Yesu avə hidi mə kawi kilif
(Mt 4:18-22; Mk 1:16-20)
5
Pic takan Yesu mə gara kaɗ atalan maza a Genezaret. Hidi dolom yigi kə zlimiy zləgam ngə Bayzlav. A goɗi kəsəm, ko yi kə jan lay gar a kibik za kə zlim tik. 2 Yesu lim pay ngə zlan maza saray a gozlum maza ngə hidi mə kawi kilif. Hidi mə kawi kilif səna ta surohigi tan za, a gohi jəva ngatan. 3 Yesu ma lim hidigi a njəsl ta, pət tik a liɓ pay ngə zlan maza ngə Simon, za ɗefenma a Simon. Luweni: ‹‹ A yah ma ngur pay ngə zlan maza koh nhi kə va a liɓ maza.›› Ma tap za, Yesu ɗew kaɗ acin, za a ceɗenta ləbar Bayzlav a hidi mə ɓas ɓasi səna. 4 Ma way kə ceɗenta ləbar a hidigi za, luwen a Simon: ‹‹ A yah ma kizer pay ngə zlan maza koh, yikwan kə va a dab dab yəm, hin kə kaw kilif avə coloyigi. 5 ‹‹ Simon ɗiya zlaweni acin: ‹‹ Mordoy, a saf yikwan tu juway vuɗu vuɗu kə jar tik, za ko kilif takan yikwan mə jan bugwən. Amma mavay hoh mə luwak ku, təv kə fək jəva səna.›› Ma vigi za, 6 wətiy jəva fək ta am yəm, nap ngazla ta, kilif həyok həyok a kimin, jəva ngatan diw kə kwah. 7 ɗiya ɗefenta a celen tan təm pay ngə zlan maza məpərmay avə ngəra kə yigi kə mənenta. Celen tan ma yigi za, kaw kawi kilif nhi, zek zek ta wek am pay ngə zlan maza saray tik, amma yəm a gər kə sulup ta. 8 Simon Piyer ma lim za, gbəlih titimbiz a kibik Yesu, luweni: ‹‹ Mordoy, av koh a jagwar ɗə za, kadaban kata hidi mə njə kə ɗiy təkən mə ngav ngav.›› 9 Simon mə luwen atəgo , kadaban sin avə celenigi nəv ngatan tu mbir atalan mə kawi kilif dolom nhi. 10 Zak avə Yuhana, wəriy Zebede mə ɗew ɗewiy tə liɓ pay ngə zlan maza məpərmay, tu hovokigi baha. Yesu ɗiya luwenni a Simon acin: ‹‹ Hoh gər kə hovok kwən. Dəga apica, hoh kaw kilif ɗaba, hav kə ɗew kə hidi məv kə ɗefenma a hidigi kə yigi kə səbiy mozlokotuf ngaɗa.›› 11 Simon avə celenigi ma zlim ta atəgo za, kəzeri pay ngə zlan maza ngatan a gozlum maza. Suroyi kaɗ, geɗiy təkən ngatan cike, səbiy Yesu acin.Yesu avə kwalkwala
(Mt 8:1-4; Mk 1:40-45)
12 Pic takan Yesu a wan liɓde məpərmay, jan kwalkwala abəgo . Kwal kwal səna ma lim Yesu za, va gbəlih titimbiz a kibik tik, tək talan tik kaɗ, ɗiya cen ngəra. Luweni: ‹‹ Mordoy, kata mə sən za, mana hoh mə may za, gədan koh tu hos gəga kə ɗiz kwalkwala ɗə kaɗ.›› 13 Yesu zok ngəra, mbəlem kəsəm tik, luwenni : ‹‹ Kat mə may za, tanjinhi kwalkwala tə kəsəm koh mə ɗiz!›› Ma luwen atəgo za, njoɗ kwalkwala tə kəsəm tik ɗizey tik. 14 Yesu ɗiya ngəz tik, luweni: ‹‹ A zlim law law, təkən kata mə ɗiyoh nhi, hoh gər kə va kə ceɗen a hidigi kwən. Amma a va angər hidi ta ɗiy məzugzugwa təm jik Bayzlav, ma va ɗefen kəsəm koh, za ma kaw vəren tə de, ma feten a Bayzlav mana məzugzugwa Musa mə luwu. Hidi cike kə sən ta, kwalkwala tə kəsəm koh tu ɗiz.›› 15 Yesu ma luwen atəgo za, gawal səna və ceɗ gendik a hidigi, za ləbar ngetik hidi zlim ta mgbaw lay. Kadaban səna hidi dolom vi ɓasi kaɗ angər Yesu. A mayi kə zlimiy ləbar sin ta ceɗu, za Yesu kə mbəl tə kaɗ am dal ngatan. 16 Amma Yesu geɗ tə kaɗ gwedek, vətik am lay ma lew lew, a tar Bayzlav a bəgo.
