Takwan maa parpar tu kə hosohoh za talan mahayək kə diw kə way
24
Yesu pətah aa mə jik Bayzlav za, mandal a vətik, wəriy gawliy ngetik viy a bər tik, luwenta: ‹‹Mordoy, a saf gəlməɗ ngə jik Bayzlav mana mə ndənta lawlaw nhi.›› 2 Za acin Yesu ɗiya luwenta: ‹‹Hin maa lim mana mə ndəniy jik lawlaw nhi kwa? Mindiwin, kata ceɗehin, a kibik nhi, ko gugwən takan a fəs atalan celen kwən, av kə gomta cike way kaɗ.3 A dəwən səna, Yesu va ɗewey tik atalan wərum Jaytun. Wəriy gawliy ngetik viy taniy a gandan angər tik. Ma hosiy za, ɗiya nehta, luwenta: ‹‹Mordoy, a ceɗeyikwan may, təkəniy hoh mə ceɗ səna av kə hosiy a pu? Ya Təkən ngemi tu kə ɗefiyikwan hoh mbeh kə jəɓaha, za talan mahayək mbeh kə way?›› 4 Yesu zlawenta, ɗiya luw: ‹‹Mə puw talan kin lawlaw, mə gər kə ngəm hidiy kə lebeɗihin kə lek kwən. 5 Kat tə luw anhi nhi, kadaban hidiy dolom av kə yiy am zlim ngaɗa, za ko hid ngayi av kə luw: ‹Kata acin Kristu.› Za taniy av kə lekiy hidiy dolom. 6 Hin məv kə zlim ləbar ngə vərum mbeh asənkwən gaf avə hayək kin. Mandal hin mə zlim za, mə gər kə hovok kwən. Say təkəniy səna kə ɗiyiy zagway. Amma talan mahayək away gesin kwən. 7 Zəgudu av kə gbezlerma a zəgudu məpərmay. Bay məpərmay av kə ɗiy vurum avə celen. Mitis av kə ɗiy dayday, za hayək av kə kəz am lay parpar. 8 Takwaniy səna cike avə ɗiy wa diw ngə ham liɓ ngə wer ta jəway kə mbuw.
9 ‹‹Zəni hidiy sənan av kə kawihin, kə vəlihin a hidiy məpərmay kə zlənehin takwan, za kə wəzlihin kaɗ. Hidiy cike maa a səniy mozlokotuf ngə Bayzlav ɗahkwən av kə zelihin makavay hin ta səb mozlokotuf ngaɗa. 10 Mandal səna, hidiy dolom av kə geɗiy səb mozlokotuf ngaɗ kaɗ. Taniy av kə vəliy kəsəm am walan tan, za av kə zeliy kəsəm am walan tan. 11 Mokotufiy dolom mə ɗiyiy polkoy av kə yigi, za av kə lebeɗiy hidiy dolom kə lekigi. 12 Mə ngavngav av kə fuful dayday, kadaban səna acin hidiy dolom a mayiy kəsəm am walan tan ɗaba. 13 Amma hid məv kə musuf am səb mozlokotuf ngaɗa hos am way tik, Bayzlav av kə mbəl tik. 14 Hidiy av kə ceɗiy Ləbar Malaw atalan bay tə dibizlav mgbaw talan mahayək, hidiy cike kə zlimta zagway, za talan mahayək kə diw kə way.››
Takwan mordoy məv kə hosoh atalan hidigi
15 Yesu ɗiya luw baha: (Ko hid ngayi mə jangi ləbar nhi, mə jar kə sən təkən səna law law) ‹‹Hin məv kə lim təkən mə ngavngav mə njə kə ɗiy ngay. Məv kə lim tik mə gara kaɗ am jik Bayzlav. Daniyel mokotuf ngə Bayzlav mə zləgam za atalan təkən səna. 16 Am pic təkən səna tu kə hosohoh, hidiy təm hayək Yahudiya mə sitan atalan wurum. 17 Hid mə ɗew ɗew təm gbugbolko, mana mə surohoh za, mə gər kə pət a jik kə gasah təkəniy tik kwən. 18 Hid təm tuz təm, mə gər kə jəɓ ade kə wəta ləkwət ngetik kwən. 19 Mandal səna, wertiy tavə liɓi ɓəw a wertiy njə wəriy tə dəwən av kə zləniy takwan day day. 20 Mə tar Bayzlav kə jan si ngəkin mə gər kə sla am tər cəcən asənkwən am pic nəp kwən. 21 Kat tu luw anhi, kadaban am mandal səna, takwan av kə ɗiy day godokwən. Takwan mana səna a ton bəgwən dəga am diw ndən ngə talan mahayək hos apica. Zəni takwan səna a ɗiy atəgo ɗaba. 22 Mana Bayzlav a gəgəc wan ngə takwan səna bəgwən wər, ko hid takan ngə mbəl ɗahkwən. A gəgəc wan səna, makavay hidiy sin mə welta.
