Wir wir ngə wəzl Yesu
22
Məmbəlwa mə njə kə ɗiyta avə bəret mətak njem mbeh. A njə kə luwta məmbəlwa ngə Paska. 2 Mogroyiy məmbəzli ma təm jik Bayzlav, taniy avəmogroyiy jəgwan ɗiya jariy mozlokotuf ngə wəzl Yesu kaɗ. Zəni a hovoki avə hidigi .3 Adəwən səna, Musuruf pət am nəv ngə Yahuda mə njə kə ɗefentəma Isikariyot. Hidi takan tə dab wəriy gawliy ngə Yesu ma gəɓ atalan saray. 4 Sliɗ va zler ma avə mə mbəzli ma mogroyigi ɓəw avə hidiy mogroyigi mə njə kə puwiy jik Bayzlav, kə jar wir wir ngə kaw Yesu. 5 Hidiy səna tu zəzayigi. Sləsləbi kə vəlenta suloy. 6 Yahuda yək mə ngatan. Sin ɗiya jar wir wir ngə kaw Yesu avə ɓah. Asəna kə jan hidiy kə sənta kwən.
Sləsləɓ ngə məmbəlwa ngə Paska
7 Tanjinhi pic məmbəlwa ngə ɗiy avə bəret mətak njem. Am pic səna hidigi a njə kə fati kər təmak ngə məmbəlwa ngə Paska. 8 Yesu ɗiya ɗefenma a Piyer avə Yuhana kə zlən ta am liɓde Ursalima. A luwenta: ‹‹ Mə va, mə sləsləɓi yikwan gəd məmbəlwa ngə Paska yikwan kə zəm tik. ›› 9 Hidi nhi ɗiya luwenta: ‹‹ Ha may yikwan kə va kə tə tik a ki?›› 10 Yesu ɗiya luwenta acin: ‹‹ Mə va am liɓde Ursalima tə kibik təgo nhi. Mana hin, mbeh kə hos abəgo, məv kə jan hidi avə siɗe ngə yəm atalan a va a mozlokotuf. Hin kə səb tik. Sin tu kə pət a de, hin kə səb tik təm, 11 Za hin kə luwen a njə de təbəgo acin: ‹‹ Mordoy ngiykwan a zləna yikwan angər koh, kə luwoh se: Jik yikwan tu kə zəm gəda məmbəlwa ngə Paska avə wəriy gawliy ngaɗa a wan a ki ta.’ 12 Mana hin tu luwen atəgo , gawal səna avə kə ɗefe hin jik mordoy tə wəlav, njə lay ɗew mə sləsləɓa waykaɗ. Am jik səna acin məv kə tə gəd məmbəlwa Paska a bəgo. ›› 13 Hidi ma saray nhi ma zlim tə za, sliɗi vigi acin. Jani təkəniy cike tiɗ tiɗe mana Yesu mə ceɗenta. Za sləsləɓi gəd məmbəlwa Paska a bəgo.
Gəda məmbəlwa ngə Paska
(Mt 26:26-30; Mk 14:22-26; 1 Kor 11:23-25)
14 Ler zəm gəd məmbəlwa Paska ma hos za, Yesu avə mokotufi tik sliɗi vigi. Ma hosigi za, ɗewiy kaɗ kə zəm tik. 15 Am mandal a zəmiy gəda, Yesu ɗiya luwenta acin: ‹‹ Kat tə may wər kə zəm gəda məmbəlwa Pask anhi avə hin witikwitik zagway za cin kata kə sa banay. 16 Ta ceɗe hin, tə zəm gəd məmbəlw anhi ɗaba. Sey madaba ma ngə məmbəlwa ngə Paska səna tu pəsl zagway, am lay Bayzlav məmaru.›› 17 Ma ceɗenta atəgo za, wət təkən ngə sa avə kop tik, luwen soko a Bayzlav, za ɗiya luw: ‹‹ Mə wət təkən ngə sa nhi, hin cike kə sa tik. 18 Ta ceɗehinkaɗ, dəga a pica, tə sa təkən ngə sa man anhi ɗaba, səna am pic, Bayzlav tu kə mar lay.›› 19 Za wət bəret, luwen soko a Bayzlav, wəɗak wəɗak kaɗ, wət vəlenta kə hamta. A luw: ‹‹ Nhi acin kəsəm ngaɗa. Kata tu kə vəlu, hidigi kə wəzlak tə kaɗ, hin kə jan mbəl micin ngikin a kimin za. Mə ham bəret nhi hoyhoy, hin kəɓən atalan ɗa!›› 20 Ma wayi zəm gəda za, Yesu wət təkən ngə sa avə kop tik bah, ɗiya luw: ‹‹ Kop nhi acin jawma ndawyan, Bayzlav tu kə jaw tik kə ɗiy lap ndawyan avə hin. Av kə ɗiy avə ɓiɓiz ɗa məv kə zek atalan kin nhi. 8:6; 9:12
21 ‹‹ Mə zlim ta ceɗe hin, hidi məv kə ɗef ngəra atalan ɗa kə kawak tə ma, yikwan zəm gəda avə sin. 22 Yaw mindiwin, kata Hidi mə yah ta ngər Bayzlav za, təv kə məc kadaban Bayzlav a may atəgo . Yo hidi məv kə ɗef ngəra atalan ɗə nhi, avə kə sa banay day godokwən.›› 23 Ma zlimiy ləbar Yesu za, ɗiya nehi kəsəm am walan tan, ko yi a luw: ‹‹ A luw a kata acin vu?›› ‹‹ A luw a kata acin vu?››
Hidi mordoy acin yi?
