Bay Musuruf avə Yesu
(Mt 4 :1-11; Mk 1:12-13)
4
Yesu ma pan baptisma a maz Zurdun za, sliɗ kə jəɓah tik. Mbiɗ ngə Bayzlav a wan kəsəm tik. Gwedek Mbiɗ ngə Bayzlav ngazl tep a dab donu. 2 A bəgo Bay Musuruf va angər tik kə lebeɗ tik kə ɗiy təkən mə ngav ngav, təl təl kə lebeɗ tik wan ngər foɗ. Yesu mə wan a dab donu səna, a zəm təkən bugwən, za mitis nap hemeni. 3 Musuruf mə sən za, mitis a hemeni a Yesu, ɗiya luwenni acin: ‹‹ Mana hoh kər ngə Bayzlav mindiwin wər, a luwen a gugwən nhi mə mbaɗ kə təkən ngə zəm, ma zəmu.›› 4 Yesu zlaweni: ‹‹ Tu ɗəɗef ta am deftere ngə Bayzlav: ‹Təkən ngə zəm a kaw micin ngə hidi a gendik ɗahkwən .’›› 5 Adəwən səna, Bay Musuruf ɓən wirwir məpərmay, ngazl atalan wərum. Ma hosigi a bəgo za, ɗefen liɓdigi tə talan mahayək, bayigi məmar ta cike. 6-7 Luweni: ‹‹ A saf, liɓdigi nhi cike avə aray tə kimin, kata maru, za kata kul kə vəlen a hidi kata mə mayu. Tanjinhi hoh tu gbəlih titimbiz a kibik ɗa kə səbanak ku wər, təv kə vərəkoh kə bay, hoh kə mar liɓdigi nhi avə təkən tə kimin cike.›› 8 Yesu zlaweni: ‹‹ Tu ɗəɗef ta am deftere Bayzlav: ‹A səban Babay koh Bayzlav a gendik, za ma ɗiy kəzəɗ ngetik a gendik.› ‹‹ 9 Bay Musuruf a geɗ kaɗ ɓah bugwən, ngazl am liɓde Ursalima. Ma hosigi za, ngazl atalan jik ngə Bayzlav am ceɓelem tik. Luweni: mana hoh kər ngə Bayzlav mindiwin wər, a mbir atalan jik nhi kə va kayək. 10 Kadaban tu ɗəɗef ta am deftere ngə Bayzlav: ‹Bayzlav av kə luwen a mbaslay tikigi kə puwigi, təkən den kə ɗiyoh kwən.’ 11 Am lay məpərmay tu ɗəɗef tə baha: ‹Ko hav kə ndəv, mbaslayigi ngə Bayzlav av kə kalawigi, ngaz koh a duroɓ am gugwən kwən.› ‹‹ 12 Yesu ma zlim za, ɗiya zlaweni: ‹‹ Bayzlav a luw am deftere ngetik: ‹Hoh gər kə sla nəv ngə Babay koh Bayzlav kwən!› ‹‹ 13 Bay Musuruf ma təl kə lebeɗ tik atəgo za, a jan mozlokotuf tik bugwən, və tik kə jan kə jəɓa am pic məpərmay bah kə lebeɗ tik.Diw kəzəɗ ngə Yesu am hayək Galili
(Mt 4:12-17; Mk 1:14-15)
14 Yesu sliɗ jəɓ kə va hayək Galili. Mbiɗ ngə Bayzlav a wan atalan tik. Ləbar ngetik cakay am hayək sən cike way za 15 Am jik jəgwan ngə Yahudigi, sin ɗiya ceɗenta ləbar a hidigi. Hidi cike wayza ɗiya səbanta.
