Ləbar Malaw atalan Yesu Kristu,
LUKA
mə ɗəɗefu
Mbeli a Tewofil
1
1-2 Ta ɗoh mbeli Mordoy ngaɗa, Tewofil. Hoh mə zlim təkən Bayzlav mə ɗiy taməcek a dab yikwan za. Hidiy mə limiy təkəniy səna avə həriya ngatan diga am diw tik, yə ceɗiy yikwan. Za Bayzlav tu zlən ta, kə ceɗ ləbar ngetik a hidigi təm. Tanjinhi acin hidiy par par a dab yikwan tu ɗəɗefiy təkəniy səna kaɗ mana mə zlim ta. 3 Ya kata təm, kata tu may kə ɗəɗef təkəniy nhi cike a hoh Mordoy ngaɗa. Kadaban səna, kata va angər hidigi y səna kə neh təkəniy nhi a neh kə jan kə sən mə tik law law. 4 Ta ɗəɗefeh təkəniy nhi acin, kə jan hoh kə sən tik ləbar hidiy mə ceɗiy nhi, mindiwin.Mbaslay ngə Bayzlav avə Zakari
5 Am diw tik, bay Heridus acin məmar hayək Yahudiya. Am mandal səna hidi məpərmay ɗaha, mə ɗiy məzugzugwa təm jik Bayzlav, zlim ngetik Zakari. A njə kə ɗiy kəzəɗ ngetik avə celeniy məpərmay. Abiya acin mordoy tə dab tan. Zakari awana werti, zlim tik Elizabet vənen ngə Haruna mordoy ngə mə ɗiyiy məzugzugwa təm jik Bayzlav ta micek. 6 Taniy avə zelen nəv ngatan kweɗek kweɗek a kibik Bayzlav. A njə kə səbiy mə taktak ngə Bayzlav law law. 7 A janiy kər ɓabəgwən kadaban Elizabet midili, za tu ɗiyiy mbusur. 8-9 Pic takan, wan ngə ɗiy kəzəɗ mə zugzug təm jik Bayzlav tu hos atalan ta Abiya, hoyhoy a njə kə ɗeweriy metentenge kə jan kə wəzakiy kəzəɗ mana mə zugzugwa ngatan mə mayu. Nap ɗewerta, metentenge ndəv atalan Zakari tafnan sin kə va am jik ngə Bayzlav kə kəɗaw tubu ngə pay mə njə kə njif nek mana dorson. Ma sən kəzəɗ ngetik za, pət am jik ngə Bayzlav kə kəɗaw tik acin. 10 Mandal sin ta kəɗaw tubu ngə pay səna, hidiy a waniy cike a caɗak, a tariy Bayzlav. 11 Za Mbaslay ngə Bayzlav pətaha a kibik Zakari, mə gara kaɗ am ngər zəm ngə lay ta njə kə kəɗawiy tubu ngə pay a kimin səna. 12 Zakari ma lim za, ɗiya hovok, a nəhnəh. 13 Mbaslay ngə Bayzlav luwenni : ‹‹ Hoh gər kə hovok kwən Zakari, Bayzlav mə yək tar koh za. Werti koh Elizabet av kə ɗə liɓi kə mbuw kərtawəl. Mana mə mbuwa za, hoh kə cen zlimiy Yuhana . 14 Hoh kə zəzay day day atalan tik, za hidi dolom tu kə zlimiy ləbar mbuw ngetik, nəv ngatan av kə ɗiy nek godokwən. 15 Kadaban mi, kər səna tu gəl, Bayzlav av kə mbaɗ tik kə hidi mordoy, av kə ɗiy kəzəɗ ngetik. A sa movu kwən, za ko təkən ngə sa məpərmay tavə njem mə njə kə hay hidi, a sa kwən. Mandal sla pic mbuw ngə kər səna tu hos, Bayzlav av kə wek nəv ngetik avə Mbiɗ ngə Bayzlav ngetik. 16 Avə kəzəɗ ngetik tu kə ɗiyu, hidi Israyiligi dolom av kə jəɓi kaɗ, kə səbiy mozlokotuf ngə mordoy ngiykwan Bayzlav. 17 ‹‹ Av kə hosoho məpəlpəla mana mə zlən zlən a kibik ngə Mordoy ngiykwan, avə bərngəzl talan ngetik ɓəw gədan mordoy ngetik mana mokotuf ngə Bayzlav ta micek, zlim ngetik Eli. Av kə ngəz babay wərigi avə wəriy ngatan kə ɗewiy ɗew malaw, za av kə ngəz hidi mə buwentadəwən a Bayzlav kə ɗewiy kə hidi ngetik. A nhi acin av kə ceɗenta a hidi Israyiligi səna kə buwi nəv ngatan kaɗ kə yəki Mordoy ngiykwan tu kə yah.