Yesu avə werti mə ngasl ta
8
Adəwən səna gwedek Yesu sliɗ kə va a liɓde mogroyigi ɓəw a liɓde ma cicerigi ma par par. Sin ta njə kə ton am liɓde am liɓde səna, a njə kə ceɗ Ləbar Malaw a hidigi mana Bayzlav ta njə kə mar lay. wəriy gawliy ngetik ma gəɓ atalan saray a ngazl ta 2 avə werti məpərmayigi. Aməcek Yesu tu gam musuruf a kəsəm wertigi məpərmay tə dab tan, za tu mbəl məpərmayigi am dal tə kəsəm tan za. Adab hidi səna: Mari tə liɓde Magdala Yesu mə gam musuruf tə kəsəm ngetik ma par par cisaray. 16:1,8 3 Yowana werti Huja, mbaslay ngə bay Hirudus. Za werti məpərmay, zlim ngetik Suzan. ɓəw werti məpərmayigi dolom baha. Werti nhi tu məni Yesu avə wəriy gawliy ngetik a kə batenta təkəniy tan.Ma məngaɓngaɓ atalan hidi mə gəgar sisin təkən
(Mt 13:1-9; Mk 4:1-9)
4 Pic takan Yesu a wan liɓde məpərmay, hidi təm lay cike ma zlim tə za, vigi angər tik. Ma ɓasigi za, Yesu diw kə ceɗenta ma məngaɓngaɓ məpərmay. Luwenta: 5 ‹‹ Mə zlim tanjinhi, hidi məpərmay va a donu kə gəgar sisin təkən am tuz ngetik. Mandal ta gəgar səna, sisin məpərmay yoɓigi a mozlokotuf. Hidi tonigi abəgo, jak jakta avə ngaz, za vigin yigi bəl bəlta kaɗ. 6 Sisin məpərmay yoɓigi am də gugun. Ma təvigi za, njoɗ ɗiya kwaligi, kadaban hayək gəɗak, yəm a gar a kimin bugwən. 7 Za am mandal ta gəgar baha, sisin məpərmay yoɓigi a liɓ kidigiɗ. Ma təvigi za, a gəligi avə kidigiɗ səna, za kidigiɗ səna a njəsl ta ha məci tan. 8 Sisin məpərmay yoɓigi am lay malaw. Ma təvigi za, tu gəligi law law, za huvi law law. Cike tu huvi mana nəv mə mayu.›› Yesu ma way kə ceɗenta ma məngaɓngaɓ səna a hidigi za, ɗiya luwenta: ‹‹ Mə zlim ləbar kata mə ceɗehinnhi. hidi məmar zlim kə zlim tik, mə sleku atalan tik law law.››
Yesu a sla nəv ngə hidigi avə hayək ma par par foɗ
(Mt 13:18-23; Mk 4:13-20)
9 Ma məngaɓngaɓ Yesu mə ceɗ nhi, wəriy gawliy ngetik a zlim tə bugwən, ɗiya neh ta. Luwenta: ‹‹ Mordoy a ceɗi yikwan mə tafnan hoh mə luw nhi.›› 10 Yesu zlawenta: ‹‹ Ngikin, Bayzlav tu zlər bərngəzl kin, hin kə sən ɓən mə ɓahɓah ngə bay ngə Bayzlav. Amma ngə hidi məpərmay, sey kə ceɗenta a ma məngaɓngaɓ, kə jan təkəniy mokotuf ngə Bayzlav mə ceɗ taməcek kə hosoho atalan hidi nhi. A luw: ‹Həri ngatan ɗaha, za a limi lay ɗahkwən, Zlimi ngatan ɗaha, za a zlimiy ɗahkwən .’ 11 Tanjinhi mə zlim acin, təv kə ceɗi hin madaba ma məngaɓngaɓ nhi mgban mgban kaɗ, hin kə zlim law law. Zləgam ngə Bayzlav wa sisin təkən, hidi ta njə kə gəgar am tuz ngetik. 12 Yo za ni nəv ngə hidi məpərmay wər, wa mozlokotuf sisin təkən mə yoɓ a kimin nhi. Hidi nhi a zlimiy mə ngə Bayzlav, amma ma zlim tə za, njoɗ Musuruf yah wət am nəv tan za kə ɗewiy mətak yək ta, za kə ɗewiy mətak jan mbəl micin ngatan. 