23 ‹‹Mandal səna, mana hid tu luwehin: ‹Kristu atawan nhi! Asənkwən ‹Sin atawan tattah!› Mə gər kə yək kwən. 24 Kat tu luw anhi, kadaban mokotufiy mə ɗiyiy polkoy av kə yiy kə luwta, taniy acin Kristu asənkwən taniy acin mokotufigi ngə Bayzlav. Av kə ɗiyiy təkəniy maa tuwah ɓəw təkəniy mə kpah talan par par kə jan kə lebeɗ hidigi. Mana tu janiy mozlokotuf, ko hidiy Bayzlav mə welta av kə lebeɗta. 25 Kat tə zlərehin zlimi angaw dəga təkən səna a ton gesin bəgwən.
Kər hidmemblen av kə jəɓahah
26 Yesu ɗiya luw baha: ‹‹Mana hidiy tu luwehin: ‹Kristu awan a dab donu a wəta,› mə gər kə va abəgo kwən. Mana taniy tu luwehin: ‹Sin atawan mə ɓahɓah nhi,› mə gər kə yək mə ngatan kwən. 27 Kat tə luw anhi, kadaban Kər Hidmemblen av yah mana von mə njə kə wəciɗ, pəzləɗ, dəga aa wəzlav za kwəla a kayək. 28 Yo, hin mə sən za, am lay maa təkən mə məc məc awan abəgo, godokiy a njə kə ɓasiy abəgo təm.
29 ‹‹Njoɗ adəwən takwaniy səna, pic av kə kpizlik. Tər təm a zləzlaɗ ɗaba. Cuwzlerekiy av kə yoɓiy aa dibizlav za a kayək. Za təkəniy cike tə dibizlav məmariy gədan av kə kəzigi. 30 Za acin, hidiy av kə limiy təkən məpərmay a dibizlav, təkən səna av kə ceɗenta Kər Hidmemblen aa yah. Am pic səna, hidiy təm talan mahayək cike av kə haniy talan tan, av kə limiy Kər hidmemblen aa yah a liɓ gazlavay za avə gədan mordoy ɓəw avə zləzlaɗ ngetik maa cəcay. 31 Kər hidmemblen av kə zlən mbaslayiy tik avə falamiy mogroy, kə mbiziy falamiy səna, za kə ɓasiy hidiy sin mə welta a madabalay a madabalay foɗ tik.
Ma mə ngaɓngaɓ atalan sikwiɗ
32 Yesu ɗiya luw baha: ‹‹Mə zlimu, təv kə ceɗehin ma mə ngaɓngaɓ məpərmay atalan sikwiɗ, kə jan hin kə jəgwan təkən a kimin. Mandal hin tu lim sikwiɗ a ɗiy jəngər, zəni aa diw kə ca vidiɗ ndawyan, kuɗuf kuɗuf wər, van matakan mbeh. 33 Asəna acin, mandal hin tu lim təkəniy səna cike aa tonigi, mə sənu, Kər hidmemblen mbeh kə jəɓaha. Sin awan a mijijik. 34 Mindiwin kata ceɗehin, hidiy tapica av kə limiy təkəniy nhi cike wayza am həriy ngatan zagway, za kə diw taniy kə məcigi. 35 Dibizlav avə talan mahayək av kə wayigi, amma zləgam ngaɗ wər, a way kwən ko apu››.
