Yesu mbəlah tik aa mə məc za
28
A dəwən pic nəp ngə Yahudigi, zlalay vət ngə daywan, Mariyama njə Magdala ɓəw Mariyama məpərmay viy kə safiy talan civ ngə Yesu. 2 Maa hosiy za, njoɗ hayək ɗiya kəz, gingiɗ gingiɗ. Mbaslay ngə Bayzlav surohoh aa dibizlav za, aa kəlam mə pekiy talan civ səna, goɗ kaɗ, za ɗew a talan. 3 Sin ɗiya zləzlaɗ, pizliɗ pizliɗ wa van ta njə kə wəciɗ. Ləkwət tə kəsəm tik, baran baran tewtew. 4 Sojiy mə puwiy talan civ ɗiya hovokigi, tu nənəhiy dayday, sənaf, wa mə məciy za. 5 Mbaslay ngə Bayzlav luwen a wertiy səna: ‹‹Hin wər, mə hovok kwən. Kat mə sən za, hin mə jar Yesu, hid hidiy mə kpawta am pay maa zləngrak. 6 Sin ɗah awənhi kwən, sin mə mbəlah tik aa mə məc za, mana sin mə luwehin mandal sin a məc gesin bəgwən. Mə yah saf lay mə ndəɗta a kimin. 7 Mə va angaw, mə ceɗen a wəriy gawliy ngetik. Hin kə luwenta: ‹Yesu mə mbəlatik aa mə məc za, sin av kə hos məpəlpla kə hin am hayək Galili, hin məv kə jan tik abəgo.› Nhi acin ləbar kat mə yah kə ceɗehin.›››8 Wertiy səna maa zlimta atəgo za, sliɗigi, siy angaw aa talan civ za, viy kə ceɗiy ləbar səna a wəriy gawliy ngə Yesu. A siy səna avə hovok ɓəw avə zəzay dayday am nəv ngatan. 9 Mandal taa siy a mozlokotuf, gbamiy, girjik, avə Yesu. Sin luwenta: ‹‹Mə yək mbeli wertigi.›› Taniy kərəɓiy a bər tik, gbəlihiy titimbiz kaɗ a kibik tik, kawiy ngaz ngetik. Ɗiya səbanta. 10 Yesu ɗiya luwenta acin: ‹‹Mə hovok kwən. Mə va luwen a galmayɗigi, mə viy am hayək Galili, taniy av kə janakta abəgo. ››
Luwenta a sojiy kə ngawima
11 Mandal wertiy səna awəleniy a mozlokotuf, sojiy məpərmay mə puwiy talan civ viy a liɓde Ursalima. Va ceɗiy təkəniy mə ton cike a mogroy ngə masayigi. 12 Mogroy ngə masayiy maa zlimta za, ɓasiy kaɗ avə talan mbalgamigi, zleriy ma tan kaɗ, wətiy suloy dolom, vəlenta a sojigi. 13 Za luwenta: ‹‹Hin kə ceɗen a hidiy anhi: ‹Ngə vuɗu, yikwan mə wana wayza, wəriy gawliy ngə Yesu yah həliy mimci tik.› 14 Mana Pilatu bay mordoy tu zlim ma tik, yikwan məv kə jan wirwir ngə bacen nəv, za kə lerehin kaɗ am takwaniy cike wayza.›› 15 Za sojiy səna yəkiy suloy, za va ɗiyiy təkən mana mogroy səna mə luwenta. Asəna acin, ləbar səna tu cakway a dab Yahudigi hos apica.
Yesu vəlen kəzəɗ a wəriy gawliy ngetik
16 A dəwən səna, wəriy gawliy ngə Yesu maa gəɓ atalan takan viy am hayək Galili. Taniy tapiy atalan wurum Yesu mə luwenta kə viy abəgo. 17 Taniy maa limiy Yesu za, gbəlihiy titimbiz kə səban tik. Amma hidiy məpərmay a dab tan aa wəzənigi. 18 Za acin, Yesu kərəɓ angər tan, luwenta: ‹‹Bayzlav tu vəlak gədan atalan təkəniy cike tə dibizlav ɓəw təm talan mahayək. 19 Tanjinhi mə sliɗ, mə va angər hidiy təm səban maa parpar təm talan mahayək cike wayza. Hin kə ɗiy taniy kə mbaɗiy kə wəriy gawliy ngaɗa. Hin kə juroɓenta baptisma am zlim ngə Vay, am zlim ngə Kərti tik, ɓəw am zlim ngə Mbiɗ ngə Bayzlav. 20 Za hin kə jəgwanenta taniy kə səbiy təkəniy cike, kat mə ceɗehin hin. Za mə sənu, kat awana avə hin hoyhoy hos am pic talan mahayək tu kə way.››