Yesu a zləgam atalan pətar ngə mawəl avə werti tik
19
Yesu maa way kə ceɗ ləbar səna za, sin gar aa mə hayək Galili za, vətik am hayək Yahudiya aa dəwən maza Urdun. 2 Zəgudiy dolom səbta. Abəgo səna, sin mbəl mə daldaliy tə dab tan kaɗ.3 Zəni, Farisiy məpərmay yiy angər Yesu. Taniy a mayiy kə ɗəfta a ma, taniy luwenta: ‹‹Mə jawjaw ngə Musa mə geɗ mozlokotuf za a mawəl kə gam werti tik kaɗ ko atalan ma ngemi vu?›› 4 Yesu zlawenta, ɗiya luw: ‹‹Hin mə saf mə ɗəɗefɗəɗef təm deftere ngə Bayzlav bəgwən vu? Mə ɗəɗefeh kaɗ akimin a luwta: ‹Am diw ngə təkəniy cike, Bayzlav a ndən mawəl avə werti.› 5 Za a luwta baha: ‹Kadaban səna acin, mawəl av kə geɗ bahbay tik avə mahmay tik kaɗ, kə lapiy avə werti tik. Taniy saray tik kə mbaɗiy kəsəm takan.› 6 Asəna acin, taniy a ɗewiy saray ɗaba, amma taniy mə mbaɗiy kəsəm takan. Kadaban səna, hid mə gər kə pətar təkən Bayzlav mə mgbəw kaɗ kwən!
7 Farisiy tafnan maa zlimta atəgo za, ɗiya luwenta a Yesu acin: ‹‹Mana anhi wər, Musa a luw mana hid tu may kə gam werti tik kaɗ, mə ɗəɗefen ɗerewel ngə gam tik am ngəra, za kə diw sin kə gam tik wər kemi?›› 8 Yesu zlawenta, ɗiya luw: ‹‹Musa a geɗehin mozlokotuf hin kə gam wertiy kin kaɗ nhi, kadaban nəv kin toytoy. Amma am diw ngə təkəniy cike wayza wər, a ɗiy atəgo bəgwən. 9 Mindiwin kata luwehin, mawəl mə gər kə gam werti tik kaɗ kwən, say mana wer səna a ɗiy vərndew. Mana mawəl tu gam werti tik kaɗ, za kə dəm wer məpərmay, gawal səna a ɗiy vərndew.››
10 Zəni,wəriy gawliy ngə Yesu luwenta: ‹‹Mana ɗew ngə mawəl a werti tik tu ɗiy anhi wər, geleɓ taniy kə dəmiy kəsəm kwən. 11 Yesu zlawenta, ɗiya luw: ‹‹Hidiy cike wayza a ɓəs kə yəkiy jəgwan nhi kwən, say hidiy Bayzlav mə vəlenta gədan ngə yəktik. 12 Kat tə luw anhi kadaban, mawəliy məpərmay kwəl kə dəmiy wer kwən, kadaban dəga mbuwiy tan kəsəm ngatan tu məc, sənaniy təm hidiy mə ləta kaɗ, za acin hidiy məpərmay təm a dəmiy kəsəm ɗahkwən makavay bay tə dibizlav. Yo mana hid kwəl kə yək zləgam nhi, mə yəku.››
Yesu a ɗiy ngərbay a wərigi
13 Zəni hidiy məpərmay dahiy wəriy maa cicer angər Yesu, sin kə ɗiy ngər tik atalan tan, za kə tarenta Bayzlav kə ɗiyenta ngərbay. Amma wəriy gawliy ngetik maa limta za, ɗiya ndəliy hidiy mə dahiy wəriy səna. 14 Yesu ɗiya luwen a wəriy gawliy ngetik: ‹‹Mə geɗ wəriy maa cicer mə yiy angər ɗa. Mə takta kaɗ kwən. Kat tə luw anhi kadaban bay tə dibizlav a ngəmen a hidiy məmariy nəv mana wəriy nhi.›› 15 Adəwən səna, sin ɗiy ngəra atalan wəriy səna kə ɗiyenta ngər bay, za acin sliɗ vətik aa bəgo za.
