Yesu ceɗ zləgam ngə Bayzlav atalan wurum
5
Yesu maa lim zəgudiy dolom mə ɓasiy kaɗ angər tik za, sin taptik atalan wurum, za ɗeweytik abəgo. Wəriy gawliy ngetik viy angər tik. 2 Zəni sin diw kə ɗiyenta jəgwan. Ɗiya luw:3 ‹‹Hidiy mə sənta am nəv ngatan taniy awaniy am sanha ngə zləgam ngə Bayzlav,
mə zəzayigi,
kadaban taniy acin məmariy bay ngə Bayzlav.
4 Hidiy taa hanigi, nəv ngatan mə ɗew avə zəzay,
kadaban Bayzlav av kə bacenta nəv.
5 Hidiy məmariy nəv maa kukuɗ,
nəv ngatan mə zəzay,
kadaban Bayzlav av kə vəlenta hayək taniy kə marta.
6 Hidiy mə mayiy a nəv takan kə zlimentəma a Bayzlav,
nəv ngatan mə zəzay,
kadaban Bayzlav av kə vəlenta təkən taniy mə jarta.
7 Hidiy mə safiy kaymah ngə hidiy məpərmay,
nəv ngatan mə zəzay,
kadaban Bayzlav av kə saf kaymah ngatan təm.
8 Hidiy məmariy nəv maa kweɗek,
nəv ngatan mə zəzay,
kadaban taniy av kə limiy Bayzlav.
9 Hidiy mə dahiy zoy a dab hidigi,
nəv ngatan mə zəzay,
kadaban Bayzlav av kə ɗefentəma kə wəriy ngetik.
10 Hidiy mə zləniy takwan makavay taniy taa zlimentəma a Bayzlav,
nəv ngatan mə zəzay,
kadaban taniy acin məmariy bay ngə Bayzlav.
11 ‹‹Mana hidiy tu rehin,
tu zlənehin takwan,
tu zləgamiy ma mə ngavngav par par,
ɓəw tu ngawehin ma,
kadaban hin ta njə kə səb mozlokotuf ngaɗa,
hin wər, nəv kin mə zəzay.
12 Mə zəzay, nəv ngəkin mə ɗiy nek,
kadaban Bayzlav a sləsləɓehin gəd mazlən mordoy a dibizlav.
Asəna, hidiy tu zlənenta takwan a mokotufiy ngə Bayzlav mə yiy məpəlpəla kə hin. ››
Hidiy mə səbiy Yesu wa məngahay ɓəw zləzlaɗ
13 Yesu ɗiya luw baha: ‹‹Hin wa məngahay ngə hidiy təm talan mahayək. Amma mana məngahay tu mbaɗ lahamlaham, kə ɗiy aceki kə jan sin kə mbaɗ yəkəɓyəkəɓ baha? Zay tik ɗahɗaba. Say kə bək kaɗ a caɗak za hidiy kə jakta.
14 ‹‹Hin wa zləzlaɗ ngə hidiy təm talan mahayək. Liɓde mə bəba tə talan wurum aa ɓah ɗahkwən. 15 Yo, Mana hid tu nef kuhu am cəbelbel, aa wət kaslak kə jəɓ kaɗ ɗah vu? Awwo! Ɗaw kə zlaɓ kaɗ am lay maa fal kə jan kə zləzlaɗ, kəkaykəkay, a hidiy tə jik səna. 16 Asəna acin, zləzlaɗ ngəkin mə ɗiy, kəkaykəkay, a kibik hidiy cike wayza, kə jan hidiy məpərmay kə limiy malaw hin taa ɗiy tik. Taniy kwəl kə səbaniy bahbay kin tə dibizlav. ››
Yesu a ɗiy jəgwan atalan mə jawjaw ngə Bayzlav
17 Yesu ɗiya luw baha: ‹‹Mə gər kə ɓən, kat tə yah kə vəvay mə jawjaw ngə Musa ɓəw zləgam ngə mokotufiy ngə Bayzlav mə jəgwanehin nhi kwən. Amma kat tə yah ɗər kə səb tik lawlaw kə jan hidiy kə səniy madabah mətik. 