Civ ngə Yesu fongo
24
Adəwən pic nəp Yahudigi, am pic dəmas, gbəma za acin, werti səna wətiy ɗawa ngatan mə tə ta səna, za sliɗi vigi acin atalan civi Yesu səna. 2 Ma hosigi za, janiy gugwən mə peki talan civi avə sin mə goɗo kaɗ a gozlum za. 3 Pətigi am civi, saf safi Mordoy ngatan Yesu mə məc səna, ɗah a bəgo ɗaba. 4 ɗiya luw ta: ‹‹ Ya, təkən ngem mə ɗiyen acin mi? Tanjinhi yikwan kə ɗiy mi?›› Am ta ɓəni atəgo , njoɗ hidi saray avə ləkwət ma baran ma tew tew a kəsəm pətigi a kibik tan. 5 Werti səna tu hovokigi kam kam, təki talan tan, kaɗ. Hidi səna luwenta acin: ‹‹ Hid, hin ta gər səna awan a variya, ya mə jar atalan civi kemi? 6 Ɗah awənhi ɗaba, Bayzlav tu mbəlah tik am məc za, tanjinhi awan a variya. Mə ɓən talan ləbar mə ceɗehinmandal sin awan am hayək Galili. Tu luwe hin: 7 ‹Kat Hidi mə yah ta ngər Bayzlav za, ko a ɗiya a ciki, hidigi av kə kawak ta kə vəlak ta am nəv ngər hidi mə njə kə ɗiyi təkən mə ngavngav kə tpawak ta am pay kə məc. Mana kata tu məc, təv kə wan am civi wan saray, mə makaɗ tik təv kə mbəla ɗa,› asənkwən vu?›› 8 Werti səna ma zlim ta atəgo za, ɓəni atalan ləbar Yesu səna. 9-10 Gari a bəgo za jəɓitan. Adab tan Mari tə liɓde Magdala, Yowana ɓəw Mari mamay Zak. Vi angər wəriy gawliy ngə Yesu ma gəɓ atalan takan avə hidi məpərmay mə njə kə səbiy mozlokotuf Yesu, ceɗenta ləbar səna. ɗiya luwenta: ‹‹ Mə zlim, Yesu awana variya ta.›› 11 Ma zlim tə za, a yəki mə ngatan bugwən, a ca gandan, a ceɗi mə may may. 12 Amma Piyer vak sliɗ si a si, va atalan civi kə safa tik. Ma hos za, daɓ kaɗ kəɗan kəɗan, ɗah a bəgo kwən. Sey a lim təkən mana maslaga mə paɗ ta avə sin a gendik. ɗiya luw: ‹‹ Ya təkən ngem mə ɗiyen acin mi? Təkən nhi a pərasl bərngəzl talan ngaɗa.›› Sliɗ yah tik a de acin.Hidi saray a mozlokotuf Emawus
(Mk 16:12-13)
13 Am pic mbəla Yesu səna, hidi mə njə kə səbiy mozlokotuf Yesu saray sliɗigi am liɓde Ursalima za, vigi a liɓde Emawus. Kə sliɗ am liɓde Ursalima za kə hos a liɓde səna, ler saray a mozlokotuf. 14 Mandal a vigi a mozlokotuf a zləgamigi atalan təkən cike mə ɗiy tə talan Yesu. 15 Mandal a ngiway day day atalan təkəniy səna, Yesu avə talan tik yah a dab tan, za a vigi avə tanigi witik witik. 16 A lim ta, amma a sən tə Yesu bugwən, həriy ngatan tu kpizlik. 17 Yesu ɗiya luwenta acin: ‹‹ Mə zləgam tafnan a mozlokotuf nhi atalan mi?›› Gari kaɗ, ngaɗ ngaɗi həriy kaɗ acin. 18 Hidi takan tə dab tan, zlim ngetik Kiliyopas, ɗiya zlawen a Yesu: ‹‹ Təkən mə ɗiy ta məskoh, mbulukigi cike mə nji təm liɓde Ursalima mə sən tə za, za hoh hoh sən bəgwən vu?›› 19 Yesu ɗiya neh tik: ‹‹ Təkən mə ɗiy mi?›› Sin zlaweni: ‹‹ Yikwan mə zləgam atalan təkən mə ɗiy atalan Yesu tə liɓde Nazaratu. Am həriy Bayzlav ɓəw am həriy hidi cike, sin acin mokotuf Bayzlav. Tu ɗiy təkən mogroyigi ma par par. Za ta njə kə ceɗenta ləbar Bayzlav a hidigi təm, mə ngetik a ndəv am lay may may ɗahkwən . 