›› 18 Zakari ma zlim za, luwen a mbaslay ngə Bayzlav acin: ‹‹ Kat kə sən ləbar hoh ta ceɗek nhi mindiwin wər, kata kə sən aceki ? Ndah, yikwan avə werti ɗa, yikwan tu ɗə mbusur.›› 19 Mbaslay ngə Bayzlav ɗiya luweni: ‹‹ Kata Gabriel, kata mbaslay ngə Bayzlav, kata wan a kibik Bayzlav, ta ɗiy kəzəɗ ngetik. Sin acin mə zlənaku angər koh kə ceɗe ləbar malaw nhi. 20 Ləbar kata mə ceɗe nhi, pic tik mə hoso za wər, av kə ɗiy tiɗ tiɗe mindiwin. Amma hoh, nəv koh mə wəzən kə yək ləbar ngaɗ nhi, tanjinhi hav kə mbaɗ kə wəya, nha am pic mbuw ngə kər səna.››
21 Mandal mbaslay ngə Bayzlav a luwen anhi, hidi mə ɓas ɓasi tə caɗak, a zləgamigi: ‹‹ Zakari wər a ɗiy mi, lek lek a jik nhi?›› 22 Puw puw ta, gwedek pətah a caɗak acin. Təl kə zləgamen a hidigi, a ɓəs kə zləgam ɗaɗaba. Hidi sən ta, Zakari mə lim təkən ma tuwnha za. A kəz ngəra kə zləgamenta acin. 23 Hoyhoy Zakari a njə kə ɗiy kəzəɗ am jik Bayzlav. Wan kəzəɗ ngetik ma way za, sliɗ və tik a de acin. 24 Gwedek werti tik Elizabet ɗə liɓi, ɗewey tik a de tər joɓən, a pətah a caɗak ɗahkwən. A luw: 25 ‹‹ Bayzlav mə saf kaymah ngaɗ za, za tu gas weli tə talan ɗə kaɗ.››
Mbaslay ngə Bayzlav avə Mari
26 Elizabet ma ɗə liɓi, tər tik kwəh, za Bayzlav zlən mbaslay ngetik Gabiriyel kə va a liɓde Nazaratu liɓde mendez təm hayək Galili. 27 A zlən angər midimi məpərmay, zlim ngetik Mari. Midimi səna hidi məpərmay a dəm tik, zlim ngetik Zozef. Zozef səna dehen bay ngə Dawda ta micek. 28 Mbaslay ngə Bayzlav ma hos a liɓde sən za, va angər midimi səna, ɗen mbeli, luweni: ‹‹ A ɗew avə zəzay, Bayzlav tu vəloh malaw ngetik, sin a wana avə hoh.›› 29 Mari ma zlim ləbar sən za, tu pərasl bərngəzl talan tik, ɗiya ɓən am nəv za, a luw: ‹‹ Gawəl nhi a ceɗ mi ?›› 30 Mbaslay ngə Bayzlav mə sən nəv ngə Mari za, luweni: ‹‹ Hoh gər kə hovok kwən, nəv ngə Bayzlav nek avə hoh. 31 Hav kə ɗə liɓi, za hav kə mbuwa kərtawəl. Mana hoh tu mbuw, hoh kə cen zlimiy Yesu. 32 Kər səna av kə ɗew kə hidi mordoy, za hidi cike av kə ɗefentəma kər ngə Bayzlav tu wəzlav. Mordoy yikwan Bayzlav av kə mbaɗ tik kə bay mana dehen bay Dawda ta micek. 33 Av kə mar hidi Israyiligi ko a pu, za mar lay ngetik a way kwən.›› 34 Mari ɗiya luwen a mbaslay ngə Bayzlav: ‹‹ Mbuwa ɗa a liɓ may za, tə sənak mawəl bugwən, ya kata kə ɗə liɓi səna acin aceki ?›› 35 Mbaslay ngə Bayzlav luweni: ‹‹ Mbiɗ ngə Bayzlav av kə yah atalan koh, avə gədan ngetik av kə ɗiy təkən atalan koh, hoh kə ɗə liɓi. Kadaban səna, kərti hoh tu kə mbuwaha, av kə ɗew kə hidi njə nəv ma kweɗek. Za hidigi av kə sən ta, sin Kər ngə Bayzlav. 36 A saf gelceh Elizabet, sin tu ɗə mbusur, amma tu ɗə liɓi. Hidigi tu luw ta, sin a jan kər kwən, tanjinhi mə jan za. Tər liɓ ngetik kwəh. 37 Kata ceɗe, təkən mə day gədan ngə Bayzlav ɗahkwən .›› 38 Mari ma zlim atəgo za, ɗiya luweni: ‹‹ Bayzlav acin məmarak ku, mə ɗiyak təkən mana hoh mə ceɗek nhi.›› Gwedek mbaslay ngə Bayzlav lekey tik am həriya ngetik za.
