Yesu mbəl hid mə mgbəruw mgbəruw
9
A dəwən səna, Yesu sliɗ pət a liɓ pay ngə zlan maza, zlan maza mordoy səna, jəɓah tik a liɓde ngetikª.2 Sin maa hosoh za, hidiy tə liɓde səna dehenta hid mə mgbəruw mgbəruw məpərmay am lay wan ngetik. Yesu lim hidiy səna mə vəliy nəv ngatan za a sin, luwen a hid mə mgbəruw mgbəruw: ‹‹A mar gədan kərti ɗa, kat mə geɗ mə ngavngaviy koh cike way kaɗ.››
3 Hidiy məpərmay tə dab mogroy ngə jəgwan ngə mə jawjaw ngə Musa maa zlimta za, nap ɓəniy aa mə nəv za, ɗiya luwta: ‹‹ Gawal nhi a ra Bayzlav.›› 4 Yesu maa sən ɓən ngatan za, luwenta: ‹‹Hin məmar ɓən mə ngavngav mana nhi kemi? 5 Maa təwah day acin mi? Kə luwenni: ‹ Kat mə geɗ mə ngavngav koh kaɗ vu, › asənkwən kə luwenni: ‹ A sliɗ za, ma va?› 6 Amma, taa may hin kə sən tik lawlaw, kat Kər Hidmemblen, kat awana avə gədan ngə geɗ mə ngavngav am talan mahayək.›› Za acin sin luwen a hid mə mgbəruw mgbəruw: ‹‹ A sliɗ za, a wət lay wan koh, av koh a de.›› 7 Gawəl səna sliɗ, za vətik a de.
8 Zəgudiy maa limta atəgo za, taniy ɗiya hovokigi. Ɗiya luwta: ‹‹Səban a Bayzlav, lay sin mə vəlen gədan mana nhi a hidmemblen.››
Yesu ɗefenma a Mata kə səbtik
9 Yesu sliɗ aa bəgo za, vətik am lay məpərmay. Mandal sin aa va a mozlokotuf, hid məpərmay zlim ngetik Mata mə ɗewe kaɗ am lay ɗiy kəzəɗ ngetik ngə kambal buhdu. Yesu ɗiya luwenni: ‹‹A sliɗ za, ma səbakku!›› Mata sliɗ, za ɗiya səbtik. 10 A dəwən səna, Yesu viy a de Mata, za ɗewiy kaɗ a wəriy gawliy ngetik aa zəmiy gəda. Hidiy mə njə kə kambaliy buhdu dolom avə hidiy mə kə ɗiyiy ngavngav yiy kə zəmiy gəda avə tanigi.
11 Farisiy maa limta atəgo za, ɗiya nehiy wəriy gawliy ngə Yesu, luwenta: ‹‹ Mordoy kin aa zəm gəda avə hidiy mə kambaliy buhdu ɓəw a hidiy mə ngavngaviy kemi?›› 12 Yesu maa zlim zləgam ngatan za, ɗiya luwenta: ‹‹Hidiy njə zoy tə kəsəm a jariy mə ɗiyiy mazla ɗahkwən. Say hidiy mə daldaligi acin mə mayiy hidiy mə ɗiyiy mazla. 13 Mə va jəgwan madabah ma ngə Bayzlav mə luw am deftere. A luw anhi: ‹Kat tə gər hidiy kə safiy kaymah ngə celeniy tan, ɗəkwən tə gər taniy kə fatakta təkən huvu kwən.› Kadaban kat tə yah kə ɗefenma a hidiy mə safiy talan tan kə hidiy malaw kwən, amma kə ɗefenma a hidiy mə səniy talan tan taniy hidiy mə ngavngav.››
Yesu a zləgam atalan ɗiy dalyam
14 Pic sənan, wəriy gawliy ngə Yuhana mə njə kə juroɓ baptisma yiy angər Yesu, ɗiya luwenta: ‹‹Yikwan avə Farisigi, pic sənan yikwan ɗaw kə ɗiy dalyam. Amma wəriy gawliy koh a ɗiyiy dalyam ɗahkwən wər kemi?›› 15 Yesu zlawenta, ɗiya luw: ‹‹Hin mə ɓən wər, hid mə dəm werti tu ɗefenma a hidigi, mandal sin awana hidiy səna, taniy a deniy za vu? Amma, pic tik av kə hos, av kə ɓiyiy hid mə dəm wer səna a dab tan za. Za acin hidiy səna av kə ɗiyiy dalyam.››
16 Yesu ɗiya luw baha: ‹‹A wətiy maslaga ndawyan kə mbok mbəsur ləkwət avə sin ɗahkwən. Ɗəkwən, maslaga ndawyan mə mbokiy mbusur ləkwət avə sin, av kə kwah gozlum ləkwət səna. Za lay mə pohpoh təm ləkwət səna av kə day kə tamicek. 17 Asəna təm, a zekiy movu mətak na am dəndoh siɗe ɗahkwən, kadaban movu səna tu kə basaha a wəzlav, av kə nder dəndoh siɗe səna kaɗ. Movu av kə zek a kayək, za təkən ngə ɗiy avə siɗe səna ɗahɗaba. Amma, hidiy a njə kə zekiy movu mətak na am siɗe maa ndawyan. A təgo siɗe a nder kə ngav movu kwən.››
Yesu a sleɗek kərtaza aa mə məc za, za a mbəl wer məpərmay
18 Mandal Yesu aa zləgam a hidiy səna, hid mordoy məpərmay yah angər tik, gbəlih titimbiz a kibik tik, ɗiya luwenni: ‹‹Kərtaza ɗa mə məca za tanjinhi. A yah, ma ɗiy ngər koh atalan tik, za av kə mbəl.›› 19 Yesu sliɗ ɗiya səbtik avə wəriy gawliy ngetik.