20 Mogroy mə mbəzli ma təm jik Bayzlav ngiykwan ɓəw mogroy ngiykwan acin mə wət ta, mə vəl ta am nəv ngər hidi mogroy Roma yigi kə zliy dalgway ngetik kə wəzl tə kaɗ, za mə tpaw ta am pay kə məc. 21 Yikwan, mə ɓən, Bayzlav acin mə zlənaha kə mbəl hidi Israyiligi kadaban səna acin talan ngiykwan slek ke atalan tik. A saf, ma wəzli Yesu sən za, wan mə makaɗ apica. Amma təkən məpərmay tu ɗiy apica. 22-23 Werti məpərmay tə dab yikwan sliɗigi acin vigi gbəma za atalan civi, pətigi a kimin. Ma pətigi za saf safi, mimci səna ɗah a bəgo ɗaba. Mbaslayigi ngə Bayzlav saray pətigi a kibik ngatan, za luwenta: ‹Bayzlav tu mbəlah kaɗ, awana variya.› Ma zlim ta atəgo za, jəɓi kə ceɗi yikwan ləbar səna acin. Ləbar werti səna mə ceɗi yikwan, tu vəli yikwan ɓən day atalan tik. 24 Yikwan ma zlim za, hidi məpərmay tə dab yikwan vigi atalan civi səna, za janiy təkən cike mana werti səna mə ceɗi yikwan. Səna Yesu avə talan tik a lim tə ɓabəgwən.››
25 Kiliyopas ma ceɗen atəgo za, Yesu ɗiya zlawenta: ‹‹ Mə zlim lawlaw gesin bəgwən nhi kemi? Ləbar, mokotuf Bayzlav mə ceɗehinatalan təkən tu kə hosoho, nəv kin a wəlen saray saray kə yək tik. 26 Kata ceɗe hin, ko ɗiy a ciki,Kristu Hidi Bayzlav mə welu kə mbəl hidigi, sey kə sa banay mana hidi mə ɗiyent anhi, kə jan kə hos am lay Bayzlav məmaru, sin kə vəlen gədan mordoy ngetik acin.›› 27 Adəwən səna, Yesu ceɗenta təkən cike, hidigi ma par par mə ɗəɗef ta atalan tik am deftere Bayzlav. Diw kə ceɗenta ləbar təm deftere Musa, ceɗ ceɗenta hos am ləbar ngə Bayzlav mokotufi məpərmayi mə ɗəɗef ta cike kə zlim ta law law.
28 Ma mbeh kə hosigi a liɓde Emawus ta vi təbəgo səna, Yesu a gər kə geɗ tə kaɗ kə va tik kibik a gendik. 29 Hidi səna luwenta: ‹‹ A geɗiy yikwan kaɗ kwən, a saf pic mbeh kə ndəv, yikwan kə nəpay kin kwən vu?›› Yesu yək mə ngatan, za nəp avə tanigi. 30 ɗewiy kaɗ kə zəmiy gəda acin. Yesu tafnan wət bəret, luwen soko a Bayzlav. Wəɗak wəɗak kaɗ, wət vəlenta. 31 Ma lim ta atəgo za, njoɗ bərngəzl tan zlər. Nap luw ta acin: ‹‹ Aska Yesu sin.›› Njoɗ Yesu lekey tik am həriy ngatan za. 32 ɗiya zləgamigi a dab tanacin: ‹‹ Mandal Yesu mə luwa yikwan tə mozlokotuf, za mə ceɗi yikwan ləbar Bayzlav təm deftere nhi kə jan yikwan kə zlim tik law law, tu vəli yikwan ɓən kwən vu?›› 33 Njoɗ sliɗigi, jəɓi tan am liɓde Ursalima, janiy wəriy gawliy ngə Yesu ma gəɓ atalan takan mə ɓas ɓasi a celenigi. Jan tə mə ɓasi kaɗ avə celen tan. 34 Hidi mə ɓas ɓasi səna luw ta: ‹‹ Mordoy ngiykwan tu mbəl mindiwin, awan a variya. Simon mə lim za avə həriy ngetik.›› 35 Za hidi ma saray nhi ɗiya ceɗenta təkən mə ɗiy tə talan tan. Luwenta: ‹‹ Yikwan ma va kə va liɓde Emawus, yikwan jan Yesu a mozlokotuf, za yikwan mə sən sin bugwən. Avə səkoh a wəɗak bəret yikwan sən tik acin.››
