Ma mə ngaɓngaɓ atalan hid mə ɗefenma a hidiy am məmbəlwa
22
Adəwən səna, Yesu ɗiya zləgamen a hidigi a ma mə ngaɓngaɓ baha. A luwenta: 2 ‹‹Bay tə dibizlav wa ləbar ngə bay məpərmay taa sləsləɓ məmbəlwa ngə dəmen werti a kərti tik. 3 Maa sləsləɓ za, sin zlən hidiy mə ɗiyiy kəzəɗ ngetik kəv kə luwen a hidiy sin mə ɗefentəma kə yigi. Amma hidiy səna aa mayiy kə yiy kwən. 4 Sin jəɓ zlən hidiy mə ɗiyiy kəzəɗ ngetik məpərmay a zləgam nhi: ‹Mə va luwen a hidiy kat mə ɗefentəma, tanjinhi gəda mə taa wayza. Kat mə fat zligi ɓəw təkəniy huviy mə gehgeh wayza. Təkəniy cike mə sləsləɓah kaɗ, mə yah am məmbəlwa ngə dəm werti!› 5 Amma hidiy mə janiy ɗefma səna a yəkiy zləgam səna ɓahbəgwən, sliɗiy viytan am kəzəɗiy ngatan maa par par. Hidiy məpərmay am tuz, hidiy məpərmay am ɗiy terere. 6 Hidiy məpərmay kawiy hidiy mə ɗiyiy kəzəɗ ngə bay səna, ɗiya zlənenta takwan, za wəzlta kaɗ. 7 Bay maa zlim atəgo za, nəv ngetik basenni, zlən sojiy ngetik kə viy kə wəzliy hidiy mə wəzliy hidiy ngetik səna, za kə kəɗaw liɓde ngatan kaɗ. 8 A dəwən səna, sin luwen a hidiy mə ɗiyiy kəzəɗ ngetik məpərmay: ‹Tanjinhi gəd məmbəlwa ngə dəm werti mə taa way za. Amma hidiy kat mə ɗefentəma a hosiy gəga kə zəmiy gəd səna bəgwən. 9 Mə sliɗ, mə va acin am mgbəw ngə mozlokotufigi, za hidiy cike hin mə janta tə bugo, mə luwenta mə yiy kə zəmiy gəd məmbəlwa nhi.› 10 Hidiy mə ɗiyiy kəzəɗ ngetik sliɗigi, viy a mozlokotufiy səna. Taniy ɓas ɓasiy hidiy cike taniy mə janta tə bugo, hidiy maa lem, hidiy malaw. Hidiy pət pətiy wek jik ngə məmbəlwa acin.11 ‹‹Bay pət a jik kə saf hidiy sin mə ɗefentəma səna. Sin lim hid məpərmay abəgo a kwəl ləkwət ngə məmbəlwa bəgwən. 12 Ɗiya luweni: ‹Ngwalay ɗa, hoh pət a jik awənhi mətak ləkwət ngə məmbəlwa a kəsəm aceki?› Gawal səna njay tik tehte. 13 Bay luwen a hidiy mə ɗiyiy kəzəɗ ngetik acin: ‹Mə jaw ngriy tik ɓəw ngaziy tik kaɗ, za mə fək a caɗak am kpizlik. Abəgo, sin av kə han, za av kə kəkraw ndin tik.›››
14 Yesu ɗiya luw am way tik: ‹‹Mindiwin, Bayzlav a ɗefenma a hidiy dolom, amma hidiy sin mə welta kə hidiy ngetik, ndez anhi dap.››
Neh atalan buhdu ngə vəlen a bay
15 Za acin, Farisiy viy ɓasiy kaɗ kə zlerima kə ɗəfiy Yesu kə kawta am zləgam. 16 Adəwən səna, taniy zləniy wəriy gawliy ngatan məpərmay avə hidiy ngə bay Hirudus angər Yesu, kə luwenta: ‹‹Mordoy, yikwan mə sən za, hoh ɗiy polkoy ɗahkwən, za hoh njə kə jəgwanen təkən Bayzlav mə mayu a hidigi avə mozlokotuf tik. Ya hoh hovok ko a hid ngayi ɗahkwən, za hoh cicef ɗew ngə hid ɗahkwən. 17 Tanjinhi, a ceɗiyikwan ɓən ngəkoh may! Mə jawjaw mə vəliy yikwan Mozlokotuf za yikwan kə vəlen buhdu a bay Roma məmar hayək cike vu, a vəl bəgwən vu?››
18 Amma Yesu aa sən ɓən ngatan mə ngavngav wayza. Sin luwenta acin: ‹‹Məplafas hidiy cah, mə ɗəfak kemi? 19 Mə ɗefek suloy hin ta njə kə wərək buhdu avə sin səna may.›› Taniy a suloy səna vəlenta. 20 Yesu ɗiya nehta, luwenta: ‹‹Həriy ngayi avə zlim ngayi təm suloy nhi?›› 21 Taniy zlawenta, luwta: ‹‹Ngə bay Roma məmar hayək cike.›› Yesu luwenta acin: ‹‹Asəna wər, mə vəlen təkən ngə bay Roma a bay Roma, za təkən ngə Bayzlav aa Bayzlav.›› 22 Taniy ma zlimta atəgo za, taniy cike wələk-wələk. Taniy geɗiy Yesu kaɗ, sliɗiy viytan acin.
