Ma mə ngaɓngaɓ atalan midimiy gəɓ
25
Yesu ɗiya luwen a wəriy gawliy ngetik baha: ‹‹Bay tə dibizlav wa ləbar ngə midimiy gəɓ mə wətiy cəbelbel ngatan, kəv kə gbamiy avə hid mə dəm werti. 2 Adab midimiy səna, joɓən mətak bərngəzl, za joɓən mariy bərngəzl. 3 Midimiy mətak bərngəzl səna, wətiy cəbelbel amma taniy a wətiy ɗawa məpərmay gəzza bəgwən. 4 Amma məmariy bərngəzl wər, ko hid ngayi wət cəbelbel ngetik, za wət ɗawa məpərmay am vəram gəzza təm. 5 Taniy puw puwiy hid mə dəm werti, a hosoh njoɗ bəgwən. Za wan wəzlenta, taniy cike waniy tan. 6 Ngə dabdab vuɗu, taniy zlimiy hid məpərmay aa ca wəla, aa luwenta: ‹Mə sliɗ za, anhi hid mə dəm werti aa yah. Mə va gbamenni.› 7 Midimiy səna cike wayza fəɗahigi, sləsləɓiy cəbelbeliy tan. 8 Midimiy mətak bərngəzl luwenta a məmariy bərngəzl: ‹Cəbelbeliy ngiykwan aa miciy tan! Ambu, mə vəliyikwan ɗawa ngəkin gwedek səka may!› 9 Amma məmariy bərngəzl zlawenta, ɗiya luwta: ‹Awa, a ɗiy kwən! Mana yikwan tu wəzak tik avə hin wər, av kə gəɗakiyikwan. Geleɓ məv angər hid taa bertik ɗər, hin kə səkəmah ngəkin.› 10 Midimiy mətak bərngəzl viy kə səkəmiy ɗawa acin, amma taniy maa viy za, hid mə dəm werti hosohoh. Midimiy mə sləsləɓ sləsləɓiy maa joɓən pətiy a jik məmbəlwa avə hid mə dəm werti, za pekiy mijijik kaɗ. 11 ‹‹Za gwedek, midimiy maa joɓən mətak bərngəzl tafnan təm hosigi. Ɗiya ɗefentəma a gədan a hid mə dəm wer səna, luwenta: ‹Mordoy, Mordoy, a zləriyikwan mijijik may!› 12 Amma hid mə dəm wer səna zlawenta, ɗiya luw: ‹Mindiwin, kata luwehin, kata sənehin ɗahkwən.›››13 Yesu maa way kə ceɗ ma mə ngaɓngaɓ atalan midimiy maa gəɓ səna za, ɗiya luwen a hidiy mə zlimiy zləgam ngetik: ‹‹Mə ɗew a variya, kadaban maa sən pic asənkwən masa, ngə Kər hidmemblen tu kə jəɓah ɗahkwən.››
Ma mə ngaɓngaɓ atalan hidiy makaɗ mə ɗiyiy kəzəɗ
14 Yesu ɗiya luw baha: ‹‹Bay tə dibizlav wa ləbar ngə hid məpərmay mə gər kə ɗəmbuluk. Mandal sin taa gar kəv tik, sin ɗefenma a hidiy mə ɗiyiy kəzəɗ ngetik, za vəlenta aray ngətik. 15 Sin a suloy melenge blək joɓən, vəlen a hid takan. A suloy melenge blək saray vəlen a hid sənan. Za acin, sin a suloy melenge blək takan vəlen a hid mə makaɗ tik. Sin a vəlenta suloy səna ko hid ngayi gəga a gədan ngetik. Za acin, sin sliɗ vətik a mbuluk.
16 ‹‹Hid mə vəlenta suloy melenge blək joɓən sliɗ, njoɗ va kə ɗiy terere avə suloy səna. Za suloy səna fuful, sin jan blək joɓən məpərmay baha. 17 Za hid mə vəlenta suloy melenge blək saray, ɗiy atəgo təm, suloy fuful sin jan blək saray məpərmay baha. 18 Amma hid mə vəlenta suloy melenge blək takan wər, va lala wili, za pəs pəs suloy ngə mordoy ngetik səna a kimin.