Yesu a ɗef həriy ngetik
36 Hidi ma saray nhi a ceɗi təkən mə ɗiy səna, njoɗ Yesu avə talan tik yah a dab tan. Luwenta: ‹‹ ɗew malaw mə ɗiy a dab kin!›› 37 Hidi cike nəv ngatan mbir, kadaban a ca gandan a limi Mbiɗ ngə Bayzlav. 38 Yesu luwenta: ‹‹ Mə hovok man anhi kemi, za nəv kin a wəzən atalan mi?›› 39-40 Yesu ɗefenta ngər ngetik avə ngaz ngetik acin. A luwenta: “Anhi, mə saf ngər ngaɗa ɓəw ngaz ngaɗa, məv kə sən tik, kata atalan ɗa dap. Mə yah, mə mbəlem ngər kin am kəsəm ngaɗa, hin kə sən tik a kimin, kata mbiɗ kwən, kadaban mbiɗ vəren kəsəm ngetik avə kirngizl ngetik ɗahkwən. Amma ngaɗ wər, ɗaha.” 41 Ma lim tə za, nəv ngatan ɗiya zəzay day day, amma talan ngatan a wəlen a pərasl, kadaban səna a yək ta gesin bugwən. Kə jan talan ngatan kə pərasl kən wər, Yesu neh təkən ngə zəm angər tan. Luwenta: “Təkən ngə zəm ɗaha angər kin vu? Mə vəla ku.” 42 Hidi səna wətiy kilif mə mbəsaw mbəsaw ndez, vəlenta. 43 Yesu yək ham a ham a kibik ngatan. 44 Adəwən səna Yesu luwenta acin: “Kat mə ɗew tə dab kin, kata tu ceɗehinlawlaw təkən cike, hidi mə ɗəɗef ta tə talan ɗa, ko a ɗiy a ciki, təkəniy səna avə kə ɗiy atalan ɗa, za mə ɗiya tiɗe. Təkən Musa mə ɗəɗefu təm deftere ngetik, təkən mokotufi Bayzlav mə ɗəɗef ta am deftere ngatan, ɓəw təkən, hidigi mə ɗəɗef ta am deftere dirif. Təkəni səna cike tu ɗiy atalan ɗa.” 45 Za acin nap mənenta, bərngəzl talan ngatan kə zlər za kə səni təkən mə ɗəɗef ta təm deftere ngə Bayzlav law law. 46 Luwenta: “Hin tu sən təkən mə ɗəɗef ta təm deftere Bayzlav atalan ɗə kwa. Tu ɗəɗef ta: Kristu Hidi Bayzlav mə wel kə mbəl hidigi, avə kə sa banay, avə kə məc, za wan saray mə makaɗ tik avə kə mbəlaha am məc za. 47 Hidigi avə kə ceɗi Ləbar Malaw a səban hidi ma par par təm talan mahayək cike. Avə kə ceɗenta kə buwi nəv ngatan kaɗ, za Bayzlav kə geɗ təkən mə ngavngav ngatan mə ɗiy ta am zlim ngetik. Ləbar ngetik avə kə cakway, diw am liɓde Ursalima za, mgbaw talan mahayək cike. 48 Təkəni səna tu ɗiy am həriy kin, za ngikin, hin acin məv kə cakway ləbar ngetik acin, hidi cike kə zlim ta. 49 Amma kata wər, təv kə vəle hin Mbiɗ ngə Bayzlav, Vay mə luw kə vəle hin. Mə ɗew gesin am liɓde Ursalima a wənhi nha am pic Bayzlav tu kə zləne hin Mbiɗ ngetik ta dibizlav za, hin kə jan gədan za hin kə va acin.”
Yesu a vətik a dibizlav acin
50 Gwedek Yesu ngazl wəriy gawliy ngetik am hayək sən za, vigi am hayək məpərmay, zlim tik Betani. Mbe kə hosi abəgo, Yesu kaf ngər, za luw: “Micin kin mə gəl zoɗ.” 51 Am mandal a luw atəgo , lekey tik am həriy ngatan kə va wəzlav. Bayzlav acin mə wət gendik kə va angər tik. 52 Ngatan wər, gbili kaɗ kə səban ta. Sliɗigi za acin, jəɓi tan am liɓde Ursalima avə zəzay am nəv. 53 Am hayək səna a njə kə vigi hoyhoy a jik Bayzlav, za a falay Bayzlav tan. Nhi acin Ləbar Malaw atalan Yesu Kristu, Luka mə ɗəɗefu. Tu way.