Yesu a liɓde Nazaratu liɓde mendez
(Mt 13:53-58; Mk 6:1-6)
16 Yesu sliɗ və tik a liɓde Nazaratu liɓde mendez sin mə gəl tə bəgo. Pic nəp ngə Yahudigi ma hos za, va pət am jik jəgwan ngatan kə ceɗ ləbar Bayzlav mana sin mə njə kə ɗiy ma hoyhoy . 17 Gwedek sliɗ za, gar a gar kəjangi deftere Bayzlav. Hidigi wətiy ɗerewel mə paɗ paɗ, Ezay mokotuf ngə Bayzlav taməcek mə ɗəɗefu, vəlenta kəjangi tik. Yesu tafnan pəsl pəsl kaɗ, jan ləbar məpərmay a bəgo mə zləgam tə talan tik. Za a jangi tik acin: 18 ‹‹ Mbiɗ ngə Bayzlav awan atalan ɗa. Bayzlav tu welek ku, za tu zlənak ku kə va kə ceɗ Ləbar ngetik Malaw a matakwan hidigi. Tu zlənak kə ceɗen a hidi təm nəv ngər Musuruf, avə kəjani mbəl talan tan, Musuruf a mar tə ɗaba. Za kə ceɗenta a hulufigi, avə kə limi lay. Tu zlənak baha angər hidi mə njə kə si banay tə ngər celen tan, kata kə mbəl tə kaɗ kə mariy talan tan. 12:18,28,31-32; 28:19; Mk 1:8,10,12; 3:29 KMY 1:2,5,8; 2:4,17,18 19 Za kata kə ceɗen a hidigi, pic Bayzlav tu kə saf kaymah ngə hidigi, tanjinhi tu hos acin.›› 20 Ma jangi za, paɗ paɗ ɗerewel səna kaɗ, wət vəlen a hidi mə njə kə ɗiy kəzəɗ təm jik jəgwan səna. Za ɗewey tik kaɗ kə ceɗenta ləbar a hidigi acin. Hidi cike tə jik ci həriya atalan tik. 21 Yesu nap luwenta acin: ‹‹ Ləbar təm deftere Bayzlav hin mə zlim nhi, təkən sən tu ɗiy tiɗ tiɗe apica.›› 22 Hidi mə ɓas ɓasi cike ma zlimiy ləbar təgo za, a luw ta: ‹‹ Kay, ləbar ngə gawal tə talan menek ngə Bayzlav nhi, law godokwən. Ya za ma gawal nhi kər Zozef tu wənhi ! Za acin a sən ləbar malaw nhi a ciki?›› 23 Yesu jəɓ kə luwenta baha: ‹‹ kata mə sən za mə may wər kata kə ɗiy təkən malaw am lay gəl ngaɗa a wənhi səka, mana kata mə ɗiyu a liɓde Kaparnahum mana hin mə zlimu. Kadaban hin mə njə luw : hoh mə ɗiy mazla, a saf kaymah ngəkoh zagway. 24 Amma ta ceɗehinkaɗ law law, hidigi a njə kə mayi hidi məyah ta mə lay mə pərmay za day kə hidi tə de. Za wa sən baha ngə mokotufigi ngə Bayzlav. 25 Ya, mə ɓən atalan Eli, mokotuf ngə Bayzlav ta micek. Mandal səna werti mə cupcupigi dolom am hayək Isirayila. Za mitis tu ɗiy day day am hayək səna, kadaban von a za ɓabəgwən di makaɗ avə tər kwəh. 26 Za ma Bayzlav a zlən Eliya kə va kə mənenta a werti səna bugwən. Səna a zlən kə va kə mən werti mə cupcup təm səban məpərmay a liɓde Sarepta təm hayək Sidon. 27 Mə ɓən baha atalan Elize, mokotuf Bayzlav məpərmay ta micek. Mandal səna kwalkwalaigi dolom am hayək Isirayila. Za ma mokotuf Bayzlav səna a mbəl kwalkwala ko takan a dab tan bugwən, səna kwalkwala təm səban məpərmay, zlim ngetik Naman təm liɓde Siriya.›› 28 Hidi mə ɓas ɓasi tə jik jəgwan səna ma zlimiy ləbar Yesu atəgo za, nəv ɗiya hamenta day day. 29 Sliɗigi, ngazli Yesu a liɓde za, tep ta atalan wərum tə liɓde ngatan. A may kə goɗo ta atalan wərum za kə məc. 30 Amma Yesu pətatik a dab hidi mə ɓas ɓasi sən za, və tik.