13 Hidi məpərmay wər nəv ngatan wa də gugun, sisin təkən mə yoɓ a kimin nhi. Ma zlimiy mə ngə Bayzlav za, yək ta avə zəzay am nəv. Amma a geɗiy mə ngə Bayzlav nhi kə za zem am nəv ngatan bugwən. A yək ta ngə wan gwedek dap. Banay tu yah atalan tan kə lebeɗ ta, avə kə geɗ tə kaɗ. 14 Amma nəv ngə hidi məpərmay təm wa də kidigiɗ, sisin təkən mə yoɓ a kimin nhi. Hidi nhi tu zlimiy mə ngə Bayzlav, am mandal ta səbiy mozlokotuf ngə Bayzlav, a ɓənigi atalan təkən ma par par təm talan mahayək baha. Tamah ngə ɓas aray, za ɓəw tamah təkəniy ma par par təm talan mahayək a ɗiyenta. Təkəni nhi ma vigi am nəv ngatan anhi, a njə kə taki mə ngə Bayzlav təm nəv ngatan kaɗ. Za gwedek hidi nhi a ɗiyi kəzəɗ ngə fet nəv ngə Bayzlav kwən. 15 Yo amma hidi məpərmay acin wər, nəv ngatan wa lay malaw, sisin mə yoɓ tə kimin. Hidi nhi a njə kə zlimiy mə ngə Bayzlav, za a njə kə yək ta avə nəv malaw. Hoyhoy a njə kə kaw ta ngər səsəray. Ko am təkən ngemi cike way za, a njə kə ɓəs ta, za a njə kə ɗiyi kəzəɗ mə njə kə fet nəv ngə Bayzlav.››
Ləbar ngə Bayzlav wa pətərla
(Mk 4:21-25)
16 Yesu ɗiya luwen a wəriy gawliy ngetik: ‹‹ Hin mə sən za, hidi mə njə kə mbəl pətərla, za jəɓ tasaw atalan tik kə ɓah kaɗ, ɗahkwən. Ko kə ɗiy adəwən harngaw ɗahkwən baha. Hidi a njə kə mbəl za kə ɗer am lay ma fal ɗər kə zləzlaɗ lay, hidi məv kə pətigi a jik kə limi lay kweɗek kweɗek. 17 Yo wa sən baha, kəzəɗ ngə Bayzlav a ɗew mə ɓahɓah kwən, awwo, hidigi av kə lim ta. Av kə ceɗi ləbar ngetik mgban mgban, za hidi mətak zlim ta gesin, av kə zlim ta am pic səna acin. 18 Yo, hin ta njə kə zlim mə Bayzlav, mə kaw talan kin law law. Mə gər kə yək avə məsəfay kwən. Mə yək avə nəv takan. Hidi mə yək ləbar ngə Bayzlav, Bayzlav av kə zlər bərngəzl talan tik bah day kə taməcek kə jan kə zlim law law. Hidi mətak yək ləbar ngetik, ko mendez tik sin mə ɓən kə jan tik ta micek, avə kə yək tə kaɗ.››
Ləbar atalan mamay Yesu ɓəw galmənigi
(Mt 12:46-50; Mk 3:31-35)
19 Pic məpərmay, Yesu a ceɗ ləbar ngə Bayzlav a hidigi, mamay ngetik avə galmənigi hosigi, a yigi kə saf ta. Amma a janiy mozlokotuf kə va angər tik bugwən, hidi mə ɓasi day. Gari tan a caɗak za. 20 Hidi ma lim tə za, ɗiya luwenta a Yesu: ‹‹ Mordoy, mamay koh ɓəw golmocoyigi awaniy caɗak, a jarigi.›› 21 Yesu ma zlim atəgo za, luwenta: ‹‹ Kata ceɗe hin, hidi mə njə kə zlimiy mə ngə Bayzlav, za mə njə kə kaw ta ngər səsəray, tanigi acin mamay ɗigi avə galmay ɗigi.››
Gədan Yesu day kə mbiɗ
(Mt 8:23-27; Mk 4:35-41)
22 Pic takan Yesu ɗiya luwen a wəriy gawliy ngetik: ‹‹ Mə yah, yikwan kə pət a liɓ pay ngə zlan maza kə zlan kə vadəwən maza.›› Və pətigi, ɗiya vigi. 23 Mandal a kəzeri pay ngə zlan maza, Yesu wər a wanay tik. Gwedek mbiɗ diw kə ca, za a cə day day atalan yəm. Yəm ɗiya kəz gingiw gingiw, za a wec avə gədan kə va liɓ pay ngə zlan maza. Saf ta micin ngatan a gər kə lek. 24 Vigi angər Yesu, fəɗah tə kaɗ, luwenta: ‹‹ Aw Mordoy, aw Mordoy, yikwan məv kə məc!›› Yesu sliɗ za, ndəl a ndəl mbiɗ nhi, za luwen a yəm, hoh kəz ɗaba. Njoɗ gari tan kaɗ tete. 25 Yesu ɗiya luwen a wəriy gawliy ngetik acin: ‹‹ Mə vəlak kin kway?›› Wəriy gawliy ngetik tu hovokigi day day, za tu pərasl bərngəzl talan tan. Nap zləgamigi a dab tan acin: ‹‹ Gawəl nhi wər hidi ngayi ? Mə saf ko mbiɗ avə yəm a zlimiy mə ngetik.››
