Yesu a ɗiy jəgwan atalan vəl təkən a hidi
6
A dəwən səna, Yesu ɗiya luw baha: ‹‹ Mə kaw talan kin lawlaw! Mandal hin ma ɗiyen malaw a hidi, mə gər kə ɗiy tik birre kə jan hidiy kə həməniy hin kwən. Mana hin tu ɗiy atəgo wər, Bahbay kin tə dibizlav a vəlehin gədmazlən kwən.2 ‹‹ Asəna acin, mandal hoh vəlen təkən a hid təm sanha, hoh gər kə cakway mə tik hayya mana məplafas hidiy ta njə kə ɗiyta am jik jəgwan ngə Yahudigi, ɓəw am mozlokotuf kwən. Taniy a njə kə ɗiyta atəgo kə jan hidiy kə həmənta. Kata ceɗehin kaɗ law law, taniy mə janiy gədmazlən ngatan wayza. 3 Amma hoh, mandal hoh vəlen təkən a ngərzəm a hid təm sanha, ngərzlaɓay koh mə gər kə sən kwən. 4 Asəna acin, təkən hoh mə vəlen a hid təm sanha, mə gər kə ɗiy birre kwən. Mana hoh tu ɗiy atəgo , Bahbay koh Bayzlav mə njə kə lim təkən hoh ta njə kə ɗiy tik avə ɓah, av kə vəloh gədmazlən. ››
Yesu a ɗiy jəgwan atalan tar Bayzlav
5 Yesu ɗiya luw baha: ‹‹Mandal hin maa tar Bayzlav, mə gər kə ɗiy mana məplafasiy ta njə kə ɗiyta kwən. Ngatan mandal a tariy Bayzlav, a njə kə gariy a gar am jik jəgwan ngə Yahudigi, ɓəw am mozlokotufigi, kə jan hidiy cike kə limta, za kə həmənta. Mindiwin, kata ceɗehin, taniy wər mə janiy gədmazlən ngatan wayza. 6 Amma hoh, mandal hoh may kə tar Bayzlav wər, a pət a jik hoh a gəngoh, a pek mijijik kaɗ, za ma tar Bahbay koh tə dibizlav ma mbeh tə jagwar koh. Mana hoh tu ɗiy atəgo , Bayzlav mə njə kə lim təkən hoh ta njə kə ɗiy avə ɓah, av kə vəloh gədmazlən.
7 ‹‹Mandal hin maa tar Bayzlav, mə gər kə zləgam dolom mana hidiy mətak səniy Bayzlav ta njə kə ɗiyta kwən. Hidiy səna a ɓənta, Bayzlav av kə yək tar ngatan kadaban lay zləgamiy dolom. 8 Amma hin, mə gər kə ɗiy mana ngatan kwən. Kadaban dəga hin mə diw kə tar Bayzlav gesin bəgwən, Bahbay kin Bayzlav mə sən təkən hin ta gər kə tartik wayza.
Tar vay ngiykwan tə dibizlav
9 Yesu ɗiya luw baha: ‹‹ Mandal hin maa tar Bayzlav, hin kə luw anhi: ‹
Vay ngiykwan tə dibizlav,
A ɗiy hidiy kə sənta hoh hid maa kweɗek kweɗek,
10 Hoh acin bay, a yah mar yikwan!
Hidiy mə ɗiyiy may ngəkoh am talan mahayək, mana tə dibizlav.
11 Aw a vəliyikwan təkən ngə zəm gəga ngə liɓ ngiykwan tapica.
12 A geɗ mə ngavngav ngiykwan kaɗ,
mana yikwan taa njə kə geɗ ngə caliyikwan
mə njə kə ɗiyiyikwan mə ngavngav.
13 Hoh gər kə geɗen mozlokotuf a Bay Musuruf kə lebeɗ yikwan
kə ɗiy mə ngavngav kwən,
amma a lereh yikwan aa mə ngər ngə Bay musuruf za.