Neh ngə Sadukigi atalan hidiy tu kə pətiy aa mə məc za
23 Am pic səna gəzza, hidiy Sadukiy yiy angər Yesu. Taniy a njə kə luwta, hidiy mə məc məc a mbəliy aa mə məc za kwən. Kadaban səna, ɗiya nehiy Yesu, 24 luwta: ‹‹Mordoy, mə jawjaw ngə Musa a luw anhi: ‹Mana hid dəm werti, za məcay tik kər ɗahkwən, galmən kə sərəɓ wer səna kə jan kə mbuw wəriy makavay ngə galmən mə məcməcª.› 25 Za acin, hid məpərmay a ɗew zaba a dab yikwan awənhi avə galməniy mawəligi, taniy cisaray. Bece dəm werti, məcay tik kərti ɗahkwən. Zərmba sərəɓ wer səna, 26 məcay tik kər ɗakwən baha. Za Deli təm asəna. Za taniy cisaray tik tu məciy atəgo . 27 Maa məciy cike wayza za, wer təm məcay tik. 28 Ya am mandal hidiy mə məc məc tu kə mbəliy aa mə məc za, wer səna av kə ɗew kə wer ngayi a dab taniy maa cisaray nhi? Yikwan mə neheh nhi, kadaban taniy cike tik mə sərəɓta za.›› 29 Yesu zlawenta, ɗiya luw: ‹‹Hin mə zlayah za, kadaban hin maa sən zləgam təm Deftere ngə Bayzlav ɗahkwən, za hin maa sən gədan ngə Bayzlav ɗahkwən. 30 Mandal hidiy mə məc məc tu kə mbəliy aa mə məc za, mawəliy avə wertigi a dəmiy kəsəm ɗaba, av kə ɗewiy tan wa mbaslayiy ngə Bayzlav tə dibizlav. 31 Atalan hidiy mə məc məc tu kə mbəliy aa mə məc za, mə saf zləgam ngə Bayzlav mə luwehin am deftere ngetik bəgwən vu? Bayzlav a luw: 32 ‹Kata acin Bayzlav ngə Ibrahima, ngə Isiyaku ɓəw ngə Yakubu.› Asəna acin, Bayzlav wər ngə hidiy mə məc məc kwən, amma sin Bayzlav ngə hidiy taa micin.›› 33 Zəgudiy ma zlimta atəgo za, jəgwan Yesu mə ɗiyenta tu wələkenta talan.
Mə jawjaw mordoy tə dab mə jawjawiy ngə Bayzlav acin ceki?
34 Farisiy ma zlimta Yesu mə kaw Sadukiy za a ma, ɓasiy kaɗ acin. 35 Hid takan tə dab tan, sin mordoy ngə jəgwan, a may kə ɗəf Yesu a ma, luwenni acin: 36 ‹‹Aw Mordoy, mə jawjaw ngə Bayzlav mordoy day tə dab mə jawjawiy cike wayza acin ceki?›› 37 Yesu zlawenni, mə jawjaw maa day səna anhi: ‹‹‹A may Bayzlav məmar hoh a nəv koh tik, atalan koh tik, ɓəw avə bərngəzl talan koh tikª.› 38 Nhi acin mə jawjaw ngə Bayzlav maa mordoy day, za sin acin tizin. 39 Anhi mə jawjaw ngə Bayzlav mə saray tik maa prakprak a ngə tizin: ‹A may coloh mana hoh taa may talan koh!› 40 Mə jawjawiy cike wayza Bayzlav mə vəlen a Musa ɓəw jəgwan ngə mokotufiy ngə Bayzlav, a gariy atalan mə jawjawiy maa saray səna.››
Kristu avə Dawda
41 Farisiy wəlen mə ɓasiy kaɗ, Yesu ɗiya nehta, ɗiya luwenta: 42 ‹‹Mə ɓən atalan Kristu aceki ? Dehen acin yi? Taniy zlawenta, luwta: ‹‹Dehen acin Dawda.›› 43 Yesu luwenta baha: ‹‹Avə gədan ngə Mbiɗ ngə Bayzlav, Dawda a ɗefen ma: ‹Məmar kata› kemi? Dawda səna a luw:
44 ‹Bayzlav Məmar hidi luwen a Məmar kata,
A ɗewey koh am ngər zəm ngaɗa za,
hos am pic kat tu kə vəloh mosumiy koh kə gbilihiy titimbiz akibik kohª.›
45 ‹‹Mə safu, Dawda atalan tik ɗefenma a Kristu ‹Məmar kata.› Ya za acin, sin kə ɗew kə dehen ngə Kristu wər, a ɗiy za vu?››
46 Adab Farisiy səna, ko hid takan mə ɓəs kə zlawen a Yesu ɗahkwən. Dəga am pic səna, hidiy hovokiy kə nehiy Yesu.