Yesu a pət a Ursalima mana bay
21
Yesu avə wəriy gawliy ngetik mbeh kə hosiy a Ursalima. Taniy hosiy a Baytifaze tə bər wurum, zlim tik wurum Jaytun. Yesu zlən wəriy gawliy ngetik saray, 2 sin luwenta: ‹‹Mə va a slalade tə kibik kin tattah. Mandal hin tu hos, hin məv kə jan ndennden mə jawa kaɗ avə kərti tik a jagwar. Mə pəslaha, mə dahakku. 3 Mana hid tu nehehin, hin kə luwenni: ‹Məmar hidi acin mə gər tik,› za avə kə geɗehin mozlokotuf angaw hin kə pəsl tik.››4 Təkən səna a ɗiy atəgo kə jan kə ɗiy tiɗtiɗe mana mokotuf ngə Bayzlav mə luwu. Sin a luw:
5 ‹‹Mə luwen a hidiy tə liɓde Siyona:
Mə safu, bay kin aa vay.
Sin awana a nəv maa kukwəɗ,
mə tapah adəwən ndennden,
sin mə tapah adəwən kər ndennden.ª››
6 Wəriy gawliy səna vigi, ɗiyiy təkəniy cike mana Yesu mə luwenta. 7 Ngazliy ndennden səna avə kərti tik, dahta angər Yesu. Aa ləkwətiy tə kəsəm tan dəp dəpta adəwən ndenndeniy səna. Za Yesu tap adəwən maa takan acin. 8 Mandal sin aa va, hidiy dolom ndəɗ ndəɗiy ləkwətiy tan a mozlokotuf səna. Hidiy sənan təm bəzloh bəzlohiy vidiɗ pay, ndəɗ ndəɗta a mozokotuf. 9 Hidiy tə kibik Yesu ɓəw taa dəwən tik a ciy wəla, a luwta: ‹‹Nəmkwan kə vəlen mordoy a kər Dawda. Bayzlav mə ɗiyen ngərbay a hid mə yah tavə zlim ngetik. Nəmkwan kə vəlen mordoy a Bayzlav tə dibizlav maa fal.››
10 Yesu maa hos a liɓde Ursalima za, hidiy tə liɓde səna cike wayza wələk-wələk, ɗiya luwta: ‹‹Nhi tik hid ngayi?›› 11 Zəgudu zlawenta, luwta: ‹‹Sin acin Yesu, mokotuf ngə Bayzlav tə liɓde Nasaratu təm hayək Galili.››
Yesu awan am jik Bayzlav
12 A dəwən səna, Yesu pət am jik Bayzlav. Jan hidiy a beriy təkəniy parpar abəgo. Hidiy sənan a səkəmiy təkəniy səna. Sin ɗiya gamta kaɗ aa bəgo za. Sin aa tabəl ngə hidiy mə zlambaɗiy suloy ɓəw karawal ngə hidiy mə beriy ɓaram gom gom way kaɗ. 13 Ɗiya luwenta: ‹‹Bayzlav a luw am deftere ngetik: ‹Jik ngaɗa avə kə ɗew kə jik hidiy tu kə tarakta abəgo.› Amma hin mbaɗ gingin kə budum ngə ɓah məhəligiª.››
14 A dəwən səna, hulufigi avə vəderiy viy angər Yesu am jik Bayzlav səna, za sin mbəlta cike waykaɗ. 15 Bayiy ngə masayiy təm jik Bayzlav ɓəw mogroy ngə mə jawjaw ngə Musa maa limiy təkən mə wələk bərngəzl Yesu mə ɗiy səna za, zlimiy wəriy a ciy wəla am jik Bayzlay, a luwta: ‹‹Nəmkwan kə vəlen mordoy a Kər Dawda!›› Kadaban səna acin, taniy ɗiya basiy nəv. 16 Taniy luwenta a Yesu: ‹‹Hoh zlim zləgam wəriy taa zləgamta təgo vu?›› Yesu zlawenta, ɗiya luw: ‹‹Yaw, kata zlim tik. Hin mə saf zləgam Bayzlav mə zləgam təm deftere bəgwən vu? Sin a luw: ‹Hoh tu sləsləɓ wəriy maa mecicer ɓəw wəriy maa leɓek kə vəlenta mordoy a hoh a ma ngatanª.›››
