Yesu zlambaɗ kəsəm tik a kibik wəriy gawliy ngetik
17
A dəwən wan kwəh, Yesu ngazl Piyer, Yakuba ɓəw Yuhana galmən ngə Yakuba, taniy tapiy a gandan atalan wurum maa fal. 2 Yesu zlambaɗ kəsəm tik a kibik tan. Muzroh tik ɗiya zləzlaɗ, kəkay kəkay, wa pic. Ləkwət tə kəsəm tik zlambaɗ kə ləkwət maa baran, tewtew. 3 Njoɗ wəriy gawliy ngetik ma makaɗ səna limiy Musa avə Eliya aa zləgamiy avə Yesu. 4 Piyer ɗiya luwen a Yesu acin: ‹‹Məmar yikwan, law godokwən yikwan kə ɗeweykin awənhi. Mana hoh may wər, təv kə lə mazlaɓiy makaɗ awənhi, takan a hoh, takan a Musa, za takan a Eliya. ›› 5 Mandal Piyer awəlen aa zləgam, njoɗ misinsineh ɗiy atalan tan, zigilim, dəpta kaɗ. Ɗiya zlimiy wəla aa liɓ misinsineh səna za, a luw: ‹‹Gawəl nhi acin kərti ɗa, kat aa may dayday, sin acin zəzay ngaɗa cike wayza. Mə zlimen ma!›› 6 Wəriy gawliy ngə Yesu maa makaɗ tafnan maa zlimta atəgo za, nəv ngatan tu mbir, dosiy muzrohiy tan a kayək. 7 Yesu va a jagwar tan, mbəlemta, za luwenta: ‹‹Mə sliɗ za, mə hovok kwən!›› 8 Taniy kafiy talan, za a limiy hid məpərmay bəgwən, səna Yesu a gendik palpal.9 Mandal a surohiy tan aa talan wurum za, Yesu ɗiya ngəzta, luwenta: ‹‹Təkən hin mə lim nhi, mə gər kə ceɗen a hidiy kwən, hos am mandal kat Kər Hidmemblen tu kə mbəlah aa mə məc za.››
Yesu a zləgam atalan Eliya
10 A dəwən səna, wəriy gawliy ngə Yesu maa makaɗ səna ɗiya nehiy Yesu, luwenta: ‹‹Mogroy ngə jəgwan ngə mə jawjaw ngə Musa ɗaw kə luwta, say Eliya kə yah məpəlpəla zagway wər kemi?›› 11 Sin zlawenta, ɗiya luw: ‹‹Tugo wər mindiwin, Eliya av kə yah məpəlpəla kə zaɓ təkəniy cike wayza zagway. 12 Amma, kata ceɗehin, tanjinhi Eliya wər mə yah za. Hidiy a sənta ɓahbəgwən, za taniy tu ɗiyenta mə ngavngav mana nəv ngatan mə mayta. Asəna acin, taniy av kə zlənenta takwan aa Kər Hidmemblen atəgo . 13 Njoɗ wəriy gawliy ngetik səna sənta, sin a zləgamenta atalan Yuhana mə njə kə juroɓ baptisma.
Yesu mbəl kərtawəl njə musuruf tə kəsəm
14 Yesu avə wəriy gawliy ngetik maa hosiy a bər zəgudu za, hid məpərmay yah gbəliy titimbiz a kibik tik, 15 nap luwenni: ‹‹Məmar Hidi, a saf kaymah ngə kərti ɗa nhi. Sin mocoɓlon, sin aa zlən takwan dayday, a vah sənan a njə kə ndəv am kuhu asənkwən a liɓ yəm. 16 Kat dah angər wəriy gawliy koh, amma taniy a ɓəsiy kə vəlenta zoy kəsəm bəgwən.›› 17 Yesu maa zlim atəgo za, ɗiya luw acin: ‹‹Hin hidiy maa tanjinhi, hin hidiy mə ngavngavigi, mə vəlen nəv kin a Bayzlav bəgwən! Kat kə ɗew avə hin bah kula a pu? Kat kə ɓəs avə hin bah kula a pu? Mə dahak kər səna awənhi!›› 18 Ma dahta za, Yesu ndəl a ndəl musuruf tə kəsəm kər səna. Sin pətah tik aa kəsəm kər səna za, kər səna jan zoy kəsəm ngetik jənjəna.
19 A dəwən səna, wəriy gawliy ngə Yesu viy angər tik, ɗiya nehta, luwenta: ‹‹Ya yikwan wər, yikwan mə ɓəs kə gam musuruf tə kəsəm kər səna bəgwən kemi?›› 20 Yesu zlawenta, ɗiya luw: ‹‹Hin mə ɓəs kə gam tik bəgwən nhi, kadaban hin mə vəlen nəv kin a Bayzlav law law gesin bəgwən. Mindiwin, kata ceɗehin kaɗ lawlaw, mana vəl nəv ngəkin a Bayzlav, ɗaha ko ndez mana sise venjeh, hin kwəl kə luwen a wurum tattah: ‹A cof awənhi za, ma və gaf a wəta,› av kə cof kəv abəgo səna. Təkən ngə dayehin gədan ɓahɗahkwən. [ 21 Amma, məzəgəneh musuruf mana nhi, gam tik wər, səna avə tar Bayzlav ɓəw avə ɗiy dalyam.]››
Yesu a zləgam atalan məc tik baha
22 Pic məpərmay, Yesu avə wəriy gawliy ngetik cike awaniy am hayək Galili. Yesu luwenta: ‹‹Ta ceɗehin, hidiy av kə kawiy Kər Hidmemblen kə vəlta am nəv ngər ngə hidiy məpərmay. 23 Hidiy səna av kə wəzlta kaɗ. Amma a dəwən məc ngetik, wan saray mə makaɗ tik, Bayzlav av kə mbəlah kaɗ aa mə məc za.›› Wəriy gawliy ngetik maa zlimta atəgo za, ɗiya denigi.
Yesu avə Piyer vəliy buhdu ngə jik Bayzlav
24 Pic takan, Yesu avə wəriy gawliy ngetik hosiy a liɓde Kafarnahum. Maa hosiy za, hidiy mə njə kə kambaliy buhdu ngə jik Bayzlav viy angər Simon Piyer, ɗiya nehta, luwenta: ‹‹Mordoy kin aa vəl buhdu ngə jik Bayzlav ɗahkwən vu?›› 25 Piyer zlawenta, ɗiya luw: ‹‹Yaw, aa vəl ɗaha.›› Piyer sliɗ, pət tik ade. Sin maa pət ade za, njoɗ Yesu luwenni: ‹‹Hoh Simon, hoh ɓən aceki ? Ngə wərək buhdu avə haramde a bay wər hidiy təm hayək ngetik vu, asənkwən mbulukigi?›› 26 Piyer zlawenni, ɗiya luw: ‹‹Mbulukiy acin ta njə kə wərəkta.›› Yesu luwenni acin: ‹‹Hidiy təm hayək ngə bay a wərəkiy buhdu ɗahkwən kwa? 27 Amma, taa may hidiy mə kambaliy buhdu nhi kə basiy nəv avə yikwan kwən. Kadaban səna acin, a va a maza, ma fək tehlem a liɓ yəm. Kilif hoh tu kə kawtik ngə tizin tik, ma zlər ma tik. Hav kə jan suloy a kəma tik. Ma wətu, za ma wərək buhdu ngaɗa ɓəw ngə koh.››