Hid mordoy maa day hidiy sənan am bay ngə Bayzlav wər yi?
18
Mandal səna gəzza, wəriy gawliy ngə Yesu viy angər tik, ɗiya nehta, luwenta: ‹‹Hid mordoy maa day hidiy sənan am bay ngə Bayzlav wər yi?›› 2 Yesu maa zlim za, ɗefenma a kər mendez, vrək a kibik tan, 3 nap luwenta: ‹‹Mindiwin, kata ceɗehin, səna hin kə buw ngar kaɗ kə ɗew mana wərigi, asənkwən hin mə pət am bay ngə Bayzlav kwən. 4 Kadaban səna acin, hid mə gəgəc talan tik kə ɗew mana kər nhi, sin acin məv kə ɗew kə hid mordoy maa day hidiy sənan am bay ngə Bayzlav. 5 Mana hid tu yək kər mendez mana kər nhi makavay kata, hid səna a yək kat talan ɗa.››Ɗew mə njə kə lebeɗ hidiy məpərmay kə ɗiyiy mə ngavngav
6 Yesu ɗiya luw baha: ‹‹Mana hid tu lebeɗ hid mendez mana kərti tə dab hidiy mə vəliy nəv ngatan a kata kə ɗiy mə ngavngav, geleɓ mə zenenta gunuhəz a hid səna am wəla, za mə goɗta a liɓ yəm mordoy. 7 Aw gawla, takwan mə njen aa hidiy təm talan mahayək, mə njə kə lebeɗiy hidiy kə ɗiyiy mə ngavngav. Takwəla, təkəniy ngə goɗ hidiy am ɗiy mə ngavngav ɗahigi. Amma takwan ɗaha a hid mə lebeɗ hid kə ɗiy mə ngavngav səna.
8 ‹‹Yo mana ngər koh asənkwən ngaz koh tu goɗiy kə ɗiy təkən mə ngavngav wər, ma mbanta kaɗ, ma fəkta gaf a hoh. Geleɓ hoh kə pət am bay ngə Bayzlav ngər takan, asənkwən ngaz takan avə kə fəkiy a liɓ kuhu maa a məc ɗahkwən avə ngər koh saray tik, asənkwən avə ngaz koh saray tik. 9 Mana həriy koh tu goɗoh kə ɗiy təkən mə ngavngav, ma huzloɗ kaɗ, za ma fək kaɗ gaf a hoh, geleɓ hoh kə pət am bay ngə Bayzlav həriy takan avə kə fəkiy a liɓ kuhu maa ligiɗ avə həriy koh saray tik.››
Ma mə ngaɓngaɓ atalan təmak mə leklek
10 Yesu ɗiya luw baha: ‹‹Mə kaw talan kin, mə gər kə jərəv ko hid takan a dab hidiy mecicer kwən. Mindiwin kata ceɗehin, mbaslay ngatan awaniy hoyhoy a Bahbay ngaɗ tə dibizlav. [ 11 Kər hidmemblen a yah am talan mahayək kə mbəl hidiy mə leklekigi.]
12 ‹‹Yo tanjinhi mə ɓən atalan ma kat tu kə ceɗehin nhi. Mana hid a mar təmakiy blək, za takan tə dab tan lekey tik. Gawal səna a geɗ maa ngər ngərafkatakan a ngərafkatakan atalan wurum, za sin kəv kə jarah mə leklek kwən vu? 13 Mindiwin, kata luwehin, mana sin tu janah tik, sin av kə zəzay atalan təmak takan mə lek səna day maa ngər ngərafkatakan a ngərafkatakan mətak lekigi.›› 14 Wa səna təm, bahbay kin tə dibizlav a may ko hid takan a dab hidiy mecicer səna kə lek bəgwən.
Kə geɗ mə ngavngav ngə hid aceki?
15 Yesu ɗiya luw baha: ‹‹Mana coloh mə səb mozlokotuf ngaɗa tu ɗiyoh mə ngavngav, ma va angər tik, ma ngəzu hin səsaray. Mana sin tu zlimeh ma, hoh tu mbəlah kaɗ aa mə ngavngav za. 16 Amma mana sin a zlimeh ma bəgwən, ma va avə hid takan asənkwən saray, kə jan kə ɗiy mana deftere ngə Bayzlav mə luw: ‹Mana hid tu ɗiyen mə ngavngav a hidi, mə tik kə zaɓ wər, say hidiy saray asənkwən makaɗ kə ɗewiy kə məsəber ngə zla ma sənaª.› 17 Amma mana sin a ngəm kə zlimentəma bəgwən, ma ceɗen ma tik a mgbəw ngə hidiy mə səbiy Yesu. Za mana sin a ngəm kə zlimenma a mgbəw ngə mə səbiy Yesu bəgwən, ma saf wa sin hid maa a vəlen nəv tik a Bayzlav bəgwən asənkwən wa hid mə njə kə kambal buhduª.
