Yesu avə mordoy ngə sojigi
(Mt 8:5-13)
7
Yesu ma way kə ceɗ ləbar ngetik cike a hidi mə ɓas ɓasi za, sliɗ və tik a liɓde Kaparnahum. 2 Am liɓde səna hidi məpərmay awan abəgo, mordoy məmar sojigi bələk təm hayək Roma. Sin səban ngə Yahudigi kwən. A de ngetik səna, hidi ɗaha mə njə kə ɗiyen kəzəɗ. Mordoy ngə sojigi a may gawal nhi day day. Za gawal səna a dal, fəs nəv a dar a gendik mba kə məc.3 Yesu ma hos a liɓde Kaparnahum za, mordoy sojigi səna zlim ləbar ngetik. Njoɗ ɗefenma a mbusurigi tə dab hidi Yahudigi kə zlən ta kə vigi angər Yesu. A luwenta: ‹‹ Mə va ngazlaha kə yah kə mbəl mə ɗiy kəzəɗ ngaɗ anhi may.›› 4 Hidi səna sliɗi vigi angər Yesu, a centə ngəra. A luwenta: ‹‹ Mordoy ngiykwan a zləna yikwan angər koh, hoh kə yah kə mbəl mə ɗiy kəzəɗ ngetik kaɗ may. Law hoh kə mən tik, 5 kadaban a njə kə mayi yikwan, yikwan hidi Yahudigi, za sin acin mə ndən jik jəgwan ngiykwan.›› 6 Yesu ma zlim za, sliɗ va avə tanigi. Gwedek mordoy sojigi zlən ngwalayi ngetik məpərmayigi kə vi kə gbomigi avə Yesu, kə luwenta mə gər kə dangar ngaz tik kə hosoh kwən. Yesu ma mbah kə hosigi a de mordoy soji səna, gbomi avə ngwalayi ngə soji tafənan. Hidi səna luwenta a Yesu acin: ‹‹ Mordoy ngiykwan a zləna yikwan angər koh kə luwoh: ‹Hoh gər kə dangar ngaz koh kə hoso kwən. Kadaban tə hos gəga hoh kə yah a de ngaɗa bugwən. 7 Za tə hos gəga kata kə vay atalan ɗa kə ngazloh bugwən. Mana hoh tu luw avə ma a gendik, mə ɗiy kəzəɗ ngaɗa av kə sliɗ am dal tik za. 8 A saf, kata avə talan ɗa, calɗigi ma day kə kata ɗahigi, za tə njə kə zlim mə ngatan baha. Za baha sojigi məpərmay, kata acin mordoy ngatan. Kata tu luwen a soji takan tə dab tan: A sliɗ ma va a wəta, av kə va. Za kata tu luwen a soji məpərmay baha: A yah awənhi, av kə yaha. Kata tu luwen a mə ɗiy kəzəɗ ngaɗa: A ɗiy kəzəɗ nhi avə nhi, av kə ɗiy tik. Ya hoh baha, hoh hidi mordoy, hoh tu luw avə ma a gendik mə ɗiy kəzəɗ ngaɗa av kə sliɗ am dal za.› ‹‹ 9 Yesu ma zlim ləbar ngə mordoy ngə sojigi sən za, nəv ngetik tu fet day day. Sin luwen a hidi mə səb ta acin: ‹‹ Ta ceɗe hin, dəga ɗew ngaɗa tə jan hidi mə vəl nəv ngetik a Bayzlav mana mbəluk hidi nhi bugwən. Mindiwin, a dab hin Isirayiligi, tə jan hidi mə yək Bayzlav mana sin bugwən.›› 10 Ngwalayi ngə soji səna sliɗigi jəɓi tan a de acin. Ma hosigi za, janiy gawal mə ɗiy kəzəɗ tə de mordoy ngə sojigi tafnan tu jan zoy kəsəm ngetik.
