Yesu mbəl kwalkwala
8
Yesu maa sərohoh atalan wurum səna za, hidiy dolom səbta.2 Gwedek kwalkwala məpərmay yah angər tik, gbəlih titimbiz a kibik tik, ɗiya luw: ‹‹Məmar Hidi, mana hoh mə may za wər, hoh kwəl kə mbəlak kaɗ.›› 3 Yesu zər ngəra, mbəlem kwalkwala səna, luwenni: ‹‹Kat mə may za, məc tə kəsəm koh mə way.›› Njoɗ kwalkwala tə kəsəm ngetik way. 4 Zəni Yesu luwenni: ‹‹A zlim lawlaw, hoh gər kə zləgam mətik a hid kwən. Amma, a va ɗef talan koh a masay, za ma ɗiy vəl mana mə jawjaw ngə Musa mə luwu. Asəna acin, hidiy cike av kə sənta məc tə kəsəm koh tu wayª.››
Yesu mbəl hid mə ɗiy kəzəɗ a de mordoy ngə sojigi
5 Mandal Yesu aa pət a liɓde Kafarnahum, mordoy ngə sojiy blək ngə Roma yah kə tar tik. 6 Ɗiya luwenni: ‹‹Məmar Hidi, hid mə njə kə ɗiyak kəzəɗ mə wana kaɗ a de, a dal. Mə mgbəruwa kaɗ, a zlim takwan day godokwən.›› 7 Yesu zlawenni, ɗiya luw: ‹‹Təv kəv kə mbəl kaɗ.›› 8 Amma Mordoy ngə sojiy səna luwenni baha: ‹‹Məmar Hidi, kat tə hos gəga hoh kə pət a de ɗa bəgwən. A luw ma takan dap, za hid mə ɗiy kəzəɗ ngaɗ av kə mbəl. 9 A safu, kat atalan ɗa, bay kat taa njə kə zlimen ma ɗaha, za sojiy mə njə kə zlimiy ma angər ɗa ɗahigi. Kat tu luwen a soje takan a dab tan: ‹A va a wəta!› Ɗaw kə va. Kat tu luwen a sənan: ‹A yah!› Ɗaw kə yah. Kat tu luwen a bahlam ngaɗa: ‹a ɗiy anhi!› Sin ɗaw kə ɗiy tik.››
10 Yesu ma zlim zləgam ngə mordoy ngə sojiy səna za, nəv ngetik tu fet dayday. Ɗiya luwen a hidiy mə səbta acin: ‹‹Mindiwin kat a luwehin, tə jan hid mə vəl nəv ngetik cike a Bayzlav mana hid nhi a dab Israyila bəgwən. 11 Kat a luwehin baha, hidiy dolom av kə yiy a madabalay ɓəw a wəzlav za, kə zəmiy gəda avə Ibrahima, Isiyaku ɓəw Yakubu am bay ngə Bayzlav. 12 Amma hidiy maa law law Bayzlav mə welta aməcek kə pətiy am bay ngetik səna, av kə fəkta a caɗak am kpizlik. Abəgo, taniy av kə hanigi za av kə kəkrawiy ndin.›› 13 Yesu ɗiya luwen a mordoy ngə sojiy tafnan acin: ‹‹A jəɓ koh a de. Təv kə ɗiy təkən hoh mə tarak nhi, makavay hoh mə vəlak nəv koh.›› Za am mandal səna gəzza mə ɗiy kəzəɗ ngə mordoy soje səna ɗiya mbəl.
Yesu mbəl minjeh ngə Piyer ɓəw hidiy par par
14 A dəwən səna, Yesu va a de Piyer, və jan minjeh tik a dal, mə wana kaɗ, kəsəm tik kwak. 15 Yesu mbəlem am ngəra. Njoɗ kəsəm ngə wer səna ɗiya ɗiy zoy. Sliɗ za, vəlen zəm a Yesu.
