Hidi ngayi mə zlənah Yesu yi?
(Mt 21:23-27; Mk 11:27-33)
20
Pic takan Yesu a jəgwanen a hidigi am jik Bayzlav, za a ceɗenta Ləbar Malaw. Gwedek mogroy mə ɗiyi mə zugzugwa, mogroyiy jəgwan ɓəw mbusurigi yigi angər tik. 2 ɗiya neh ta: ‹‹ Hid ngayi mə vəloh mozlokotuf kə ɗiy təkəniy nhi yi? Za hidi ngayi mə zlənoh yi?›› 3 Yesu ɗiya zlawenta: ‹‹ Yo tanjinhi kata təm, təv kə nehe hin təkən gwedek zagway. 4 Hidi ngayi mə zlənah Yuhana kə ɗiy baptisma yi? Bayzlav vu? Hidigi vu? Mə ceɗek hidi tik.›› 5 Taniy diw kə zləgamigi a dab tan acin. A luw ta: ‹‹ Ya tanjinhi yikwan tu luw: ‹Bayzlav a zlənaha› wər, av kə luwa yikwan: ‹Ya mana atəgo wər, mə yək mə ngə Yuhana sən kway?’ 6 Za təm yikwan tu luw: ‹Hidigi acin mə zlənah ta› wər, hidi cike av kə ndiy yikwan avə gugwən kə məc. Kadaban hidi cike a vəriki Yuhana kə mokotuf ngə Bayzlav.›› 7 Zlaw tik ma pəraslen tə talan tan za, ɗiya zlawenta acin: ‹‹ Yikwan mə sən hidi mə zlənah tik bugwən, Mordoy.›› 8 Yesu luwenta: ‹‹ Ya law, kata təm, tə ceɗehinhidi mə zlənah ku kə ɗiy təkəniy nhi kwən.››Hidi ma lem mə puwiy pay mə mbu mbu
(Mt 21:33-46; Mk 12:1-12)
9 Adəwən səna Yesu ɗiya ceɗenta ma məngaɓngaɓ məpərmay a hidi mə ɓas ɓas. A luw: ‹‹ Hid məpərmay ɗaha, ngəɓ ngəɓ pay mə njə kə mbuw kə ham am tuz ngetik. Ma ngəɓ za, geɗ a hidi məpərmay kə puw ta. sin tafnan wər, sliɗ vətik a mbuluk kə wana wan ndas a bəgo. 10 ‹‹ Pic ket mə mbu mbu tik ma hos za, məmar pay tafnan zlən hidi mə ɗiy kəzəɗ ngetik angər hidi mə puwiy pay ngetik səna kə batentə mə na na tik səka. Gawal səna ma hos za, njap kaw ta, bazl bazlen tə wəzl, gam tə kə va a de ngər maymay. 11 Hidi məmar pay səna zlən hidi mə ɗiy kəzəɗ ngetik məpərmay. Ma hos za, njap kaw ta baha, bazl bazlen tə wəzl, gas gasen məcəcew, gam ta kə va a de ngər maymay. 12 Hidi məmar pay səna jəɓ zlən hidi məpərmay bah. Ma və za, njap kaw ta, bazl bazlen tə wəzl bah ha avə ɓiɓiz pəren a kəsəm, za gam ta. 13 Hidi məmar pay səna ɓən ɓən, za ɗiya luw acin: ‹Tanjinhi kata kə ɗiy bah mi? Təv kə zlən kərti ɗa malay. Mana tu limi kərti ɗə nhi, a zen av kə zlimiy mə ngetik.’ 14 Zlən kərti tik səna acin, sliɗ nap va. Hidi mə puwiy pay səna ma limi kərti tik sən za a yah, ɗiya pəteɗi kəsəm am walan tan acin, a luw ta: ‹Anhi hidi məv kə zəm payi nhi, tu yah acin. Kay nakam kə kaw tik kə wəzl kaɗ, yikwan kə mar pay mə mbu mbu nhi acin.’ 15 Njoɗ vigi njap kawi kərti nhi, ngazl ta adəwən tuz za, və wəzl tə kaɗ acin.›› Yesu ma way kə ceɗ ma məngaɓngaɓ sən za, ɗiya luwen a hidi mə ɓas ɓas acin: ‹‹ Tanjinhi ngikin, hin mə ɓən wər, hidi məmar pay tu yah, avə kə ɗiyentə mi, a hidi mə puwiy pay səna acin? 16 Ta ceɗe hin, amma sin tu yə wər, avə kə wəzl hidi mə puwiy pay səna kaɗ təm, za avə kə wət pay ngetik kə vəl am nəv ngər hidi məpərmay kə puw ta.›› Hidigi ma zlim ta atəgo za, ɗiya luw ta: ‹‹ Awa, mə səna a ɗiya atəgo kwən.›› 17 Yesu cə həriya talan tan, ɗiya luwenta: ‹‹ Hin mə sən za, ko ləbar ngə Bayzlav, a luw a ciki? Anhi ləbar səna: ‹Gugun, hidi mə ɗiyi gidivil mə fək tə nhi, Bayzlav wel kə gugwən malaw njə gədan.’ 18 Ta ceɗe hin, amma gugwən mə fək tə nhi, hidi məv kə ton, mana a lim gugwən sən bugwən, av kə tpicen ngaz, kə ndəv atalan gungun tugo, kə kop kolom micin tik kaɗ. Za gugwən səna tu gom atalan hidi bah wər, avə kə joɗ kaɗ təm.›› 19 Mogroyiy jəgwan avə mogroy mə mbəzl ma tə jik Bayzlav ma zlimiy mə sən za, tu sən ta, Yesu a luw mə ma ngaɓngaɓ nhi atalan tan. Kadaban səna acin, ɗiya jariy mozlokotuf kə kawi Yesu angaw, amma a hovokigi a hidi cike, ta kə ɓasenta a kəsəm.
