Ma mə ngaɓngaɓ atalan hidiy mə ɗiyiy kəzəɗ am tuz ngə hidi
20
Yesu ɗiya luw baha: ‹‹Bay tə dibizlav wa ləbar atalan hid məmar tuz. Sin pət gbəmza kə jar hidiy ngə ɗiyenta kəzəɗ am tuz inaboje.ª 2 Sin maa jan hidiy za, sin zlerma a tanigi, a luw av kə wərəkenta suloy ngə ɗiy kəzəɗ pic pic suloy takanª. Za sin zlənta am tuz pay səna acin. 3 Am masa ngərafkatakan, sin pətah baha, sin lim hidiy məpərmay mə gariy kaɗ a kəmay luma, a mariy kəzəɗ ngə ɗiy bəgwən. 4 Sin ɗiya luwenta: ‹Mə va bizek tuz inaboje ngaɗa təm. Təv kə wərəkehin tiɗtiɗe mana mə njə kə wərəkenta a hidigi.› 5 Taniy sliɗiy vigi. Njə tuz səna pətah ngə dabdab pic, sin jan hidiy baha. Adəwən səna, sin pətah a masa makaɗ ngə sukoh, sin ɗiy mana tafnan. 6 Am way tik, sin pətah am masa joɓun ngə sukoh, jan hidiy sənan mə gariy kaɗ a kəmay luma baha. Sin nehta, ɗiya luw: ‹‹Hin mə ɗew pic pic mətak ɗiy kəzəɗ kemi?› 7 Hidiy səna ɗiya zlawenta, luwenta: ‹Yikwan mə jan hid mə luwiyikwan kə ɗiy kəzəɗ bəgwən.› Sin luwenta: ‹Hin təm, mə va biz am tuz ngaɗa.›8 ‹‹Pic maa ndəv za, njə tuz səna luwen a mordoy ngə mə ɗiyiy kəzəɗ ngetik: ‹A ɗefenma a hidiy mə ɗiyiy kəzəɗ təm tuz ngaɗa, za maa wərəkenta gəɗmazlən ngatan. Hoh kə diw a hidiy mə viy taa dəwən, za kə way a hidiy mə viy məpəlpla.› 9 Hidiy mə viy am kəzəɗ taa masa joɓun ngə sukoh hosigi, vəlenta suloy takan takan. 10 Hidiy mə viy təm tuz məpəlpla hosigi, taniy a ɓənta av kə janiy suloy day ngə hidiy sənan. Amma vəlenta suloy takan takan təm. 11 Mandal taniy taa yəkta, aa jəgwaniy ma atalan njə tuz, 12 a luwenta: ‹Hidiy nhi a yiy a dəwən, a ɗiyiy kəzəɗ masa takan dap, za hoh wərəkenta suloy prakprak a yikwan. Yikwan ɗər, yikwan tu təl a dangar, avə lay wiriɓ ngə pic!› 13 Njə tuz səna ɗiya zləgamen a hid takan tə dab tan, luwenni: ‹Ngwalay ɗa, a safu, kat tə ɗiyoh məplafas ɓahbəgwən. Yikwan mə zlerma avə hoh, hoh kə ɗiyak kəzəɗ picpic, za kat kə wərəkoh suloy takan kwən vu? 14 A wət gədmazlən koh, a va. Kat tə may kə wərəken suloy a hid mə yah taa dəwən am kəzəɗ prakprak a hoh. 15 Hoh ɓən wər, tə hos gəga kə ɗiy mana kat mə mayu avə aray ngaɗa bəgwən vu? Asənkwən hoh ɗiy ngərak lay kat mə ɗiyen malaw a hidi vu?››› 16 Adəwən səna, Yesu ɗiya luw baha: ‹‹Asəna acin, hidiy taa dəwən av kə mbaɗiy kə hidiy tə kibik, za hidiy tə kibik təm av kə mbaɗiy kə hidiy taa dəwən.››
Yesu a zləgam mə makaɗ tik atalan məc ngetik