Yesu avə kərti ngə werti mə cupcup
11 Adəwən səna, Yesu sliɗ va a liɓde məpərmay, zlim tik Nayin. Wəriy gawliy ngetik avə hidi məpərmay dolom a səb ta. 12 Ma mbeh kə hosigi a liɓde səna za, gbomigi avə hidi məpərmayigi, a wətiy mimci avə pay kə va kə kahaha. Kər ngə werti mə cupcup acin mə məc, malay ngetik. Hidi dolom a tepiy mimci səna kə va kə kahaha. Mamay kər nhi awan dab tan. 13 Mordoy ngiykwan Yesu ma lim werti nhi a han, kaymah ɗiyen ni. ɗiya luweni: ‹‹ Wer cah, hoh han kwən, a bes kaɗ.›› 14 Yesu va acin mbeh a jagwar mimci nhi, wət ngər mbəlem am pay tav mimci səna. Hidi mə wət ta gari kaɗ. Yesu ɗiya luwen a mimci nhi acin: ‹‹ Ta luwoh kərti ɗa, a mbəlah am məc za.›› 15 Njoɗ gawal səna sliɗ za, ɗew a ɗew, diw kə zləgam. Yesu luwen a mamay tik: ‹‹ Anhi kərti koh mə mbəlah za, a ngazl kərti koh.›› 16 Hidi cike təbəgo ma lim ta za, ɗiya hovokigi. A səbaniy Bayzlav, za a luw ta: ‹‹ Kay apica mokotuf ngə Bayzlav mordoy tu pətaha am həriya ngiykwan. Bayzlav avə talan tik acin mə zlənaha kə mən hidi ngetik.›› 8:28; 14:65; Lk 7:39; 9:8,19; 22:64; 24:19; Yuhana 4:19; 6:14; 7:40; 9:17 17 Gwedek hidi tə liɓde ma par par, bay Yahudiya məmaru, avə liɓde tə bər hal ngatan tu zlimiy təkən ma tuwnha mə ɗiy nhi.
Yesu avə Yuhana baptis
(Mt 11:2-19)
18 Mandal Yesu ta ɗiy kəzəɗ ngetik ma par par nhi, Yuhana mə njə kə ɗiy baptisma awan am jik dangay. Wəriy gawliy ngetik sliɗi və ceɗenta a Yuhana, təkən Yesu mə ɗiyu cike. 19 Yuhana ma zlim za, ɗefenma a hidi saray tə dab tan kə zlən ta kə vigi angər məmar hidi Yesu. Luwenta: ‹‹ Mə va, mə nehu, hin kə luwenni : Hoh acin hidi məv kə yah vu, yikwan kə puw hidi məpərmay vu ta? Mə ceɗehinmadaba mə tik.›› Sliɗigi vigi acin. 20-21 Ma vigi za, və janiy Yesu, a mbəl hidi dolom njə məc tə kəsəm. A kaf vəderigi, a gam musuruf a kəsəm hidi mə wək wək, za a zlər həriya ngə hulufigi kaɗ dolom kə limi lay təm baha. Hidi Yuhana mə zlən tə nhi luwenta a Yesu acin: ‹‹ Yuhana mə njə kə pan baptisma a zləna yikwan angər koh, yikwan kə yah kə neheh kə luwoh: ‹Hoh acin hidi məv kə yah vu, yikwan kə puw hidi məpərmay vu?› ‹‹ 22 Yesu ɗiya zlawenta: ‹‹ Mə va, mə ceɗen a Yuhana təkən hin mə lim avə həriya kin awənhi, ɓəw ləbar hin mə zlim angər ɗa. Hin tu lim hulufigi a limi lay, videri ta micek, a vigi avə gar sək sək, mbəlah ngə kwalkwalaigi tu ɗiz, mədəgəzligi a zlimigi, za hidi mə məc məc a mbəligi am məc za. Za matakwan hidigi a zlimiy ləbar ngaɗa Malaw. 23 Məv ceɗen a Yuhana təm, hidi ma a wəzən ɗahkwən, tu geɗ nəv ngetik cike a kata, nəv ngetik av kə zəzay.