18 Mindiwin, kata ceɗehin, mana talan mahayək avə dibizlav a way bəgwən, ko təkən asənkwən mə ɗəɗefɗəɗef ndez am mə jawjaw ngə Bayzlav a vəvay kwən, hos am təkəniy cike wayza tu kə toniy mana mə jawjaw səna mə luwu. 19 Kadaban səna acin, hid mə zel mə jawjaw mendez ngə Bayzlav, za mə jəgwanen a hidiy kə zeliy mə jawjaw səna, hid səna av kə ɗew kə hid mendez am bay ngə Bayzlav. Amma hid mə səb mə jawjaw, za mə jəgwanen a hidiy məpərmay kə səb tik, sin av kə ɗew kə hid mordoy am bay ngə Bayzlav. 20 Mindiwin kata luwehin, mə səb mə jawjaw ngə Bayzlav lawlaw day kə ngə mogroy ngə jəgwan ɓəw ngə Farisigi. Asənkwən hin mə pət am bay ngə Bayzlav kwən. ››
Yesu ɗiy jəgwan a talan zlerma
21 Yesu ɗiya luw baha: ‹‹Hin mə zlim mana mə luwenta a didiy kin za. A luwta: ‹Hoh gər kə wəzl dəwa kwən. Ko hid ngayi mə wəzl dəwa, av kə zlenta dalgway.› 22 Amma kat wər, kata luwehin, mana hid tu bas nəv atalan galmən, mə centa wəla am dalgway. Hid mə luwen aa galmən: ‹Wəya cah,› mə tepta a kibik mgbəw ngə hidiy mə zliy dalgway. Za hid mə luwen a galmən: ‹Bərngəzl talan koh ɗahkwən,› mə fəkta a liɓ kuhu ngə sa takwan.
23 ‹‹ Asəna acin, mana hoh va am lay vəl təkən a Bayzlav kə ɗiy vəl, za hoh ɓən galmocoh nəv a basenni avə hoh, 24 asəna wər, a geɗ vəl koh kaɗ abəgo. A va jar zoy avə galmocoh zagway. Zəni maa buw, ma ɗiyen vəl a Bayzlav acin.
25 ‹‹Wa səna, mana hin mawan a mozlokotuf avə hid taa va kə coh wəla am dalgway, a jar zlerma avə sin angaw. Asənkwən sin av kə vəloh angər hid mə zla dalgway, za hid mə zla dalgway təm av kə vəloh a soje, zəni av kə fəkiy am jik jaw. 26 Mindiwin kata luwoh, a fəkiy kaɗ aa bəgo za kwən, say hoh tu wərək suloy ngə gawal səna cike way za. ››
Yesu a luw kə ɗiy vərndew kwən!
27 Yesu ɗiya luw baha: ‹‹Hin mə zlim mana mə luwenta a didiy kin za. A luwenta: ‹Hoh gər kə ɗiy vərndew kwən.› 28 Amma kat wər kata ceɗehin, ko hid ngayi tu saf wer ngə hid avə tamah am nəv, gawal mə ɗiy atəgo tu ɗiy vərndew avə wer səna am nəv ngetik. 29 Mana həriya koh taa mə ngərzəm tu lebeɗe kə ɗiy təkən mə ngavngav, maa huzloɗ həriya səna, za maa fək kaɗ guduk avə hoh. Geleɓ hoh kə lek təkən takan tə kəsəm koh am talan mahayək avə hoh kə lek kəsəm koh cike wayza am kuhu. 30 Ya za mana ngərzəm koh acin taa lebeɗeh kə ɗiy mə ngavngav, ma rəsl kaɗ, za ma fək guduk avə hoh. Geleɓ hoh kə ɗew ngər takan am talan mahayək, law day avə hoh kə lek kəsəm koh cike wayza am kuhu.››
Yesu a luw mə gər kə pətar avə wertiy kin kwən!
31 Yesu ɗiya luw baha: ‹‹Tu luwta baha: ‹Mana hid aa may kə pətar avə werti tik wər, mə vəlen ɗerewel ngə pətar am ngəra, za taniy kə pətarigi.› 32 Amma kat wər, kata luweh hin: Ko hid ngayi mə pətar tavə wer tik, wer səna a ɗiy vərndew ɓahbəgwən. Gawal səna a goɗ wer tik kə ɗiy vərndew, kadaban wer səna av kə dəm mawəl məpərmay baha. Za ko hid ngayi mə dəm wer zelen mə pətariy tavə sin, sin mə ɗiy vərndew za təm. ››
Yesu a luw mə gər kə luw mbeɗ kwən!