Yesu avə hidi njə musuruf tə kəsəm
(Mk 1: 21-28)
31 Yesu sliɗ və tik acin a liɓde məpərmay təm hayək Galili, zlim tik Kaparnahum. A liɓde səna a njə kə ceɗenta ləbar Bayzlav a hidigi am jik jəgwan ngə Yahudigi. Hoyhoy a njə kə ceɗenta am pic nəp ngatan. 32 Za hidi ta njə kə zlimiy ləbar ngetik avə jəgwan ngetik a njə kə pərasl bərngəzl talan tanid mə wəkwək, kadaban mə tik a ndəv am lay may may ɗahkwən . 33 Am pic nəp ngə Yahudigi məpərmay, Yesu a ceɗenta ləbar Bayzlav a hidigi am jik jəgwan ngə Yahudigi, mawəl mə wək wək ɗaha a bəgo. Musuruf a wan kəsəm tik. Ma lim Yesu za, cə wəla day day, a luw: 34 ‹‹ Hoh Yesu njə Nazaratu liɓde mendez, təkən ngemi mə lapiy yikwan avə hoh mi? Kata mə sən za, hoh Hidi makweɗek ngə Bayzlav. Ya za acin wər, hoh yah kə lek yikwan kaɗ vu?›› 35 Yesu ndəl musuruf tə kəsəm gawal nhi, luweni: ‹‹ A pek mə kaɗ, a pətah a kəsəm gawal nhi za.›› Musuruf səna tuwələk gawal nhi, mgbav a kayək a kibik hidigi, za cəka pətah tik a kəsəm tik za, za ko a ɗiyen təkən mə ngavngav ndes bugwən. 36 Hidi təbəgo cike ma limi təkən sən za, tu pərasl bərngəzl talan tan. ɗiya zləgamigi am walan tan: ‹‹ Kay, mə ngə gawal nhi, a ndəv am lay may may ɗahkwən. Tu luwen a mosurufigi kə pəti tan a kəsəm hidi za, a njə kə zlimiy mə ngetik kə pətigi angaw.›› 37 Hidi a zləgami mə ngə Yesu am liɓde cike.
Yesu mbəl mə daldaligi
(Mt 8:14-17; Mk 1:29-39)
38 Yesu sliɗ am jik jəgwan ngə Yahudigi za, və tik a de Simon. Yuhana sukwəlen Simon səna werti, a dal kəsəm ngetik kwak. Hidi mə njə kə puw ta ɗiya tari Yesu, luwenta: ‹‹ A yah ma mbəl mə dal dal ngiykwan nhi kaɗ may.›› 39 Yesu və gar atalan tik, za ndəl məc tə kəsəm werti nhi, luweni: ‹‹ A geɗ werti nhi kaɗ.›› Za kəsəm werti nhi ɗiy zoy. Njoɗ sliɗ za acin, za tə gəda kə vəlen a Yesu avə hidi məpərmay. 40 Pic ma ndəv za, lay kəluw kəluw, hidi məpərmay a dahi mə daldaligi angər Yesu kə mbəl tə kaɗ, njə məc tə kəsəm ngatan ma par par. Yesu ɗiy ngəra atalan tan takan takan, za mbəl ta am məc ngatan za. 41 A gam musuruf dolom kə pəti tan a kəsəm hidigi za. Musurufigi səna pəti tan a kəsəm hidigi za, a ci wəla, a luwenta a Yesu: ‹‹ Yikwan ma sənoh, hoh acin Kristu hidi Bayzlav mə wel kə mbəl hidigi .›› Yesu ndəl ta, luwenta: ‹‹ Mə ɗew kaɗ tete, mə gər kə cakway zlim ngaɗ kwən.›› Yesu mə luwenta atəgo nhi, kadaban musurufigi mə sən tə za, sin acin Hidi Bayzlav mə welu kə mbəl hidigi . 42 Yesu wan kaɗ, a pat tik sliɗ və tik a dab donu am lay ma lew lew. Hidi dolom jar jar ta, za jan ta. Ma jan tə za, luwenta a Yesu acin: ‹‹ Mordoy, hoh gər kə geɗiy yikwan kaɗ kwən, a nəpay koh awənhi.›› 43 Yesu ɗiya zlawenta: ‹‹ ko a ɗiy a ciki, təv kə ceɗ ləbar malaw ngə bay ngə Bayzlav a hidi təm hayək məpərmay. Kadaban Bayzlav a zlənak makavay kəzəɗ səna.›› 44 Yesu sliɗ, geɗ hidigi kaɗ, və tik kə ceɗ ləbar ngə Bayzlav am jik jəgwan ngə Yahudigi a liɓde ma par par.