19 ‹‹Adəwən wan ndas, mordoy ngatan jəɓah tik ade. Za sin ɗiya neh təkən hidiy mə ɗiyiy kəzəɗ ngetik, mə ɗiyta avə suloy ngetik. 20 Hid mə ɗiy kəzəɗ sin mə vəlen suloy melenge blək joɓən, yah avə suloy blək joɓən məpərmay am ngəra. Ɗiya luwenni: ‹Mordoy, hoh vəlak suloy blək joɓən. Anhi blək joɓən məpərmay, kat mə jan kə fuful tik.› 21 Mordoy ngetik luwenni: ‹Kay law godokwən, hoh hid malaw mə kaw kəzəɗ, za hoh hid maa tiɗtiɗe. Təkən mendez, kat mə vəloh, hoh tu ɗiy kəzəɗ avə sin lawlaw. Tanjinhi təv kə vəloh təkəniy dolom godokwən hoh kə kaw tik. A yah, yikwan kə zəzay avə hoh witik- witik.› 22 ‹‹Hid mə ɗiy kəzəɗ ngetik məpərmay sin mə vəlen suloy melenge blək saray, yah avə suloy blək saray məpərmay am ngəra, ɗiya luwenni: ‹Mordoy, hoh vəlak suloy blək saray. Anhi suloy blək saray bah kat mə jan kə fuful tik.› 23 Mordoy ngetik luwenni acin: ‹Kay law godokwən, hoh hid malaw mə kaw kəzəɗ, za hoh hid maa tiɗtiɗe. Təkən mendez kat mə vəloh, hoh tu ɗiy kəzəɗ avə sin lawlaw. Tanjinhi təv kə vəloh təkəniy dolom. A yah, yikwan kə zəzay avə hoh witik -witik.› 24 ‹‹Am waytik, hid mə ɗiy kəzəɗ ngetik sin mə vəlen suloy melenge blək takan yah, za ɗiya luwenni: ‹Mordoy, kat mə sən za, hoh hid maa lem. Hoh njə kə bəl ngirmi am tuz maa hoh zləg a kimin bəgwən. za hoh njə kə ɓas təkən am lay maa hoh gəgar abəgo bəgwən 25 Asəna acin, kat hovok, za kat lala wili, kat pəs suloy koh a kimin. Suloy səna anhi, a yək gungoh.› 26 Mordoy ngetik zlawenni, ɗiya luw: ‹Hoh hid mə ɗiy kəzəɗ mə ngavngav, hoh məsəfay hidi. Hoh mə sən za, am lay maa kat tə zləg təkən a kimin bəgwən, tə njə kə bəl ngirmi. Za tə gəgar təkən abəgo bəgwən, tə njə kə ɓas təkən a kimin. 27 Ya lawlaw wər, hov kə tep suloy ɗa am jik ngə ɓah suloy. Mbək kat mə buwah nhi, təv kə jan suloy ɗa avə yəm.› 28 Mordoy səna ɗiya luwen a hidiy məpərmay mə ɗiyiy kəzəɗ ngetik: ‹Mə yək suloy melenge blək tə ngər tik nhi kaɗ, za mə capen a hid mə jan suloy melenge ngərbək takan. 29 Kat tu luw anhi, kadaban hid məmar təkən, av kə capenta bah kə jan sin kə mar təkəniy day godokwən. Hid maa təkən ɗahkwən, ko mendez sin məmaru, av kə wətta kaɗ. 30 Amma məsəfay hid nhi, mə fək a caɗak am lay maa zigwit. Am lay hidiy taa hanigi, za taa kəkrawiy ndin.›››
Kər hidmemblen av kə yah kə zla dalgway