17 A dəwən səna, Yesu geɗta, pət tik aa Ursalima za, va wanay tik a liɓde Baytaniya.
Yesu ngav sikwiɗ
18 Apat tik, gbəm za, Yesu aa jəɓ kəv a liɓde Ursalima, mandal sin taa va səna, mitis ɗiya wəzlenni. 19 Sin lim sikwiɗ a bər mozlokotuf, sin va a madabah tik, acagendik av kə jan mə mbumbu tik. Amma sin maa hos za, safsaf, a jan mə mbumbu a kimin bəgwən, səna vidiɗ a gendik dap. Za acin sin luwen a sikwiɗ səna: ‹‹Hoh mbuw ɗaba ko apu!›› Wayba sikwiɗ səna kwalay tik, kuyor. 20 Wəriy gawliy ngetik maa limta atəgo za, taniy wələk-wələk, za taniy nehiy Yesu, ɗiya luwenta: ‹‹Haya, sikwiɗ nhi a kwal njoɗ aceki ?›› 21 Yesu zlawenta, ɗiya luw: ‹‹Mindiwin, kata ceɗehin, mana hin tu vəl nəv kin a Bayzlav, za hin mə wəzən bəgwən wər, hin məv kə ɓəs kə ɗiy təkən mana kat mə ɗiy atalan sikwiɗ nhi. Hin məv kə ɗiy mana kat mə ɗiy nhi dap kwən, hin kwəl kə luwen a wurum tattah: ‹A gar abəgo za, a va gom a liɓ maz mordoy!› Sin av kə gar kəv dap. 22 Mana hin tu vəl nəv kin a Bayzlav, sin av kə vəlehin təkəniy cike hin mə tar tə ngər tik.››
Mə vəlen gədan a Yesu wər yi?
23 Adəwən səna, Yesu jəɓ pət a jik Bayzlav, za ɗiya ɗiy jəgwan a hidigi. Mandal sin ta ɗiy jəgwan səna, bayiy ngə masayigi ɓəw talan mbalgam ngə Yahudiy yiy angər tik. Ɗiya neh ta, luwenta: ‹‹Hid ngayi mə vəloh mozlokotuf kə ɗiy təkəniy nhi yi? Za hid ngayi mə vəloh gədan ngə ɗiy tik yi?›› 24 Yesu zlawenta, ɗiya luw: ‹‹Yo, kat təm, təv kə nehehin təkən takan. Mana hin tu zlawakku, kat təv kə ceɗehin hid mə vəlak mozlokotuf kə ɗiy təkəniy səna.›› 25 Mə zlənah Yuhana kə juroɓ baptisma wər yi? Bayzlav vu? Hidiy vu? Mə ceɗek may. Za acin taniy diwiy kə ngiway am walan tan, ɗiya luwta: ‹‹Ya, tanjinhi mana yikwan tu luw: ‹Bayzlav acin mə zləna tik›, sin av kə luwiyikwan: ‹Ya, hin mə yək ma ngə Yuhana kway?› 26 Amma mana yikwan tu luw: ‹Hidiy acin mə zlənahta›, say yikwan kə hovok a hidigi, kadaban hidiy cike wayza a vərəkta, Yuhana mokotuf ngə Bayzlav.›› 27 Kadaban səna acin, taniy zlawenta a Yesu, luwenta: ‹‹Yikwan mə sən hid mə zlənah Yuhana bəgwən.›› Yesu ɗiya luwenta: ‹‹Ya law, kat təm tə ceɗehin hid mə vəlak mozlokotuf kə ɗiy təkəniy nhi kwən.››
Ma mə ngaɓngaɓ atalan wəriy saray
28 Yesu ɗiya luw baha: ‹‹Zləgam kat tu kə luwehin nhi, hin məv kə ɓən atalan tik aceki ? Hid awana wəriy saray. Sin luwen a kər tizin tik: ‹Kərti ɗa, apica a va ɗiyah kəzəɗ am tuz ngə pay inaboje!› 29 Kər səna zlawenni, ɗiya luw: ‹Kat təv kwən bahbay.› A dəwən səna, sin ɓən ɓən, buw ɓən kaɗ. Zəni va kə ɗiyah kəzəɗ. 30 Za Bahbay va luwen a kər mə saray tik mana sin mə luwen a kər ngə tizin. Kər səna zlawenni, ɗiya luw: ‹Yaw bahbay, təv kə va!› Amma sin av ɓahbəgwən. 31 Tanjinhi a dab wəriy maa saray nhi, hid ngayi mə ɗiy təkən mana bahbay tik mə mayu?›› Taniy zlawenta, luwta: ‹‹Kər ngə tizin acin mə ɗiy tik.›› Yesu ɗiya luwenta acin: ‹‹Mindiwin, kata ceɗehin, hidiy mə kambaliy buhdu ɓəw mə ɗiyiy vərndew av kə pətiy am bay ngə Bayzlav məpəlpla kə hin. 32 Kat tə luw anhi, kadaban Yuhana mə juroɓ baptisma yah angər kin, ceɗehin mozlokotuf ngə Bayzlav, hin mə yək zləgam ngetik bəgwən. Amma hidiy mə kambaliy buhdu ɓəw wertiy mə ɗiyiy vərndew tu yəkta. Ko adəwən hin mə lim mana taniy mə buwiy ngar ngatan, hin təm hin mə buw nəv kin kə yək zləgam ngə Yuhana ɓahbəgwən.››
Ma mə ngaɓngaɓ atalan hidiy maa lem mə puwiy pay inaboje
33 Yesu ɗiya luwenta baha: ‹‹Mə zlim ma mə ngaɓngaɓ məpərmay baha. Hid məpərmay ɗaha, ngəɓ payiy inaboje, za cakcak kaɗ mgbaw. Sin lutlut gugwən abəgo ngə ɗic mə mbumbu ngə pay mə nana. Sin ɗiy zəray fal a wəzlav ngə puw. Adəwən səna, sin geɗen a hidiy mə biz biz kə puwta, zəni taniy kə vəlenta makavay ngetik təm. Zəni sin ɗə mbuluk.