17 Mandal Yesu aa tap kəv a Ursalima, sin ngazl wəriy gawliy ngetik ma gəɓ atalan saray taniy a gandan. Am taa viy a mozlokotuf səna, sin ɗiya luwenta: 18 ‹‹Mə zlimu, tanjinhi yikwan maa tap kəv a Ursalima. Mandal yikwan tu hos abəgo, hidiy av kə kawiy Kər Hidmemblen, za kə vəlta am nəv ngər ngə bayiy ngə masayigi ɓəw angər mogroy ngə jəgwan ngə mə jawjaw ngə Musa. Taniy av kə zlenta dalgway ngə wəzlta kaɗ. 19 Zəni taniy av kə vəlta am nəv ngər ngə hidiy maa səban tan par a yahudigi. Hidiy səna av kə rəta, za av kə zarta. Za acin, av kə kpawta kaɗ am pay maa zləngrak. Amma a dəwən məc ngetik, wan saray mə makaɗ tik, Bayzlav av kə mbəlah kaɗ aa mə məc za.››
Wer ngə Zebede a pəl təkən angər Yesu
20 Zəni wer ngə Zebede yah angər Yesu avə wəriy tik saray. Maa hosiy za, sin gbəlih titimbiz a kibik Yesu kə pəl təkən. 21 Yesu luwenni: ‹‹Hoh may tə ngər ɗa mi?›› Sin zlawenni, ɗiya luw: Wəriy ngaɗ saray a tawaniy nhi. Am pic hoh tu kə zəm bay koh, maa geɗ takan aa mə ngərzəm koh, za takan aa mə zlaɓay koh.›› 22 Yesu luwenta acin: ‹‹Hin maa sən təkən hin mə pəl nhi ɗahkwən. Hin məv kə ɓəs takwaniy kat tu kə sətik nhi vu?›› Taniy zlawenta, ɗiya luwta: ‹‹Yaw, yikwan məv kə ɓəs tik.›› 23 Yesu ɗiya luwenta: ‹‹Mindiwin, hin məv kə sa takwan mana kata. Amma kata acin ngə wel hid məv kə ɗew aa mə ngərzəm ngaɗa asənkwən aa mə zlaɓay ngaɗ nhi, kat kwən. Vay avə talan tik acin mə sləsləɓen a hidiy sin mə welu.
24 Wəriy gawliy ngə Yesu mə fəstik maa gəɓ, maa zlimta za, basiy nəv atalan wəriy Zebede maa saray səna. 25 Za acin Yesu ɗefentəma a taniy cike wayza kə yiy a jagwar tik. Maa yiy za, sin ɗiya luwenta acin: ‹‹Hin mə sən za, bayiy ngə hidiy təm talan mahayək a njə kə marta a takwəla. Za hidiy mogroy ɗaw ɗefiy gədan mordoy ngatan atalan hidigi. 26 Amma mə gər kə ɗiy atəgo am walan kin kwən. Hid mə may kə mbaɗ kə hid mordoy a dab kin, sin kə ɗew kə hid mə ɗiyen kəzəɗ a hidiy məpərmay ɗər. 27 Za hid mə may kə mbaɗ kə talan mbalgam a dab kin, sin mə ɗew wa bahlam kin. 28 Wa səna, Kər Hidmemblen a yah za hidiy kə ɗiyenta kəzəɗ kwən, amma sin a yah kə ɗiyen kəzəɗ a hidigi. Za sin kə vəl micin ngetik kə zlambaɗ micin ngə hidiy dolom.››
Yesu a zlər həriya ngə hulufiy saray
29 Mandal Yesu avə wəriy gawliy ngetik taa pətiy tan aa liɓde Yeriko za, zəgudiy dolom ɗiya səbiy Yesu. 30 Mandal taa viy səna, janiy hulufiy saray mə ɗewiy kaɗ a gozlum mozlokotuf. Hulufiy səna zlimiy Yesu aa ton, nap ciy wəla, ɗiya luwta: ‹‹Məmar hidi, Kər ngə bay Dawda, a saf kaymah ngiykwan!›› 31 Zəgudu ɗiya ndəlta, luwenta: ‹‹Mə pek ma kin kaɗ.›› Amma hulufiy səna a ciy wəltan dayday dap, a luwta: ‹‹Məmar hidi, Kər ngə bay Dawda, a saf kaymah ngiykwan!›› 32 Yesu maa zlim atəgo za, sin gar kaɗ, ɗefentəma. Maa yiy angər tik za, sin ɗiya nehta, luwenta: ‹‹Hin mə may kat kə ɗiyehin mi?›› 33 Taniy zlawenta, luwta: ‹‹Aw Məmar hidi, may ngiykwan hoh kə zləriyikwan həriya kaɗ.›› 34 Kaymah ngatan gasan a Yesu dayday, sin mbəlem hulufiy səna am həriya, wayba həriya ngatan zləriy tan, za taniy ɗiya səbiy Yesu.