31 Yesu ɗiya luw baha: ‹‹Mandal Kər hidmemblen tu kə yah avə gədan mordoy ngetik ɓəw avə mbaslayiy tik, sin av kə ɗew am karawal ngetik malaw ngə bay. 32 Am pic səna, zəgudiy tə talan mahayək cike av kə ɓasiy a kibik tik. Za sin av kə pətar hidiy kaɗ madabah saray, wa kər məgəlgəla ta njə kə kpay təmakiy aa dab gənawiy za. 33 Sin av kə geɗ təmakiy aa mə ngərzəm ngetik, za gənawiy təm aa mə zlaɓay ngetik. 34 Za acin, bay av kə luwen aa hidiy taa mə ngərzəm tik: ‹Hin hidiy vay mə ɗiyenta ngərbay, mə yah. Mə zəm bay, Bayzlav mə sləsləɓehin dəga mandal sin a ndən talan mahayək gesin bəgwən. 35 Mə zəm bay kin, kadaban mitis mə ɗiyak za, za hin tu vəlak təkən ngə zəm. Yəm tu wəzlakku, za hin tu vəlak yəm ngə sa. Kat tu ɗew mbuluk a dab kin, za hin tu yəkak ngər səsaray. 36 Kat tu ɗew kəsəm aa səna, za hin tu kwəlak ləkwət. Kat tu dal, za hin tu yah kə safakku. Fəkakta am jik jaw, za hin mə yah za kə safakku abəgo.› 37 Za acin, hidiy mə ɗiyiy may ngə Bayzlav av kə luwenta aa bay acin: ‹Məmar yikwan, hoh luw, mitis tu wəzloh, za yikwan mə vəloh təkən ngə zəm za. Yikwan mə vəloh apu? Hoh luw yəm tu wəzloh, za yikwan mə vəloh yəm ngə sa za. Yikwan mə vəloh apu? 38 Hoh luw, hoh tu ɗew mbuluk a dab yikwan, za yikwan mə yəkoh za ngər səsaray. Yikwan mə yəkoh apu? Hoh luw hoh tu ɗew kəsəm aa səna, za yikwan mə kwəloh ləkwət za. Yikwan mə kwəloh apu? 39 Hoh luw hoh tu dal, tu fəkiy am jik jaw, za yikwan tu vay kə safoh. Yikwan mə vay apu?› 40 Za Bay av kə zlawenta, kə luwenta: ‹Mindiwin, kata ceɗehin, təkəniy cike hin mə ɗiyen a hidiy mə gəcgəc mə səbiy mozlokotuf ngaɗa, hin mə ɗiyen a kat talan ɗa.›
41 ‹‹A dəwən səna, bay av kə luwen a hidiy taa mə ngərzlaɓay tik: ‹Mə jel kin gaf a bər ɗa za. Bayzlav mə ngavehin wayza. Mə pət a liɓ kuhu maa a məc ɗahkwən, mə sləsləɓenta a bay Musuruf ɓəw mbaslayiy tik! 42 Kat tə ɗiyehin anhi, kadaban mitis tu wəzlakku, za hin mə vəlak təkən ngə zəm bəgwən. Yəm tu wəzlakku, za mə vəlak yəm ngə sa bəgwən. 43 Kat tu ɗew mbuluk a dab kin, za mə yəkak ngər səsaray bəgwən. Kat tu ɗew kəsəm aa səna, za mə kwəlak ləkwət bəgwən. Kat tu dal, za tu fəkakta am jik jaw, za mə yah kə safak bəgwən.› 44 Hidiy taa mə ngər zlaɓay ngetik səna av kə luwenta təm: ‹Məmar yikwan, hoh luw mitis tu wəzloh za yikwan mə vəloh təkən ngə zəm bəgwən, yəm tu wəzloh za yikwan mə vəloh yəm ngə sa bəgwən, hoh tu ɗew mbuluk a dab yikwan, za yikwan mə yəkoh bəgwən, hoh tu ɗew kəsəm aa səna a dab yikwan, za yikwan mə kwəloh ləkwət bəgwən. Hoh tu dal, za tu fəkiy am jik jaw za yikwan mə vay kə safoh bəgwən. Ya təkəniy nhi a toniy acin apu?› 45 Bay av kə zlawenta, kə luwenta: ‹Mindiwin, kata ceɗehin, təkəniy cike hin mə ɓon kə ɗiyen aa hidiy mə gəcgəc mə səbiy mozlokotuf ngaɗa, hin mə ɓon kə ɗiyen a kat talan ɗa təm.› 46 Za taniy av kə viy am lay ngə sa takwan maa a way ɗahkwən. Amma hidiy mə ɗiyiy may ngə Bayzlav, taniy av kə janiy micin mətak way.››