Yesu zləgam atalan pic nəp ngə Yahudigi
12
Mandal sənan, pic nəp ngə Yahudigi, Yesu avə wəriy gawliy ngetik aa toniy aa mə tuz ngirmi maa cehceh a ngirmi hiziɗ maa cece ngirmi maa cehceh a ngirmi hiziɗ. Mandal taniy ta toniy səna, mitis hamen a wəriy gawliy ngetik. Taniy ɗiya kariy ngirmi maa cehceh a ngirmi hiziɗ səna, hamta. 2 Farisiy maa limta za, ɗiya luwenta a Yesu: ‹‹A safu! Wəriy gawliy koh a ɗiyiy təkən maa mə jawjaw ngiykwan, a geɗen mozlokotuf a hid kə ɗiy tik am pic nəp ngiykwan bəgwən.›› 3 Yesu zlawenta, ɗiya luw: ‹‹Hin mə saf am mə jawjaw ngə Musa, təkən bay Dawda avə hidiy ngetik mə ɗiyta am pic nəp, mandal mitis mə wəzlenta bəgwən vu? 4 Taniy pətiy am jik Bayzlavª, wətiy bret mə ɗerenta a Bayzlav. Za hamta avə hidiy ngetik. Zəmaa mə jawjaw a geɗenta mozlokotuf a hidiy cike kə hamta bəgwən, say masayiy a gandan acin ngə hamta. 5 Asənkwən hin mə saf mə ɗəɗefta am mə jawjaw ngə Musa bəgwən vu? Am pic nəp, masayiy a njə kə ɗiyiy kəzəɗ am jik ngə Bayzlav. Taniy a səbiy mə jawjaw bəgwən. Zəɗər a zlenta dalgway bəgwən. 6 Zəni kata ceɗehin, tanjinhi awənhi, hid maa zay tik day jik Bayzlav ɗaha. 7 Bayzlav a luw am deftere ngetik: ‹Kat tə may hid kə saf kaymah ngə hidi, day kə təkəniy huvu hidiy ta bənakta.› Mana hin maa sən madaba ma səna ɗaha, hin mə saf hidiy səna wa mə ɗiyiy mə ngavngav za kwən. 8 Kat Kər Hidmemblen acin maa kwəl kə ceɗ kəzəɗ ngə ɗiy am pic nəp.››Yesu mbəl hid njə ngər mə məcməc
9 A dəwən səna, Yesu sliɗ aa bəgo za, va pət am jik jəgwan ngə Yahudigi. 10 Sin jan hid məpərmay abəgo. Hid səna ngər ngetik ma takan tu məc. Hidiy nehiy Yesu kə jan kə ɗəfta, ɗiya luwenta: ‹‹Mə jawjaw ngiykwan mə vəl mozlokotuf za kə mbəl hid am pic nəp vu?›› 11 Yesu zlawenta, ɗiya luw: ‹‹Mana hid tə dab kin a mar təmak takan dap, za təmak ngetik tu ndəv am wil ma kpum am pic nəp wər, ɗah kə ɓiyah kaɗ aa wil za kwən vu? 12 Zay ngə hidmemblen day kə təmak. Asəna acin, mozlokotuf ɗaha ngə ɗiy malaw am pic nəp.›› 13 Za acin Yesu luwen a gawal səna: ‹‹A zər ngəra koh.›› Sin zər ngəra ngetik! Njoɗ ngəra ngetik lawlaw wa ngəra məpərmay. 14 Farisiy maa limta atəgo za, sliɗigi, viy tan a caɗak, ɓasiy kə jariy wirwir ngə wəzl Yesu kaɗ.
Yesu acin hid mə ɗiy kəzəɗ ngə Bayzlav
15 Mandal Yesu maa zlim farisiy aa gər kə wəzlta kaɗ za, sin vətik aa bəgo za. Mandal sin aa va tik, hidiy dolom səbta. Sin mbəl hidiy cike mə daldaliy tə dab tan kaɗ. 16 Zəni sin ndəl hidiy sin mə mbəlta səna avə gədan, ɗiya luwenta: ‹‹ Mə gər kə ceɗen a hidiy kata acin mə mbəlehin kwən.››
17 A ɗiy atəgo nhi, kə jan kə ɗiy tiɗtiɗe mana Bayzlav mə luw avə ma ngə mokotuf ngetik Esaya. Sin a luw:
18 ‹‹Anhi hid mə ɗiy kəzəɗ ngaɗa, kat mə welu.
Kat a may tik, sin mə fetek nəv za dayday.