›› 24 Hidi ma saray Yuhana mə zlən ta, ma zlim ta atəgo za, sliɗigi vi tan. Adəwən səna Yesu ɗiya ceɗenta ləbar a hidi mə ɓas ɓasigi. A ceɗenta atalan Yuhana. A luwenta: ‹‹ Mandal hin mə va kə safa Yuhana a dab donu wər, mə ce gingin wər sin yi? Mə ɓən wər, məv kə lim hidi mə njə kə njol ma mana mbiɗ ta njə kə bərazl ngirmi vu? Ta ceɗe hin, Yuhana wər a njə kə ceɗ mə ma mindiwin. 25 Hin ma və za, mə ɓən wər, məv kə lim hidi avə ləkwət mə njə kə lir a kəsəm vu? Awwo, mə jan atəgo bugwən. Kadaban hidi mə njə kə kuli ləkwət mə lir lir ɓəw mə njə kə mariy təkən par par, a ɗewiy a dab donu mana Yuhana ɗahkwən, a njə kə ɗewiy avə bay witik witik. 26 Yo, hin ma və za acin, mə ce gingin, məv kə safa yi? Mə ɓən wər, məv kə lim mokotuf ngə Bayzlav vu? Yaw, Yuhana səna mokotuf ngə Bayzlav mindiwin. Ta ceɗe hin, Yuhana səna day kə mokotuf ngə Bayzlav. 27 Kadaban sin acin Bayzlav mə luw, avə kə zlənaha məpəlpəla a kibik ɗa. Bayzlav tu luw am deftere ngetik atalan sin: ‹Anhi ta zlən mokotuf ngaɗa məpəlpəla kə hoh kə ceɗenta ləbar ngaɗa gesin a hidigi. Av kə ceɗenta kə buwi nəv ngatan kaɗ kə jan kə yəkigi ngər səsəray.’ 28 Yo ta ceɗe hin, a dab hidi mə mbuwigi am talan mahayək a wənhi nha apica, ko hidi takan mə hos mana Yuhana ɗahkwən. Amma tanjinhi koh hidi may may mana hidi məpərmay tu yək Bayzlav, kə ɗiy bay am nəv ngetik, sin day kə Yuhana . 29 ‹‹ Mə ɓən atalan hidi məpərmay mə vigi angər Yuhana kə zlimiy ləbar ngetik a dab donu. Hidi cike, ko dəwanigi mə njə kə ngoki təkən ngə hidigi, tu yəki ləbar ngə Bayzlav Yuhana mə ceɗenta. Tu luw ta: ‹Law, Bayzlav kə mar yikwan, kadaban sin a njə kə ɗiy təkən avə mozlokotuf tik.› Za tu janiy baptisma angər Yuhana . 30 Amma Farisigi avə mogroyiy jəgwan a mayi baptisma ngə Yuhana bugwən. Asəna baha, tu zeli təkən malaw ngə Bayzlav mə may kə vəlenta.›› 31 Yesu luw bah: ‹‹ Hin hidi ma tanjinhi, kata kə sla hin avə mi? Kata kə sla hin avə təkən məpərmay. 32 Hin wa wərigi mə ɓasi kəsəm am walan tan kə ɗewerigi a kəmay luma. Am ta ɗewerigi, məpərmay ɗewiy tan kaɗ tete. Kadaban səna celen tan a ndəl ta. A luwenta: ‹Yikwan tu jək dirif ndawya, za mə dar kway? Yikwan tu jək dirif mimci, za mə han kway?’ 33 Yo ta ceɗe hin, mandal Yuhana baptis ma yə za, hin tu ɗiy təkən mana ngə wəriy nhi təm. Yuhana a zəm təkən malaw bugwən, za a sa movu bugwən. Amma hin tu luw atalan tik: ‹Gawəl nhi a wək,› za mə yək mə ngetik bugwən. 34 Amma kata Hidi mə yah ta ngər Bayzlav za, kata ma yah za, tə njə kə zəm təkən ngə zəm, za tə njə kə sa təkən ngə sa mana hidi məpərmay. Za hin tu luw atalan ɗa: ‹Gawəl nhi a zəm day, za a njə kə may təkən ngə sa godokwən. A njə kə kaw ngwalay avə dəwanigi mə njə kə ngoki təkən ngə hidigi ɓəw avə hidi mə njə kə ɗiyi təkən mə ngav ngav,› mə yək mə ngaɗ bəgwən baha. 35 Amma hidi məpərmay wər tu yək ta. Mə yək t anhi, a njə kə sən ta a kimin za, ɓən ngə Bayzlav wər, ɓən ma tiɗ tiɗe.››
