Luka 3

Yuhana baptis avə hidi ɓas ɓasi tə jagwar tik

(Mt 3:1-12; Mk 1:1-18; Yuh 1:19-28)

Agustus, bay Roma məmar hayək roma cike ma məc za, vərəki hidi məpərmay am lay tik. Zlim ngetik Tiber. Tiber səna vərək mogroy tikigi baha. Vərək hidi məpərmay, zlim ngetik Pontiyus Pilatu kə mar liɓde Yahudiya. Vərək hidi məpərmay, zlim ngetik Hirudus kə mar hayək Galili. Vərək hidi məpərmay zlim ngetik Filip, galmən Hirudus kə mar liɓde Iture avə Tərakonit, za vərək hidi məpərmay baha zlim ngetik Lisaniyas kə mar liɓde Abilen. Tanjinhi Tiber, bay səna, di ngetik məmar hayək roma cike, tu ɗiy di gəɓ atalan joɓən. 2 Am mandal hidi ta mariy lay səna, bayigi ngə mə ɗiyi məzugzugwa am jik Bayzlav ɗahi saray am liɓde Ursalima, zlim ngatan Anas avə Kayif. Mandal səna Yuhana kər Zakari a wəlen a dab donu. Pic takan Bayzlav luwen acin: ‹‹ Ta zlənoh, a sliɗ, ma va ceɗ ləbar ngaɗa a hidigi .›› 3 Yuhana ma zlim atəgo za, sliɗ va angər hidigi mə biy də ngatan tə talan maz Zurdun za. A ceɗenta ləbar Bayzlav a hidigi am lay par par. A luwenta: ‹‹ Mə buw nəv ngikin kaɗ, hin kə yək baptisma, za Bayzlav avə kə geɗ təkən mə ngavngav hin mə ɗiy kaɗ.›› 4 Ləbar Yuhana mə ceɗ nhi tu hosoho tiɗ tiɗe mana mokotuf Bayzlav Ezay mə ɗəɗefu am deftere ngetik. Tu luw a tan Yuhana anhi : ‹‹ Hid məpərmay a cə wəla a dab donu, a luw: ‹Mə geɗ mə ngavngav təm nəv kin kaɗ kə puw Mordoy ngiykwan, Bayzlav tu kə zlənaha mana hin ta njə kə zaɓ mozlokotuf kə ɗiy sək sək, za kə zlaɗ tik kaɗ, kə puw hidi mordoy məv kə yah a bəgo za. 5 Mə zlimu hidi mordoy ta njə kə vay a liɓde kin, hin mə njə kə juroh lay ma fal kə ɗiy varak varak, za lay ma kpum kpum, kə ɗiy pərak pərak. Mozlomozlokotuf mə tər tər kə ɗiy sək sək. Yo wa sən baha, mə geɗ mə ngavngav kin kaɗ, mə puw Mordoy ngiykwan ma mbeh kə yah. 6 Hidi cike av kə limi hidi məv kə mbəl yikwan, Bayzlav tu kə zlənah anhi .’ 7 Am mandal Yuhana ta ngəz hidigi nhi, hidi dolom yigi angər tik kəjani baptisma. Yuhana diw kə ngəz ta, a luwenta acin: ‹‹ Hin hidi mə njə kə ɗiyi mə ngavngav mana kurslu nhi, ngikin mə njə kəɓən hin tu jan baptisma wər, dalgway ngə Bayzlav məv kə yah ɗah atalan kin ɗaba. Ya hidi ngayi mə ceɗehinacin atəgo yi? 8 Geleɓ mə ɗiy kəzəɗ malaw, hidigi kə sən ta a kimin za, hin tu buw nəv ngikin kaɗ mindiwin. Ngikin mə njə kəɓən kə luw baha: ‹Yikwan wər Bayzlav tu mbəl micin ngiykwan kaɗ, kadaban Ibrahima taməcek didi ngiykwan ta.› Amma ta ceɗe hin, təgo a hos gəga kə mbəl hin ɓabəgwən. Mə saf ko gugunigi man anhi, Bayzlav tu may kə mbaɗ ta kə səban ngə Ibrahima wər, avə kə mbaɗ tik kwən vu? 9 Ta ceɗehintanjinhi, dalgway Bayzlav wər mbeh kə yah mgbanga. Bayzlav av kə zla dalgway a hidi ma a ɗiyi malaw ɗahkwən, mana hidi mə njə kə bəli pay mətak mbuw avə ndun tik kaɗ, za kə kəɗaw avə kuhu.›› 10 Hidi mə ɓas ɓasi ma zlimiy ləbar təgo za, ɗiya luwenta a Yuhana : ‹‹ Ya tanjinhi acin wər, yikwan kə ɗiy mi?›› 1 11 Yuhana luwenta: ‹‹ Hid məmar ləkwət saray, mə wət ma takan mə vəlen a celen mətak lukwət. Hidi məmar təkən ngə zəm, mə vəlen a celen njə mitis təm. 12 Za dəwanigi yigi angər Yuhana baha kəjani baptisma. ɗiya neh ta: ‹‹ Mordoy, yikwan dəwanigi, yikwan kə ɗiy mi?›› 13 Yuhana zlawenta: ‹‹ Hin ta njə kə ɗiy kəzəɗ dəwanigi, mə gər kə moh təkən ngə hidigi kwən, mə ɗiy avə mozlokotuf tik mana məmar lay mə luwe hin.›› 14 Adəwən səna sojigi sliɗiy vigi baha. ɗiya nehi Yuhana : ‹‹ Mordoy, yikwan sojigi, yikwan kə ɗiy mi?›› Yuhana ɗiya zlawenta: ‹‹ Mə gər kə moh suloy angər hidigi avə gədan kwən, za mə gər kə ɗiy polkoy a hidigi kə jan suloy avə sin kwən. Səna hin kə vərək talan kin am suloy ngə kəzəɗ ngikin dab.›› 15 Təkən sən ma ɗiya atəgo za, hidi mə ɓas ɓasi cike ɗiya ɓəni am nəv za: ‹‹ tanjinhi ko gawal nhi acin Kristu hidi Bayzlav mə welu kə mbəl hidigi nhi səki?›› 16 Yuhana ma sən nəv ngə hidi cike za, luwenta acin: ‹‹ Kat acin hidi məv kə mbəl hidigi, hin ta puw kwən. Kata wər tə ɗiye hin baptisma avə yəm. Amma hidi ma day kata, avə kə yah am lay ngaɗa. Tə hos gəga kə ɗew kə baalam ngetik kə pəsl mbiseh kərap ngetik kaɗ bugwən. Sin wər, avə kə ɗiye hin baptisma avə Mbiɗ ngə Bayzlav, za avə kə zle hin dalgwayavə kuhu baha. 17 Dalgway ngetik av kə ɗiy mana hidi mə wət waslak am ngəra kə bem ngirmi. Mana mə bem za, avə kə wət ngirmi maa cehceh a ngirmi hiziɗ kə zek a debin, za sagway tik kə kəɗaw avə kuhu. Yo amma dalgway ngetik, av kə zla dalgway səna avə kuhu ma a məc ɗahkwən ko a pu.›› 18 Wa səna Yuhana tu ceɗenta Ləbar Malaw a hidigi avə ma məngaɓngaɓ ma par par, za tu ngəz ta avə zləgam par par kə buwi nəv ngatan kaɗ. 19 Adab hidi sin mə ngəz tə nhi, bay Hirudus awan bəgo baha. Sin tu ɗiy təkən weli, kadaban a ɓiy Herodiyas werti galmən. Za tu ɗiy təkən mə ngavngav məpərmayigi dolom baha. 20 Yuhana ma ngəz atalan təkini sin mə ɗiy za, Hirudus nəv hemeni, njap kaw Yuhana fək am jik dangay. Mə fək Yuhana am jik dangay nhi, tu gas mə ngavngav day baha.

