Tepiy Yesu a kibik bay Pilatu
27
Zlalay vət, mogroy ngə masayiy təm jik Bayzlav ɓəw talan mbalgamiy ngə Yahudigi cike wayza, jawiy ma ngatan takan kə wəzl Yesu kaɗ. 2 Zəni taniy jawta kaɗ, tepta, vəlenta aa Pilatu bay məmar hayək Roma cike wayza.Məc ngə Yahuda
3 Yahuda mə vəl Yesu zlim mə zlenta dalgway za aa Yesu ngə wəzl kaɗ. Maa zlim atəgo za, ɗiya luw am nəv tik mana kat tə sən zaba, za wət suloy ngərmakaɗ səna, tepen a mogroy ngə masayiy təm jik Bayzlav ɓəw talan mbalgamigi. 4 Ɗiya luwenta: ‹‹Kat tu ɗiy mə ngavngav. Kat vəl hid mətak ɗiy mə ngavngav kə wəzlta kaɗ.›› Amma hidiy səna zlawenta, luwenta: ‹‹Ya ma ngiykwan a kimin ɗahkwən. Ma ngəkoh.›› 5 Yahuda maa zlim atəgo za, a suloy səna cik kaɗ a jik Bayzlav. Sin pət tik, va zen wəltik kaɗ.
6 Mogroy ngə masayiy aa suloy səna wətta. Zəni luwta: ‹‹Suloy nhi, lay yikwan mə wərəken a hid kə wəzl dəwa, mə jawjaw Musa mə vəliy yikwan a geɗiyikwan mozlokotuf yikwan kə lap tik am aray ngə jik Bayzlav bəgwən.›› 7 Zəni taniy zleriy ma ngatan takan, a suloy səna, taniy səkəmiy tuz am lay taa liy ɓuzu ngə ndən siwli, kə kah mbulukiy abəgo. 8 Kadaban səna acin, kula apica a njə kə ɗefiy zlim ngə tuz səna ‹‹Tuz mə səkəmta avə suloy ngə ɓiɓiz.›› 9 Təkən nhi a ɗiy tiɗtiɗe mana mokotuf ngə Bayzlav, zlim tik Yeremiya mə luwu. Sin a luw: ‹‹Hidiy a wətiy suloy ngər makaɗ. Suloy səna acin suloy hidiy Israyila mə zleriy ma kə bertik. 10 Za taniy səkəmiy tuz am lay taa liy ɓuzu ngə ndən siwli avə sin. Nhi acin təkən Bayzlav mə luwak kat kə ceɗentaª.››
Yesu awan a kibik Pilatu
11 Adəwən səna tepiy Yesu a kibik Pilatu, bay mordoy. Maa hosiy za, Bay səna neh Yesu, ɗiya luwenni: ‹‹Hoh acin bay ngə Yahudiy vu?›› Yesu zlawenni, ɗiya luw: ‹‹Yaw, mana hoh mə luwu.›› 12 A dəwən səna, mogroy ngə masayigi ɓəw talan mbalgamiy zləgamiy ma par par atalan Yesu am dalgway. Amma sin a zlawma ɓahbəgwən. 13 Za acin, Pilatu ɗiya luwenni : ‹‹Hoh zlim təkəniy cike hidiy taa luwta atalan koh am dalgway nhi ɗahkwən vu?›› 14 Amma Yesu wər, a zlawen ma ko gwedek bəgwən. Təkən səna tu ngen talan a bay dayday.
A zlenta dalgway aa Yesu ngə wəzl kaɗ
15 Am məmbəlwa Paska cike kə di kə di, bay ɗaw kə fəkah hid takan kaɗ aa mə jik jaw za, hid maa hidiy cike mə mayta. 16 Am mandal səna, hid məpərmay ɗaha zlim tik aa zlim, awan a jik jaw, zlim tik [Yesu] Barabas. 17 Pilatu neh zəgudu, ɗiya luw: ‹‹Mə may kat kə fəkehin hid ngayi? [Yesu] Barabas vu, asənkwən Yesu ta njə kə luwta Kristu?›› 18 Pilatu a luw atəgo nhi, kadaban sin mə sən za lawlaw, hidiy a centa wəla a Yesu am dalgway nhi, a ɗiyenta ngərak dap.
