Wer mə cupcup a vəlen təkən a Bayzlav
(Mk 12:41-44)
21
Yesu awan am jik Bayzlav. Lim hidi mə njənjigi a vəlenta suloy a Bayzlav. A zek ta am lay zek tik. 2 Gwedek lim matakwan werti mə cupcup wət dal saray, za zek a kimin təm. 3 Yesu ma lim za, ɗiya luwen a hidigi acin: ‹‹ Ta ceɗehinkaɗ law law, matakwan werti nhi tu vəlen suloy a Bayzlav day kə hidi cike mə vəl ta ma day day nhi. 4 Kadaban mi, matakwan werti nhi wər, a wət təkən cike sin məmaru, za vəlen a Bayzlav. Ko təkən ndez a fəs angər tik ɓabəgwən, sin ɗew ngər may may acin. Amma məpərmayigi wər, a vəli suloy am ngatan mə fəs fəs, taniy məmarta, təkən ngə ɗiy avə sin gesin ɗahkwən .››Banay ma par par zagway, za acin talan mahayək kə way
(Mt 24:1-14; Mk 13:1-13)
5 Pic takan hidi məpərmay a zləgamigi atalan jik Bayzlav, ɗiya luw ta: ‹‹ Mə saf jik malaw nhi. A ndən ta avə gugwən malaw, za təkən malawigi hidi mə vəlenta a Bayzlav awaniy kimin.›› Yesu luwenta acin: 6 ‹‹ jik malaw hin ta saf nhi, pic takan av kə gom grimimim way kaɗ. Gugun mə sləb tə njəsl njəsl nhi, məv kə fəs atalan celen ɗahkwən .›› 7 Ma zlim ta atəgo za, a luw ta: ‹‹ Aw Mordoy, təkən nhi avə kə hosoho a pu? Təkən məv kə ceɗe yikwan, jik Bayzlav sən avə kə gom nhi təkən ngemi? A ceɗe yikwan səka!›› 8 Yesu ɗiya zlawenta: ‹‹ Mə puw talan kin law law, ta hidi məpərmay kə lebeɗi hin. Ta ceɗe hin, hidigi dolom avə kə yigi am zlim ngaɗa kə mbaɗi talan tan kə kata, ko yi kə luw: ‹Sin acin Kristu, Hidi Bayzlav mə welu kə mbəl hidigi. Pic sən mə hoso za, kadaban səna sin mə yah.› Mana tu luwe hin atəgo , mə gər kə yək mə ngatan kwən. 9 ‹‹ Mana hin tu zlim vərum tu diw am lay ma par par, za hidigi a ngavi lay, mə gər kə hovok kwən. Kadaban ko a ɗiya a ciki, səna təkəniy nhi kə ɗiy zagway. Amma ta ceɗe hin, ko təkəniy nhi tu ɗiya atəgo , talan mahayək a way njoɗ gesin kwən. 10 Yo ta ceɗe hin, hidi tə liɓde məpərmay av kə jəgəmigi avə hidi tə liɓde məpərmay. Bay məpərmay av kə gərin ma a celen bay mana sin. 11 Talan mahayək avə kə kəz gingiɗ gingiɗ. Am hayək par par mitis avə kə ɗiy day day, za dal mə njə kə zlan angaw avə kə mgbaw hayək təm. Zik ziki mordoy avə kə yigi a dibizlav za kə hovok hidigi .
12 Yo, mə slek atalan kin law law, məv kə sa banay zagway za acin təkən, kata mə ceɗehinnhi kə ɗiy. Hidi məpərmay avə kə ɗiye hin mə ngavngav kadaban hin ta səb mozlokotuf ngaɗa. Avə kə kawi hin kə tep a kibik mə zliy dalgway tə jik jəgwan ngə Yahudigi. Avə kə peki hin am jik dangay, za avə kə tepiy hin a kibik bayigi ɓəw hidi mogroy məmariy lay kə zliy hin dalgway. 13 Mandal hin ma wan am nəv ngər ngə hidi mogroy nhi, hin məv kə jan mozlokotuf acin kə ceɗenta mgban mgban kaɗ, hin səb mozlokotuf ngaɗa. 14 Za talan kin mə ɓən təm: Hidigi tu kə kawi hin səna, mə gər kəɓən day atalan ma, hin tu kə ceɗenta kwən. 15 Kadaban sləgam məv kə pətah a kəma kin za, kata acin məv kə ceɗe hin, za təv kə vəle hin ɓen. Ko a dab mosum kin cike, hidi takan məv kə kaw hin am dalgway ɗahkwən . 16 ‹‹ Ko babay kin avə mamay kin av kə tepe hin a kibik hidi mogroyi, kadaban mə njə kə səb mozlokotuf ngaɗa. Ko galmocoh kin, ko vuni kin, ko ngwalayi kin avə kə ɗiyi hin atəgo təm. Hidi məpərmay dolom tə dab kin avə kə wəzl tə kaɗ. 17 Hidi cike avə kə zeli hin kadaban hin ta njə kə səb mozlokotuf ngaɗa. 18 Amma ta ceɗe hin, mə gər kə hovok kwən, ko suson talan kin takan a lek kwən. 19 Mə ɓəs kə jan hin kə jan micin ndawyan.››
