Yesu a kibik Pilatu
23
Gwedek hidi mə ɓas ɓas cike sliɗigi, tepiy Yesu a kibik Pilatu, bay məmar lay. 2 A bəgo, a luw ta: ‹‹ Yikwan jan gawal nhi a ngav hayək ngiykwan. A luwenta a hidigi : ‹Mə gər kə wərək buudu ngə bay Roma məmar hayək roma cike kwən ta.› Tu luwenta bah: ‹Sin acin Kristu Bayzlav mə wel kə ɗew kə bay ta.› ‹‹ 3 Pilatu ma zlim atəgo za, ɗiya luwen a Yesu acin: ‹‹ Hoh acin bay hidi Yahudigi mindiwin vu?›› Yesu zlaweni: ‹‹ Yaw mana hoh mə luw sən dab.›› 4 Pilatu luwen a mogroy məmbəzlimigi ɓəw a hidi mə ɓas ɓas acin: ‹‹ Tə jan mə ngav ngav, gawal nhi mə ɗiy ko gwedek kə zlen dalgway bugwən.›› 5 Amma hidi a wəleni ɓe ɓe a ngawentə ma a madaba kə kaw ta am dalgway dab. A luw ta: ‹‹ Gawəl nhi tu cakway ləbar ngetik a dab hidi Yahudigi. A diw am hayək bay Galili məmaru hos awənhi. A wilen a cakway tik. Za ləbar ngetik a njə kə dah jəgəm a dab hidi cike.››Yesu a kibik bay Hiridus
6 Pilatu ma zlim ləbar hidi mə cen tə wəla a Yesu am dalgway sən za, ɗiya luwenta: ‹‹ Gawəl nhi wər, hidi təm hayək Galili, bay Hirudus məmar vu?›› 7 Hidi səna zlawenta: ‹‹ Yaw, sin hidi təm hayək Galili.›› Pilatu luwenta: ‹‹ Yo, Yesu hidi təm hayək bay Hiridus, mə tep angər tik, sin mə zlen dalgway.›› Mandal səna, bay Hirudus awan am liɓde Ursalima təm. 8 Sliɗigi tep ta acin. Ma tep tə za, nəv bay Hirudus ɗiya zəzay kə lim Yesu. A may dəga micek kə gbomigi avə sin. Kadaban tu zlim ləbariy tik, ta njə kə ɗiy təkən ma tuwah, za a may sin kə ɗiy səka am həriy ngetik kə lim tik. 9 Hirudus ɗiya neh Yesu atalan təkən ma par par acin. Amma Yesu a zlawen ɓabəgwən, njay tik tete. 10 Mogroy mə mbəzli migi tə jik Bayzlav avə mogroyiy jəgwan awaniy bəgo təm. Nap ngawenta ma par par a madaba acin. 11 Hirudus avə soji ngetik a mbisen ta, za a saf ta mana təkən mə ngav ngav. Wəti ləkwət malaw godokwən, kulenta wa ngə bay kə mbisen ta. Ma ɗiy ta atəgo za, jəɓ tep tə bah angər Pilatu. 12 Aməcek Pilatu avə Hirudus a zleri ma ɗahkwən. Amma am pic səna kawi ngwalay acin.
A zliy dalgway Yesu kə wəzl tə kaɗ
13 Yesu ma hos a kibik Pilatu za, Pilatu ɗefenma a mogroy məmbəzlimigi təm jik Bayzlav, hidi mogroyigi ɓəw hidi məpərmay kə ɓasi kaɗ bah. 14 Ma ɓasigi kaɗ za, ɗiya luwenta: ‹‹ Hin dah gawal nhi a kibik ngaɗa, za hin luw: ‹A ngav hayək ngiykwan ta.› Yo, kata mə neh za a kibik kin kwən vu, atalan təkən ma par par hin mə cen wəla am dalgway. Za tə jan təkən mə ngavngav sin mə ɗiyu ko gwedek kə jan kə zlen dalgway ɓabəgwən. 15 Mə saf, ko Hirudus a jan təkən mə ngavngav sin mə ɗiyu ɓabəgwən, makavay səna acin mə jəɓah tə bah angər yikwan awənhi. Yo ta ceɗe hin, gawal nhi a ɗiy mə ngavngav ko gwedek ngə wəzl kaɗ bugwən. 16 Tanjinhi təv kə zaren lakwatay, za təv kə fək kaɗ.››
