Hidiy mogroy a ɗəwaliy ma kə wəzliy Yesu kaɗ
26
Yesu maa way zləgamiy səna aa hidiy za, ɗiya luwen a wəriy gawliy ngetik: 2 ‹‹Hin mə sən za, wan saray awənhi, məmbəlwa ta njə luwta Paska av kə ɗiy. Am məmbəlwa səna, hidiy av kə kawiy Kər hidmemblen kə vəlta a hidiy məpərmay kə kpawta am pay mazləngrak.››3 Gwedek mogroy ngə masayiy təm jik Bayzlav ɓəw talan mbalgamiy ngə Yahudigi ɓasiy a terde hid məpərmay zlim tik Kayafas, sin bay ngə masayiy təm jik Bayzlav. 4 Taniy zleriy ma ngatan takan kə kawiy Yesu avə ɓah za kə wəzlta kaɗ. 5 Taniy luwta: ‹‹Kay geleɓ yikwan kə kawtik am pic məmbəlwa kwən, av kə dah gbezlerma.››
Wer məpərmay a zeken dorson a Yesu am talan
6 Pic məpərmay, Yesu awan a liɓde Baytaniya ade hid məpərmay, zlim tik Simon. Amicek gawəl səna kwalkwala. 7 Mandal Yesu aa zəm gəda, wer məpərmay yah avə dorson wek am vəram. Dorson səna səkəm tik tuwah. Va zeken dorson səna a Yesu am talan. 8 Wəriy gawliy ngetik maa limta za, basiy nəv za ɗiya luwta: ‹‹Kay, a ngav dorson səna kaɗ kemi? 9 Mana a zek bəgwən, yikwan kwəl kə ber kaɗ suloy ndas, za yikwan kə mən hidiy təm sanha avə sin kwən vu?›› 10 Njoɗ Yesu sən zləgam ngatan, za ɗiya luwenta: ‹‹Mə tes wer nhi kwən. Sin a ɗiyak təkən malaw. 11 Hin mawana hidiy təm sanha hoyhoy, amma kata, tə ɗew hoyhoy avə hin kwən. 12 Sin a zekek dorson nhi, kə jan kə sləsləɓ kəsəm ngaɗa kə pət a wili. 13 Mindiwin, kata luwehin, kə lay, kə lay am talan mahayək cike, hidiy tu kə ceɗiy Ləbar Malaw, av kə nəfiy kəzəɗ wer nhi mə ɗiyakku, za hidiy av kə slekiy talan am zlim ngetik.››
Yahuda vəl Yesu a mosumiy tik
14 Za acin, hid takan a dab wəriy gawliy ngə Yesu maa gəɓ atalan saray, zlim tik Yahuda Iskariyot, va angər mogroy ngə masayiy təm jik Bayzlav. 15 Sin maa hos za, sin ɗiya luwenta: ‹‹Mana kat tu vəlehin Yesu wər, hin məv kə vəlak mi?›› Mogroy ngə masayiy vəlenta suloy ngər makaɗ. 16 Dəga am pic səna, Yahuda diw kə jar mozlokotuf ngə vəl Yesu a mosumiy ngetik taniy kə kawta.
Yesu avə wəriy gawliy ngetik a zəmiy gəd məmbəlwa ngə Paska
17 Am becwan ngə məmbəlwa ngə bret mətak njem, wəriy gawliy ngə Yesu viy angər tik, ɗiya nehta, luwenta: ‹‹Mordoy, hoh may yikwan kəv kə sləsləɓoh gəd məmbəlwa ngə Paska aki?›› 18 Sin zlawenta, ɗiya luw: ‹‹Mə va a liɓde angər mana, mandal hin mə hosoh za, hin kə luwenni: ‹Mordoy ngiykwan a luw seh: Pic ngaɗa mə hosoh za. Kat təv kə zəm gəd məmbəlwa ngə Paska avə wəriy gawliy ngaɗa ade koh.››› 19 Wəriy gawliy ngə Yesu vigi, ɗiyta mana sin mə luwenta. Taniy sləsləɓiy gəd məmbəlwa ngə Paska səna.