Yesu gam mbiɗ mə ngavngav a kəsəm hidi
(Mt 8:28-34; Mk 5:1-20)
26 Yesu avə wəriy gawliy ngetik hosiy adəwən torok tə liɓde məpərmay, zlim tik Gerazene, liɓde səna dəzdəz a hayək Galili. 27 Yesu maa pətah a mə pay ngə zlan maza za, hidi mə wəkwək tə liɓde təbəgo yah gbamenni. Mə ɗiya di ndas a njə kə tal kəsəm maymay. A wan a de ɗahkwən. A njə kə ɗewey tik atalan civi. 28 Sin maa lim Yesu za, ɗiya cə wəla. Sin gbili titimbiz a kibik tik, ɗiya luw: ‹‹ Mə lapak avə hoh mi, Yesu kər ngə Bayzlav tə wəzlav ma fal? Kata pəloh, hoh gər kə ɗiyak mə ngavngav kwən.›› 29 Sin a luw atəgo , lay Yesu mə luwen a mbiɗ mə ngavngav kə pətah tik a kəsəm tik za. Hoyhoy musuruf tə kəsəm tik a njə kə ɓərət tik. Hidiy a njə kə jaw tə kaɗ avə njalalaw ɓəw a njə kə kpawta kaɗ am dən. Zəni a njə kə nga təkəniy səna cike kaɗ, kə va tik sunot a dab donu. 30 Yesu ɗiya neh tik: ‹‹ Zlim koh mi?›› Sin zlaweni: ‹‹ Zlim ngaɗa ɓas.›› A luw atəgo səna, kadaban musurufiy par par ndas a kəsəm tik. 31 Musurufiy səna ɗiya hovokigi. Taniy centa ngəra a Yesu kə jan sin kə geɗta mətak goɗta am wil ma kpum. 32 Am lay səna, hidiy aa gəliy guldomiy dolom a bər wərum. Musurufiy tə kəsəm gawal səna ɗiya centa ngəra a Yesu kə geɗenta lay taniy kə pətiy a kəsəm guldomigi. Yesu geɗenta mozlokotuf taniy kə pətigi. 33 Musurufiy səna pətiy tan aa kəsəm gawal nhi za, viy a kəsəm guldomigi. Guldomiy cike ɗiya siy tan aa bər wərum za, pətiy sirif a liɓ yəm mordoy, lekiy a bəgo. 34 Hidiy mə gəliy guldom ma lim ta atəgo za, nap siy tan a de. Viy a liɓdiy cike, ceɗiy ləbar tik a hidigi . 35 Hidiy ma zlimta za, viy kə safiy təkən mə ɗiy səna təm avə həriya ngatan. Janiy gawal mə wək wək taməcek səna mə ɗewe kaɗ a jagwar Yesu avə ləkwət a kəsəm, awana avə bərngəzl talan tik lawlaw. Ma limta atəgo za, nəv ngatan kwir. 36 Hidiy mə limiy təkən səna avə həriy ngatan, ɗiya ceɗenta a hidiy mə yiy kə safta, mana Yesu mə gam musuruf tə kəsəm gawal səna. 37 Hidiy cike tə liɓde par par Gerazene məmaru maa zlimta za, tu hovokiy day day. Kadaban səna acin, taniy luwenta a Yesu: ‹‹ Yikwan ma pəloh, a sliɗ ma vəkoh aa liɓde ngiykwan za.›› Yesu pət am pay ngə zlan maza, kə jəɓ tik am lay sin mə yah taa bəgo za. 38 Am mandal sin aa pət a liɓ pay ngə zlan maza, gawal Yesu mə gam musuruf tə kəsəm tik, ɗiya cen ngəra a Yesu, luweni: ‹‹ A geɗek kata kə va avə hoh.›› Amma Yesu a geɗen mozlokotuf bugwən. Sin luweni: 39 ‹‹ A jəɓ koh a de. A va ceɗen a hidiy təkən malaw Bayzlav mə ɗiyoh səna.›› Njoɗ gawal səna vətik a de, ceɗen a hidiy tə liɓde ngetik cike wayza təkən Yesu mə ɗiy tə talan tik.
