Mə puw talan kin avə mogroy ngə jəgwan ɓəw avə Farisigi!
23
Adəwən səna, Yesu ɗiya luwen a zəgudu ɓəw a wəriy gawliy ngetik: 2 ‹‹Mogroy ngə jəgwan ngə mə jawjaw avə Farisigi wər, kəzəɗ ngatan acin kə pəsl madaba ma ngə mə jawjaw ngə Musa a hidigi. 3 Hin wər, mə zlim ma ngatan, za mə ɗiy təkəniy cike taniy mə ceɗehin. Amma mə gər kə səb ngar ngatan kwən. Kat tə luw anhi, kadaban taniy aa ɗiyiy təkən ta jəgwanenta a hidiy ɗahkwən. 4 Taniy ɗaw kə jawiy səndək maa ɓilik-ɓilik, za kə ɗiyenta a hidiy atalan. Amma taniy aa mbəlemiy ngəra ngatan ko gwedek a kimin ɗahkwən. 5 Kəzəɗiy cike taniy ta njə kə ɗiyta, a njə kə ɗiyta kə jan hidiy kə safta. Asəna acin, taniy ɗaw kə jawiy təkəniy mə njə kə luwta filakteriyª am muzuroh ngatan ɓəw am ngər ngatan. Ɗaw kə ɗiyiy ngatan mordoy day kə ngə hidigi. Za a njə kə njeviy mbiseh maa zoɗ am gozlum ləkwət ngatan avə təkəniy maa teɓeren teɓeren. 6 Mandal hidiy tu ɗefentəma kə zəm gəd məmbəlwa, taniy ɗaw kə jariy lay ɗew malaw. Za am jik jəgwan ngə Yahudigi, taniy a njə kə jariy lay ɗew ngə mogroyigi. 7 Am lay hidiy mə ɓasiy təm, a njə kə mayiy hidiy kə ɗenta mbeli avə daɓ talan, za kə ɗefentəma ‹Mordoy.›8 ‹‹Amma hin wər, mə gər kə may hidiy kə ɗefehin ma ‹Mordoy› kwən, kadaban hin cike wayza hin prakprak, za mordoy kin ɗaha takan, sin a gendik palpal. 9 Hin mə gər kə vəlen mordoy a hidi am talan mahayək avə kə ɗefenma ‹bahbay› kwən, kadaban hin mawana Bahbay takan dap, sin acin Bayzlav tə dibizlav. 10 Mə gər kə may hidiy kə ɗefehin ma ‹bay jəgwan› kwən təm, kadaban hin mawana bay jəgwan takan dap, sin acin Kristu. 11 Hid mordoy tə dab kin, mə ɗewey tik kə hid mə ɗiyehin kəzəɗ. 12 Hid mə kaf talan tik, Bayzlav av kə gəgəc tik, za hid mə gəgəc talan tik, Bayzlav av kə kaf tik.››
Yesu ngəz mogroy ngə jəgwan ɓəw Farisigi
(Luka 11.39-42, 52)
13 Yesu ɗiya luw baha: ‹‹Hin mogroy ngə jəgwan ɓəw Farisigi, hin məplafas hidigi. Takwan av kə yah atalan kin, kadaban hin ɗaw kə pek mijijik ngə bay tə dibizlav kaɗ, kə jan hidiy kə pətiy abəgo kwən. Hin talan kin, hin maa pət abəgo ɗahkwən. Za hin maa geɗen lay a hidiy mə mayiy kə pətigi, kə pətiy kwən.
14 [‹‹Hin mogroy ngə jəgwan ɓəw Farisigi, hin məplafas hidigi. Takwan av kə yah atalan kin, kadaban hin mə njə kə moh təkəniy ngə wertiy mə cupcup, za baha hin mə njə kə tar Bayzlav, tar tar nanha, kə jan hidiy kə safiyhin kə hidiy malaw. Hin ta njə kə ɗiy atəgo səna, Bayzlav av kə zlehin dalgway lem day ngə hidiy cike wayza.]
