɗiya luw: ‹‹ Haya hin hidi tə liɓde nhi, mana apica hin tu yək malaw Bayzlav mə may kə ɗiye hin wər, məv kə jan mbəl micin kin. Amma, mə mbaɗa kə təkən mə ɓas ɓas am hiriya ngəkin. 43 Ta ceɗe hin, pic takan banay av kə yah atalan kin. Mosum kin av kə yigi kə ndəni gəlməɗ mgbaw liɓde kin kaɗ kə taki hin a de. Av kə garigi adəwən za acin kə taki hin am lay ma ngəc. 44 Av kə gomi liɓde kin cike way kaɗ. Ko lay mbasl jik ngikin, a lim ɗaba, za av kə leki micin kin avə ngə wəriy kin kaɗ. Kadaban am pic səna Bayzlav mə yah kə mbəle hin, mə may bugwən.››
Yesu avə hidi mə beri təkən təm jik Bayzlav
45 Yesu ma hos am liɓde Ursalima za, və pət a jik Bayzlav, jan hidi məpərmay abəgo, a beri təkən. Ma lim tə za, gamata cike a caɗak. 46 Nap luwenta: ‹‹ Bayzlav a luw am deftere ngetik: ‹Jik ngaɗa acin jik hidi tu kə tarak ta a bəgo.› Amma ngikin, hin mbaɗ gingin kə jik ngə ɓah məhəligi.››
47 Adəwən səna Yesu a njə kə ceɗenta ləbar Bayzlav a hidigi hoyhoy a bəgo. Mogroy mə ɗiyi mə zugzugwa, mogroyiy jəgwan ɓəw hidi mogroyigi məpərmay tə liɓde səna ɗiya jariy mozlokotuf kə lek micin ngə Yesu kaɗ. 48 Amma a səni kə kaw ta a ciki ɗahkwən, kadaban hoyhoy hidigi a njə kə ɓasigi angər tik, a mayi kə zlimiy ləbar ngetik law law.