Yesu a zləgam atalan Yuhana mə njə kə juroɓ baptisma
11
Yesu maa way kə ceɗ təkəniy maa parpar səna a wəriy gawliy ngetik ma gəɓ atalan saray za, sin sliɗ tik aa bəgo za. Va kə ceɗ Ləbar malaw ngə Bayzlav ɓəw kə jəgwanen təkən a hidiy tə liɓdiy ma parpar təm hayək yahudiya.2 Am mandal səna, Yuhana mə njə kə juroɓ baptisma awan am jik jaw. Abəgo, sin zlim ləbar atalan təkən Kristu taa ɗiyu. Za sin zlən wəriy gawliy ngetik kə nehiy Yesu. 3 Kə luwenta: ‹‹Hoh acin Kristu hid tu kə yah yikwan ta puw tik nhi vu, asənkwən yikwan kə puw hid məpərmay vu? ›› 4 Taniy maa viy za, nehta atəgo . Za Yesu zlawenta, ɗiya luw: ‹‹Mə va ceɗen a Yuhana ləbar hin mə zlimu ɓəw təkən hin mə limu. Anhi təkəniy səna: 5 Hulufiy aa limiy lay baha, vəderiy aa viy law law, mbəlah ngə kwalkwaliy tu ɗizigi. Za mədəgəzliy aa zlimigi. Hidiy mə məcməciy tu mbəliy aa mə məc za. Zəni hidiy təm sanha aa zlimiy Ləbar Malaw kat mə ceɗenta. 6 Hid maa a səb aa kə vəlak nəv ngetik, nəv ngetik av kə ɗew avə zəzay.››
7 Wəriy gawliy ngə Yuhana maa zlimta atəgo za, sliɗ jəɓiy tan. A dəwən səna, Yesu ɗiya zləgam atalan Yuhana a zəgudu. Sin luw: ‹‹Mandal hin mə njah a dab donu nhi, mə jan təbəgo mi? Hin mə lim ken mbiɗ taa kəz tik vu? 8 Ya hin mə njah kə safah acin mi? Hin mə njah kə safah hid mə kwəl ləkwət malaw vu? Hidiy mə njə kə kwəliy ləkwət malaw a njə kə ɗewiy ade bay. 9 Hin mə nja kə safah mi? Hin mə njah kə safah mokotuf ngə Bayzlav kwa? Mindiwin kata a ceɗehin, hid hin mə njah kə safah səna, sin acin Yuhana. Sin day gədan ngə mokotuf ngə Bayzlav. 10 Sin acin hid Bayzlav mə zləgam tə talan tik am Deftere. Sin a luw:
‹Anhi ta zlən mokotuf ngaɗ məpəlpla kə hoh
kə sləsləɓoh mozlokotufª.›
11 Kata ceɗehin lawlaw, a dab hidiy təm talan mahayək cike wayza, ko hid mə day Yuhana avə mordoy ɗahkwən. Zəɗər hid mendez təm bay ngə Bayzlav, sin mordoy day Yuhana səna. 12 Dəga am mandal Yuhana taa ceɗ ləbar ngə Bayzlav hos apica, hidiy aa takiy hidiy kə pətiy am bay ngə Bayzlav kwən. Za hidiy məpərmay aa təlta avə gədan ngatan cike wayza kə jan kə pətiy am bay ngə Bayzlav. 13 Mokotufiy ngə Bayzlav cike ɓəw Musa am mə jawjaw ngetik, tu zləgamiy atalan bay ngə Bayzlav, hos am mandal Yuhana mə yah. 14 Mana hin maa may kə yək ma ngaɗa, mə sənu, Yuhana səna acin Eliya hid tu kə yah. 15 Hid məmar zlimi kə zlim tik, mə zlimu!››