17 A luwenta atəgo nhi, kadaban am di cike hidi Yahudigi ta njə kə ɗiyi məmbəlwa Paska, sey Pilatu kə fəkenta hidi takan am jik dangay za. 18-19 Am pic ta jariy Yesu kə wəzl tə kaɗ nhi, hidi məpərmay awan jik dangay, zlim ngetik Barabas. Barabas səna tu ngav lay a liɓde Ursalima avə hidi məpərmay, za tu wəzl hidi mimci. Hidi mə ɓas ɓas ma sən ta, Pilatu a gər kə fək Yesu kaɗ, ɗiya ci wəl day day, a luw ta: ‹‹ A wəzl gawal təgo kaɗ, ma fəka yikwan Barabas kaɗ.›› 20 Pilatu luwenta bah kə jan kə yəki mə ngetik, a luwenta: ‹‹ Ta may kə fək Yesu kaɗ.›› 21 Amma taniy a wəleni ɓe ɓe a ci wəl tan dab. A luw ta: ‹‹ A tpaw am pay mə məc, a tpaw am pay mə məc ta.›› 22 Pilatu luwenta bah jəɓ mə makaɗ tik: ‹‹ Aw hidi cah, mə ceɗek təkən mə ngavngav sin mə ɗiyu, kata kə tpaw am pay kə məc nhi, a ɗiy təkən ngemi? Tə jan təkən mə ngavngav mə ɗiy ko gwedek kə wəzl kaɗ ɓabəgwən. Tanjinhi təv kə zar tik avə lakwatay, za təv kə fək kaɗ.›› 23 Amma a wəleni ɓe ɓe a ci wəl tan dab. A luw ta: ‹‹ Aw, a tpaw am pay mə məc ta.›› Am ta ci wəl, day day, səna, tu kaw nəv ngə Pilatu. 24 Pilatu pəɗ ngər tik a kimin za, a luw acin: ‹‹ Mə ɗiyen təkən hin mə may.›› 25 Wət Yesu, vəl am nəv ngər ngatan, wət hidi mə ngav lay ɓəw mə wəzl hidi mimci tafənan, fəka kaɗ am jik dangay za mana taniy mə mayta.
Yesu am pay
26 Sojigi a tepiy Yesu kə wəzl tə kaɗ acin. Wəti pay vəlenta a Yesu kə wət kə va kə tpaw ta a kimin. Mandal a vigi a mozlokotuf, gbomigi avə hidi məpərmay a yah don za. Zlim ngetik Simon tə liɓde Sirene. Soji səna wətiy pay nhi vəlen ta a gawal tugo, luwenta: a səbaha adəwən za.›› 27 Hidi məpərmay dolom a səb ta baha. Adab hidi səna, wertigi awaniy bəgo. A hanigi, a dawi nəv ngatan atalan banay tu kə hosoho atalan Yesu. 28 Yesu buw kə va ngər tan, luwenta: ‹‹ Hin werti tu liɓde Ursalim anhi, mə gər kə han atalan ɗə kwən. Mə han atalan kin, ɓəw atalan wəriy kin ɗər. 29 Ta ceɗe hin, pic takan banay mordoy avə kə yah atalan kin. Am pic səna hidigi avə kə luw ta: ‹Midil wertigi, nəv ngatan mə ɗiy nek.› Kadaban werti njə wərigi avə kə hanigi: ‹Haya wəriy ɗa,› kəɓəni day day. 30 Hidigi avə kə hovokigi day day, za avə kə luwenta a wərum: ‹Mə gom atalan yikwan!› Za avə kə luwenta a wurum bah: ‹A pəs yikwan kaɗ!’ 31 Mana tu ɗiyenta təkəniy nhi a səna a pay ma njeɓek wər, za pay mə kwalkwala wər avə kə ɗiyen ta a ciki?
32 Sojigi ta tepiy Yesu səna, tepiy məhəligi saray baha kə va kə tpaw ta avə Yesu. 33 Hosigi am lay taniy mə may ta, zlim tik Golgota. Golgota səna mana kə luwa kaɗ, lay sən wa kukuɗum talan hidi membilen. Ma hosi za, wətiy Yesu tpaw ta am pay acin. Wəti məhəl ma takan tpaw ta am pay məpərmay am ngər zəm ngə Yesu za, za wətiy məhəl məpərmay tpaw ta am pay məpərmay am zlaɓay ngə Yesu za. 34 Yesu ɗiya tar Bayzlav atalan sojigi mə tpaw tə səna. A luw: ‹‹ Vay, a geɗ mə ngavngav ngatan kaɗ, kadaban a səni təkən taniy ta ɗiy ta ɗahkwən .›› Adəwən səna sojigi wətiy ləkwət tə kəsəm tik, za ɗiya fiyi metentenge kə sən avə kə wəzak ta a ciki. Ma fi tə za, nap wəzak ta acin. 35 Hidi mə ɓas ɓas təbəgo gari kaɗ kə safi təkən mə ɗiy səna. Amma mogroy Yahudigi tə dab tan wər, a mbisen ta a Yesu. A luw ta: ‹‹ Sin Kristu Hidi Bayzlav mə wel kə mbəl hidigi wər, mə mbəl talan tik may. Tu mbəl hidigi, za a mbəl talan tik səka ɗahkwən wər, mə ɗiy mi?