Yesu avə werti mə ɗiy mə ngav ngav
36 Pic takan hidi Farisa məpərmay, zlim ngetik Simon, ɗefenma a Yesu kə zəm gəda a de ngetik. Yesu sliɗ va. Ma hos za, ɗewiy kaɗ acin kə zəmiy gəda avə Simon ɓəw hidi məpərmay. 37 Am liɓde səna werti məpərmay awan abəgo, werti mə njə kə ɗiy vərndew, za hidi cike a sən ta. Wer sən ma zlim Yesu tu a de Simon kə zəma gəda, sliɗ wət dorson avə vərom tik, va a bəgo təm. 38 Va ɗewey tik adəwən Yesu za. A han, za teweɗ ngetik a ləv am ngaz ngə Yesu. Nap sakwat gaz ngə Yesu avə suson talan ngetik ma ciɗip ciɗip, wət dorson tafnan zek zek a kimin kə ndelek tik. 39 Simon njə Farisa tafnan ma lim za, ɗiya ɓən atalan Yesu am nəv za: ‹‹ Mana gawal nhi mokotuf ngə Bayzlav mindiwin wər, a ngəm werti nhi kə takaɗen ngaz avə dorson kwən. Av kə sən tik, a njə kə ɗiy mə ngav ngav, za zlim ngetik a zlim.›› 40 Njoɗ Yesu mə sən ɓən təm nəv Simon za. ɗiya luwenni acin: ‹‹ A yah Simon, ta may kə ceɗe ma a liɓ ɗə wənhi.›› Simon ɗiya zlaweni: ‹‹ Law, a ceɗek ku Mordoy.›› 41 Yesu luweni: ‹‹ A zlim acin: Aməcek hidi saray ɗahigi, a yəki dəwa angər hidi məpərmay. Hidi ma takan yək dəwa angər gawal nhi gabal bələk joɓən, za hidi məpərmay gabal ngər joɓən. 42 Pic ngə wərək tik ma hos za, təl təl ta, a jan kə wərək tə bugwən. Gawal njə təkən nhi geɗentə dap. Yo, tanjinhi a ceɗek ku acin Simon, a dab hidi ma saray nhi, hidi ngayi məv kə may hidi mə geɗentə dəw anhi day acin yi?›› 43 Simon zlaweni: ‹‹ A ngər ɗə wər, hidi mə jan suloy ma day, gawal səna mə geɗentə nhi.›› Yesu ɗiya zlaweni acin: ‹‹ Yaw, hoh mə sən za. 44 Saf werti nhi, za luwen a Simon, hoh saf ɗəɗef nhi a ciki? Kata yah a de koh, hoh vəlak yəm kə pan ngaz ɗa bugwən. Amma werti nhi tu pan ngaz ngaɗa avə teweɗ ngetik, za tu sakwat kaɗ avə suson talan ngetik. 45 Ngə koh, hoh mə yəkak a de koh, hoh ndelekek mana sin bugwən. Amma werti nhi ma hosoho cap a de awənhi, a geɗek kaɗ mətak ndelek bugwən. 46 Ko ɗawa koh təm, hoh pəzak bugwən. Amma werti nhi, tu zekek dorson am ngaz. 47 Hoh Simon a zlimu, ta ceɗeh, malaw ngetik sin mə ɗiyak ku, a ɗef may ngetik atalan ɗa day day, za a ɗefek mə ngavngav ngetik ma dolom day day sin mə ɗiyu, Bayzlav tu geɗen kaɗ acin. Hidi mə jan geɗ təkən mə ngavngav ndez anhi, avə kə maya ku ndez anhi təm.›› 48 Yesu ma zləgamen a Simon za, ɗiya luwen a werti nhi acin: ‹‹ Mə ngav ngav koh tu geɗ.›› 49 Hidi məpərmay mə zəmiy gəda av tanigi, a zləgamigi am walan tan: ‹‹ Kay gawal nhi wər yi, kə geɗ mə ngavngav ngə hidi kaɗ nhi?›› 50 Za Yesu luwen a werti nhi acin: ‹‹ A sliɗ, ma və koh law law, hoh mə vəlak nəv koh za, hoh tu mbəl.››