24 Gwedek wəriy gawliy ngetik diwi kə zləgam am walan tan, a luw ta: ‹‹ Hid mordoy tə dab yikwan acin yi?›› 25 Yesu luwenta: ‹‹ Hin mə sən za, bayigi təm talan mahayək nhi a njə kə mariy hidigi avə gədan. Za bayigi njə gədan a njə kə mayi hidigi kə həmənta, kə luw ta: ‹Kay hidi nhi hidi malaw.’ 26 Amma hin wəriy gawliy ngaɗa wər, mə gər kə ɗiy talan kin mana bayigi nhi kwən. Ta ceɗe hin, hidi mordoy tə dab kin mə mbaɗ kə hidi mendez ɗər. Talan mbalgam tə dab kin mə ɗew kə hidi mə ɗiyen kəzəɗ a hidi cike. 27 Yo, tanjinhi hidi mə njə kə ɗew kaɗ kə zəm gəda avə hidi mə danah gəd səna am siwli za wər, mordoy acin yi? Mə ceɗek ku! Yo, hin mə sən za, hidi mordoy acin hidi mə njə kə zəm. Mə saf kata hidi mordoy tə dab kin ma, tə njə kə ɗiye hin kəzəɗ. Mə səb batam ngaɗa acin.
28 Ngikin, ko am banay kata mə su cike, hin mə ɓəsaza avə kata. 29 Kadaban səna, təv kə vəle hin lay, yikwan kə mar tik witikwitik mana Vay mə vəlak kata kə mar tik. 30 Am lay tu kə mar nhi, yikwan məv kə zəm gəda witik witik, za yikwan məv kə sa təkən sa a bəgo təm. Məv kə ɗew am lay ɗew bay kə zla dalgway səban hidi Israyiligi gəɓ atalan saray. Za məv kə mbaɗ mordoy acin.››
Yesu avə Simon Piyer
31 Yesu luwen a Simon Piyer: ‹‹ Simon, a teh zlimiy kə zlim ləbar kata tu kə ceɗeh nhi. Bayzlav tu geɗen mozlokotuf a Satan bay musuruf kə saf nəv kin, hin hidi mə səbiy mozlokotuf ngaɗa, mana werti mə njə kə kəceɗ mosuf kə wəɗak mə dapəɗ dapəɗ avə mətak dapəɗ. 32 Amma kata tu tar Bayzlav atalan koh Simon, hoh kə ɗew mətak buwak dəwən. Kata mə sən za, hav kə buwak dəwən, amma pic takan, hoh tu kə jəɓa kə səb mozlokotuf ngaɗ bah, ma mənenta a colohigi kə gari toy toy am mozlokotuf ngaɗa.›› 33 Simon Piyer luwenni acin: ‹‹ Ha gər kə luwa aceki, Mordoy? Ko avə kə fiyigi a jik dangay, məv kə va avə hoh. Ko avə kə wəzli kaɗ, məv kə məc avə hoh.›› 34 Yesu ɗiya zlaweni: ‹‹ Piyer, ta ceɗeh kaɗ, avə vuɗu nhi, gomzok a cə wəl gesin bugwən, havə kə luw atalan ɗa am həriy hidigi jəɓ makaɗ, ha sənak ɗahkwən ta.››
Ngəz a hidi kə ɓəs am banay
35 Yesu ɗiya luwen a wəriy gawliy ngetik bah: ‹‹ Kat mə zləne hin kə va a liɓde məpərmay kə ceɗenta ləbar Bayzlav a hidigi, kata tu zləne hin mətak suloy, mətak gabal ngə zek təkən zəm a kimin, za mətak kərap am ngaz. Yo, hin ma və za, təkən mə ndake hin ɗa vu?›› Nap luw ta: ‹‹ Awa, təkən mə ndake yikwan ɗahkwən .›› 36 Yesu luwenta acin: ‹‹ Tanjinhi atəgo ɗaba. Hidi məmar suloy ɓəw hidi məmar gabal ngə zek təkən zəm, mə wət gendik kə va avə sin. Hidi mətak masalam wər, mə ber ləkwət ngetik, mə səkəm takan kə va avə sin təm. 37 Hin mə sən ləbar məpərmay mə ɗəɗef ta təm deftere Bayzlav za kwa. Tu ɗəɗef ta: ‹Sin wa hidi mə ngav ngav.