Yesu a zləgam avə ma mə ngaɓngaɓ atalan hid mə bizbiz
13
Am pic səna, Yesu sliɗ aa de tik za, va ɗew atalan maza tə Galili. 2 Zəgudiy dolom ɓasiy angər tik. Maa lim hidiy sən day a kibik tik za, sin tap tik am pay mendez ngə zlan maza ɗewey tik a kimin. Zəgudiy cike wayza gariy tan aa talan maza za.3 Yesu ɗiyenta jəgwan par par avə ma məngaɓngaɓ. Sin ɗiya luwenta: ‹‹Hid va a donu kə zləgahaª . 4 Am mandal sin taa zləg səna, sisiniy məpərmay yoɓiy a mozlokotuf. Viginiy yah cam camta kaɗ. 5 Sisiniy məpərmay yoɓiy a talagwən am lay maa hayək ɗah day kwən. Njoɗ təviy angaw, makavay hayək am madabah tan gəɗak. 6 Pic maa diw kə rəngəzl day day za, ɗiya kəɗaw ngirmiy maa cicer. Taniy kwaliy, kuyoh, kadaban zemiy tan a pətiy nha a kaɗ kaɗ bəgwən. 7 Sisiniy məpərmay yoɓiy am digidigiɗ. Təviy witikwitik. Gidigiɗiy maa gəliy za, ɗiya njəsliy təkəniy mə təv təviy səna. 8 Sisiniy məpərmay təm yoɓiy am lay malaw. Maa təviy za, ɗiya gəliy lawlaw, za ɗiya huviy lawlaw. Məpərmay tu huviy gwaray blək, məpərmay huviy gwaray ngər kwəh, za məpərmay təm huviy gwaray ngər makaɗ. 9 Hid məmar zlimi ngə zlim təkən, mə zlimu.››
Yesu a zləgam avə ma mə ngaɓngaɓ kemi?
10 A dəwən səna, wəriy gawliy ngə Yesu viy angər tik, nehta, ɗiya luwenta: ‹‹Hoh ɗaw kə zləgamen a hidiy avə ma mə ngaɓngaɓ kemi?›› 11 Sin zlawenta, ɗiya luw: ‹‹Ngəkin, Bayzlav mə zlər bərngəzl talan kin za, kə sən mindiwin mə ɓahɓah ngə bay ngə Bayzlav. Amma a vəlen sən səna a taniy bəgwən. 12 Mə safu, hid məmar təkən gwedek, Bayzlav av kə capenni a kimin zəni sin av kə mar day kə tamicek. Amma ngə hid maa a mar ɓahbəgwən, Bayzlav av kə ɓiy təm ngər ngetik maa mendez sin məmar səna kaɗ. 13 Asəna acin, kat tə zləgamenta avə ma məngaɓngaɓ, kadaban aa ciy həriya za aa limiy ɗahkwən. Aa tehiy zlimi, za aa zlimiy ɗahkwən ɓəw a sənta ɗahkwən. 14 A ɗiy atalan tan a səna mana Bayzlav mə luwu aa ma ngə mokotuf ngetik Esaya. Sin a luw:
‹Hin məv kə teh zlimi,
zəni hin mə zlim kwən.
Hin məv kə ca həriya,
zəni hin mə lim kwən.
15 Mindiwin, talan ngə hidiy səna toy toy wa gugwən.
Mə nekiy zlim ngatan kaɗ,
mə pekiy həriy ngatan kaɗ.
Aa may kə safiy lay avə həriya ngatan kwən,
aa may kə zlimiy təkən avə zlim ngatan kwən,
aa may kə səniy təkən avə nəv ngatan kwən.