Hid mə sən Məmar hidi av kə jəɓah apu ɗahkwən
36 Yesu ɗiya luw baha: ‹‹Ko hid takan mə sən pic ɓəw masa ngə təkəniy səna tu kə ton ɗahkwən. Ko mbaslayiy ngə Bayzlav tə dibizlav, ko Kər ngə Bayzlav, səna Vay Bayzlav a gendik acin mə səntik. 37 Am pic Kər hidmemblen tu kə jəɓahah, təkəniy av kə ɗiyiy mana mandal mə ɗiy am ɗew ngə Nuhu am talan mahayək. 38 Am mandal Bayzlav a za van mordoy gesin bəgwən, hidiy aa zəmigi, za aa siy təkən ngə sa. Taniy aa dəmiy wertigi, za aa vəliy wərziy tan a madaba mawəl. Tu ɗiyta atəgo , hos am pic Nuhu mə pət am pay mordoy ngə zlan maza. 39 Hidiy səna zlayiy talan tan atəgo , nha Bayzlav za van mordoy, za yəm yah lekta cike way kaɗ. Mandal Kər hidmemblen tu kə jəɓaha, av kə ɗiy atəgo təm. 40 Am mandal səna, hidiy saray av kə biziy am tuz. Av kə wətiy takan za kə geɗiy takan. 41 Wertiy saray av kə həziy am gunuhəz takan. Av kə wətiy takan za kə geɗ takan.
42 ‹‹A səna acin, mə ɗew avə variya, kadaban maa sən pic ngə Məmarehin tu kə jəɓah ɗahkwən. 43 Hin mə sən za lawlaw, mana hid məmar de tu səntik, məhəl av kə yah avə masa wanhi ngə vuɗu, sin av kə ɗew a variya, za a geɗ məhəl kə pəten ade kwən. 44 Kadaban səna acin, hin təm mə puwu, kadaban Kər hidmemblen av kə jəɓaha, hin mə sən mandal sin tu kə jəɓah kwən.››
Hid mə ɗiy kəzəɗ njə bərngəzl avə mətak bərngəzl
45 Yesu ɗiya luw baha: ‹‹Hid maa tiɗtiɗe njə bərngəzl mə ɗiy kəzəɗ ade hidi acin yi? Sin acin hid maa məmar tik mə vəlen kəzəɗ. Sin kə vəlen zəm a hidiy məpərmay mə ɗiyiy kəzəɗ am mandal taniy mə mayta. 46 Mana hid məmar de tu buwaha, za tu jan hid səna a ɗiy kəzəɗ ngetik lawlaw wər, nəv ngə hid mə ɗiy kəzəɗ səna av kə zəzay. 47 Mindiwin, kata ceɗehin, hid məmar de səna av kə vəlen de ngetik avə təkəniy tik cike sin kə kaw tik. 48 Amma mana hid mə ɗiy kəzəɗ səna lem wər, av kə ɓən kə luw: ‹Wanna, məmar kata a yah ade njoɗ kwən,› 49 za av kə diw kə wəzl celeniy mə ɗiyiy kəzəɗ, kə zəmay gədtik, za kə say movu tik avə hidiy mə njə kə hayigi. 50 Za acin, mordoy ngetik av kə jəɓah kə jan tik girjik mandal sin aa puw tik ɗahkwən ɓəw am masa maa sin a sən bəgwən. 51 Mordoy səna av kə zlənen takwan day godokwən pərak pərak a məplafasigi. Za acin hid mə ɗiy kəzəɗ səna av kə han, za av kə kəkraw ndin.››