15 ‹‹Hin mogroy ngə jəgwan ɓəw Farisigi, hin məplafas hidigi. Takwan av kə yah atalan kin, kadaban hin mə njə kə tal am hayəkiy parpar, hin mə njə kə zlan maziy parpar kə jar hid məv kə səb mə zugzugwa ngəkin. Mandal hin tu jan hid səna, hin mə njə kə mbaɗ tik kə hid maalem day kə hin jəɓ saray, kə pət am kuhu maa ligiɗ.
16 ‹‹Hin hulufiy mə njə kə ngazl hidigi, takwan av kə yah atalan kin, kadaban hin mə njə kə luw: ‹Mana hid tu luw mbeɗi avə jik Bayzlav, təkən a ɗiyen kwən. Amma mana hid tu luw mbeɗi a melenge təm jik Bayzlav, say sin kə ɗiy təkən sin mə luw mbeɗi atalan səna.› 17 Hulufiy mətak bərngəzl talan cah, mə ceɗek may, təkən ma day wər mi? Melenge təm jik Bayzlav vu asənkwən jik Bayzlav mə mbaɗ melenge səna kə ɗiy kweɗek-kweɗek a kibik Bayzlav vu? 18 Hin mə njə kə luw təm: ‹Mana hid tu luw mbeɗi avə lay hidiy ta njə kə vəlenta təkən a Bayzlav a kimin, təkən ngə ɗiyen ɗahkwən. Amma mana hid tu luw mbeɗi avə təkən hidiy taa njə kə vəlenta a Bayzlav, say sin kə ɗiy təkən sin mə luw mbeɗi atalan tik səna.› 19 Hin hulufiy cah, mə ceɗek may, təkən maa day wər mi? Təkən hidiy taa njə kə vəlenta a Bayzlav vu, asənkwən lay hidiy ta njə kə vəlen təkən a Bayzlav a kimin mə njə kə mbaɗ təkən səna kə ɗiy kweɗek-kweɗek a kibik Bayzlav vu? 20 Asəna acin, mana hid tu luw mbeɗi avə lay ta njə kə vəlenta təkən a Bayzlav, sin a luw mbeɗi avə lay səna ɓəw avə təkəniy cike mə ɗerɗer tə kimin təm. 21 Mana hid tu luw mbeɗi avə jik Bayzlav, sin a luw mbeɗi avə jik səna ɓəw avə Bayzlav təm jik səna. 22 Mana hid tu luw mbeɗi avə dibizlav, sin a luw mbeɗi avə majanga ngə Bayzlav ɓəw avə Bayzlav mə ɗew tə kimin səna.
23 ‹‹Hin mogroy ngə jəgwan ɓəw Farisigi, hin məplafas hidigi. Takwan av kə yah atalan kin, kadaban am vidiɗ wiliy cike wayza, hin mə njə kə wət takan am gəɓ kə vəlen a Bayzlav, mana vidiɗiy ta njə luwta minti, anisa ɓəw algaruª. Amma, hin a təkəniy maa law day təm mə jawjaw ngə Musa hin geɗgeɗta waykaɗ. Təkəniy səna acin: Ɗew maa tiɗtiɗe a kibik Bayzlav, ɗiy malaw ɓəw luw mindiwin. Nhi acin malaw day kə ɗiy, za kə jərəv məfəs tik kaɗ kwən təm. 24 Hin hulufiy mə njə kə ngazl hidigi! Hin ɗaw kə ɓiy ceɗi kaɗ aa mə təkən ngəkin ngə sa, amma hin ɗaw kə mbiɗ zlogomo tə kimin!
25 ‹‹Hin mogroy ngə jəgwan ɓəw Farisigi, hin məplafas hidigi. Takwan av kə yah atalan kin, kadaban hin mə njə kə goh dəwən kendek ngə sə yəm kin ɓəw dəwən waslak gəda kin kaɗ. Amma hin mə njə kə geɗ təkəniy hin mə həlta ɓəw tamah ngə moh təkən wekwek a kimin. 26 Hin Farisiy hulufigi, mə goh liɓ ngə waslak kin zagway, za acin dəwən tik av kə ɗiy kweɗek-kweɗek təm!