33 Yesu ɗiya luw baha: ‹‹ Hin mə zlim mana mə luwenta a didiy ngiykwan za. A luwenta: ‹ Hid mə gər kə ɗiy polkoy a kə luw mbeɗi kwən. Mana hid tu luw mbeɗi, say hid səna kə ɗiy təkən sin mə luw mbeɗi tə talan səna a kibik Bayzlav Məmar Hidi.› 34 Amma kat wər, kata luwehin, mə gər kə luw mbeɗi ɓahkwən. Mə gər kə luw mbeɗi avə dibizlav kwən, kadaban sin lay ɗew ngə Bayzlav. 35 Za mə gər kə luw mbeɗi avə hayək kwən, kadaban sin lay jak ngaz ngə Bayzlav. Mə gər kə luw mbeɗi avə liɓde Ursalima kwən, kadaban liɓde ngə Bay Mordoy. 36 Mə gər kə luw mbeɗi ko avə talan kin kwən, kadaban hin mə hos gəga kə wəzlel suson talan kin kə ɗiy baran baran, asənkwən mbilen mbilen bəgwən. 37 Am zləgam kin cike wayza, hin kə luw: ‹Yaw, mana yaw! Awwo, mana awwo!› Mana zləgam tu day kə nhi, təgo wər a yah aa ngər bay musuruf za. ››
Yesu a luw hid kə nda dəwa kwən!
38 Yesu ɗiya luw baha: ‹‹Hin mə zlim mana mə luwenta a didiy ngiykwan za. A luwenta: ‹Mana hid tu ngaɓ həriy ngə hidi, say kə ngaɓiy həriy ngetik kaɗ təm. Tu selen ndin ngə hid kaɗ, say kə seleniy ngetik kaɗ təm.› 39 Amma kat wər, kata luwehin, mana hid mə ɗiyehin mə ngavngav za, mə gər kə jəɓen kaɗ kwən. Mana hid tu ndoh ngərgəda am bərzlim taa mə ngərzəm, ma buwen kav mə zlaɓay mə ndoh a kimin baha. 40 Mana hid aa may kə coh wəla am dalgway, za kə cok ləkwət koh mendez ta jik za, ma coken mordoy ma capen bah a kimin. 41 Za mana hid aa may kə takoh wəla kə wət səndək ngetik kə tep baɗ gaf, ma tepen gədək. 42 Hid tu tar təkən angər koh, maa vəlenni. Hid tu neh dəwa angər koh, maa vəlenni. ››
Yesu a luw kə ɗiyen malaw a cal mosum!
43 Yesu ɗiya luw baha: ‹‹Hin mə zlim mana mə luwenta a didiy ngiykwan za. A luwenta: ‹A may coloh, za ma zel mosum koh.› 44 Amma kat wər, ta luwehin, mə may mosumiy kin. Za mə tar Bayzlav kə ɗiyen malaw a hid mə njə kə ɗiyehin mə ngavngav. 45 Mə ɗiy atəgo , kə jan kə ɗef hin wəriy ngə Bahbay kin Bayzlav tə dibizlav. A njə kə dan lay law law atalan hidiy mə ngavngav mana taa njə kə dan tik atalan hidiy malaw. A njə kə za von a hidiy mə njə kə ɗiyiy təkən sin ta mayu, mana sin ta njə kə zenta a hidiy maa a ɗiyta ɗahkwən. 46 Yo, mana hin mə may hidiy mə mayiyhin a gendik dap, Bayzlav kə vəlehin gədmazlən acin vu? Ko hidiy mə kambaliy buhdu a njə kə ɗiyta atəgo təm. 47 Mana hin ma ɗen mbeli a vənekin a gendik dap, mə ɓən wər, mə ɗiy təkən maa day ngə hidiy sənan vu? Ko hidiy maa aa səbiy mozlokotuf ngə Bayzlav ɗahkwən a njə kə ɗiyta atəgo təm. 48 Kadaban səna acin, mə ɗew kə hidiy malaw kadaban Bahbay kin Bayzlav tə dibizlav sin hid malaw. ››