Mari avə Elizabet
39 Wan gwedek, Mari sliɗ va avə si kə safa Elizabet a liɓde məpərmay təm hayək Yahudiya. Liɓde səna a wan talan wurum. 40 Ma hos za, pət a de Zakari, və ɗen mbeli a gelcin Elizabet. Ɗiya luweni: ‹‹ Soko galvay.›› 41 Am mandal ta ɗen mbeli səna, kər tə liɓ Elizabet ɗiya kəz, za Mbiɗ ngə Bayzlav wek nəv ngə Elizabet baha. 42 Elizabet a ɗəɗel, a zəzay day day, za luwen a Mari: ‹‹ Bayzlav tu vəloh malaw ngetik day ngə werti məpərmayigi cike. Za kər tə liɓ koh nhi təm, Bayzlav av kə gəl micin tik zoɗ. 43 Kay, hoh mamay ngə Mordoy ngaɗa, za kə yah a de ngaɗ anhi, a ɗiy a ciki? Tu hos gəga zav vu? 44 A saf hoh mə ɗak mbeli nhi, kərti tə liɓi ɗa tu zəzay, za tu kəz. 45 Nəv koh mə fet, kadaban hoh mə yək ləbar ngə mbaslay ngə Bayzlav mə ceɗe nhi, za hoh mə sən za, av kə ɗiy tiɗ tiɗe mindiwin.››
Dirif ngə Mari
46 Mari diw kə jək dirif acin kə səban Bayzlav. A luw: ‹‹ Ta səban Bayzlav Mordoy ngiykwan, 47 za nəv ngaɗ nek godokwən avə sin mə mbəlak ku. 48 Kata wa werti məpərmay dap, tə njə kə ɗiy kəzəɗ ngetik avə nəv malaw, za talan ngetik a zlay avə kata ɗahkwən. Yaw mindiwin, dəga tanjinhi, ko a pu, hidigi av kə zləgamigi atalan ɗa: ‹Bayzlav mə ɗiyen malaw za ta.’ 49 Kadaban Bayzlav ma məmar gədan cike, tu ɗiy təkən ma tuwnha atalan ɗa. Sin hidi ma kweɗek 50 A njə kə saf kaymah ngə hidi ko a pu, a njə kə saf kaymah ngə hidimə njə kə ɗiyi kəzəɗ ngetik mana sin ta mayu. 51 Bayzlav gədan ngetik ɗaha day day ngə ɗiy təkən mordoy. A njə kə cakway ɓən ngə hidi ta fali talan tan. 52 Bayigi mə njə kə mariy lay avə gədan, a njə kə goɗ tə kaɗ. Za a njə kə vərək hidi mə njə kə daɓi talan tan. 53 Hidi mə zləmi mətis, tu vəlenta zəm malaw, hidi mə njənjigi a vəlenta ɓabəgwən, gam ta ngər maymay. 54 Yaw mindiwin, Bayzlav tu məna yikwan, yikwan Israyiligi mə njə kə ɗiyenta kəzəɗ. Tu ɗiy tiɗ tiɗe mana mə ceɗenta a didi ngiykwan. 55 Aməcek Bayzlav tu ɗiyen malaw a Ibrahima, za talan ngetik a zlay avə yikwan səban ngə Ibrahima ɓabəgwən. Kula a picah a ɗiy yikwan malaw, za malaw ngetik a way ɗahkwən, ko a pu.›› 56 Mari ma way jək dirif ngetik za, ɗewigi avə Elizabet tər makaɗ. Adəwən səna sliɗ və tik a de.