27 ‹‹Hin mogroy ngə jəgwan ɓəw Farisigi, hin məplafas hidigi. Takwan av kə yah atalan kin, kadaban hin wa talan civi mə kəlaɓ-kəlaɓ tavə ndugwən haza. Law godokwən a caɗak za, amma aa liɓ za wər, kirngizl avə vren kəsəm mə wər wər dap. 28 Hin wa səna a kibik hidigi, wa hin ma zlimenma a Bayzlav, amma nəv kin wek avə məplafas ɓəw avə təkəniy mə ngavngavigi.
29 ‹‹Hin mogroy ngə jəgwan ɓəw Farisigi, hin məplafas hidigi. Takwan av kə yah atalan kin, kadaban hin ɗaw kə ndən talan civ ngə mokotufiy ngə Bayzlav kaɗ lawlaw, za hidiy mə zlimentəma a Bayzlav, hin ɗaw kə wəzlel talan civ ngatan lawlaw təm. 30 Za hin mə njə kə luw: ‹Mana mandal didiy ngiykwan mə wəzliy mokotufiy ngə Bayzlav kaɗ nhi, yikwan ɗaha wər, yikwan mə lap a taniy za kə wəzl mokotufiy səna kwən.› 31 Asəna acin, hin atalan kin, hin maa ɗeftik, hin wəriy ngə hidiy mə wəzliy mokotufiy ngə Bayzlav! 32 Mana asəna, hin maa səb avə ɗiy kəzəɗ ngə didiy kin kibik-kibik acin! 33 Hin wa wənigi! Hin wa səban ngə kursligi! Hin kwəl kə ler am takwan təm kuhu maa ligiɗ kwən!
34 ‹‹Mə zlimu acin. Kat təv zlenehin mokotufigi, hidiy njə bərngəzl ɓəw mogroy ngə jəgwan. Hin məv kə wəzl hidiy məpərmayiy kaɗ, za sənaniy təm, hin məv kə kpawta kaɗ am pay maa zləngrak. Hin məv kə zar sənaniy təm am jik jəgwan kin, za hin məv kə səbta a liɓde a liɓde kə zlənenta takwan. 35 Asəna acin, dalgway Bayzlav tu kə zlen a hidiy mə wəzliy hidiy mə zlimentəma aa Bayzlav, av kə ndəv atalan kin təm. Diw am mə wəzliy Habila, hid maa tiɗtiɗe, hos am Zakariya kər ngə Barakiya. Hin mə wəzlta am walan Jik Bayzlav avə lay hidiy ta njə kə fatenta təkəniy huvu a Bayzlav. 36 Mindiwin, kata ceɗehin, dalgway hidiy mə wəzliy hidiy səna cike av kə kawihin hin hidiy ta picah.››
Yesu a han atalan hidiy tə liɓde Ursalima
37 Yesu ɗiya luw baha ‹‹Hin hidiy tə Ursalima, hin hidiy tə Ursalima, mə wəzliy mokotufiy ngə Bayzlav. Za hidiy məpərmay, Bayzlav mə zlənahta, hin ndəta a gugwən kə wəzlta kaɗ. Kat təltəl kə ɓasehin mana mən gamndak ta njə kə ɓas wəriy tik a madaba liɓi, amma hin mə ngəm bəgwən. 38 Tanjinhi acin, Bayzlav av kə cakway liɓde kin, kə ɗew kə kifde.››› 39 Mindiwin kata luwehin, dəga tanjinhi hin mə limek ɗaba, hos am pic hin tu kə limekku, za hin kə luw: ‹‹Bayzlav mə ɗiyen ngərbay a hid mə yah am zlim ngetikª.››