Təv kə vəlen Mbiɗ ngaɗa.
Za av kə ceɗen a hidiy səban tan par a yahudigi, Bayzlav av kə zlen dalgway a hidigi a mozlokotuf tik.
19 A gəɓəz a hid kwən,
a cəwəla hayya kwən,
hid a zlim wəl ngetik am lay mgbəw kwən.
20 Sin ɗah kə way kə nga ken mə tərɓəsl-tərɓəsl kwən.
za sin ɗah kə məc cəbelbel taa gər kə məc kwən.
Av kə ɗiy atəgo hos am pic sin tu kə taken wəla a hidiy kə ɗiyiy təkən avə mozlokotuf tik.
21 Za hidiy ma səban tan par a yahudigi, av kə bəbəciy atalan tik.››
Yesu a jan gədan kə gam musuruf angər yi?
22 A dəwən səna, hidiy dahiy hid njə musuruf tə kəsəm angər Yesu. Musuruf səna acin mə huluf tik ɓəw mə mbaɗ kaɗ kə wəya. Yesu mbəl gawal səna kaɗ, sin ɗiya zləgam, peɗenpeɗen, aa lim lay. 23 Hidiy cike mə ɓasɓas maa limta atəgo za, taniy gərən gərən, ɗiya luwta: ‹‹Gawal nhi acin kər ngə Dawda kwa?››
24 Farisiy wər maa zlimiy zləgam ngə hidiy səna za, ɗiya luwta: ‹‹Belzebul bay musuruf acin mə vəlen gədan a gawal nhi kə gam musuruf səna.››
25 Yesu mə sən ɓən ngatan za, ɗiya luwenta: ‹‹Mana hidiy təm bay takan a zlerima ɗahkwən a jəgəmiy am walan tan, bay səna av kə cakway. Mana a liɓde takan asənkwən am səban takan hidiy a zlerima ɗahkwən, hidiy səna av kə cakwayigi. 26 Wa səna təm, mana Sayɗanu bay musuruf aa gam musuruf aa kəsəm hidiy za, sin a ɗiy jəgəm atalan tik. Za bay ngetik a gar za vu? 27 Mana kat tə gam musuruf avə gədan ngə Belzebul bay musuruf mana hin mə luw wər, hidiy kin təm a gamta avə gədan ngayi? Hidiy kin səna acin tu kə luwta təkən hin taa zləgam atalan ɗa nhi mindiwin kwən. 28 Amma kata ceɗe hin, Mbiɗ ngə Bayzlav acin mə vəlak gədan kə gam musuruf tə kəsəm hidigi. Asəna acin, pic Bayzlav tu kə zəm bay atalan kin tu hos.
29 ‹‹Hid ngə pət a de ngə gawal məmar gədan kə həl təkəniy tik ɗahkwən. Say sin kə jaw gawal njə gədan səna kaɗ zagway, za kə diw kə gas təkəniy tə de ngetik cike wayza. 30 Hid maa aa lap a kata ɗahkwən, sin aa ngav kəzəɗ ɗa. Hid maa a mənak kə lap hidiy kə səbiy mozlokotuf ngə Bayzlav bəgwən, sin a cakway hidigi. 31 Kadaban səna acin, kata luwehin: Təkəniy mə ngavngav hidiy ta njə kə ɗiyta cike, zləgamiy mə ngavngav hidiy ta njə kə zləgamta atalan Bayzlav, Bayzlav av kə geɗenta kaɗ. Amma hid mə zləgam ma mə ngavngav atalan Mbiɗ ngə Bayzlav, Bayzlav a geɗ mə ngavngav ngetik kaɗ kwən. 32 Mana hid tu zləgam ma mə ngavngav atalan Kər Hidmemblen, Bayzlav av kə geɗ mə ngavngav ngetik kaɗ. Amma mana hid tu zləgam ma mə ngavngav atalan Mbiɗ ngə Bayzlav, Bayzlav a geɗen mə ngavngav səna kaɗ kwən, ko am ɗew maa tanjinhi, ko am ɗew tə kibik.››
Ɗaw kə səniy pay am mə mbuw mbuw tik