› Yo, ləbar səna a ɗəɗef ta atalan ɗa. Ta ceɗe hin, ko a ɗiya aceki, sey təkəniy təgo kə ɗiy atalan ɗa. Yaw, təkən mə ɗəɗef ta atalan ɗə nhi, mbeh kə ɗiy atalan ɗa mindiwin.›› 38 Wəriy gawliy ngetik luwenta: ‹‹ Mordoy, ndah masalam saray anhi .›› Yesu luwenta: ‹‹ Kay, mə zlim ləbar ɗə gesin bugwən, geleɓe kə geɗ zləgam səna awənhi.››
Yesu tar Bayzlav a wərum Jaytun
(Mt 26:36-46; Mk 14:32-42)
39 Yesu sliɗ va atalan wərum Jaytun am lay sin ta və ma hoyhoy a bəgo. wəriy gawliy ngetik səb ta. 40 Ma hosigi am lay sən za, ɗiya luwen a wəriy gawliy ngetik acin: ‹‹ Mə tar Bayzlav atalan kin, musuruf kə ɗew mətak lebeɗi hin, hin kə geɗ mozlokotuf ngaɗa.›› 41 Yesu ma luwenta atəgo za, sliɗ vətik gaf gwedek dey dey ndə gugwən hos a bəgo. Gbili titimbiz, cə ngəra a Bayzlav, 42 luweni: ‹‹ Aw Vay, a jan za wər, hoh gər kə geɗek kə sa banay tu kə yah atalan ɗə nhi kwən. Ya Vay ɗa, hoh gər kə ɗiy təkən mana kata mə may kwən, a ɗiy təkən hoh mə mayu.›› 43 Njoɗ mə zləzlən Bayzlav yah a wəzlav za angər tik kə vəlen gədan kə ɓəs. 44 Yesu ɗiya nənəh kam kam kam a hovok, nəv ngetik mbeh kə ndoh kə məc. Kadaban səna a tar Bayzlav day day avə gədan ngetik cike wayza kə mənen ni. ɓən ɓən lay wiriɓ ɗiya kwara məzəroh ngetik za go go gok mana ɓiɓiz. 45 Ma tar Bayzlav za, jəɓ angər wəriy gawliy ngetik, jan ta a wanigi, həriy ngatan tu hav, kadaban tuwnha tə talan tan. 46 Fəɗah tə kaɗ, luwenta: ‹‹ Ngikin, ma wan vu? Mə sliɗ za, mə tar Bayzlav, Musuruf kə ɗew mətak lebeɗi hin, hin kə geɗ mozlokotuf ngaɗa.››
Kaw ngə Yesu
47 Yesu a zləgam a wəlen, hidi dolom hosigi. Yahuda tafənan, hidi tə dab wəriy gawliy ngetik ma gəɓ atalan saray acin mə cə kibik. Va angər Yesu kə ɗen mbeli law law. 48 Yesu luwenni acin: ‹‹ Hay Yahuda, ha yə kə ɗə mbeli, a kat, Hidi mə yah ta ngər Bayzlav za mana ngwalay koh malaw, hidi kə sən ta a kimin kə kawak tə vu?›› 49 Njoɗ hidi mə səbiy Yesu tu səni təkən məv kə hosoho atalan Yesu, neh ta acin: ‹‹ Aw Mordoy, yikwan kə bəl ta avə masalam vu?›› 50 Njoɗ hidi takan tə dab tan pəɗ masalam ɗiya bəl hidi mə njə kə ɗiy kəzəɗ a de mə mbəzl ma mordoy tə jik Bayzlav. Mban zlim ngetik tam ngər zəm kaɗ, 51 Yesu ɗiya luw: ‹‹ Mə geɗ jəgəm kaɗ, mək.›› Njoɗ Yesu mbok zlim gawal nhi kaɗ. 52 Adəwən səna Yesu ɗiya luwen a mogroy məmbəzlimigi, avə mogroyigi mə njə kə puwiy jik Bayzlav, ɓəw a mbusurigi mə yi kə kaw ta: ‹‹ Ngikin, mə yah avə masalam ɓəw avə zlambəlay wər, kata məhəl ta zla wəl hidigi vu? 53 Hoyhoy yikwan ma avə hin witikwitik a jik Bayzlav, za mə kawak kway? Yo apica, pic ngikin tu sla acin kə kawa ku, ɓəw pic ngə Musuruf tu sla baha kə ɗiy kəzəɗ lay ma zigwit. ‹‹