Buudu ngə bay Roma
(Mt 22:15-22; Mk 12:13-17)
20 Dəga am pic səna, mogroyiy jəgwan ɓəw mogroy məmbəzlimigi təm jik Bayzlav ɗiya jariy Yesu kə kawta. Njoɗ ɗefenma a hidi məpərmay mə vərəki talan ngatan mana hidi mə kawi məzugzugwa Musa ngər səsəray. Zlən ta kə vigi kə nehe ta kə səni mə gana ngetik, ko avə kə luw a ciki wər, kəjani mozlokotuf acin kə kaw ta za kə tep ta a kibik bay məmar lay kə zlen dalgway. Hidi səna sliɗi vigi acin. 21 Ma hosigi angər Yesu za, luwenta: ‹‹ Mordoy, yikwan mə sən za, hoh hoh ɗiy polkoy ɗahkwən, za hoh njə kə ceɗen ma a hidigi avə mozlokotuf tik. Ko hidi səna a njay tik wa ciki, hoh cə həriy koh a kimin ɗahkwən. Hoh njə kə ceɗ mə koh mgban mgban dap, hidi kə ɗewiy ɗew malaw mana Bayzlav mə mayu. 22 Ya Mordoy, tanjinhi a ceɗe yikwan səka, məzugzugwa Bayzlav a luw wər, law yikwan kə vəlen buudu a bay Roma məmar hayək roma cike vu, law kwən vu?›› 23 Njoɗ Yesu mə sən wirwir ngatan za, ɗiya luwenta acin: 24 ‹‹ Mə dahak suloy takan awənhi.›› Wət dah ta. Yesu ɗiya luwenta acin: ‹‹ Həriy ngayi avə zlim ngayi təm suloy nhi?›› Ɗiya zlawenta: ‹‹ Ngə bay Roma məmar hayək roma cike .›› 25 Yesu luwenta acin: ‹‹ A sən law, mana atəgo wər, mə vəlen buudu a bay Roma mana mə luw, za mə vəlen ngə Bayzlav təm mana Bayzlav mə mayu.›› 26 Ma zlim ta atəgo za, ɗiya luw ta: ‹‹ Kay, gawal nhi a sən zlaw kwet ta!›› Njay tan kaɗ tete. A tugo, a zlimiy ma mə ngavngav mə pətah a kəma ngetik za kə səni madaba gana tik a kibik hidigi ɓabəgwən.
