Mbuw ngə Yesu
(Mt 1:18-25)
2
Am mandal mə mbuwiy Yuhana, bay Roma məmar hayək roma cike, zlim ngetik Agustus. Sin luwen a hidiy cike kə viy kə ɗəɗefiy zlim ngatan am hayək ngatan. 2 Və kə ɗəɗefiy zlimi am hayək səna, a ton ngə tizin tik a liɓde Siriya, sin vərək bay Kiriniyus a bəgo. Mandal bay Kiriniyus awan mə bay, pic takan bay Roma səna luwen a bayigi: ‹‹ Mə va, mə ɗəɗef zlim ngə hidi təm hayək ngaɗa cike kaɗ. Ko yi mə sliɗ, məv tik am wərum ngə dehen, kə ɗəɗef zlim ngetik a bəgo.›› Ver səna, diw ɗəɗef ngə kambal buudu. 3 Hidi cike ma zlimiy ləbar ɗəɗef sən za, ko yi sliɗ və tik am wərum ngə dehen kə va kə ɗəɗef zlim ngetik a bəgo. 4 Hidi məpərmay ɗaha, zlim ngetik Zozef təm liɓde Nazaratu liɓde mendez, bay Galili məmaru. Ma zlim ləbar ɗəɗef sən za, sliɗ və tik am hayək Baytəlama təm hayək Yahudiya. Am liɓde Baytəlama səna, səban ngə bay Dawda acin tə bəgo. Zozef səna dehen ngə bay Dawda, sin acin mə va a liɓde. 5 A vigi avə midimi, Mari sin mə dəmu, kə ɗəɗefi zlim ngatan kaɗ. Mari a wana avə liɓi, 6 ma hosigi am liɓde sən za, nəp nəpigi gwedek abəgo, za pic mbuw ngetik hos acin. 7 A mbuw kərtawəl, tizin mbuw ngetik. Ma mbuw za, dəp kaɗ avə lukwət, wət ndəɗ am zəm ngə arayigi. A ndəɗ ta am lay zəm ngə arayigi kadaban a janiy jik ngə wan a liɓde səna ɓabəgwən, mbulukigi mə wətiy jik ngə wan cike wayza.8 Am liɓde Baytəlam anhi, hidi mə məgəlgəli ɗayi a bəgo. A njə kə wanigi a donu kə puwiy təmaki tan. 9 Ngə vuɗu səna, Mbaslay ngə Bayzlav pətaha a kibik tan, gədan mordoy ngə Bayzlav ɗiya zləzlaɗ atalan tan kəkay kəkay. Ma lim tə za, ɗiya hovokigi day day. 10 Mbaslay ngə Bayzlav ɗiya luwenta acin: ‹‹ Mə hovok kwən, təyah kə ceɗehinləbar malaw. Hidi cike av kə zəzayigi day day atalan tik. Mə zlimu, 11 Hidi məv kə mbəlehin mə mbuwa za ngə vuɗu nhi a liɓde Baytəlama. Sin acin Mordoy ngiykwan, Kristu Bayzlav mə welu kə mbəl hidigi . 12 Mə sliɗ mə va safaha. Hin məv kə jan kər mawar mə dəpah kaɗ avə lukwət, za mə ndəɗa kaɗ am zəm ngə arayigi, sin acin kər səna.›› 13 Mbaslay ngə Bayzlav ma luw atəgo za, mbaslay ngə Bayzlav məpərmayigi dolom dayday yigi a wəzlav za angər tik, lapigi avə sin. ɗiya səbaniy Bayzlav, a luw ta: 1 14 ‹‹ Bayzlav tə dibizlav a mar gədan mordoy. Nakam kə səban tik. Za Bayzlav mə vəlenta ɗew malaw a hidi tə talan mahayək, sin mə may ta.›› 15 Ma səbaniy Bayzlav za, jəɓi tan a dibizlav. Za hidi məgəlgəli səna ɗiya zləgamigi a dab tan acin: nəmkwan a Baytəlama kə safa təkən mə ɗiy a bəgo səna, Bayzlav mə ceɗe yikwan nhi.›› 16 Vigi angaw, vi janiy Zozef avə Mari ɓəw kər mawar mə ndəɗa kaɗ atalan zəm arayigi. 17 Ma lim tə za, ɗiya ceɗenta ləbar a hidi tə bəgo, mana mbaslay ngə Bayzlav mə ceɗenta atalan kər mawar səna. 18 Hidi təgo ma zlim tə za, nap luw ta: ‹‹ Anhi vu, hidi ɗa. Ya law godokwən.›› 19 Mari ma zlim sləgam ngə wəriy məgəlgəli, slek slek am talan, za a ɓən gendik am nəv za. 20 Adəwən səna mə gəlgəligi nhi jəɓi tan. Mandal a vigi a mozlokotuf, a səbaniy Bayzlav. A luw ta: ‹‹ Bayzlav, yikwan ma səbanoh, za yikwan ma luwoh soko day day atalan təkən yikwan mə zlimu, za yikwan mə limu nhi. Kadaban təkəniy səna mə ɗiya za tiɗ tiɗe mana mbaslay koh mə ceɗiy yikwan››.