19 Mandal Pilatu wəlen mə ɗewe kaɗ am lay zla dalgway, werti tik zlən hid məpərmay angər tik, luwenni: ‹‹Hoh gər kə təm ma koh am ma ngə gawəl malaw nhi kwən. Kat tu luw atəgo , kadaban ngə vuɗu nhi, kat tu sisin atalan tik. Za sisin səna tu ngak talan day godokwən.››
20 Amma, mogroy ngə masayigi ɓəw talan mbalgamiy ɗiya kəɓiy zəgudu kə luwenta a Pilatu kə fəkah Barabas kaɗ aa mə jik jaw za, za kə wəzl Yesu kaɗ. 21 Pilatu ɗiya nehta baha, luwenta: ‹‹A dab hidiy saray nhi, hin mə may kat kə fəkehin yi?›› Ɗiya zlawenta, luwta: ‹‹A fəkiyikwan Barabas.›› 22 Sin nehta, luwenta: ‹‹Ya Yesu ta njə kə luwta Kristu wər, kat kə ɗiyen mi? ›› Hidiy cike zlawenta, luwta: ‹‹A kpaw kaɗ am pay maa zləngrak.›› 23 Sin nehta baha, luwenta: ‹‹Hay hidiy cah, mə ngavngav ngemi sin mə ɗiyu?›› Amma taniy cike diw kə ciy wəla bah a gədan, a luwta: ‹‹A kpaw kaɗ am pay maa zləngrak.›› 24 Za Pilatu saf saf sin a ɓəs kə ɗiy ko mi kwən, za gbezlerma a fuful, sin wət yəm, panpan ngər ngetik kaɗ a kibik hidigi, za luwenta: ‹‹Hin tu kə wəzl gawəl nhi, ma ngaɗa a kimin ɗakwən say ma ngəkin.›› 25 Za hidiy cike zlawenta, ɗiya luwta: ‹‹Mana yikwan tu wəzl kaɗ, dalgway ngə məc ngetik mə ɗew atalan yikwan ɓəw atalan ngə wəriy ngiykwan.›› 26 Za acin, Pilatu fəkenta Barabas. Za luwen a sojiy kə zariy Yesu, za kpawta am pay maa zləngrak.
Sojiy mbisenta a Yesu
27 Za acin, sojiy ngə Pilatu tepiy Yesu a terde ngə bay Pilatu səna. Mgbəw ngə sojigi cike ɓas ɓasiy atalan tik. 28 Za cok cokiy ləkwət tik kaɗ, za aa ləkwət maawizek kwəlenta a kəsəm, kə jan taniy kə mbisenta. 29 A gidigiɗ babəta, za təmenta atalan mana maytolol. Za a zlamblay vəlenta am ngərzəm mana ngə bay. Za acin taniy gbəlihiy titimbiz a kibik tik kə jan kə mbisinta, ɗiya luwenta: ‹‹Soko bay Yahudigi.›› 30 Za taniy tif tifenta giden a kəsəm, za wətiy zlamblay tafnan, wəzlta avə sin am talan. 31 Taniy maa mbisenta atəgo za, cokiy ləkwət maawizek səna kaɗ, za kwəlenta ləkwət ngetik. Adəwən səna, taniy tepta kəv kə kpawta am pay maa zləngrak.
Kpawiy Yesu am pay maa zləngrak
32 Mandal sojiy taa pətiy Yesu aa liɓde za, taniy gbamenta aa hid məpərmay tə liɓde Sirene, zlim tik Simon. Za taniy takenta wəla aa gawal səna kə wət pay maa zləngrak ngə kpaw Yesu. 33 Taniy hosiy am lay ta njə kə luwta Golgota. Mana kə luwa kaɗ, lay ngə kukuɗum talan. 34 Abəgo, wətiy movu mə gavaɗ gavaɗ avə təkən maa heɗek, vəlenta a Yesu kə sa. Yesu maa dezl za, aa may kə sə kwən. 35 Zəni sojiy kpawta kaɗ am pay maa zləngrak. Za wəzakiy ləkwətiy tə kəsəm tik am walan tan avə ɗiy metentenge. 36 A dəwən səna, taniy ɗewiy kaɗ bəgo kə puwiy Yesu. 37 Za wətiy pay maa kaslaprap, ɗəɗef ɗəɗefiy zləgam ngə dalgway ngetik a kimin, zenta aa talan tik za am pay maa zləngrak səna. A ɗəɗefta anhi: ‹‹Gawal nhi acin Yesu bay ngə Yahudigi.›› 38 Kpawiy məhəliy saray a jagwar Yesu, takan aa mə ngərzəm tik, takan aa mə ngərzlaɓay tik.
39 Hidiy mə toniy taa bəgo za ɗiya kəziy talan bazla bazla, za ɗiya riy Yesu. 40 Ɗiya luwenta: ‹‹Hoh luw hov kə nder jik Bayzlav kaɗ, za kə ndən kaɗ am lay tik am wan makaɗ tik kwa? Mana hoh kər ngə Bayzlav wər, a ler talan koh, za a səroho kaɗ aa mə pay maa zləngrak nhi za.›› 41 Mogroy ngə masayiy təm jik Bayzlav, bayiy ngə jəgwan ngə mə jawjaw ɓəw talan mbalgamiy təm ɗiya mbisenta, luwta: 42 ‹‹Sin tu mbəl hidiy məpərmay, zəni sin kwəl kə ler talan tik kwən kemi? A luw sin bay ngə Israyiliy kwa? Mə surohoh tik mbeh mbeh nhi aa mə pay maa zləngrak za, yikwan məv kə vəlen nəv ngiykwan. 43 Sin a bəbəc atalan Bayzlav kwa? Za sin a luw: ‹Kat kər ngə Bayzlav› kwən vu? Ya law, mana Bayzlav a may tik, mə ler kaɗ tanjinhi acin.›› 44 Ko məhəliy mə kpawta a jagwar Yesu, tu rəta atəgo təm.