Piyer a luw: ‹‹ Ta sən Yesu ɗahkwən ‹‹
54 Gwedek hidi kawi Yesu,za tep ta a de ngə mə mbəzl ma mordoy tə kimin təm jik Bayzlav. Amma Piyer wər a səb ta adəwən za. 55 A terde mə mbəzl ma səna, hidi mbəli kuhu, a sif ta. Piyer va angər tan, ɗew kaɗ kə sif tik təm. 56 Gwedek werti mə ɗiy kəzəɗ tə de ngə mə mbəzl ma səna lim Piyer a sif kuhu. Cə həriya atalan tik, ɗiya luw: ‹‹ Gawəl nhi təm a njə kə ɗewiy avə Yesu.›› 57 Piyer luweni: ‹‹ Awa, ta sən gawal nhi ɗahkwən .›› 58 Gwedek hidi məpərmay lim, ɗiya luw: ‹‹ Kata sənoh, hoh wan dab celeni Yesu təm.›› Piyer tafnan luweni: ‹‹ Awa, kata celen kwən.›› 59 Adəwən ler takan, hidi məpərmay luw bah: ‹‹ Kat mə sən za, ko a ɗiy a ciki, gawal nhi celen Yesu, kadaban sin hidi təm hayək Galili mana Yesu təm.›› 60 Amma Piyer a ngəway dab, ɗiya luweni: ‹‹ Ha ceɗek mə ngemi? Ta sən ɗahkwən .›› Piyer ta zləgam nhi, njoɗ gomzok cə wəla. 61 Yesu buw za, cə həriya atalan tik. Njoɗ Piyer ɓən atalan ləbar, Yesu mə ceɗen ngə səko gəda. Tu luweni: ‹‹ Avə vuɗ nhi gomzok a cə wəl gesin bugwən, hav kə luw atalan ɗa jəɓ makaɗ am həriy hidigi, hoh sənak ɗahkwən ta.›› 62 Piyer ma ɓən atalan ləbar, Yesu mə ceɗen sən za, sliɗ pətah tik a caɗak, za nap han acin avə teweɗ.
Yesu avə mə mbəzli ma mogroy ngə Yahudigi
63-64 Gwedek hidi mə puwiy Yesu ɗiya mbisen ta. Paɗ paɗi həriy tik kaɗ, wəzl wəzl ta. Ma wəzl tə za, luwenta: ‹‹ hoh mə sən təkən nhi, hoh mə sən hidi mə wəzli nhi za vu? A ceɗe yikwan səka may !›› 65 Ɗiya gasenta məcəcew day. 66 Lay ma dan za, mbusurigi, mogroyi məmbəzlimigi təm jik Bayzlav avə mogroyiy jəgwan yi ɓas ɓasi kaɗ. Nap luwenta a hidigi kə dahi Yesu a kibik mogroyigi mə zliy dalgway tə dab Yahudigi cike kə zleri mə tik. Sliɗ və dah ta. 67 Ma dah tə za, hidi mogroyigi səna ɗiya neh ta, a luwenta: ‹‹ Hoh acin Kristu Hidi Bayzlav mə welu kə mbəl hidigi vu? A ceɗe yikwan may.›› Yesu luwenta: ‹‹ Mana kata luwe hin,, yaw kata, mə yək mə ngaɗ kwən. 68 Za mana kata nehe hin təkən təm, mə zlawak kwən. 69 Amma ta ceɗe hin, dəga apica, kata Hidi mə yah ta ngər Bayzlav za, təv kə ɗew am ngər zəm Bayzlav məmar gədan.›› 70 Ma zlim ta atəgo za, taniy cike gasi ma waw, a luwenta: ‹‹ Yawa, mana kə luwa kaɗ hoh Kər Bayzlav kwa?›› Yesu luwenta acin: ‹‹ Yaw, hin mə ceɗ way za, kata səna.›› 71 Ma zlim ta atəgo za, ɗiya luw ta: ‹‹ Mə nhi gəga dab, yikwan ma may hidi məpərmay kə ceɗi yikwan ma a ceɗ ɗaba. Yikwan avə talan ngiykwan, yikwan tu zlim a kəma tik mana mə rə Bayzlav.››