Yesu a zləgam atalan kərgawla mə njənja
16 Pic takan, hid məpərmay va angər Yesu, ɗiya nehtik, luwenni: ‹‹Mordoy, kat kə ɗiy təkən malaw ceki kə jan kat kə jan micin maa a way ɗahkwən?›› 17 Yesu zlawenni, ɗiya luw: ‹‹Hoh nehek atalan təkən malaw kemi? Hid malaw wər, takan dap, sin acin Bayzlav. Mana hoh may kə jan micin angər Bayzlav wər, a səb mə jawjaw ngetik kpekpe.›› 18 Gawəl səna luwenni: ‹‹Mə jawjaw ceki?›› Yesu zlawenni ɗiya luw, anhi mə jawjaw səna: ‹‹Hoh gər kə wəzl dəwa kwən, hoh gər kə ɗiy vərndew kwən, hoh gər kə həl kwən, hoh gər kə ngawen ma a coloh kwən, 19 a vəlen mordoy a bahbay koh ɓəw a mahmay koh, za a may coloh tə jagwar koh mana hoh taa may talan kohª.›› 20 Kərgawla səna luwenni: ‹‹Mordoy, mə jawjawiy nhi cike wayza, kat a səbta kpekpe. Ya kat kə ɗiy təkən ngemi bah mi?›› 21 Yesu luwenni: ‹‹Mana hoh may kə ɗiy təkəniy cike Bayzlav mə mayu wər, a sliɗ, a va ber təkəniy hoh məmaru cike way kaɗ, za ma wəzakenta suloy tik a hidiy təm sanha. Asəna acin, hov kə jan nja malaw a dibizlav, adəwən səna ma yah səbakku acin.›› 22 Kərgawla səna maa zlim atəgo za, nəv ngetik ɗiya bas, sin vətik, kadaban sin awana aray day godokwən.
23 Yesu ɗiya luwen a wəriy gawliy ngetik acin: ‹‹Mindiwin kata ceɗehin, tuwah godokwən a hid mə njənja kə pət am bay tə dibizlav. 24 Kata luwehin baha, hid mə njənja kə pət am bay tə dibizlav tuwah godokwən, geleɓ zlogomo kə pət aa mə wil ngə jelɓel.›› 25 Wəriy gawliy ngetik maa zlimta atəgo za, taniy wələk wələk, nap luwta: ‹‹Mana atəgo wər, hid ngayi ngə mbəl acin yi?›› 26 Yesu ɗiya ca həriy atalan tan, za luwenta: ‹‹A hidiy wər tuwah godokwən, amma a Bayzlav ɗah tuwah kwən, sin kwəl kə ɗiy təkəniy cike.
27 Piyer luwenni acin: ‹‹Mordoy, hoh mə sən za, yikwan mə geɗ təkəniy cike way kaɗ kə səboh. Yo tanjinhi acin ngə janiyikwan mi?›› 28 Yesu zlawenta, ɗiya luw: ‹‹Mindiwin kata luwehin, am mandal Bayzlav tu kə zlambaɗ təkəniy cike təm talan mahayək kə mbaɗiy ndawyan, Kər Hidmemblen av kə ɗew am karawal ngetik malaw ngə bay. Za hin hidiy mə səbakta, hin məv kə ɗew am karawaliy gəɓ atalan saray ngə bayigi, kə zla dalgway ngə səbaniy ngə Israyila gəɓ atalan saray. 29 Mə zlimu, ko hid ngayi mə geɗ de ngetik, galmənigi, bahbay tik avə mahmay tik, za geɗ wəriy tik ɓəw tuziy tik kaɗ lay sin taa səb mozlokotuf ngaɗa, av kə jan təkəniy səna cike jəɓ bləkblək. Adəwən səna, av kə jan micin mətak way baha. 30 Amma, tanjinhi hidiy dolom awaniy a kibik, av kə jəɓiy aa dəwən. Za hidiy dolom taa dəwən av kə viy a kibik.››