Yesu a luw mə gər kə zlen dalgway a hidiy kwən
7
Yesu ɗiya luw baha: ‹‹Mə gər kə zlen dalgway a hidiy kwən, kə jan Bayzlav təm kə zlehin dalgway kwən. 2 Kat tə luw a nhi, kadaban mana hin tu zlen dalgway a hidigi, Bayzlav təm av kə zlehin dalgway. Av kə sla tik tiɗtiɗe mana hin mə ɗiyen a hidigi.3 ‹‹Hoh saf hiziɗ mendez təm həriya ngə galmocoh, amma pay təm həriya koh hoh lim ɗahkwən kemi? 4 Hoh awana avə pay am həriya koh, zəni hoh kə luwen a galmocoh anhi: ‹A geɗ kat kə ɓiyah hiziɗ təm həriya koh kaɗ› a ɗiyza vu? 5 Hoh məplafas hidi, a ɓiyah pay təm həriya koh kaɗ zagway, za acin hov kə lim lawlaw ngə pəɗ hiziɗ mendez təm həriya ngə golmocoh.
6 ‹‹Mə gər kə wət təkən malaw Bayzlav mə vəlehin, kə vəlen a hidiy mana haziy kwən. Mana hin tu vəlenta, av kə buwiy atalan kin za kə ngacihin. Za mə gər kə wət təkən malaw ngə Bayzlav, za kə vəlen a hidiy mana guldomiy kwən təm. Mana hin tu vəlenta, av kə jakta a ngaz kə dəbəzta kaɗ.››
Mə tar təkən hin mə mayu angər Bayzlav
7 Yesu ɗiya luw baha: ‹‹Mə tar təkən hin mə mayu angər Bayzlav, av kə vəlehin. Mə jar təkən hin mə mayu angər tik, hin məv kə jan tik. Za mə cen wəla kəv de, av kə zlehin wəla. 8 Kadaban səna acin, ko hid ngayi mə tar təkən, av kə vəlenta. Ko hid ngayi mə jar təkən, av kə jan tik. Za ko hid ngayi mə ca wəla kəv ade, av kə zlenta wəla.
9 ‹‹Yo a dab kin, hid maa kərti tik tu pəl bret, sin kə vəlen gugwən ɗaha vu? 10 Asənkwən kər tu pəl kilif, sin kə vəlen wən ɗaha vu? 11 Hin hidiy mə ngavngav, zəmaa hin maa sən kə vəlen təkən malaw a wəriy kin. Kambay bahbay kin tə dibizlav a vəlen təkən malaw a hidiy mə pəlta kwən vu?
12 ‹‹Təkəniy cike hin mə may hidiy kə ɗiyehin, mə ɗiyenta səka. Nhi acin zləgam təm defteriy ngə mə jawjaw ngə Musa ɓəw ngə mokotufiy ngə Bayzlav mə jəgwaniyikwan.››
Yesu a zləgam atalan bər midigiɗ saray
13 Yesu ɗiya luw baha: ‹‹Mə pət aa mə bər midigiɗ maa ɗen, kadaban bər midigiɗ maa bezlim a njə kə tep hid am lek, za mozlokotuf ngə ton aa bəgo ɗah tuwah kwən. Hidiy dolom aa toniy aa bugo. 14 Amma bər midigiɗ ma ɗen wər a njə kə tep hid am jan micin, za mozlokotuf ngə ton aa bəgo tuwah. Hidiy gwedek aa toniy aa bugo. ››
Mokotufiy mə ngawiy ma
15 Yesu ɗiya luw baha: ‹‹ Mə kaw talan kin a mokotufiy mə ngawiy ma! Ɗaw kə mbaɗiy talan tan wa təmakigi, kə yiy a dab kin. Amma aa mə nəv ngatan za, taniy haz donu. 16 Hin məv kə sənta avə kəzəɗ taniy ta njə kə ɗiyta. Pay watan aa mbuw bus ɗahkwən. Pay gidigiɗ aa mbuw sikwiɗ ɗahkwən. 17 Asəna acin, Pay malaw ɗaw kə mbuw wəriy ngə zəm. Za pay mə ngavngav ɗaw kə mbuw wəriy maa hidiy aa hamta ɗahkwən. 18 Pay malaw a mbuw wəriy mə ngavngav ɗahkwən, za pay mə ngavngav a mbuw wəriy malaw ɗahkwən. 19 Ko pay ceki mə mbuw wəriy mə ngavngav, say kə bəlta kaɗ, za kə fiyta am kuhu. 20 Asəna acin, hin məv kə sən mokotufiy mə ngawiy ma am kəzəɗ taniy taa ɗiyta.››
Hidiy ta zləgamigi za a ɗiyiy kəzəɗ səna ɗahkwən
21 Yesu ɗiya luw baha: ‹‹ Mə sən kaɗ lawlaw, hidiy taa luwakta: ‹ Məmar Hidi, Məmar Hidi a pətiy cike am bay ngə Bayzlav kwən. Say hidiy taa ɗiyiy may ngə Bahbay ngaɗ tə dibizlav dap. 22 Mandal Bayzlav tu kə zla dalgway a hidigi, hidiy dolom av kə luwakta: ‹Məmar Hidi, Məmar Hidi, yikwan tu ceɗ ləbar mə yah taa ngər Bayzlav za a hidigi avə zlim koh. Avə zlim koh, yikwan tu gam musuruf a kəsəm hidigi. Za yikwan tu ɗiy təkəniy ma tuwah par par avə zlim koh.› 23 Amma təv kə luwenta anhi: ‹Ta sənehin ɓahɗahkwən. Mə jelkin gaf avə kata, hin hidiy mə ɗiyiy mə ngavngav.› ››
Ma mə ngaɓngaɓ atalan jik mə ndən ndən saray
24 Yesu ɗiya luw baha: ‹‹Ko hid ngayi mə zlim zləgam ngaɗa, zəni ɗiy mana kat mə luwu, sin wa hid njə bərngəzl, mə ləlay lala hos am talagwən, za kə diw kə ndən de ngetik a talan. 25 Ma ndən za, von ɗiya za day day, za maza wek, pele pele, avə yəm. Mbiɗ ɗiya ca a gədan atalan jik səna. Amma a gom ɓahbəgwən, kadaban mə mbasla am talagwən. 26 Amma ko hid ngayi mə zlim zləgam ngaɗa, zəni a ɗiy mana kat mə luw bəgwən, sin wa hid mətak bərngəzl, mə ndən de ngetik atalan vəgaɗ. 27 Ma ndən za, von ɗiya za day day, za maza wek, pele pele, avə yəm. Mbiɗ ɗiya ca a gədan atalan jik səna. Zəni ɗiya gom, girmimim, ko gwedek a fəs bəgwən.››
Yesu a ɗiy jəgwan avə gədan ngə Bayzlav