20 Pic maa ndəv za, Yesu avə wəriy gawliy ngetik ma gəɓ atalan saray ɗewiy kaɗ kə zəmiy gəda. 21 Mandal taniy aa zəmiy gəd səna, Yesu luwenta: ‹‹Mindiwin, kata ceɗehin, hid takan a dab kin av kə vəlak a mosumiyɗa kə kawakta.›› 22 Wəriy gawliy ngetik maa zlimta atəgo za, taniy cike ɗiya denigi. Za ɗiya nehiy Yesu, ko hid ngayi luwenni: ‹‹Kata acin vu, Məmar yikwan?›› ‹‹Kata acin vu, Məmar yikwan?›› 23 Yesu zlawenta, ɗiya luw: ‹‹Hid taa təm ngəra am kaslak lap avə kata kə zəm gəd nhi, sin acin məv kə vəlak a mosumiyɗa kə kawakta. 24 Mindiwin, Kər hidmemblen av kə məc mana mə ɗəɗefta am deftere ngə Bayzlav. Amma hid məv kə vəl Kər hidmemblen səna, av kə sə takwan day godokwən! Geleɓ a mbuwiy gawal səna bəgwən!›› 25 Yahuda məv kə vəltik maa zlim atəgo za, ɗiya neh Yesu, luwenni: ‹‹Kata acin vu Məmar yikwan?›› Yesu zlawenni, ɗiya luw: ‹‹Yaw, mana hoh mə luwu.››
Gəd ngə Məmar hidi
(Markus 14.22-26; Luka 22.15-20; 1 Korintu 11.23-25)
26 Mandal Yesu avə wəriy gawliy tik aa zəmiy gəda, sin wət bret, tar Bayzlav kə ɗiy ngərbay atalan bret səna, za wəɗak wəɗak kaɗ. Sin wət, vəlen a wəriy gawliy ngetik. Ɗiya luwenta: ‹‹Nhi acin kəsəm ngaɗa. Mə wətu, mə hamu.›› 27 Adəwən səna, sin wət təkən ngə sa am kendek, luwen soko a Bayzlav, za vəlenta. Ɗiya luwenta: ‹‹Mə su hin cike wayza. 28 Nhi acin ɓiɓiz ngaɗa, Bayzlav av kə jaw bərngəzl ndawyan avə hidigi. Ɓiɓiz səna av kə zek kə jan Bayzlav kə geɗ mə ngavngav ngə hidiy dolom. 29 Ta ceɗehin, dəga tanjinhi kat tə sa movu ɗaba, hos am pic kat tu kə sətik ndawyan am bay ngə Vay Bayzlav avə hin.››
30 Adəwən səna, taniy nap jəkiy drif kə səban Bayzlav. Za sliɗiy viytan atalan wurum jaytun.
Yesu luw, Piyer av kə luw aa sənak ɗahkwən.
31 Za acin Yesu luwen a wəriy gawliy ngetik: ‹‹A vuɗ nhi, hin cike məv kə geɗekku makavay təkən tu kə janakku. Av kə ton atəgo , makavay Bayzlav a luw am deftere ngetik: ‹Təv kə wəzl kər məgəlgəl kaɗ, za təmakiy av kə cakwayiytan.› 32 Amma mandal kat tu mbəlah ɗa aa mə məc za, kat təv kə hos məpəlpəla a Galili kə hin.››
33 Piyer ɗiya luwenni: ‹‹Ko hidiy sənan cike tu geɗigi, kat wər tə geɗeh ɓahkwən.›› 34 Yesu zlawenni, ɗiya luw: ‹‹Mindiwin, kata luwoh, a vuɗ nhi, dəga gomzok a cə wəla gesin bəgwən, hov kə luw atalan ɗa a kibik hidigi, jəɓ makaɗ, hoh sənak ɗahkwən.›› 35 Piyer luwenni: ‹‹Ko a sla ngə məc avə hoh, kat tə luw a kibik hidigi, kata sənoh ɗahkwən kwən.›› Za wəriy gawliy ngə Yesu mə fəs tik cike wayza luwta atəgo təm.