18 ‹‹Mindiwin, kata ceɗehin, təkəniy cike hin mə tak am talan mahayək, Bahbay kin tə dibizlav av kə tak kaɗ təm. Təkəniy cike hin mə yəku am talan mahayək nhi, bahbay kin tə dibizlav av kə yək tik təm.
19 ‹‹Mindiwin kata ceɗehin baha, mana hidiy saray a dab kin am talan mahayək nhi tu zleriy ma kə tariy ko təkən ngemi angər vay tə dibizlav, sin av kə vəlenta təkən taniy mə tarta səna. 20 Kat tə luw anhi, kadaban am hidiy saray ko makaɗ mə lapiy kaɗ am zlim ngaɗa, kat awan a dab tan.››
Hid mə ɗiy kəzəɗ maa aa may kə geɗ mə ngavngav ngə celen kwən
21 A dəwən səna, Piyer va a bər Yesu, ɗiya nehtik, luwenni: ‹‹Məmar Kata, mana cal mə səb mozlokotuf ngə Bayzlav tu ɗiyak mə ngavngav wər, kat kə geɗen kaɗ jəɓ nu? Kat kə geɗen jəɓ cisaray vu?›› 22 Yesu zlawenni, ɗiya luw: ‹‹Awwo! Kat tə luwoh jəɓ cisaray dap kwən, amma ngərcisaray jəɓ cisaray 23 Kadaban səna acin, bay tə dibizlav av kə sla avə təkən bay məpərmay mə ɗiyu. Sin a may hidiy mə ɗiyiy kəzəɗ ngetik kə wərəkenta duwa ngetik. 24 Sin maa diw kə nehtik za, hidiy dahenta hid sin taa səbtik avə suloy gabal məlyon dolom. 25 Gawəl səna kwəl kə wərək tik kwən. Kadaban səna acin, Bay səna ɗiya luwen a hidigi: ‹Mə ber kaɗ kə bahlam! Werti tik, wəriy tik ɓəw təkəniy ngetik cike mə berta kaɗ təm, kə jan kə wərəkakta dəwa!› 26 Gawal mə ɗiy kəzəɗ səna maa zlim atəgo za, gbəlih titimbiz a kibik bay ɗiya tar tik, luwenni: ‹Aw bay ɗa, a musufakku. Təv kə wərək tik cike.› 27 Bay səna safen kaymah, a duwa səna cike geɗen kaɗ, luwen sin kə vətik.
28 ‹‹Gawal səna aa pətah a pət a caɗak, gbamiy avə cal ngetik mə ɗiy kəzəɗ, sin a səb celen səna a suloy gwedek. Sin kaw gawal səna am wəla, ɗiya ɓərət tik, luwenni: ‹A wərəkak dəwa ɗa kaɗ!› 29 Gawal səna gbəlih titimbiz kaɗ, ɗiya cen ngəra, luwenni: ‹Aw a musufakku, təv kə wərəkoh cike.› 30 Amma hid mə səb celen a duwa, a ngəm bəgkwən. Sin luwen a hidiy kə tepiy gawal səna am jik jaw, tepta, va pekta kaɗ say sin tu wərəken duwa tik cike. 31 Celeniy mə ɗiyiy kəzəɗ məpərmay maa limta atəgo za, nəv ngatan tu bas dayday. Viy ceɗenta təkəniy səna cike a bay ngatan. 32 Za acin bay ɗefenma a hid mə ɗiy kəzəɗ səna, sin maa yah za, bay ɗiya luwenni: ‹Hoh hid mə ɗiy kəzəɗ nhi, hoh hid mə ngavngav! Kat tə geɗeh duwa cike way kaɗ lay hoh mə tarakku. 33 Ya hoh təm, lawlaw hoh kə saf kaymah ngə coloh təm mana kat mə saf ngəkoh kwən vu?› 34 Bay səna nəv tik tu bas day godokwən. Sin luwen a hidiy kə tepiy hid mə ɗiy kəzəɗ səna am jik jaw, sin kə ɗew abəgo am takwan, say sin tu wərəken duwa ngetik cike kaɗ.›› 35 Za acin, am way tik Yesu ɗiya luw: ‹‹Mana ko hid ngayi a geɗ a nəv takan mə ngavngav celen mə ɗiyen bəgwən wər, Vay tə dibizlav təm, a geɗ mə ngavngav ngetik kwən təm.››