Yesu avə hidi mə mgbəru mgbəru
(Mt 9:1-8; Mk 2:1-12)
17 Pic takan Yesu a ceɗenta ləbar ngə Bayzlav a hidigi. Adab hidi nhi, Farisigi ɓəwmogroyiy jəgwan mə ɗewiy kaɗ a bəgo. Hidi səna a yigi a liɓde ma par par bay Galili məmaru. Məpərmayigi a yigi am liɓde Ursalima, za ɓəw a liɓde ma par par bay Yahudiya məmaru. Yesu ta ceɗenta ləbar ngə Bayzlav a hidi mə ɓas ɓasi səna, Bayzlav tu vəlen gədan kə mbəli mə daldaligi. 18 Gwedek hidi məpərmay yigi, a dahi hidi mə mgbəru mgbəru məpərmay avə lay wan tik. Ma hosohigi za, jar jariy mozlokotuf kə tep ta angər Yesu, 19 za ko lay və ɗahkwən, hidi njəsl njəsl. ɓən ɓənigi za acin, wət ta, za tapigi avə sin atalan jik, wəraɗi talan jik. Ma wəraɗ tə za, wətiy mbiseh, jaw ta am lay wan ngetik. za wətiy hidi mə mgbəru mgbəru tafnan nhi acin, sərohota atalan jik mə wəraɗ wəraɗ səna, vərək ta a kibik Yesu a dab hidi mə ɓas ɓasigi. 20 Yesu ma lim atəgo za, mə sən za, hidi mə dahi mə mgbəru mgbəru səna, mə yək tə za. Njoɗ luwen a hidi mə mgbəru mgbəru səna acin: ‹‹ gwalay ɗa, mə ngavngav koh tu geɗ.›› 21 Mogroyiy jəgwan avə Farisigi ma zlim ta atəgo za, a ɓənigi am nəv za: ‹‹ Kay gawal nhi wər hidi ngayi? Sin tu ra Bayzlav avə ma mə luw nhi. Hidi a hos gəga kə geɗ mə ngavngav ngə hidigi bugwən, səna Bayzlav a gendik.›› 22 Njoɗ Yesu mə sən ɓən tan za, ɗiya luwenta: ‹‹ Mə ɓən atəgo kemi? 23 Təkən mordoy acin ceki, kə luw mə ngavngav koh mə geɗe kaɗ, asənkwən kə luw a gar za a va koh ? 24 Amma ta may hin kə sən tik, kata mə yah ta ngər Bayzlav za, ta wana avə gədan am talan mahayək a wənnhi, ngə geɗ mə ngavngav ngə hidi kaɗ.›› Yesu ma luw atəgo za, luwen a hidi mə mgbəru mgbəru tafnan nhi acin: ‹‹ Ta luwoh, a sliɗ za, ma wət lay wan koh, ma və koh a de.›› 25 Gawal nhi vak sliɗ za a kibik hidi cike, sin tu mbəl lawlaw acin, wət lay wan tik, və tik a de. A səban Bayzlav mozlokotuf mozlokotuf. 26 Hidi mə ɓas ɓasi təbəgo ma lim tə za, nap hovokigi. Təkən nhi tu pərasl bərngəzl talan ngatan. ɗiya səbaniy Bayzlav acin. A luw ta: ‹‹ A picah yikwan tu lim təkən ma tuwah.››
Yesu avə Levi
(Mt 9:9-13; Mk 2:13-17)