Yesu a tar Bayzlav a Gecemane
36 Yesu avə wəriy gawliy ngetik hosiy am lay zlim tik Gecemane. Maa hosiy za, Yesu luwenta: ‹‹Mə ɗew awənhi. Kat təv kə tara Bayzlav a wəta.›› 37 Za acin sin ngazl Piyer ɓəw wəriy Zebede saray tik, viy avə tanigi. Mandal səna Yesu diw kə hovok, nəv tik tu mbir. 38 Sin ɗiya luwenta: ‹‹Takwan təm nəv ngaɗa a gər kə wəzlak kaɗ. Mə ɗew awənhi, hin kə ɗew a variya mana kata. 39 Sin sliɗ va baɗ gaf, dos məzəroh a kayək. Ɗiya tar Bayzlav, luwen anhi: ‹‹Aw Vay ɗa, mana a jan za wər, takwan nhi, a tak kaɗ! Amma Vay ɗa, hoh gər kə ɗiy mana nəv ngaɗ kwən, a ɗiy mana nəv koh mə mayu.››
40 Sin maa tar Bayzlav za, jəɓ angər wəriy gawliy ngetik ma makaɗ tafnan, janta taniy mə waniy wayza. Sin fəɗah Piyer kaɗ, za luwenni: ‹‹Mə jan kə musuf kə ɗew a variya mana kata ko ngə masa takan bəgwən vu? 41 Mə ɗew avə variya, za mə tar Bayzlav, kə jan mandal Musuruf tu kə lebeɗehin, hin kə ndəv kwən. Yo ɓən ngə hid membəlen wər, a may kə ɗiy təkən malaw, amma sin aa ɓəs ɗahkwən, kadaban kəsəm tik kukwəɗ-kukwəɗ.›› 42 A dəwən səna, Yesu jəɓ va baɗ gaf mə saray tik kə tara Bayzlav. Ɗiya luw: ‹‹Aw Vay ɗa, mana hoh tak takwan nhi kaɗ, kat kə ɗew mətak sətik kwən wər, a ɗiy mana nəv koh mə mayu.›› 43 Maa tar Bayzlav za, jəɓ bah angər wəriy gawliy ngetik tafənan səna, janta taniy mə waniy wayza. Həriy ngatan ɓilik ɓilik avə wan. 44 Yesu geɗta kaɗ, jəɓ baɗ gaf kə tar Bayzlav mə makaɗ tik, sin jəɓ zləgam mana tafnan baha aa Bayzlav. 45 Za jəɓah angər wəriy gawliy ngetik, ɗiya luwenta acin: ‹‹Nha tanjinhi hin maa wan vu? Hin maa nəp acin vu? Tanjinhi masa tik mə hosoh za. Hidiy av kə kawiy Kər hidmemblen, za kə vəlenta aa hidiy mə ɗiyiy mə ngavngav. 46 Mə sliɗ, nəmkwan! Mə saf hid ngə vəlakku a hidiy kə kawakta mə yah za.››
A kawiy Yesu
47 Mandal Yesu a wəlen, a zləgamen a wəriy gawliy ngetik, njoɗ Yahuda hid takan tə dab wəriy gawliy ngetik ma gəɓ atalan saray hosohoh. Zəgudiy dolom lapiy avə sin. Taniy awaniy avə maslalamiy am ngəra ɓəw zlamblayigi. Mogroy ngə masayiy təm jik Bayzlav ɓəw talan mbalgamiy tə dab Yahudigi acin mə zlənahta kə kawiy Yesu. 48 Yahuda məv kə vəl Yesu, mə ceɗenta təkən sin tu kə ɗiy tik ngə ɗefenta wayza. Sin a luwenta: ‹‹Hid kat tu kə tərlak tik kə ɗen mbeli, sin acin hid səna. Hin kə kaw tik.›› 49 Yahuda maa hos za, sin kərəɓ njoɗ a bər Yesu, za luwenni: ‹‹Mbeli Mordoy!›› Za sin tərlak Yesu. 50 Yesu zlawenni, ɗiya luw: ‹‹Ngwalay ɗa, təkən hoh mə yah kə ɗiy tik səna, a ɗiy angaw.›› Za hidiy tafnan maa limta atəgo za, kərəɓiy a bər Yesu, təvəl, kawta. 51 Hid takan a dab wəriy gawliy ngə Yesu pəɗ maslalam tik, ɗiya bəl hid mə ɗiy kəzəɗ ngə mordoy ngə masay təm jik Bayzlav, celen zlim kaɗ, kac. 52 Yesu maa lim atəgo za, ɗiya luwenni: ‹‹A təm masalam koh kaɗ am jik tik, kadaban mana hid mə jəgəm avə masalam, av kə wəzlta kaɗ avə masalam. 53 A sən kaɗ lawlaw, kat kwəl kə luwen a vay kə mənakku, za njoɗ av kə zlənah mbaslayiy tik mgbəw par par gəɓ atalan saray kə mənakta. 54 Asəna wər, təkəniy cike deftere ngə Bayzlav mə luwu atalan ɗa, av kə ɗiy acin a pu? Tu ɗəɗefta am deftere, təkəniy səna av kə ɗiyiy anhi.››
55 A dəwən səna, Yesu luwen a hidiy mə yiy kə kaw tik səna : ‹‹Hin mə yah avə masalamiy ɓəw zlamblayiy kə kawakku, kat məhəl mə wəzl dəwa vu? Hoy hoy tə njə kə va am jik Bayzlav, tə njə kə jəgwanen təkən a hidiy abəgo, za mə kawak kway? 56 Amma təkəniy nhi cike a ɗiy atəgo kə jan kə ɗiy tiɗtiɗe mana mokotufiy ngə Bayzlav mə ɗədefta am deftere ngə Bayzlav.›› Za acin, wəriy gawliy ngetik cike geɗta kaɗ, siytan.
Yesu a wan a kibik mgbəw ngə hidiy mə zliy dalgway
57 Hidiy mə kawiy Yesu səna tepta ade hid məpərmay zlim tik Kayafas, mordoy ngə masayiy təm jik Bayzlav. Mogroy ngə jəgwan ngə mə jawjaw ɓəw talan mbalgamiy mə ɓasiy kaɗ abəgo təm. 58 Piyer aa səb Yesu aa gaftik, nha hos a de ngə mordoy ngə masayiy səna. Sin pət a terde, za sin ɗew kaɗ avə hidiy mə puwiy de. Sin a may kə saf mana ma səna tu kə way.