Zozef avə Mari ɓəw Yesu am jik Bayzlav
21 Kər mawar ma ɗiy zəm luma takan za, pic zla məkibik ngetik tu hos za acin, ci zlim ngetik Yesu mana mbaslay ngə Bayzlav mə ceɗen a Mari mandal sin a ɗə liɓ gesin bugwən. 22 Mari tu way wan mawar ngetik, wan ngər foɗ mana məzugzugwa Musa mə luwu. Wan mawar ngetik ma way za, sliɗ vigi avə Zozef kə va am liɓde Ursalima. Ma hosigi a bəgo za, pətigi am jik Bayzlav. 23 Wəti kər mawar nhi, vəlenta a Bayzlav, sin kə martik. Mə ɗiy ta atəgo nhi, kadaban məzugzugwa ngə Bayzlav a luw: ‹‹ Mana werti tu mbuw kərtawəl, diw mbuw ngetik nhi, səna kə vəlenta kaɗ a Bayzlav.›› 24 Wəti ɓaramigi saray baha, mbəsawenta a Bayzlav, kadaban məzugzugwa ngə Bayzlav a luw baha: ‹‹ Wan mawar tu way wər, səna hin kə mbəsaw ɓaram saray, asənkwən ɓaram debin saray a Bayzlav.›› 25 Zəni hidi məpərmay ɗaha a Ursalima, zlim ngetik Simeyon. A mar nəv ma kweɗek, za a njə kə kaw mə taktak ngə Bayzlav ngər səsəray. A puw hidi məv kə yah kə mbəl hidi Israyiligi Bayzlav tu kə zlənaha. Mbiɗ ngə Bayzlav a wan atalan tik. 26 Mbiɗ ngə Bayzlav luweni: ‹‹ A musuf, hav kə lim Kristu Hidi Bayzlav tu kə zlənatik kə mbəl hidigi zagway.›› 27 Zozef avə Mari tepiy Yesu am jik Bayzlav mana məzugzugwa mə luwu. Mbiɗ ngə Bayzlav ngazl Simeyon səna a bəgo təm. 28 Simeyon wət kərti həmbət am bərbəra, za ɗiya səban Bayzlav. A luw: 29 ‹‹ Tanjinhi Məmar hidi, təkən hoh mə luw hov kə ɗiy tik, tu ɗiy tiɗ tiɗe mana hoh mə luwu. Tanjinhi a geɗ mə zlən zlən koh mə məcay tik acin. 30 Kadaban kata mə lim za avə həriya ngaɗa hidi hoh mə zlənaha kə mbəl hidigi . 31 Hidi hoh mə sləsləɓ za hidiy cike kə limta. 32 Sin av kə mbaɗ kə zləzlaɗ ngə ɗef am talan mahayək. Za av kə vəlen gədan mordoy a hidiy koh Israyiligi.›› 33 Simeyon ma way kə səban Bayzlav za, ləbar səna tu pərasl bərngəzl talan babay Yesu ɓəw mamay Yesu. 34 Simeyon ɗiya luwenta bah: ‹‹ Bayzlav mə gəl micin kin zoɗ,›› za luwen a mamay tik acin: ‹‹ Bayzlav acin mə wel kər nhi kə saf nəv ngə hidigi. Hidi Israyiligi dolom av kə buwenta dəwən, za hidi Israyiligi dolom baha, av kə səni mozlokotuf ngə səb Bayzlav. Hidigi av kə sən ta, sin acin hidi mə yah angər Bayzlav za. Amma hidi məpərmay av kə ɗiyenta mə ngav ngav. 35 A nhi kər nhi av kə gudoro ɓən ngə hidi dolom am lay ma varak. Hoh Mari, mə ngavngav ngə hidigi tu kə ɗiyenta a kərti koh, av kə hamoh am nəv mana hidi ta njə kə sək hidi avə njervek am bəra.›› 36 Mbusur werti məpərmay ɗaha, zlim ngetik Ana, kər Fanuyel. Səban ngetik ngə hidi Aser. Sin tu mbusur day day. A njə kə ceɗ ləbar ngə Bayzlav a hidigi. Mandal wilen midimi, sin dəm mawəl, ɗewigi avə sin di cisaray. 3 37 Zelen ma məc za, sin ɗewey tik kaɗ sin a ngetik, di ngər cəfaɗ cəfaɗ atalan foɗ. A njə kə ɗewey tik am jik Bayzlav kə ɗiy kəzəɗ ngetik vuɗu avə pic. A njə kə ɗiy dalyam, za a njə kə tar Bayzlav. 38 Am mandal səna, werti səna a wan a bəgo. Ma lim kər nhi za, ɗiya ɗiyen soko a Bayzlav. Diw kə ceɗen a hidigi mə puwiy hidi Bayzlav tu kə zlənaha kə mbəl hidi Isirayiligi. A luwenta: ‹‹ A nhi Hidi Bayzlav tu kə zlənaha kə mbəl hidigi, sin acin kər nhi.›› 39 Babay Yesu avə mamay Yesu ma wayi kəzəɗ ngatan kə ɗiy cike za mana məzugzugwa Bayzlav ta luwu, jəɓi tan a de a liɓde Nazaratu liɓde mendez təm hayək Galili. 40 Kər nhi a gəlay tik angər mamay tik, kəsəm ngetik law law, za bərngəzl talan ngetik wek avə sən. Za Bayzlav tuw ɗiyen ngər bay.