34 ‹‹Mandal ket mə mbumbu ngə pay maa hos za, məmar tuz səna zlən hidiy mə ɗiyiy kəzəɗ ngetik angər hidiy mə puwiy tuz səna, taniy kə vəlenta makavay ngetik səka. 35 Hidiy mə ɗiyiy kəzəɗ maa hosiy za, hidiy mə puwiy tuz səna kawta. Hid maa takan a zarta a zar, hid mə saray tik, wəzlta kaɗ mimci, za hid mə makaɗ tik ndəta avə gugwən nha məc. 36 Hid məmar tuz səna jəɓ zlən mə ɗiyiy kəzəɗ ngetik məpərmayiy bah day kə sin mə zlən ngə tizin. Amma hidiy mə puwiy tuz səna ɗiyta mana mə ɗiyenta a hidiy ngə tizin. 37 Am way tik, njə tuz səna a kərti tik zlən acin. Sin ɓən, za luw: ‹Kərti ɗa wər, taniy av kə zlimentəma.› 38 Amma hidiy mə puwiy tuz tafənan maa limiy kərti tik səna a yah za, ɗiya zləgamiy am walan tan, luwta: ‹Anhi hid məv kə zəm tuz nhi, tu yah acin. Nəmkwan, kə wəzl kaɗ, yikwan kə zəm tuz gingin.› 39 Njap, kawiy kər səna, ngazlta a dəwən cak ngə tuz inaboje, za wəzlta kaɗ.››
40 Yesu ɗiya neh hidigi, luwenta: ‹‹Mandal hid məmar tuz tu kə yah, sin av kə ɗiyenta mi a hidiy mə puwiy tuz səna?›› 41 Taniy zlawenta, luwta: ‹‹Mana sin tu yah, av kə wəzl hidiy maa lem səna kaɗ təm, a saf kaymah ngatan kwən. Za av kə wət tuz ngetik kə vəlen a hidiy məpərmay kə puwta. Taniy wər, mandal ket mə mbumbu tik tu hos, taniy av kə vəlenta makavay ngetik.
42 Za acin Yesu luwenta baha: ‹‹Hin mə saf zləgam nhi za am deftere, zləgam səna a luw:
‹Gugwən, hidiy mə sləbiy gidivil mə fək ta səna,
Sin acin mə mbaɗ kə gugwən malaw njə gədan ngə ndən.
Bayzlav acin mə ɗiy tik.
Mə mbaɗah kə təkən malaw godokwən am həriya ngiykwanª.›
43 Kadaban səna acin kata luwehin, Bayzlav av kə ɓiy bay ngetik sin mə luw kə vəlehin kaɗ, za kə vəlen a hidiy məpərmay mə ɗiyiy kəzəɗ mə fet nəv ngetik. [ 44 Mana hid tu ndəv am gugwən səna, hid səna av kə nga, tunus tunus. Za mana gugwən səna tu gom atalan hidi, av kə kop hid səna, kotopo-kotopo.]›› 45 Masayiy təm jik Bayzlav avə Farisiy maa zlimiy ma mə ngaɓngaɓ səna za, tu sənta, Yesu a zlagam nhi atalan tan. 46 Kadaban səna acin, taniy ɗiya jariy mozlokotuf ngə kaw Yesu. Amma a hovokiy avə zəgudu, kadaban hidiy a vərəkiy Yesu kə mokotuf ngə Bayzlav.