Taniy a mayiy kə buwiy ngar ngatan kaɗ za kə yiy angər ɗa, za kat kə way məc tə kəsəm ngatan kaɗ kwən!›››ª
16 Yesu ɗiya luw baha: ‹‹Amma ngəkin, mə ɗew avə zəzay kadaban həriya kin aa lim, zlim kin aa zlim. 17 Mindiwin, kata a luwehin, mokotufiy ngə Bayzlav dolom ɓəw hidiy mə səbiy Bayzlav tu mayiy kə limiy təkən hin taa limu, amma a limta bəgwən. Tu mayiy kə zlimiy təkən hin taa zlimu, amma a zlimta bəgwən.››
Yesu pəsl madaba ma mə ngaɓngaɓ atalan hid mə zləg sisin
18 Yesu ɗiya luw baha: ‹‹Mə zlimu acin, təv kə ceɗehin madaba ma mə ngaɓngaɓ atalan hid mə zləg sisin tafnan. 19 ‹‹Mozlokotuf sisin mə yoɓ tə kimin səna acin, hidiy mə zlimiy zləgam atalan bay ngə Bayzlav, za a səni madaba ma tik bəgwən. Bay musuruf yah wət təkən mə zləgzləg təm nəv ngatan səna kaɗ.
20 ‹‹Lay njə talagwən acin hidiy mə zlimiy zləgam ngə Bayzlav, za njoɗ yəkiy zləgam səna avə zəzay. 21 Amma taniy aa geɗiy zləgam səna kə za zem am nəv ngatan ɗahkwən. A yəkiy zləgam səna ngə wan gwedek dap. Mandal takwan tu janenta asənkwən fəsək parpar tu janenta, a njə kə buwenta dəwən a Bayzlav, za kə geɗiy zləgam səna angaw.
22 ‹‹Lay njə digidigiɗ acin hidiy mə zlimiy zləgam ngə Bayzlav, amma ɓən ngə təkən ngə talan mahayək ɓəw tamah ngə jar aray ɗaw kə dayenta gədan. Kadaban səna acin, təkəniy səna ɗaw kə takiy gəl zləgam ngə Bayzlav təm nəv ngatan kaɗ. Zəni zay ngə zləgam Bayzlav səna aa pətah am ɗew ngatan ɗahkwən. 23 Lay malaw acin, hidiy mə zlimiy zləgam ngə Bayzlav, za aa səniy madaba ma tik. Zləgam səna ɗaw kə pətah am ɗew ngatan. Ɗaw kə huv gwaray blək, sənan ngər kwəh za sənan ngər makaɗ.››
Ma mə ngaɓngaɓ atalan denden
24 Yesu ɗiya ceɗ ma mə ngaɓngaɓ məpərmay a hidiy səna baha. Sin ɗiya luwenta: ‹‹Bay ngə Bayzlav wa hid mə zləg sisin malaw am tuz ngetik. 25 Vuɗu sənan, mandal hidiy cike aa wanigi, mosum ngə gawal njə tuz yah. Sin ɗiya zləg denden am tuz ngə gawal səna, za va tik. 26 Təkən mə zləgzləg təvigi, dahiy sefel, za dendeniy təm ɗiy atəgo təm. 27 Hidiy mə njə kə ɗiyiy kəzəɗ viy nehiy hid məmar tuz səna, ɗiya luwenta: ‹ Mordoy na, hoh zləg sisin malaw am tuz koh kwən vu? Ya dendeniy a yiy aa zəki?› 28 Sin zlawenta ɗiya luw: ‹Mosum ngaɗa acin mə ɗiy tik atəgo .› Hidiy səna luwenta: ‹Hoh may yikwan kəv kə cofta kaɗ vu?› 29 Gawəl njə tuz səna ɗiya luwenta : ‹Awwo, mə gər kə cofta kaɗ kwən, kadaban mandal hin tu kə cof denden, hin məv kə cofta avə təkən ngə zəm tik. 30 Mə geɗta, mə gəliy witikwitik hos am pic tu kə bəliy ngirmi. Am pic səna, təv kə luwen a hidiy mə ɗiyiy kəzəɗ kə bəliy denden zagway, za kə jawta, njuknjuk, kə kəɗawta kaɗ. Za a dəwən səna, mə ɓas təkən ngə zəm, za mə zek a debin ngaɗa.›››