[Kadaban hoh acin bay məmar təkəniy cike wayza, hoh mar gədan
ɓəw hoh acin maa bilin bilin ko a pu. Amina.]››
14 ‹‹Anhi acin, mana hin tu geɗ mə ngavngav hidiy mə ɗiyehin kaɗ, Bahbay kin Bayzlav tə dibizlav av kə geɗ mə ngavngav kin kaɗ təm. 15 Amma mana hin mə geɗ mə ngavngav hidiy mə ɗiyehin bəgwən wər, Bahbay kin Bayzlav a geɗ mə ngavngav kin kaɗ kwən təm. ››
Yesu a ɗiy jəgwan atalan ɗiy dalyam
16 Yesu ɗiya luw baha: ‹‹ Mandal hin maa ɗiy dalyam, mə gər kə gərəs həriy kaɗ mana məplafas hidiy ta njə kə ɗiyta kwən. Taniy a njə kə gərəsiy həriy kaɗ, kə jan hidiy cike kə sənta, taniy aa ɗiyiy dalyam. Mindiwin, kata luwehin, taniy wər mə janiy gədmazlən ngatan wayza. 17 Amma hoh, mandal hoh ɗiy dalyam, hoh kə pan həriy koh lawlaw, za hoh kə pəz ɗawa am talan. 18 A ɗiy atəgo , kə jan taa hoh kə ɗef talan koh a hidiy kə sənta, hoh ɗiy dalyam. Səna Bahbay koh Bayzlav tə bər koh am lay hoh mə ɓah acin mə səntik a gendik. Sin a njə kə lim təkən hoh ta njə kə ɗiy tik avə ɓah, av kə vəloh gədmazlən.››
Yesu a ɗiy jəgwan atalan ɓas aray
19 Yesu ɗiya luw baha: ‹‹Mə gər kə zlay talan kə ɓas aray am talan mahayək kwən, kadaban aray təm talan mahayək nhi nənəɓ avə gozu av kə ngavta, asənkwən məhəliy av kə nderiy mijijik kə həliy aray səna. 20 Amma, geleɓ mə ɓas aray kin ngəv dibizlav ɗər. Abəgo, nənəɓ avə gozu a ngavta kwən. Za məhəliy bah a janiy kə nderiy mijijik kə həlta kwən. 21 Kat tə luw atəgo , kadaban nəv koh awan a lay hoh mə ɓas aray tə bəgo.››
Yesu a luw həriya acin zləzlaɗ ngə kəsəm
22 Yesu ɗiya luw baha: ‹‹Həriy wa cəbelbel ngə kəsəm. Anhi acin mana həriy koh kwen kwen, kəsəm koh cike wayza awan am zləzlaɗ. 23 Amma mana həriya a lim lawlaw ɗahkwən, kəsəm koh cike awan am gbizlik. Kadaban səna acin, mana zləzlaɗ tə ngər koh tu məc wər, hoh wan am gbizlik mindiwin. ››
Hid kə wel Bayzlav asənkwən suloy
24 Yesu ɗiya luw baha: ‹‹Hid ngə ɓəs kə ɗiyen kəzəɗ a hidiy saray məmar tik ɗahkwən. Av kə may hid takan, za kə zel hid sənan. Av kə kaw kəzəɗ ngə hid takan ngər səsaray, za ngə hid sənan av kə kaw tik avə safar. Yo asəna acin, hin təm hin mə ɓəs kə ɗiyen kəzəɗ a Bayzlav, za kə vəl nəv ngəkin am suloy kwən.
Kə vrək ɓən atalan Bayzlav
25 Yesu ɗiya luw baha: ‹‹ Kadaban səna acin, kata luwehin, mə gər kə den atalan təkən taa kaw micin kin kwən. Mana kə luw kaɗ təkən ngə zəm, təkən ngə sa ɓəw ləkwət ngə kwəl. Micin kin day təkən ngə zəm, kəsəm kin təm zay tik day ləkwət. 26 Mə saf viginiy mək, aa zləgiy ɗahkwən, aa bəliy ɗahkwən. Aa ɓasiy təkən a debin ɗahkwən. Zəni Bahbay kin Bayzlav tə dibizlav ɗaw kə vəlenta zəm. Zay ngəkin day kə taniy kwən vu? 27 Hin taa den nhi wər, hid ngayi tə dab kin maa kwəl kə gəl micin ngetik zoɗ gwedek avə den ngetik səna yi? 28 Ya za, mə den atalan ləkwət ngə təm kemi? Mə saf fufoniy tə donu mana ta gəligi, aa ɗiyiy kəzəɗ ɗahkwən, za aa biy ləkwət ɗahkwən təm. 29 Zəɗər, kata luwehin, ko bay Suleymanu maa, am nja ngetik, a kwəl ləkwətiy malaw mana fufon səna takan tə dab tan bəgwən. 30 Mə safu, Bayzlav tu wəzlel fufoniy tə donu, za apat hidiy kə kəɗawta kaɗ, mana a səna Bayzlav a kwəlehin ləkwət day fufoniy səna kwən vu? Vəl nəv ngəkin a Bayzlav slahkaɗ. 31 Kata luwehin acin, mə gər kə den za kə luw: ‹Yikwan məv kə zəm mi? Yikwan məv kə sa mi? Yikwan məv kə kwəl tə kəsəm mi kwən? 32 Təkəniy səna cike, hidiy maa a səbiy mozlokotuf ngə Bayzlav ɗahkwən ɗaw kə jarta mətak nəp. Amma bahbay kin tə dibizlav a sənu, hin maa may təkəniy səna. 33 Mə vəl talan kin Bayzlav kə mar hin ɓəw mə ɗiy may ngetik zagway, za sin av kə vəlehin təkəniy mə fəstik təm. 34 Mə gər kə den atalan təkən tu kə ton apat kwən, kadaban sləsləɓ ngə tapat av kə ɗiyay tik ngəwuray. Ko pic ceki awana takwan gəga a sin. ››