Məc ngə Yesu
45 Ngə dab dab pic, talan mahayək cike ɗiya kpizliɓ hos am masa makaɗ ngə sukoh. 46 Am masa makaɗ səna, Yesu ɗiy cəwəla dayday, luw: ‹‹Eli Eli, lema sabaktani?›› Mana kə luwa kaɗ ‹‹Bayzlav ɗa, Bayzlav ɗa, hoh buwak dəwən kemi?›› 47 Hidiy məpərmay tə dab hidiy mə gar gariy təbəgo maa zlimta za, ɗiya luwta: ‹‹Mə zlimu, a ɗefenma a Eliya.›› 48 Njoɗ hid takan tə dab tan siy, va wət mbusur ləkwət, juroɓ am təkən ngə sa maa kwerek, za cəɓ am pay maa zoɗ, vəlen a Yesu kə seɓtik. 49 Zəni hidiy məpərmay luwta: ‹‹Nəmkwan kə puwtik kə saf ko Eliya səna av kə yah kə ler tik!›› 50 Yesu ca wəla dayday baha, za məcaytik.
51 Am mandal səna gəzza, godo mə zenzen təm jik Bayzlav kə wəɗak lay, ɗiya kwah a dab daba, dəga aa wəzlav za nha a kayək. Hayək nap kəz, gingiɗ-gingiɗ, talgwəniy mogroy ɗiya pəɗakigi, 52 za talan civiy zləriytan. Hidiy dolom mə səbiy mozlokotuf ngə Bayzlav mə məciy tamicek, mbəliy aa mə məc za. 53 A dəwən Yesu maa mbəlahah aa mə məc za, hidiy səna pətiy aa talan civ za, pətiy a liɓde Ursalima, liɓde ngə Bayzlav, za hidiy dolom tu limta.
54 Mordoy ngə sojiy ngə blək avə sojiy mə puwiy Yesu maa limiy hayək mə kəz ɓəw təkəniy maa parpar mə ɗiy cike səna za, ɗiya hovokiy dayday, za luwta: ‹‹Mindiwin gawəl nhi, Kər ngə Bayzlav!››
55 Am lay səna, wertiy dolom awaniy abəgo. Garitan a gaftik, aa safiy mana təkəniy səna taa tonigi. Taniy a səbiy Yesu dəga aa Galili za, kə jan taniy kə ɗiyenta kəzəɗ. 56 Adab wertiy səna, Mariyama njə Magdala, ɓəw Mariyama mahmay Yakuba avə Yusufu, za ɓəw mahmay ngə wəriy Zebede.
Kahiy Yesu
57 Pic maa ɗiy zoy za, hid mə njənja məpərmay tə liɓde Arimatiya yah. Hid səna, zlim tik Yusufu. Sin təm kər gawla ngə Yesu. 58 Sin va angər bay Pilatu, neh kə jan kə geɗen mozlokotuf ngə kah mimci ngə Yesu. Zəni Pilatu luwen a sojiy kə vəlenta mimci səna. 59 Yusufu wət mimci səna, va paɗpaɗ kaɗ avə maslaga ndawyan, 60 za sin va kah kaɗ am civ ngetik sin mə nguh talagwən a nguh, a kahiy hid abəgo gesin bəgwən. Sin goɗ kəlam mordoy, pek ma ngə civ səna kaɗ, za sin vətik.
61 Mandal sin taa kah tik, Mariyama njə Magdala avə Mariyama məpərmay awaniy abəgo. Mə ɗewiy kaɗ dəzdəz aa talan civ səna.
Sojiy a puwiy talan civ ngə Yesu
62 Apat tik, a dəwən pic ngə sləsləɓ pic nəp ngə Yahudigi, mogroy ngə masayigi ɓəw Farisigi ɓasiy viy angər Pilatu. 63 Maa hosiy za, luwenta: ‹‹Mordoy, yikwan mə ɓən atalan təkən takan. Gawəl mə njə kə ngawma nhi, a zləgam zaba mandal sin awana micin, sin a luw: ‹A dəwən məc ngaɗa, wan saray mə makaɗ tik, təv kə mbəlahɗa aa mə məc za.› 64 Ambu bay, a zlən sojiy mə puwiy talan civ səna hos wan makaɗ. Asənkwən wəriy gawliy ngetik kwəl kə həliy mimci səna. Za kə luwenta a hidigi: ‹Yesu mə mbəlah tik aa mə məc za.› Mana wəriy gawliy ngetik səna tu ɗiy atəgo wər, polkoy taa dəwən səna, hidiy av kə yəkta day ngə tizin.›› 65 Pilatu maa zlim atəgo za, ɗiya luwenta: ‹‹Ya law, anhi sojigi, mə va, mə luwenta kə puwiy talan civ mana hin mə mayu.›› 66 Za taniy viy atalan civ səna a sojigi. Ma hosiy za, sləraɓ sləraɓiy kəlam mə pekiy talan civi səna law law, za gboriy mə tak tak ngə bay mordoy a kimin, za vərəkiy sojiy abəgo kə puw tik.