33 Yesu ɗiya luw baha: ‹‹Pay malaw ɗaw kə mbuw wəriy tik malaw. Pay mə ngavngav təm ɗaw kə mbuw wəriy mə ngavngav. Hidiy ɗaw kə səniy pay aa mə mə mbuw-mbuw tik za. 34 Hin hidiy mana kurslu, hin hidiy mə ngavngav. Zləgam malaw av kə pətah a kəma kin za aceki ? Təkən maa wek təm nəv ngə hidi, sin acin taa njə pətaha am ma ngə hid səna. 35 Hid malaw ɗaw kə pətah təkən malaw təm nəv ngetik. Hid mə ngavngav ɗaw kə pətah təkən mə ngavngav təm nəv ngetik. 36 Mindiwin kata luwehin, hidiy av kə zlawiy ma atalan ma ngatan mə ngavngav a kibik Bayzlav, am pic sin tu kə zla dalgway ngə hidigi. 37 Bayzlav av kə luwoh, hoh hid malaw asənkwən, hoh hid mə ngavngav am zləgam tə kəma koh.››
Yesu a may kə ɗiy təkəniy ma tuwah ɗaba
38 A dəwən səna, mogroy ngə jəgwan sənan ɓəw Farisiy luwenta a Yesu: ‹‹Mordoy, a ɗiyiy yikwan təkən ma tuwah, kə jan yikwan kə sən tik Bayzlav acin mə zlənoh.›› 39 Yesu zlawenta, ɗiya luw: ‹‹Hin hidiy maa tanjinhi, hin hidiy mə ngavngav. Hin tu buwen dəwən a Bayzlav. Za hin maa may kat kə ɗiyehin təkən ma tuwah, kə jan hin kə sən tik Bayzlav acin mə zlənakku. Amma tə ɗiyehin təkən ma tuwah ko takan kwən. Səna kə ɗiy təkən ma tuwah mana Bayzlav mə ɗiyu atalan mokotuf ngetik Yonas a gendik. 40 Mana Yonas mə ɗew vuɗ makaɗ ɓəw pic makaɗ aliɓ kilif, Kər Hidmemblen av kə ɗew vuɗ makaɗ ɓəw pic makaɗ aliɓ civ təm.
41 ‹‹Mandal Bayzlav tu kə zla dalgway ngə hidigi, hidiy tə Niniwe av kə centa wəla am dalgway a hidiy maa tanjinhi, za av kə zlenta dalgway kadaban taniy mə buwiy ngar ngatan kaɗ mandal Yonas mə ceɗenta zləgam ngə Bayzlav. Ya tanjinhi acin, hid ɗaha awənhi day kə Yonas, za hin mə zlimen ma bəgwən. 42 Mandal Bayzlav tu kə zla dalgway ngə hidigi, bay werti təm hayək Seba av kə centa wəla. Za av kə zlen dalgway a hidiy tapica atalan mə ngavngav ngatan, kadaban sin a yah aa madabah lay za kə zlim zləgam tav sən ngə Suleymanu. Ya tanjinhi acin hid ɗaha awənhi day Suleymanu, za hin maa cəcef ɗahkwən.››
Mbiɗ mə ngavngav jəɓ am lay tik
43 Yesu ɗiya luw baha: ‹‹Mana mbiɗ mə ngavngav tu pətah tik aa kəsəm hid za, a njə kə tiwirey tik a dab donu kə jar lay nəp. Zəni aa jan lay ɗahkwən. 44 Za sin ɗaw kə luw aa mə nəv za: ‹Kat təv kə jəɓ ɗa am lay kat mə pətah taa bəgo za!› Mandal sin tu hos abəgo, av kə jan lay səna təkən kimin ɗahkwən. Mə zlaɗah kaɗ, mə zaɓah kaɗ law law. 45 Za acin sin av kə buw a dab donu baha, kə jarah musurufiy cisaray ma lem day kə sin, kə yiy kə pətiy a kəsəm gawal tafnan. Za gawal səna av kə sə takwan day ngə tizin. Wa səna, av kə ɗiy a hidiy mə ngavngav tapica təm.››
Mahmay ngə Yesu ɓəw galmənigi
46 Mandal Yesu awəlen a zləgam a hidigi, galmənigi avə mahmay tik hosigi. Taniy gariy a caɗak, a jariy kə zləgamenta. [ 47 Hid məpərmay ɗiya luwenni: ‹‹Mordoy, mahmay koh ɓəw golmocohiy awaniy a caɗak a mayiy kə zləgamiy avə hoh.››] 48 Yesu zlawenni, ɗiya luw: ‹‹Mahmay ɗa acin yi? Za galmayɗigi acin yi?›› 49 Zəni sin sək ngəra atalan wəriy gawliy ngetik, za ɗiya luw: ‹‹Anhi mahmay ɗa! Anhi galmayɗigi! 50 Kata ceɗehin, ko hid ngayi mə ɗiy may ngə Vay tə dibizlav, sin acin galmayɗa ɓəw mahmay ɗa.››