20 Mandal taniy taa vigi, wer məpərmay ɗaha a dal, dal ngetik mə ɗiya di gəɓ atalan saray, ɓiɓiz aa kwaraytik dap. Sin va a dəwən za mbəlem gozlum ləkwət ngə Yesu. 21 A ɗiy atəgo , kadaban sin a ɓən aa mə nəv za, a luw: ‹‹Mana kat tu mbəlem ləkwət ngetik dap, təv kə mbəl.›› 22 Sin maa ɗiy atəgo za, Yesu cəhəriya a dəwən, lim wer səna, za ɗiya luwenni: ‹‹Kərtaza ɗa, a səsak nəv kaɗ. Lay hoh mə vəlak nəv koh, kat tu mbəloh.›› Njoɗ məc tə kəsəm tik way.
23 Yesu maa hos a de hid mordoy səna za, jan hidiy mə haniy kərtaza mə məc səna, a mbiziy wərzlek, ɓəw zəgudu a ciy wəla təm. 24 Yesu ɗiya luwenta: ‹‹Mə pət kin a wənhi za. Kər nhi a məc bəgwən, a wanay tik dap.›› Hidiy maa zlim ta atəgo za, ɗiya mbisenta. 25 Yesu maa gam hidiy cike a caɗak za, pət a jik kərtaza mə məc səna, kaw am ngəra, za kərtaza səna, vak, sliɗ. 26 Hidiy cakwayiy ləbar tik am hayək səna cike wayza.
Yesu zlər həriya ngə hulufiy saray
27 Mandal Yesu aa gar tik abəgo za, hulufiy saray ɗiya səbta. A ciy wəla, a luwenta: ‹‹Hoh kər Dawda, a saf kaymah ngiykwan!›› 28 Yesu maa hos a de za, hulufiy səna viy angər tik. Yesu ɗiya nehta, luwenta: ‹‹Hin mə ɓən wər, kat tu hos gəga kə zlər həriya kin kaɗ vu?›› Ɗiya zlawenta: ‹‹Yaw Məmar Hidi, hoh tu hos gəga.›› 29 Za acin Yesu mbəlem həriy ngatan, luwenta: ‹‹Lay hin mə vəlak nəv kin, kat zlərehin həriy kaɗ.›› 30 Wayba həriy ngatan zlərigi. Zəni Yesu ndəlta, luwenta: ‹‹Mə kaw talan kin law law, mə gər kə ceɗ ma tik ko a hid ngayi kwən.›› 31 Amma hulufiy səna maa viy tan za, ɗiya cakwayiy ləbar atalan təkən Yesu mə ɗiyenta a hidiy təm hayək səna cike wayza.
Yesu mbəl hid maa a zləgam ɗahkwən
32 Mandal hulufiy səna aa viy tan, hidiy məpərmay dahiy gawal məpərmay maa a zləgam ɗahkwən angər Yesu. Musuruf acin mə ɗiy tik kə ɗew mətak zləgam. 33 Yesu maa gam musuruf tə kəsəm tik za, njoɗ gawəl səna diw kə zləgam. Təkən səna tu kpah talan ngə zəgudigi. Za ɗiya luwta: ‹‹Kay təkən mana nhi a ɗiy am hayək Israyila bəgwən.›› 34 Amma Farisiy ɗiya luwta: ‹‹Bay musuruf acin mə vəlen gədan kə gam musurufiy tə kəsəm hidigi!››
Yesu saf kaymah ngə zəgudigi
35 Yesu tal tal liɓdigi ɓəw a slaladigi cike wayza. Sin a ɗiy jəgwan am jik jəgwan ngə Yahudigi. A ceɗ Ləbar Malaw ngə bay ngə Bayzlav a hidigi, sin vəl zoy kəsəm a hidiy njə məc maa parpar cike wayza.
36 Yesu ma lim zəgudiy za, kaymah ngə hidiy səna ɗiya gasenni, kadaban hidiy səna tu dangarigi, za mə janiy kukwəɗ za mana təmakiy mətak kər məgəlgəla. 37 Za acin Yesu ɗiya luwen a wəriy gawliy ngetik: ‹‹Təkəniy mə biz biz ngə zəm dolom ngə ɓasah kaɗ kə yah ade, amma hidiy ngə ɓasahta gəɗak. 38 Mə tar hid məmar təkəniy səna, mə zlən hidiy bah kə ɓasiy təkəniy ngetik səna.››