Dalgway atalan Ursalima
(Mt 24:15-21; Mk 13:14-19)
20 Yesu ɗiya luwenta bah: ‹‹ Mandal pic sən mə hoso za, hidi mə diwi vərum avə kə yigi kə nder liɓde Ursalima. Mandal hin tu lim sojigi tu gbawi liɓde sən kaɗ, hin məv kə sən tik acin a kimin, hayək səna avə kə cakway njoɗ. 21 Am pic təkən sən tu kə hosoho, hidi təm hayək ma par par bay Yahudiya məmaru, mə si tan atalan wərum kə mbəl micin ngatan. Hidi təm liɓde Ursalima məv kə ɗewiy a de, mə si tan angaw. Za hidi tə donu, mə gər kə jəɓi a de kwən, mə si tan dab. 22 Am pic səna Bayzlav av kə zlen dalgway a hidigi. Təkən cike av kə hosoho atalan tan mana ləbar Bayzlav mə luwu. 23 Banay mordoy av kə yah atalan hidi təm hayək nhi, kadaban Bayzlav av kə ɗefentə lem ngetik. Ta ceɗe hin, am pic səna wertigi tav liɓi avə mawarigi av kə zləni banay day day. 24 Hidi av kə bəli hidi məpərmay təm hayək səna avə masalam. Sənanhigi av kə kaw ta, kə tep ta am hayək ma par par təm talan mahayək kə ɗewiy kə baalam. Hidi təm səban ma par par av kə jakenta ngaz am wula ngə hidi təm hayək tugo. Av kə mariy liɓde səna nha am pic Bayzlav mə zlu kə way kəsəɗ tan.››
Hidi mə yah ta ngər Bayzlav za avə kə jəɓaha
(Mt 24:29-35; Mk 13:24-31)
25 Yesu ɗiya luw bah: ‹‹ Am pic talan mahayək tu kə way, pic, təra ɓəw cuzlerekigi avə kə zlambaɗigi. Səban hidi ma par par təm talan mahayək cike, tu kə limi təkəniy sən, avə kə nənihigi av kə hovokigi. Mana tu zlimiy maza a kwar a gədan, a zlim, nəv ngatan av kə mbir. 26 Hidi cike tu kə puwiy təkən ma par par tu kə hosoho atalan ngatan təm, nəv ngatan av kə ndoh kə hovokigi za kə məcigi. Kadaban təkən cike tə dibizlav njə gədan mə kawi təkən təbəgo avə kə cakwayigi. 27 Za acin hidigi av kə limek ta, kata Hidi mə yah ta ngər Bayzlav za, ta yah am liɓ gazlavay za. Təv kə yah avə gədan mordoy. 28 Təkən nhi cike tu kə diw kə hoso, mə səsak, mə sok nəv kaɗ. Kadaban a fəs wan ndas ɗaba, Bayzlav av kə mbəle hin kaɗ.
29 ‹‹ Yo mə zlimu, təv kə ceɗehinma məngaɓngaɓ atalan sikwiɗ ɓəw pay məpərmayigi. 30 Hin ta njə kə lim ta, vidiɗi tan tu yoɓigi za a diw kə ci vidiɗ ndawyan, mə njə kə ləw: ‹von mbeh,› atəgo kwən vu? 31 Yo, atəgo təm, hin tu kə lim təkəniy cike kata mə ceɗehinnhi a ɗiy wər, məv kə sən tik a kimin za, Bayzlav mbeh kə yah kə mar lay. 32 Ta ceɗehinkaɗ law law, hidi ta picah av kə limi təkən nhi cike zagway avə həriy ngatan za acin kə məcigi. 33 Dibizlav avə mahayək avə kə lekigi, amma ləbar ngaɗ wər, a lek kwən, avə kə ɗew ko a pu.
34 ‹‹ Yo ta luwe hin, mə kaw talan kin lawlaw acin. Mə gər kə zlay talan kə zəm gəda, zəm zəm kə hav, za kə sa movu day talan kin ha kə hay kwən. Bərngəzl talan kin mə gər kə pərasl kəɓən atalan təkən zəm ɓəw atalan aray kin kwən. Kadaban hin tu zlay talan am təkən nhi wər, am pic kata tu kə jəɓaha, təv kəjani hin məndumndum. 35 Təv kə yah məndumndum mana jəva ta njə kə kaw təkən donu viyak. Am pic səna təv kə jan hidi cike təm talan mahayək məndumndum. 36 Yo, mana anhi acin, ta ceɗehinkaɗ, mə ɗew avə variya, za mə tar Bayzlav hoyhoy. A təgo məv kə jan gədan ngə ɓəs am təkən cike məv kə hosoho atalan kin. Za məv kə yah a kibik ɗa kata Hidi mə yah ta ngər Bayzlav za mətak hovok acin.››