›› 36 Ko sojigi mə tpaw ta ma a mbisen ta baha. Vigi mbeh mbeh a jagwar tik, wətiy təkən ngə sa ma kwerek vəlentakə sa. 37 ɗiya luwenta: ‹‹ Hoh bay hidi Yahudigi wər, a mbəl talan koh səka.›› 38 Hidigi tu ɗəɗef ta am pay ta talan tik za: ‹‹ Gawəl nhi, bay ngə hidi Yahudigi.›› 39 Məhəl ma takan bah, ɗiya rə Yesu, a luweni: ‹‹ Hoh luw, hoh acin Kristu Hidi Bayzlav mə wel kə mbəl hidigi. Tanjinhi, a mbəl talan koh za acin, za ma mbəl yikwan səka.›› 40 Məhəl mə saray tik ɗiya luwen a celen səna: ‹‹ Ha luw atəgo kwən. Ha hovok avə Bayzlav ɗahkwən vu? A saf, yikwan makaɗ tik, tu zliy dalgway ngiykwan pərak pərak. 41 Amma kata avə hoh wər, law yikwan kə sa banay anhi, kadaban yikwan mə jan gəd mazlən ngə kəzəɗ ngiykwan yikwan mə ɗiyu. Amma ngetik a ɗiy mə ngavngav ɓabəgwən, a sa banay may may dap.›› 42 ɗiya luwen a Yesu acin: ‹‹ Yesu, hoh tu kə jəɓa kə mar lay, ma ɓən atalan ɗə səka.›› 43 Yesu ɗiya luweni: ‹‹ Ta ceɗeh kaɗ law law, apica, yikwan məv kə lap avə hoh kə va a dibizlav kə ɗew am lay malaw.››
Məc ngə Yesu
44 Ma ɗiy dab dad pic, pic a zləzlaɗ ɗaɗaba, talan mahayək cike tu tpizlik. Tu nəp, nanha hos am pic hidi mə bizigi a yi tan a de. 45 Godo mə zen zen tə jik Bayzlav mə njə kə tak lay, Bayzlav ta njə kə ɗew a kimin, tu kwah a dab daba kav saray. 46 Yesu cə wəla, luwen a Bayzlav: ‹‹ Vay, a wət mbiɗ ngaɗ kaɗ.›› Ma luw atəgo za, məcay tik acin. 47 Mordoy soji təbəgo lim Yesu ta məc səna, ɗiya luw: ‹‹ Kay gawal nhi a ɗiy mə ngavngav bugwən, mindiwin sin hidi malaw hidi ɗa, za ɗiya səban Bayzlav,.›› 48 Hidi mə ɓas ɓas təbəgo mə yigi kə saf tik ma lim tə za, ɗiya dawi nəv ngatan, za vi tan de. 49 Baɗ gaf ngwalay Yesu avə wertigi məpərmay mə gari kaɗ, a safi Yesu ta məc səna. Mandal Yesu ma sliɗ am hayək Galili za, werti səna səb ta baha.
Yesu atalan civi
50-51 Hidi məpərmay ɗaha, zlim ngetik Zozef. Sin hidi təm liɓde Arimate am hayək Yahudiya. Gawal səna hidi malaw, za a njə kə ɗiy təkən mana Bayzlav mə mayu. A njə kə puw pic, Bayzlav tu kə yah kə mar lay. Zozef səna, hidi tə dab mbusurigi mə njə kə zliy dalgway. Mandal mə zliy dalgway ngə Yesu kə wəzl tə kaɗ nhi, a yək mə ngatan bugwən. 52 Yesu ma məc za, Zozef səna sliɗ va angər Pilatu, za luweni: ‹‹ Kat tə yah kə neh mozlokotuf kə wət mimci nhi kə va kə kaha kaɗ.›› 53 Bay Pilatu geɗən mozlokotuf. Zozef sliɗ va, və səroho mimci səna am pay za, paɗ paɗ avə yar ma baran, və kah kaɗ am civi. Civ səna civ ndawyan, a li gugwən mana bədum. 54 Mandal ta kah tə səna, hidi a sləsləɓigi ngə pic nəp ngə hidi Yahudigi.Pic mbah kə ndəv, mbe kə diwi nəp ngatan. 55 Werti məpərmayigi mə səbiy Yesu mandal məv kə sliɗi am hayək Galili za, səbiy Zozef təm kə va am talan civi, za limi mana Zozef mə kah mimci sən am civi. 56 Ma limi lay sən za, sliɗi jəɓi tan a de, və jar jariy pay mə mbu mbu, ti ti ɗawa avə sin kə va kə pəzenta a mimci səna. Am pic nəp hidi Yahudigi a vi ɓabəgwən. Nəpi tan mana məzugzugwa ngatan ta luw.