Hidi mə məc məc avə kə mbəligi am məc za
(Mt 22:23-33; Mk 12:18-27)
27 Pic takan hidi Sadukigi yigi angər Yesu. Sadukigi səna a njə kə ngəway, za a njə kə luw ta: ‹‹ Hidi mə məc məc a mbəligi am məc za kwən ta.›› Ma yigi za, ɗiya nehi Yesu kə səni madaba gana tik, ɗiya luwenta acin: 28 ‹‹ Mordoy, anhi ləbar Musa mə ɗəɗefi yikwan ta micek, yikwan kə ɗiy tik. A luw: ‹Apica hidi tu dəm werti, za məcay tik mətak geɗ wərigi a dəwən, galmən kə sərəɓ werti tik səna kə jan kə mbuw wərigi makavay ngə galmən mə məc səna ta.’ 29 Ya Mordoy, aməcek hidi məpərmay ɗaha avə galmən wəriy kərtawəligi cisaray. Bece dəm werti, məcay tik mətak jan kərti. 30 Zərmba sərəɓ werti səna, məcay tik mətak jan kərti bah. 31 Za Deli təm a səna. Ha hos taniy cisaray tik atəgo . 32 Ma məcigi cike za, werti səna məcay tik təm. 33 Yo, mana atəgo acin Mordoy, am pic hidi mə məc məc tu kə mbəligi am məc za, werti səna acin av kə ɗew kə werti ngayi? Kadaban hidi nhi cisaray tan tu dəm ta.›› 34 Yesu luwenta: ‹‹ A talan mahayək a wənhi mawəl avə werti a njə kə dəmi kəsəm tan. 35 Amma mawuligi avə wertigi mə hosigi gəga za Bayzlav kə mbəla ta am məc, za kə tep ta am lay sin məmaru, a dəmi kəsəm ɗaba. 36 A məci ɗaba, av kə ɗewiy mana mbaslayigi ngə Bayzlav. Tu mbaɗi kə wəriy Bayzlav, kadaban Bayzlav tu mbəla ta am məc za. 37 Mə jəgwan ma atalan mbəl ngə məc məcigi am məc za bah kemi? Ko Musa avə talan tik tu luw, hidi mə məc məci av kə mbəligi am məc za. Mə ɓən atalan ləbar tə talan pay kidigiɗ Musa mə luw təm deftere: a luw Bayzlav ngə Ibrahima, ngə Izak ɓəw ngə Zakob.’ 38 Mə nəfiy zlim tan təgo kə luw kaɗ, a wani avə micin. Kadaban Bayzlav wər, ngə hidi mə məc məci kwən, amma ngə hidi njə micin. Bayzlav ngə hidi tav variya. Am həriy ngetik wər, hidi cike awaniy avə micin.›› 39 Mogroyiy jəgwan məpərmay təbəgo ma zlim ta atəgo za, ɗiya luwenta a Yesu: ‹‹ Kay mordoy, hoh sən zlaw ma kwet.›› 40 Adəwən səna ɗewiy tan kaɗ tete, kadaban tu hovokigi kə neh mə məpərmay bah.
Kristu, kər ngə Bayzlav
(Mt 22:41-46; Mk 12:35-37)
41 Yesu a ceɗenta ləbar məpərmay a hidigi. A luwenta: ‹‹ Hidigi a njə kə luw ta: ‹Kristu, Hidi Bayzlav mə wel kə mbəl hidigi acin dehen bay Dawda wər kemi?’ 42 Ko bay Dawda avə talan tik ma, tu jək dirif atalan Kristu səna am deftere ngetik. A luw: ‹Bayzlav tu luwen a Mordoy ɗa: A ɗewey koh am ngər zəm ɗə za, yikwan kə mar lay avə hoh. 43 Kula am pic kata tu kə vəloh mosum koyigi am ngəra, hoh kə bacentə ngaz am wəla.’ 44 Mə saf, bay Dawda avə talan ngetik tu ɗefenma a Kristu səna ‹Mordoy ngaɗa.› Ya za acin kə mbaɗ kə dehen nhi wər, a ɗiy a ciki?››
Mogroyiy jəgwan mə njə kə gəli talan tan
(Mt 23:1-36; Mk 12:38-40)
45 Yesu ɗiya sleken talan a wəriy gawliy ngetik a kibik hidi mə ɓasi kə zlimiy ləbar tik. A luwenta: 46 ‹‹ Mə kaw talan kin lawlaw avə mogroyiy jugwan. A njə kə may kə taligi avə ləkwət mogroyigi ma cip kə fali talan tan avə sin. Am lay ɓas a njə kə mayi hidi kə ɗewiy kaɗ kə ɗen tə mbeli mana hidi mordoy. A jik jəgwan ngə Yahudigi, a njə kə jariy lay ɗew ma fal kə ɗewiy rap a kimin, hidigi kə saf ta. Za hidigi tu kə ɗefentəma kə zəm gəd məmbəlwa, a njə kə jariy lay ɗew malaw kə ɗewiy a kimin kə vərəki talan tan mana hidi mogroy. 47 A njə kə vahi am tar Bayzlav, kə jan hidigi kə saf ta mana hidi malaw. Za ma a njə kə lebeɗi wertigi mə cupcup kə jan kə yəki təkən təm ngər tan cike wayza. Ta ceɗe hin, hidi nhi, mandal pic sən mə hoso za, dalgway ngatan avə kə ɗiy kwat day kə ngə hidigi .