16 Pic maa ndəv za, hidiy dahiy hidiy dolom njə mbiɗ tə kəsəm angər Yesu. Yesu gam gam musuruf tə kəsəm tan kaɗ avə zləgam ngetik, za mbəl mədaldaliy cike wayza. 17 Yesu a ɗiy atəgo kə jan kə ɗiy tiɗtiɗe mana Esaya, mokotuf ngə Bayzlav mə luw tamicek. Sin a luw: ‹‹Sin tu gas təkəniy ta zləniy yikwan takwan ɓəw məc tə kəsəm ngiykwan cike atalan tikª. ››
Yesu ngəz hidiy mə mayiy kə səbiy mozlokotuf ngetik
18 Yesu maa lim zəgudu mə ɓas ɓas a jagwar tik za, sin luwen a wəriy gawliy ngetik kə viytan a pal talan maza.
19 Zəni hid takan tə dab mogroy ngə jəgwan ngə mə jawjaw ngə Bayzlav va angər tik, luwenni: ‹‹Mordoy, təv kə səboh ko aki am lay hoh tu kə va.›› 20 Yesu zlawenni, ɗiya luw : ‹‹Bəlwayiy awaniy avə wil ngatan ngə wan. Zəni viginiy tə wəzlav təm awaniy a de ngatan. Amma kata, Kər Hidmemblen tə mar lay nəp ngaɗa bəgwən.›› 21 Hid takan tə dab wəriy gawliy ngetik ɗiya luwenni: ‹‹Məmar kata, a geɗek mozlokotuf kat kəv kə kahah bahbay ɗa kaɗ zagway.›› 22 Yesu zlawenni, ɗiya luw: ‹‹A yah səbakku! Za a geɗ mimciy mə kahiy mimciy tan.››
Yesu tak mbiɗ kə ca avə tak yəm kə kəz
23 A dəwən səna, Yesu pət am pay ngə zlan maza, za wəriy gawliy ngetik ɗiya səbta. 24 Mandal a vigi, njoɗ mbiɗ diw kə ca avə gədan atalan yəm. Yəm ɗiya kəz, za ɗiya wac a gədan a liɓ pay ngə zlan maza, nha yəm a gər kə wek pay ngə zlan maza. Yesu wər, mə wana za. 25 Wəriy gawliy ngetik kərəɓiy a jagwar tik, fəɗahta kaɗ, luwenta: ‹‹Aw Məmar yikwan, aw Məmar yikwan, yikwan ɗahɗaba, a mbəl yikwan kaɗ! ›› 26 Yesu zlawenta, ɗiya luw: ‹‹Mə hovok kemi? Mə vəl nəv kin law law a Bayzlav bəgwən vu?. ›› Sin sliɗ za, ndəl mbiɗ avə yəm səna, taniy njiy tan tehte. 27 Hidiy səna cike wayza wələk wələk. Ɗiya luwta: ‹‹Hay gawla, nhi tik wər hid ngayi? Ko mbiɗ avə yəm a zlimenta ma!››
Yesu gam mbiɗ mə ngavngav a kəsəm hidiy saray
28 Yesu ma hos a dəwən maza mordoy təm hayək Gadarena za, hidiy saray njə mbiɗ mə ngavngav tə kəsəm taa njə kə waniy am talan civi, pətiy aa bəgo za, gbamenta a Yesu. Taniy lem godokwən, kadaban səna, ko hid takan ngə ton aa mozlokotuf səna ɗahkwən.
29 Maa limiy Yesu za, nap ciy wəla dayday. Luwenta: ‹‹Hoh kər ngə Bayzlav, hoh gər tə ngər yikwan mi? Hoh yah awənhi kə zləniy yikwan takwan dəga wan Bayzlav mə zlu a hos gesin bəgwən vu?››
30 Baɗ gaf a tanigi, guldomiy dolom a gəliy a bəgo. 31 Mbiɗiy mə ngavngav tə kəsəm hidiy səna centa ngəra a Yesu, luwenta: ‹‹Mana hoh gər kə gamiyikwan a kəsəm hidiy nhi za wər, a geɗiyikwan kəv kə pət a kəsəm guldomiy tattah. ›› 32 Yesu luwenta: ‹‹Mə va! ›› Za acin, taniy pətiy tan a kəsəm hidiy səna za, va pətiy a kəsəm guldomigi. Zəni guldomiy səna cike wayza siy aa bər wurum za, pətiy, sirif, a liɓ yəm mordoy, lekiy bugo.
33 Hidiy mə gəliy guldom maa limta atəgo za, siy tan. Viy a liɓde, ceɗenta təkəniy mə toniy cike a hidigi. Za ceɗenta mana təkən mə jan hidiy maa saray njə mbiɗ tə kəsəm səna. 34 Za acin, hidiy tə liɓde səna cike pətiy kə gbamenta a Yesu. Ma gbamiy za, ɗiya tarta luwenta: ‹‹Aw, a jelkoh aa liɓde ngiykwan za. ››