Ma mə ngaɓngaɓ atalan sise wili maa ceceh sise venjeh
31 Yesu ɗiya ceɗenta ma mə ngaɓngaɓ məpərmay. A luw: ‹‹Bay ngə Bayzlav wa sise wili maa ceceh sise venjeh, hid mə zləg təm tuz ngetik. 32 Sise wili səna feɗeɗfeɗeɗ day kə sise wiliy cike wayza. Amma mandal wil səna tu təv, ɗaw kə gəl day kə wiliy məpərmay təm tuzª cike wayza. A njə kə mbaɗ kə wil mordoy maa, givirgivir, za viginiy a njə kə biy de ngatan a kimin.››
33 Sin ɗiya ceɗenta ma mə ngaɓngaɓ məpərmay baha. A luw: ‹‹Bay ngə Bayzlav wa njem wer mə ɓiy tik, za gavaɗgavaɗ am mosuf ngə ta bret kiliw ngər saray avə joɓən. Zəni kə bas mosuf səna cike wayza.
Ma mə ngaɓngaɓ atalan təkəniy mə ɓahɓah
34 Yesu a ceɗen təkəniy nhi a hidiy cike avə ma mə ngaɓngaɓ. A zləgamenta mətak ngaɓ ma ɓahbəgwən. 35 A ɗiy atəgo , kə jan kə ɗiy tiɗtiɗe mana Bayzlav mə zləgam avə ma ngə mokotuf ngetik. Sin a luw:
‹‹Təv kə zləgamen a hidiy avə ma mə ngaɓngaɓ.
Təv kə ceɗenta təkəniy mə ɓah ɓah
dəga am kat mə diw kə ndən talan mahayək.ª››
Yesu pəsl madaba ma mə ngaɓngaɓ atalan denden
36 A dəwən səna,Yesu sliɗ, geɗ hidiy səna kaɗ vətik ade. Wəriy gawliy ngetik viy angər tik, za ɗiya nehta, luwenta: ‹‹A pəsliyikwan madaba ma mə ngaɓngaɓ tə talan denden təm tuz tafnan.›› 37 Yesu ɗiya zlawenta, ɗiya luw: ‹‹Hid mə zləg sisin malaw, sin acin Kər Hidmemblen. 38 Tuz səna acin talan mahayək. Sisin malaw acin hidiy ngə bay ngə Bayzlav. Denden acin hidiy bay musuruf mə marta. 39 Mosum mə zləg denden səna acin bay musuruf. Pic ngə ɓas təkən ngə zəm kə yah de acin pic ngə way talan mahayək. Za hidiy mə ɓasiy təkən ngə zəm səna acin mbaslayiy ngə Bayzlav. 40 Mana mə ɓasiy denden kə kəɗawta kaɗ səna, wa səna av kə ɗiy mandal way ngə talan mahayək. 41 Am pic səna, Kər Hidmemblen av kə zlənah mbaslayiy ngə Bayzlav. Taniy av kə ɓiyiy hidiy mə njə kə lebeɗiy celeniy tan kə ndəv am mə ngavngav, ɓəw hidiy məpərmay mə njə kə ɗiyiy mə ngavngav cike kaɗ aa mə bay ngə Bayzlav za. 42 Taniy av kə fiyta am kuhu maa ligiɗ. Abəgo, hidiy səna av kə hanigi, za av kə kərawiy ndin tan. 43 Amma hidiy mə səbiy ma ngə Bayzlav, taniy av kə liriy mana pic am bay ngə Bahbay ngatan Bayzlav. Hid məmar zlimi ngə zlim, mə zlimu!››
Ma mə ngaɓngaɓ atalan aray mə ɓahɓah
44 Yesu ɗiya luw baha: ‹‹Bay ngə Bayzlav wa aray malaw mə ɓahɓah təm tuz. Hid məpərmay jan aray səna, zəni sin təm ɓah kaɗ baha. Sin ɗiya zəzay godokwən, sin va ber təkəniy tik cike, yah səkəm tuz səna.