27 Adəwən səna Yesu sliɗ kə va am lay məpərmay. Mandal a va a mozlokotuf, lim dəwan məpərmay mə ɗewe kaɗ am biriw ngetik, zlim ngetik Levi. Va angər tik, za ɗiya luweni: ‹‹ A sliɗ za, ma səbak ku.›› 28 Levi sliɗ, geɗ təkən ngetik cike kaɗ, ɗiya səb tik. 29 Adəwən səna Levi ɗiy məmbəlwa, ɗefenma a Yesu kə yah kə zəm gəda. Celen dəwanigi dolom avə hidiy məpərmay yigi a bəgo. A zəmiy gəda avə Yesu ɓəw wəriy gawliy ngetik. 30 Gwedek hidiy Farisigi avə mogroyiy jəgwan lim ta, nəv hamenta, ɗiya luwenta a wəriy gawliy ngə Yesu: ‹‹ Hin avə mordoy ngikin, mə zəm gəda avə dəwanigi ɓəw hidi məpərmay mə njə kə ɗiyi təkən mə ngavngav təgo kemi?›› 31 Yesu luwenta avə ma məngaɓngaɓ: ‹‹ Ya, tanjinhi wər, hidi mə njə kə ɗiy maazla a njə kə mən hidi ma lawlaw vu? Awwo, a njə kə mən hidi mə daldaligi. 32 Ya, kata təm asəna, kata tə yah am talan mahayək, kə jar hidi njə nəv ma kweɗek kwən. Kata tə yah kə jar hidi mə njə kə ɗiyi təkən mə ngav ngav, kə buwi nəv ngatan kaɗ.››
Məzugzug ngə Farisigi avə məzugzugwa ngə Yesu
(Mt 9:14-17; Mk 2:18-22)
33 Adəwən səna, hidi Farisigi məpərmay ɗiya luwenta a Yesu: ‹‹ A saf, wəriy gawliy ngə Yuhana a njə kə ɗiyi dalyam hoyhoy, za a njə kə tari Bayzlav. Za wəriy gawliy ngiykwan, a njə kə ɗiy ta atəgo təm. Ya wəriy gawliy ngəkoh a ɗiyi dalyam səka ɗahkwən wər, mə ɗiy mi?›› 34 Yesu ɗiya zlawenta acin avə ma məngaɓngaɓ: ‹‹ Hidi mə dəm werti tu ɗefenma a hidigi kə zəmiy gəda, za mana sin a wəlen a dab tan wər, avə kə ɗewigi avə mitis vu? Awwo, avə kə zəzayigi ɗər avə zəm səna. 35 Amma pic takan tu wətiy mə dəm werti səna a dab tan za wər, am pic səna hidi avə kəɓənigi, za avə kə ɗiyi dalyam.››
36 Yesu ɗiya ceɗenta ma məngaɓngaɓ məpərmay bah, a luw: ‹‹ Hid mə njə kə wət ləkwət ndawyan kə kwah za kə mbok mbəsur ləkwət avə sin ɗahkwən. Kadaban tu kwah a kimin za, ləkwət ndawyan a ɗiy law ɗaba, tu ngav. Za təkən ndawyan mə mbok mbok ta təkən mbəsur tik a ɗiy law kwən təm. 37 A sən baha, hidi mə njə kə zek movu am dəndoh siɗe ɗahkwən. Kadaban mbazl tu kə bas, dəndoh siɗe av kə si. Mbazla avə kə zek, za təkən ngə ɗiy avə siɗe səna ɗahkwən . 38 Səna hidi kə zek movu am siɗe ma ndawyan. 39 Za hin mə sən za, hidi tu sa movu mə na na, koh a may kə sa ma dindem ɗaba. A njə kə luw: ‹Movu mə na na acin me nek day.’