Baptisma ngə Yesu

(Mt 3:13-17; Mk 1:9-11)

21 Mandal a fəki Yuhana gesin am jik dangay bugwən, hidi dolom yigi angər Yuhana, za Yuhana a ɗiyenta baptisma. Pic takan Yesu sliɗ va angər Yuhana, za Yuhana ɗiyen baptisma təm. Mandal Yesu a tar Bayzlav, njoɗ dibizlav zlər, 22 za Mbiɗ ngə Bayzlav səroho a wəzlav za. A wət kəsəm ngə ɓaram, yah ɗew atalan tik. Zlimi wəl ngə Bayzlav a luwen a Yesu, a luwen a wəzlav za acin: ‹‹ Hoh acin kərti ɗa, ta moyoh day day, hoh zəzay ngə nəv ngaɗa.››

Səban ngə Yesu hos am didi məkuturkutur

(Mt 1:1-17)

23 Tanjinhi di ngə Yesu ngər makaɗ acin, sin diw kə ɗiy kəzəɗ ngetik, Bayzlav mə vəlen kə ɗiyu. Hidigi a njə kə luw ta Yesu kər Zozef, Zozef kər Heli, 24 eli kər Matat, Matat kər Levi, Levi kər Melki, Melki kər Yuhana ay, Yuhana ay kər Zozef, 25 Yozef kər Matatiyas, Matatiyas kər Amos, Amos kər Nahum, Nahum kər Esili, Esili kər Nagay, 26 agay kər Mat, Mat kər Matatiyas, Matatiyas kər Semeyin, Semeyin kər Zozek, Zozek kər Zoda, 27 Zoda kər Zowanan, Zowanan kər Resa, Resa kər Zorobabel, Zorobabel kər Salatiyel, Salatiyel kər Neri, 28 Neri kər Melki, Melki kər Adi, Adi kər Kosam, Kosam kər Elmadam, Elmadam kər Er, 29 Er kər Yesu, Yesu kər Eliyezer, Eliyezer kər Zorim, Zorim kər Matat, Matat kər Levi, 30 Levi kər Simeyon, Simeyon kər Yahuda, Yahuda kər Zozef, Zozef kər Zonam, Zonam kər Eliyakim, 31 Eliyakim kər Meleya, Meleya kər Mena, Mena kər Matata, Matata kər Natan, Natan kər Dawda, 32 Dawda kər Yesa, Yesa kər Zobed, Zobed kər Bowaz, Bowaz kər Sala, Sala kər Nason, 33 Nason kər Aminadab, Aminadab kər Adimin, Adimin kər Arni, Arni kər Esirom, Esirom kər Fares, Fares kər Yahuda, 34 Yahuda kər Zakob, Zakob kər Izak, Izak kər Ibrahima, Ibrahima kər Tara, Tara kər Nakor, 35 Nakor kər Seruk, Seruk kər Ragaw, Ragaw kər Falek, Falek kər Eber, Eber kər Sala, 36 Sala kər Kaynam, Kaynam kər Arfakəsad, Arfakəsad kərti Sem, Sem kər Noye, Noye kər Lamek, 37 Lamek kər Matusala, Matusala kər Henok, Henok kər Zared, Zared kər Maleleyel, Maleleyel kər Kaynam, 38 Kaynam kər Enos, Enos kər Set, Set kər Adamu, Adamu acin hidi Bayzlav mə ndənu.