Mbuw ngə Yuhana mə pan baptisma
57 Tər mbuw ngə Elizabet tu hos acin. A mbuw kərtawəl. 58 Kadaban Bayzlav mə ɗiyen malaw ma day day a Elizabet, njoɗ medigi tan ɓəw vənen tan zlimiy ləbar səna, ɗiya zəzayigi witikwitik avə sin. 59 Kər mawar sən ma hos zəm luma takan za, hidi yigi kə zliy məmən ngetik kaɗ. A gəri kə centə zlimiy Zakari mana zlim ngə babay tik. 60 Mamay kərti ɗiya luw: ‹‹ Awwo, atəgo kwən. Yikwan məv kə cə zlim ngetik Yuhana .›› 61 Hidigi luw ta: ‹‹ Ya, a dab vənenhigi wər, hidi njə zlim mana təgo ɗaha vu?›› 62 Pəteki babay kər səna avə ngəra, neh ta: ‹‹ Hoh may kə cə zlimiy a kərti nhi aceki ?›› 63 Babay kərti səna neh pay ma kaslapərap kə ɗəɗef zlim ngə kər səna a kimin. Vəlenta, ɗəɗef a ɗəɗef: “zlim tik Yuhana.” Za ɗiya pərasl bərngəzl talan tan cike›› 64 Gwedek, gana ngə Zakari ɗiya pəsl: diw kə səban Bayzlav. 65 Təkəni sən ta ɗiy mana təgo nhi, medigi tik a hovokigi. A cakwayi ləbar tə talan kər mawar səna am hayək Yahudigi tu wurum, za hidi cike mə zlim tə za. 66 ɗiya ɓənigi day day, nap luw ta: ‹‹ Kər nhi av kə mbaɗ kə mi,?›› Kadaban mindiwin gədan ngə Bayzlav a wana avə sin.
Drif ngə Zakari
67 Zakari babay ngə Yuhana nhi,Mbiɗ ngə Bayzlav yah atalan tik, za ɗiya səban Bayzlav. Diw kə ceɗ ləbar atalan təkəniy Bayzlav tu kə ɗiyu. A luw acin: 68 ‹‹ Nakam kə səban Mordoy ngiykwan Bayzlav mə njə kə puw hidi Isirayiligi. Tu saf kaymah ngə hidi ngetik, za tu mbəl ta. 69 Tu zləna yikwan hidi məv kə hos gəga kə mbəl yikwan. Mə mbəl yikwan nhi, dehen ngə bay Dawda mə ɗiy kəzəɗ ngə Bayzlav ta micek. 70 Bayzlav tu ceɗe yikwan təkəniy nhi avə mə ngə mokotuf tikigi malawi ta micek. 71 Tu luwen a didi ngiykwan: ‹Təv kə mbəl didi ngikin am nəv ngər mosum ngikin za, ɓəw am nəv ngər ngə hidi mə zeli hin. 72 Mə luw atəgo səna, sin mə saf kaymah ngə didi ngiykwan za, za mə ɓəna za atalan jaw ma kata mə jaw avə tanigi.’ 73 Pərak pərak a sən baha, Bayzlav mu luwen a didi ngiykwan Ibrahima a micek: ‹Ta luw mbeɗ, 74 təv kə mbəl dehehigi am nəv ngər mosum kin za, ɓəw təv kə məne hin kə ɗiy kəzəɗ ngaɗa mətak hovok. 75 Təv kə məne hin, hin kə mar nəv ma kweɗek, za hin kə ɗiy təkən hoyhoy mana kata mə mayu, ko a pu.’ 76 Amma hoh kərti ɗa wər, hav kə ɗew kə mokotuf ngə Bayzlav tu wəzlav. Hoh kə ɗew kə hidi mə zləzlaɗ mozlokotuf, Mordoy ngiykwan kə yah a kimin za. 77 Za kə ceɗen a hidigi, kə buwi nəv ngatan kaɗ, Bayzlav av kə geɗ mə ngavngav ngatan kaɗ, kə mbəl micin ngatan kaɗ. 78 Təkən nhi av kə ɗiy mindiwin mana Bayzlav mə luwu, kadaban Bayzlav a may hidi day day, ɓəw a njə kə ndelek hidigi godokwən. Av kə zləna yikwan lay ma kweɗek a wəzlav za kə zləzlaɗ nəv ngiykwan mana pic ta mbireh a madaba lay za. 79 Lay ma kweɗek səna av kə zləzlaɗ atalan hidi təm lay ma zigwit mə njə kə hovoki avə məc. Av kə ngazli yikwan angər Bayzlav, yikwan kə lap kə ɗew avə sin.›› Zakari tu way dirif ngetik acin. 80 Tanjinhi, kər Zakari a gəl, za bərngəzl talan ngetik a zlər baha. Sin ɗew a dab donu, ɗewɗew nha hos am pic mə ɗef talan ngetik a hidi Isirayiligi.