59 Mogroy ngə masayigi ɓəw mə fəs ngə mgbəw ngə hidiy mə zliy dalgway a jariy hidiy kə ngawenta ma a Yesu, za kə jan taniy kə janiy mozlokotuf kə zlenta dalgway ngə wəzlta kaɗ. 60 Amma taniy a janta ɓahbəgwən. Zəɗər hidiy dolom yiy ngawenta ma aa Yesu. Am waytik, hidiy saray yigi, 61 taniy luwta: ‹‹Gawal nhi a luw zaba: ‹Kat kwəl kə nder jik Bayzlav kaɗ, za kat kə ndənª kaɗ bah am wan makaɗ ta.››› 62 Mordoy ngə masay maa zlim atəgo za, sliɗ za ɗiya luwen a Yesu: ‹‹Təkən hidiy taa zləgamta atalan koh nhi, hoh zlawenta kwən vu?›› 63 Amma Yesu njay tik tehte. Za mordoy ngə masay səna luwen baha: ‹‹Kata nehoh am zlim ngə Bayzlav taa micin, hoh kə zlawak avə luw mbeɗi, hoh acin Kristu, Kər ngə Bayzlav vu?›› 64 Yesu zlawenni, ɗiya luw: ‹‹Yaw, hoh acin mə luwtik. Asəna acin, kata ceɗehin: Dəga apica hin məv kə lim, Kər hidmemblen mə ɗeweh kaɗ aa mə ngərzəm ngə Bayzlav məmar gədan. Hin məv kə limtik baha, sin av kə surohoh aa dibizlav aa liɓ gazlavay za.›› 65 Mordoy ngə Masay maa zlim atəgo za, aa ləkwət tə kəsəm tik, kwah kaɗ, za ɗiya luw: ‹‹Gawəl nhi, mə ra Bayzlav za. Yikwan maa may hidiy kə zləgamiy atalan tik bah vu? Hin talan kin hin mə zlim mana sin mə ra Bayzlav za. 66 Hin mə ɓən atalan ma nhi aceki ?›› Hidiy zlawenta, luwta: ‹‹Dalgway mə kaw za, say kə wəzl kaɗ dap.››
67 Za acin, hidiy səna diw kə tifenta giden am həriya. Gbif gbifta aa ngəra, za hidiy sənan ndenta ngərgəda, 68 za ɗiya luwenta: ‹‹Hoh luw hoh acin Kristu, a sən hid ngay mə wəzloh yi? A ceɗiyikwan may!››
Piyer luw aa sən Yesu ɗahkwən
69 Mandal səna, Piyer mə ɗewe kaɗ a terde ngə mordoy ngə masayiy təm jik Bayzlav. Gwedek wer mə njə kə ɗiy kəzəɗ ngə mordoy ngə masayiy yah angər tik, za luwenni: ‹‹Hoh təm hoh awana Yesu njə Galili.›› 70 Amma Piyer ɓon ma ngə wer səna a kibik hidiy cike wayza. Ɗiya luw: ‹‹Kata sən hoh gər kə luw aceki ɗahkwən.›› 71 Sin sliɗ, vətik a bər mədigiɗ. Abəgo, wer məpərmay mə ɗiy kəzəɗ ngə mordoy ngə masayiy səna lim Piyer. Ɗiya luwen a hidiy tə bəgo: ‹‹Gawəl nhi awaniy avə Yesu njə Nasaratu.›› 72 Piyer ɓon ma ngatan baha, za ɗiya luw: ‹‹Taa luw mbeɗi, taa sən gawəl nhi ɗahkwən.›› 73 Gwedek a dəwən səna, hidiy təbəgo kərəɓiy a bər Piyer, za luwenta: ‹‹Mindiwin, hoh təm hoh hid takan tə dab tan. Yikwan mə sən aa mə madaba gana koh hoh taa zləgam.›› 74 Piyer ɗiya luw baha: ‹‹Taa luw mbeɗi, taa sən gawəl nhi ɗahkwən! Mana kat tə ngaw ma, Bayzlav mə zlak dalgway!›› Mandal Piyer aa luw atəgo , njoɗ gomzok ɗiya cəwəla. 75 Zəni Piyer ɓən zləgam Yesu mə luwenni, sin a luwenni: ‹‹Dəga gomzok a cəwəla gesin bəgwən, hov kə luw atalan ɗa jəɓ makaɗ, hoh sənak ɗahkwən.›› Sin maa ɓən atəgo za, sin pətahtik a caɗak, za ɗiya han dayday.