16 ‹‹Kat kə sla hidiy tapica avə mi? Taniy wa wəriy mə ɓasɓas tə kəmay. Wəriy sənan luwenta a məpərmayigi. Ɗiya luwta: 17 ‹Yikwan mbizehin falam, za hin mə dar ɓahbəgwən! Yikwan tu jək drif mimci, za hin mə han bəgwən!› 18 Kat tə luw atəgo kadaban Yuhana yah aa zəm gəda malaw ɗahkwən, ɓəw aa sa movu ɗahkwən. Zəni hidiy a luwta: ‹‹Sin aa wək.›› 19 Kər Hidmemblen yah, aa zəm gəda malaw za aa sa movu. Zəni hidiy luwta: ‹‹Hid mə hamham ɓəw hid mə hayhay anhi. Sin ngwalay ngə hidiy mə yəkiy buhdu ɓəw ngə hidiy mə ngavngav! Amma mana hid aa lim təkən Bayzlav taa ɗiy tik avə sən ngetik, hid aa sən tik Bayzlav a ɗiy kəzəɗ malaw.››
Liɓdiy maa a vəliy nəv ngatan a Yesu bəgwən
20 A dəwən səna, Yesu diw kə ndəl hidiy tə liɓdiy sin mə ɗiy təkəniy ma tuwah parpar tə bəgo. A ndəlta makavay hidiy təbəgo a buwiy ngar ngatan bəgwən. Sin luwenta: 21 ‹‹Takwan av kə janehin hin hidiy tə liɓde Korajin ɓəw hidiy tə liɓde Baytisayda. Təkəniy maa tuwah kat mə ɗiyehin, mana tə ɗiyen a hidiy tə liɓde Tirus ɓəw a hidiy tə liɓde Sidon, hidiy tə liɓdiy səna av kə buwiy ngar ngatan dəga aməcek za, av kə kwəliy gabal ªa kəsəm ɓəw av kə bəkiy heleci a kəsəm ngatan. 22 Mindiwin kata ceɗehin, pic Bayzlav tu kə zla dalgway ngə hidigi, dalgway ngəkin av kə ɗiy lem day kə ngə hidiy tə liɓdiy Tirus ɓəw Sidon. 23 Za a hin hidiy tə liɓde Kafarnahum, hin mə ɓən wər Bayzlav av kə kafehin hos a dibizlav kə vəlehin mordoy vu? Awwo! Sin av kə suroh hin hos am lay ɗew ngə mimcigi. Sin av kə ɗiy atəgo , kadaban təkəniy maa tuwah kat mə ɗiy təm hayək kin nhi, mana tə ɗiy zaba am hayək Sodoma wər, av kə ɗiy nha tanjinhi hayək səna ɗaha. 24 Mindiwin, kata ceɗehin, mandal Bayzlav tu kə zla dalgway a hidigi, dalgway ngəkin av kə ɗiy lem day kə ngə hidiy təm hayək Sodoma.››
Yesu a ɗefenma a hidiy kə yiy kə janiy nəp
25 A dəwən səna, Yesu ɗiya zləgam. Sin ɗiya luw: ‹‹Vay Məmar dibizlav avə mahayək, kata luwoh soko kadaban hoh mə ɗefen a hidiy mətak səniy təkən, təkəniy mə ɓahɓah maa hidiy məmariy sən ɓəw hidiy məmariy bərngəzl aa sənta ɗahkwən. 26 Yaw Vay ɗa, a ɗiy anhi kadaban hoh acin mə may tik atəgo .
27 ‹‹Vay tu vəlak təkəniy cike. Kat kər ngə Bayzlay, ko hid takan taa sənak ɗahkwən, say Vay Bayzlav a gendik. Za, ko hid takan mə sən Vay Bayzlav ɗahkwən, səna kat kərti tik ɓəw hid kat mə may kə ɗefenni.
28 ‹‹Hin hidiy cike məmariy səndək maa ɓilik tə talan mə dangar dangarigi, mə yah angər ɗa təv kə ɗiy hin kə nəp. 29 Mə zlim ma ngaɗa za mə ɗiyak kəzəɗ. Mə ngəm kat kə jəgwanehin təkən. Mə ɗiy atəgo , kadaban kat hid njə nja maa tehte, kat hid njə nəv maa kukwəɗ. Mana hin tu yah angər ɗa, təv kə ɗiy hin kə nəp. 30 Mindiwin, jəgwan ngaɗa a dayehin gədan kwən, za səndək kat tu kə vəlehin a ɗiyehin ɓilik-ɓilik kwən.››