45 ‹‹Bay ngə Bayzlav wa hid mə ɗiy terere mə jar yakwaɗ malaw. 46 Sin maa jan yakwaɗ maa səkəm tik tuwah za, va ber təkəniy tik sin məmar cike, za sin va səkəm yakwaɗ səna.››
Ma mə ngaɓngaɓ atalan jəva
47 Yesu ɗiya luw baha: ‹‹Bay ngə Bayzlav wa jəva hidiy mə fiyta a liɓ yəm, za kawah kilifiy parpar. 48 Jəva səna maa wek za, hidiy mə kawiy kilif ngazlata a gozlum maza, ɗewiy kaɗ kə weliy kilif tə kimin. Taniy aa kilif malaw zekta am ndel, za aa təkəniy mə ngavngav cikta kaɗ. 49 Mandal talan mahayək tu kə way, av kə ɗiy atəgo təm. Mbaslayiy ngə Bayzlav av kə yiy kə pətariy hidiy maa lem aa dab hidiy mə zləmentəma a Bayzlav za. 50 Av kə wətiy hidiy maa lem kə fəkta am kuhu maa ligiɗ. Abəgo, hidiy səna av kə hanigi, za av kə kərawiy ndin.››
Yesu a zləgam atalan təkəniy ndawyan avə mə didi
51 Yesu ɗiya neh wəriy gawliy ngetik, luwenta: ‹‹Hin mə zlim ləbar kat mə ceɗehin səna cike wayza vu?›› Taniy zlawenta, luwenta: ‹‹Yaw yikwan mə zlim cike wayza.›› 52 Yesu ɗiya luwenta acin: ‹‹Mana bay jəgwan ngə mə jawjaw tu yək jəgwan atalan bay ngə Bayzlay wər, sin wa njə de mə gasah təkəniy ndawyan avə mə didi aa mə debin tik za››
Hidiy tə liɓde Nasaratu a vəliy nəv ngatan a Yesu bəgwən
53 Yesu maa way kə zləgam avə ma mə ngaɓngaɓ za, gar tik aa bəgo za. 54 Sin vətik a liɓde Nasaratu sin mə gəl tə bəgo. Sin maa hos abəgo za, ɗiya ceɗ zləgam ngə Bayzlav a hidiy am jik jəgwan ngatan. Hidiy cike maa zlimiy jəgwan ngə Yesu səna za, tu wələk bərngəzl talan tan. Nap luwta: ‹‹Mə vəlen sən mana nhi yi? Mə vəlen gədan ngə ɗiy təkəniy maa tuwah nhi yi? 55 Zəɗər maa, bahbay tik acin mə njə kə cəm pay, mahmay tik acin Mariyama. Galməniy acin Yakuba, Yusufu, Simon ɓəw Yahuda. 56 Za galməniy wərzigi cike awaniy a liɓde ngiykwan awənhi. Ya za acin, mə vəlen sən ɓəw gədan ngə ɗiy təkəniy nhi yi?›› 57 Makavay səna acin, taniy a vəliy nəv ngatan a Yesu bəgwən. Yesu ɗiya luwenta acin: ‹‹Ɗaw kə vəlenta mordoy aa mokotuf ngə Bayzlav ko a ki, say a liɓde ngetik ɓəw a dab hidiy ngetik acin aa vəlenta mordoy ɗahkwən.›› 58 A liɓde Nasaratu, Yesu a jan kə ɗiy təkən ma tuwah dolom bəgwən, kadaban hidiy təbəgo a vəlenta nəv ngatan ɓahbəgwən.