Yesu tu hos di gəɓ atalan saray
41 Am di cike babay Yesu avə mamay Yesu a njə kə vigi am liɓde Ursalima kə dari məmbəlwa ngə Paska. 42 Yesu ma hos di gəɓ atalan saray za, ɗiyi məmbəlwa səna mana mə njə kə ɗiy ta ma hoyhoy. Za Yesu səb babay tik avə mamay tik kə va am məmbəlwa səna. 43 Məmbəlwa ma cakway za, Yesu ɗewey tik adəwən am liɓde Ursalima. Babay tik avə mamay tik a sən ta kər ngatan tu zlay adəwən bugwən. A vi tan a de avə hidigi dolom. Mandal a vigi a mozlokotuf, taniy safi Yesu ɗah jagwar tan kwən. 44 ɗiya ɓənigi am nəv za: ‹‹ Av kə ɗiy a lapigi avə celenigi zen.›› Pic pic am lay va. Pic ma ndəv za, vi jar jariy Yesu, a jan tə ɓabəgwən. Vigi angər celenigi, jar jar ta, a jan tə ɓabəgwən. Wani kaɗ, 45 apat tik gbum sliɗiy, jəɓi baha am liɓde Ursalima kə jariy Yesu a bəgo. Mandal a vigi a mozlokotuf, a jar ta, jar jar, a jan tə ɓabəgwən. Pic pic lay jar ta. Ma hosigi am Ursalima za, wanigi kaɗ. 46 6 Apat tik gbum acin, sliɗiy vi jar jar, jan ta am jik Bayzlav, mə ɗewe kaɗ a dab mogroyiy jəgwan mə njə kə ceɗenta məzugzugwa ngə Bayzlav a hidigi. A zlim ləbar hidi ta ceɗ ta səna. Za a neh ta atalan təkəniy ma par par. 47 Hidi mə ɓas ɓasi təbəgo cike a luw ta: ‹‹ Kay, kər nhi, a sən zlaw mə nhi a ciki? Bərngəzl talan ngetik day godokwən.›› 48 Zozef avə Mari ma limi kər ngatan mə ɗewe kaɗ a dab hidi mogroyigi, tu pərasl bərngəzl talan tan. Mamay tik luweni: ‹‹ Hoh zləni yikwan banay anhi, kemi kərti ɗa? A saf, yikwan tu jaroh, jar jar, yikwan mə janoh bugwən, nəv ngiykwan tu mbir.›› 49 Yesu luwenta acin: ‹‹ Mə jarak ku atəgo kemi? Mə sən Vay Bayzlav tu welek kata kə ɗiy kəzəɗ am jik ngetik bəgwən vu?›› 50 Yesu ma luwenta atəgo za, mə səna tu pərasl bərngəzl talan babay tik avə mamay tik. 51 Adəwən səna acin Yesu sliɗ lapiy avə babay tik ɓəw mamay tik kə vi tan a de a liɓde Nazaratu liɓde mendez. Ma vigi a de za, Yesu a zlim mə ngatan mana ta micek. mamay tik slek slek təkən mə ɗiy nhi cike am talan. 52 Yesu a gəlay tik, a sən ma, za bərngəzl talan tik a zlər. Bayzlav avə hidi cike a may ta.