Gədan Yesu day məc
(Mt 9:18-26; Mk 5:21-43)
40 Yesu ma jəɓah adəwən maz sən za, jan hidi mə ɓas ɓasi dolom abəgo, a puw ta. Hidi sən yək ta ngər səsəray. 41-42 Gwedek hidi məpərmay zlim ngetik Zayirus yah angər Yesu. Sin hidi mordoy təm jik jəgwan ngə Yahudigi. Kərti tik ɗaha, malay tik kər taza, di ngetik gəɓ atalan saray. Ma yə za, gbəlih titimbiz a kibik Yesu, ɗiya cen ngəra, luweni: ‹‹ Nakam a de ɗa, kərti ɗa a gər kə məc, a zla pic nhi kwən.›› Yesu ma zlim atəgo za, sliɗ lapiy avə sin acin. Am mandal a vigi, hidi məpərmay dolom a səb ta, za a njəsli Yesu mozlokotuf mozlokotuf. 43 Wer məpərmay ɗaha a bəgo. A njə kə zla vidiɗ hoyhoy. di ngetik gəɓ atalan saray ɓiɓiz a kwaray tik. Tu ngav aray ngetik cike kə va angər hidi mə ɗiyi maazla kə jəway kəsəm ngetik. Ko hidi mə ɓəs kə way məc tə kəsəm tik ɗahkwən . 44 Mandal Yesu ta vigi, werti nhi va adəwən Yesu za, və mbəlem ngəra am gozlum ləkwət ngetik. Njoɗ ɓiɓiz tə kəsəm ngetik tu kaw. 45 Yesu ɗiya luwen a hidigi : ‹‹ Hid ngayi mə mbəlemek yi?›› Hidi ngayi a luw: ‹‹ Kat kwən.›› Hidi ngayi a luw: ‹‹ Kat kwən.›› Piyer ɗiya luwenni acin: ‹‹ Mordoy, hoh neh yikwan nhi wər, hoh lim hidi dolom mə njəslih sən bəgwən vu?›› 46 Yesu ɗiya luw: ‹‹ Kat mə sən za, hidi mə mbəlemek za, kadaban gədan ngə mbəl hidi tu pətah a kəsəm ɗə za.›› 47 Wer tafnan ma zlim za, njoɗ sin mə sən za, wirwir ngə ɓah talan tik ɗahkwən, kadaban səna sin ɗiya nənəh a hovok. Va angər Yesu, gbəlih titimbiz a kibik tik acin. ɗiya ceɗ a kibik hidi cike wayza, təkən mə lebeɗ tik kə mbəlem Yesu, za njoɗ a ciki sin mə jan geleɓe ngə kəsəm ngetik. 48 Yesu ɗiya zlaweni: ‹‹ kərti ɗa, hoh mə vəlak nəv koh za, hoh tu mbəl. A sliɗ, mavə koh law law.›› 49 Yesu ta luwen a werti nhi, hidi məpərmay tə de Zayirus tafnan yah. ɗiya luwen a Zayirus acin: ‹‹ Mordoy, hoh dangar Mordoy ngiykwan avə ma ɗaba. Kərti koh tu məc.›› 50 Yesu ma zlim za, ɗiya luwen a Zayirus acin: ‹‹ Hoh gər kə hovok kwən. Sey ma vəl nəv koh cike a Bayzlav, kərti koh av kə mbəl.›› 51 Sliɗ vigi a de ngetik acin. Ma hosi za, Yesu a geɗ hidi məpərmay kə pətigi a de avə sin bugwən. Səna a ngazl Piyer, Yuhana, Zak ɓəw babay ngə kər səna avə mamay tik. 52 Ma pətigi a de za, janiy hidi məpərmay a hanigi, a ci wula day day. Yesu ɗiya luwenta acin: ‹‹ Mə han kwən. Mə bes kaɗ. Kər nhi a məc bugwən, a wanay tik.›› 53 Hidi ma zlim ta atəgo za, ɗiya mbisenta a Yesu, kadaban mə sən tə za, kər nhi tu məc mindiwin. 54 Yesu va a jagwar kər mə məc məc nhi, kaw am ngəra, za ɗiya luweni: ‹‹ Kərti ɗa, a sliɗ za!›› 55 Njoɗ tu mbəla tik am məc za, vak sliɗ za. Yesu ɗiya luw acin: ‹‹ Mə wət təkən ngə zəm, mə vəleni, mə zəmu.›› 56 Babay kər nhi avə mamay tik ma limi təkən mə ɗiy nhi za, tu pərasl bərngəzl talan tan, ɗiya luw ta: ‹‹ Haya hidi ɗa, təkən nhi a ɗiy a ciki?›› Yesu ngəz ta, ɗiya luwenta: ‹‹ Mə gər kə zləgam mə nhi a hidi kwən.››